Responsive Ad Slot

Hmar Holy Bible Golden Jubilee hmang zo; Jubilee Edition Bible tlangzar; Mi 23 Memento inhlan an nih

Tuesday, November 27, 2018

/ Posted by VIRTHLI HMAR
CCPur, November 26, 2018 (HT): Pi le pu tam takin siemtu Pathien le Chanchinṭha hre loa muol an liem hnungah, Watkin Roberts (Saptlangval) in kum 1910-a Manipur Sim tlang Senvawn khuo a Krista Chanchin Ṭha a hung phurlut hnung le, khawvela Hmar ṭawng hmang han chatuon hringna Bu hlu takel “Hmar Holy Bible” an nei kum 50 tling lawmna chu November 24, 2018 khan Rev. Chawnga Memorial Hall, Sielmat, CCPur-ah ursun taka hmang ṭana um chu hlawtling takin November 25, 2018 zan khan hmang zo a lo ni tah.


A ni khatna (November 24, 2018) hun hmasa zing dar 10:00AM in Sielmat khelmuol-ah Hmar Holy Bible Golden Jubilee lungphun hawngna hunser hmang a nih. Hun hmangna Rev. Huolthangsei Ṭhiek in a keiṭhuoi a, ‘Aw Pathien Ṭhangpuitu pangngai” ti hla sak a ni zoin Rev. C.C. Rema in Jubilee lung hawngna le ṭawngṭaia inhlanna a nei a. Hmar Kohran tum tuma ṭhuoitu thlangsuok mi 50 han Jubilee darkuong vuokna an nei a, Jubilee Choir haia inthawk famtah Pu James Songrolal Songate in Jubilee hla dinga a lo phuok “Hmar Holy Bible Golden Jubilee’ ti hla mawi le thiem takin an sak a, hi zo hin Rev. Dr H.K. Khawlkung in benediction hrilin Jubilee lung hawngna hunser chu hmang zo a nih.

Jubilee Lungphun hawng zo sun dar 11:30 ah Rev. Chawnga Memorial Hall, Sielmat, CCPurah Jubilee lawmna Hall programme hmang ṭan a ni a, Rev. Alan L. Ṭhiek le Nk. Margareth Ramtharsiem hai hun vawngtu in an ṭhang. “Aw Pathien Nangma Chanchin Ṭha zarah” ti hla mipuiin hlim taka an sak zoin Rev. Lalṭhakung in hun hawng ṭawngṭaina a nei a. Hi zo hin Rev. Ros Infimate, Chairman, Celebration Committee chun mipui lawmlutna le address a hril. Rev. Ros Infimate chun, Hmar Holy Bible Golden Jubilee hi Dima Hasao a khawm December 1 le 2, 2018 hai hin Muolhoi hmunah ropui taka hmang tuma inbuotsai a ni thu, Barak Valley, Cacharah November 28, 2018 hin hmang tum a ni bakah Hmarbiel-a chun December 17, 2018 hin Hmar Holy Bible Golden Jubilee ropui taka hmang dinga inbuotsai mek a nih tiin a hril. Hi zo hin Rev. Rohminglien Pakhuongte, Secretary, HCLF in Jubilee Souvenir tlangzarna le inhlannaa nei a, Jubilee Choir haia inthawk Pu Solomon V. Hmar in Jubilee hla dinga a phuok inpakna hla mawi takel an sak zoin mipuiin ṭawngṭairuolna hun an hmang.


Blessed Choir le District Choir, W. Methodist Church haia inthawk hla mawi takel ngaithlak a ni bakah Rev. Dr J.L. Songate, Chairman, HCLF; Pu Joseph Lalrothang, President, Hmar Inpui GHQ le Dr Chaltonlien Amo, MLA haia inthawk Chibaibukna thu ngaithlak a niin, Rev. Rokhum Joute in benediction in hun a khar.


Dr Chaltonlien Amo in Jubilee chibaibukna thu a hril hunaah, tukum December thlaa inthawk kum thar 2019 sung po, kum khat sunga Holy Bible zieksuok hmasa tak pakhatna, pahnina le pathumna hai kuomah lawmman Rs. 30,000/- , Rs. 25,000/- le Rs. 20,000/- pek dingin a tiem. Hi Bible ziek suoknaa hin tuta Golden Jubilee Edition Hmar Holy Bible ngei hmang ding a nih tiin a hril. A hril dan chun, tuta hma khawmin Bible zieksuok inelna buotsai a lo nita a, tiem ringawt ni loa a zieka zieksuok hin, a ziektu han malsawmna tam tak an dawng pha leia hiengang chona hi a hung siem niin a hril.

