UPA-HAI NI KAN HMANGA

Simon L Infimate
~ H. Zaneisang


KhawvĆŖl sawrkĆ¢r inzawmkhĆ¢wm (ti el ei ta), UNO General Assembly chun December 14, 1990 khan, kum tin October ni 1 hi Upa-hai Ni (International Day of Older Persons) tia inser/hriet dingin thutlĆ»kna an lo siemtah a. Chu an thutlĆ»kna chu UNO Resolution no 44/106 dated December 14, 1990-ah record a nih. Chuong ang tak chun khawvĆŖl sawrkĆ¢r tam tak (member of UNO)-hai chun, a hmasatakna dingin October ni 1, 1991 khan ‘Upa-hai Ni’ chu an lo inser į¹­an a nih. Ei chĆŖngna India rama khawm vawisĆ»n (October ni 1, 2018) hi International Day of Older Persons, tia hriet le inser hlak a nih. Ei chĆŖngna India rama chu Upa/ Older Persons/ Senior Citizens tia hriethai chu kum 60 le a chungtienghai an nih.


VawisĆ»n October 1, 2018 hi Thawį¹­anni a ni ding leiin, kan lawina EFCI Rengkai kohran chun, zĆ¢ni September ni 30, 2018 Pathienni zĆ®ng inkhĆ¢wm, Sunday Sikul inchĆ»kna huna kan nei hlak kha cancelled-in, Upa-hai ni, kan kohran ah a į¹­um khatna ni dingin kan hmang a. India sawrkarin Senior Citizen a tihai chu kum 60 le a nĆŖka tamlema upahai nihai sien khawm, hi nia kan kohranin chawimawina a pĆŖkhai chu kum 70 le a chungtienghai an nih.  Chu thil ka hei hril le nitin chanchinbua ka hei ziek kher nasan chu, thil pahnih a um a. A pakhatnaa chun, mithiemhai chun kum upa, ei ni rawiin ‘tar’ ei ti el hlakhai hi, an taksa le an lungril a hung chau hnung hin naupang thar nĆ¢wkin, an lĆ¢wmna le an lungawinawna khawm thil chĆ®tĆŖ tĆŖ a ni hlak an ti chu, ka lungrilah a thar lei le, kum 70 le chu nĆŖka upa, nuhmei le pasal mi 69 zet kuomah kohranin ditsakna le ngaihlutna thilpĆŖk envelops a sem suok thei chu lĆ¢wmum ka ti ĆŖm lei a nih.

A pahnina a chun, hi huna kohranhai chawimawina dawngtuhai lai hin kei (hi thuziek ziektu) le ka khing phel Ms Lalchawimawi kan į¹­hang ve lei a nih. Kha chawimawina hunser, mi tam tak hmu le ngaia thil hotĆŖ anga inlang kha, kan ta dinga a hlutna bĆŖk bĆŖk chu, kei naupangtĆŖ ka nia inthawka bawrsĆ¢wm hrim hrim, į¹­um tam tak thi į¹­hel tah (ti el ka tih) hin, Pathien mi Mosie į¹­awngį¹­aina Psalms 90:10-a, “Kan dam sĆ»ng kumhai chu kum 70 a nih a….” a lo ti, kum 70 ban phĆ¢k dingin ka lo insuongtuo ngai naw lei a nih. (Lungril sĆ»ngril inthĆ»k taka ruok chu, “Pathien thu thu nĆ®ng a ta,” tiin beiseina ruok chu a bo į¹­hak  chu a ni chuong nawh.

Ka ruolnu, ka khingphel leh hin kohran dĆ¢n bawsiein May 9, 1971 zĆ¢n khan, a khing a khinga kan nu le pahai rĆ¢wn į¹­hak lovin kan lo inį¹­huoi ve chawt a. Harsatna chi hran hran į¹­um tam tak paltlangin, kum 70 hmĆŖl hmu ve vein, kum 47 zet kan lo inkawp tah a. ZĆ¢ni September 30, 2018-a kan inlawina kohranin, ‘Kum upahai chawimawina’ hunser kan hmang kha mi į¹­henkhat ta ding chun a hlutna a um lĆ¢wm naw el thei lai, kei ni nupa ta ding chun a hlu bĆŖk bĆŖk a nih. 

Chu tieng chu hril sei rak lovin fesan ei ta. Kum upa le bawrsĆ¢wmhai ei hmangai le ei lainat leia ei ditsakna į¹­awngbau į¹­henkhat, a lo dawngsawngtu ta dinga tuorhlaum į¹­awngbau į¹­henkhat, keima thil tawng ngeia inthawk tlĆ¢wm azĆ¢wng hei hril ka tih. Kei hi chĆ®ntĆŖta inthawka bawrsĆ¢wm, a vĆŖl a vĆŖla doctor clinic tlung zing zing. Ṭum li (4) rau major operation tuok tah ka nih a. Ka taksa hrisĆŖlna le ka nitin sin thawna Bank sin kha a lo inremnaw bawk leh. Pei le pei lo, zawi ngawi ngawiin ka nitin sin kha thei le thei lovin ka sunzawm į¹­Ć¢wk į¹­Ć¢wk hlak a. Ka taksa bawrsĆ¢wm leiin doctor-in driving thaw lo dinga thurĆ¢wn a mi pĆŖk leiin, ruolhaiin loan la a, mani gari-a an sin thawna hmun an pan sup sup lai khan, tlep ngawi ngawiin ka nitin sin thawna hmun kein ka pan hlak a. Ruol į¹­ha le ditsaktu į¹­henkhatin lam lakah an min tuokpui chĆ¢ng, “I va chĆŖr lĆ¢wm lĆ¢wm de ! I dam nawh maw ?” an mi ti chĆ¢ng khan chu, lu inhaiin lamlien lai ka  tlu sawp vĆ¢ng hlak niin ka hriet.

Mithiemhai chun, ‘Mihriem hin tui ei mamaw ĆŖm ĆŖm a; tui bo chun ni tam ei dam thei nawh a. Amiruokchu, mihriem hringna dinga tui nĆŖka pawimaw lem a la um a, chu chu boruok a nih. Boruok (air) bo chun minute tam ei dam thei nawh. Amiruokchu, chuong thil pahnihai nĆŖka mihriem ta dinga la pawimaw lem rawp chu, beiseina hi a nih. Mihriem hi beisena bo chun second khat khawm ei hring/dam thei nawh,’ an ti chu. Chu thil chu indik dinga ka ring bĆŖk bĆŖk nasan chu, chau le hrĆ¢tnaw tak pumin zĆ®ngkĆ¢r ka hei in vĆ¢k suok a. Unau į¹­henkhat, (kei chun a vengva deuhai ka ti el a) kan tuokpui chĆ¢ng a. “E khaw chen am phĆ¢k i tum a ? Saikawt i tlung hlak a ni ?” an ti chĆ¢ng chu, kea lĆ¢wn ringawt chun Saikawt ka tlung zo naw ding ti hrezing lang khawm, ka hrĆ¢t sawt a, ka kalpĆŖn khawm a zĆ¢ng sawt hlakin ka hriet.

Amiruokchu, mi hmangaitu le mi ditsaktu an nih ti ka hriet ngawi ngawi mi į¹­henkhatin, “E ! i suok pei a ni maw ? I chĆŖrin i lo va hrĆ¢t tanaw de !” an mi hei ti chĆ¢ng dĆ¢m chu, luhaiin lamlien lai ka tlu vĆ¢ng hlak ni’n ka hriet hiel hlak. Upahai į¹­awng takin, ei vĆ¢nglai hun haia khan chu hlimen (dĆ¢rthlalang) hma ah, lungawinawna į¹­hang lĆŖm lovin ni khat ah vawi hni khat el khawm ni lovin, į¹­um tam ei inlang sĆŖn hlak a ni kha tie maw ? Tu hun, Upa-hai chawimawina hunser ah, a chawimawitu ni lova, mihai chawimawia ei hei um ve zet hnung hin chu, į¹­halai haiin, ‘Pu, i la va tlangvĆ¢l de’ an mi ti chĆ¢ng khawm, an į¹­awng chun thudik a pai lĆ¢wm nawh ti hrie zing inla khawm, ‘I va tar ta de !’ mi tituhai nĆŖk chun ei lĆ¢wm  lem hrim hrim.