Inrinni zan Jubilee Concert huna chun Mr Lalhuolhim Tusing le Miss Hanna Lalṭhahnieng hai hun vawngtu in an ṭhang a, Rev. Lalhmingthang in ṭawngṭainaa hun a hawng zoin Presbytery Choir, EFCI in hla an sak a, hi zo hin Rev. Lalsandam Songate in thuhriltawi hun a hmang a, Hla Ruoi nei zo a ni hnungin Pi Lalremsiem a inthawk thuhriltawi ngaithlak niin Rev. Varsanglur, Lamka in Benediction in hun a khar.

Golden Jubilee a ni hnina Pathienni 10:30 AM a Jubilee lawmna huna chun Golden Jubilee Edition Hmar Holy Bible tlangzar a ni bakah Hmar Bible inletna (translation)-a sulsutu le sin lo thawtu mi 23 hai chawimawinain Memento inhlan an ni bawk.

Pathienni zing inkhawm hunah hun vawngtu in Rev. Lalhmingthang Famhoite a ṭhang a, Hmar Holy Bible Golden Jubilee edition chu Rev. Zathangsing Zate in hawngna le ṭawngṭaia inhlanna a nei a, Rev. Dr Lalhmuoklien in Hmar Bible nei dan chanchin tawifel takin hrilna a nei a. Rev. H. Chungthang Ṭhiek in thuhriltawi hun a hmang a, Rev. H.B. Hluothang, Secretary, Celebration Committee inrawinain Hmar Bible inletna sin lo thawtuhai kuomah Memento inhlanna nei a nih.

Tuta Holy Bible Golden Jubilee edition hawnga um hi ‘Pathien Lekhabu Thienghlim’ ti a ni ta a, sienkhawm sukdik hmai ṭhenkhat a la um rawp a, Jubilee huna hawng hman ei nuom si leiin a sutna tieng han correction thaw an mi phal pek tanaw leiin sukdiklo ṭhenkhat a la um zeu zeu leiin mipui hai hre thiem dingin Rev. H.B. Hluothang chun ngenna a siem a, sut nawk huna chu sukdik vawng a nita ding thu a hril.

Golden Jubilee Edition hi CCPur tienga dingin copy 100 chau hung pek a la ni leiin hawng ni hin copy um po a bo/inchawk zo nghal a ni a, December thla hin Leather cover bakah Ordinary cover hai copy tamlem a hung tlung ding thu a hril bawk.

Chun, Jubilee edition Holy Bible hawngnaa hmang tak Bible chu Tipaimukh MLA Dr Chaltonlien Amo in Rs. 10000/- in an chawk. Zingkar inkhawm huna hin Jubilee Choir, Blessed Choir le Reformed Choir haia inthawk inpakna hla ngaithlak a ni a, Rev. Langailien Joute in hun a khar.

Hun tawpna tak zan dar 5 inkhawm a chun hun vawngtu in Rev V. Lalṭhalien Zote a ṭhang a, hi huna hin Jubilee Choir, ICI Central Choir le EAC Choir haia inthawk hla ngaithlak a ni a, thawlawm lakkhawm a ni bakah Rev. Dr Lalrosiem Songate in Thuhril tawi hun a hmang a, Rev. Ros Infimate, Chairman, Celebration Committee in lawmthu hrilna a nei zoin mipuiin inpakna hla sak a ni a. Hi zo hin Rev. Saithanglur Joute chun Hmar Holy Bible Golden Jubilee lawmna Benediction in a khar.
Jubilee hmangna huna Memento pek/inhlan hai chu a hnuoia hai hi an nih.

1. Dr. H.S.Thanglung
2. Rev. Dr. Rochunga Pudaite
3. Rev. Dr. Hrilrokhum Ṭhiek
4. Pu Kawlvel
5. Pu Lera
6. Pu Thlunga
7. Rev. H. L. Sela
8. Pu Z. Nghinglo
9. Pu K. Luoia
10. Rev. H. Daia
11. Rev. Chawnga Pudaite
12. Pastor K. S. Luoia
13. Upa H. L. Daka
14. Pu Liensangvung
15. Rev. Lalthankhum Sinate
16. Pu H. Thanglora
17. Rev. K. T. Amos
18. Rev. V. L. Ralsun
19. Pu Nguna-Compounder
20. Pu Thangkhup
21. Pu Thanga(Rasi)
22. Pu S. Thangneilal
23. Pu H.K. Thanglura
Don't Miss
© all rights reserved
made with by Simon L Infimate