Thuomhnaw tha, suit man tam tam leh ngaitha fahrana ei hei induong chĆ¢ng hlak khawm chun,  kĆ»nghmuia puon vĆ¢r tĆ¢r ang chau ei ni tah, inhmena hrim hrim hlak nei ve ta lo. Mani kawngkĆ¢rah nal lo inti ve nĆ¢klai, thalaihai hlak chun, ‘An cheina thuom chu ama inbel ding chun a va pĆ¢mhmai de!’ dĆ¢m an lo ti ta dai nĆ¢wk nghĆ¢l. Amiruokchu, a bengvĆ¢r pawl deuvin, an lungril le inpersan ĆŖm ĆŖmin, ‘Pu / Pa i va nal de!’ an mi hei ti chĆ¢ng hin chu, an tawngbau chun thudik a fĆ»n nawh ti hre kar inla khawm, ngaitha fĆ»tin, a rĆ»kin ei innui var var hlak chu a ni hi tie! 

Thalaihai po po hi,  chuong ang vawnga bengvĆ¢r ni hai sienla hlak chu, a tak tak insĆ¢wnin ei che buoi rawp ding a ni Ć¢wm nghĆ¢l a! I va nal de mi titu ding an um ta nawh, ti thudik chu lungawi takin lo pawm thiem ve tah lang khawm; ‘I va tar ta de’ mi titu le hin chu inchapchĆ¢r nghal ka nuom deu hlak. Indikna le thudik hi ngainatu ka ni ve hlakin ka hriet a. Amiruokchu, ‘I va tar ta de’ ti thudik tawngbau ruok hi chu khawvĆŖla ka ngai pei naw tak ni hiel ta Ć¢wm a nih. TlangvĆ¢l intuoi tha put chu ka ni ta nawh ti hre zing lang khawm, ‘I la tlangvĆ¢l ngei’ mi titu hi chu zakuo thar inchĆ¢wkpĆŖk tak ka nuom hiel hlak; ka neiin tlin sienla lem chu!

KhawvĆŖl mithiemhai chun, ‘Mihriem hi an hung upa deu deu a, tar tihai laia zĆŖl thei hiel an hung ni hnung hin chu, lungril le ngaituona ah an naupang thar nĆ¢wk a nih,’ an ti hlak a ni Ć¢wm ie. Chu chu thudik a ni ka ring. Naupang chu thil hotea khawm an lung awi lovin, nuor hlak hai sien khawm, thil hotĆŖ, į¹­awngbau į¹­ha ringawt khawma thlĆŖm lungawi thei an ni angin, kum upahai khawm chuong ang tho chu an hung ni pei ding a ni leiin, į¹­halaihai khawm, mani nu le pa le pi le puhai, taksaa upa (tar)-hai hrietthiemna kawngah inį¹­hang ei pawimaw hlĆŖ Ć¢wm ie. Naute i ni lai, nangma hringtu che i nu le pa kuomah insĆŖkin, anni chun kawi thei dawma an lo dawm el hlak che ang khan; i piengna nu le pahai chu, ei thuring inziekna Bible-in, mihriem dam chen a ti, kum 70 an lo pĆŖl duoi a ni tah lem chun,  i piengna  i nu le pahai kha, nangma lakah an insĆŖk ve hun a tlung ‘an tah, ti  thudik hi, į¹­halaihaiin ei hriet dinga pawimaw bĆŖk bĆŖk el  chu a nih.

Upahai chawimawina nia kan kohranin hun kan hmang mĆŖk lai khan, ka lungril mi kamtu lientak chu, ‘Chawimawia um, ni lovin, a chawimawitu ngĆ®rhmun ah la ngĆ®r lem lang aw,’ ti a nih. Exam result į¹­hat lei dĆ¢m, sin thar hmu leia chawimawina dĆ¢m hi chu, chawimawia um ngĆ®rhmun hi dit le inhnar a um hle hlak a. ‘Kum upahai chawimawina’ programme-a ruok chu, chawimawia um nĆŖk chun, chawimawitu ngĆ®rhmuna um nuom a um vei tliet leh; ka dam sĆ»ngin kum upahai chawimawina ni ah, a chawimawitu ngirhmun ah ka ngir ve tah ngai naw ding a nih ti hrietna ruok hin chu, lairil a va fang na ngei aw …!!


Dated: Rengkai, the 1st October 2018.
Phone: 9862065735.

#buttons=(Ok, Go it!) #days=(20)

Our website uses cookies to enhance your experience. Learn More
Ok, Go it!
To Top