Responsive Ad Slot

HSA Hlapui: "HSA, HSA, HSA tiin kan ko"

Wednesday, October 3, 2018

/ Posted by Simon L Infimate
Kum 1980 khan (L) Pu S. Rokung Songate Gen. Secy., Hmar Students' Association (HSA)., General Headquarters inrawina hnuoi ah HSA hlapui ding phuok Inelna huoihawt a nih a, Pu (Rev.) Hranghmingthang Varte hla phuok "HSA, HSA, HSA tiin kan ko" ti hla hi chutaka chun pakhatna a thlangin a um tah a nih. Hi hla hi a thlûk mawi taka siemtu le sukvultu chu famtah Pu Lalruotthang le Pi Buongthangpui le Pi Thansingpui hai an nih.


HSA hlapui, a hla thu chu hi ang hi a nih -

HSA, HSA, HSA,
'H' - Hmar, 'S'-Students, 'A' - Association;
Hmar thiem-in-zir inzawmkhawm pâwl,
I sakhming 'HSA tiin kan ko, HSA.

Tiena Pi-Pu, lungmawl thingbul, lungbul bêl maw e,
Kawlva lensama tharsa nun lo ieng maw ?
Khuovangpa riṭiel changhnaah biethu kim naw maw ?
Thlang sappui tuorem A B C tawnmangah mang maw e,
Keini thiem-in-zir Sikeisen lawina HSA.

Keini thiem-in-zir pawl Hmar hrailêng chawilai kan nih,
Thlang sâppui tuorem zerâng tinreng chawiin;
Tawng tin chungah lengin Babel run insang kan chuon,
Lena Pu Lalruong dawibur hleia thiemna bûr kan tum,
Thangvan sangah kawlva ang leng ing e, HSA.

Aw, nang kan neisun
Hmar thiem-in-zir inzawmkhawm pawl,
Nisa angin var zing rawh, Hmar tlangpuiah,
I sakhming nau ang kan lawm, I thilthaw zuopa ang,
Hmar hrai chawi lungmawl ha'n
I zû khuoi ang dawk kâr nghakhla'n,
Tlumte ang thlirna singmit kham lawng e, HSA.



Hi le inzawm hin Pu (Rev.) Hranghmingthang Varte hi 'Certificate of Merit' inhlan a nih a, chu taka chun hi ang hin a'n ziek -

THE HMAR STUDENTS' ASSOCIATION 
(Manipur, Assam, Meghalaya, Mizoram, Nagaland & Tripura)
Gen. Hqrs. CHURACHANDPUR, Manipur. 

CERTIFICATE OF MERIT 

THIS CERTIFICATE IS AWARDED TO Hranghmingthang Varte by the Hmar Students' Association, Gen. Hqrs. at the 36th Gen. Assembly held on 2nd - 5th October at Saikot, Churachandpur, Manipur for participating in the HSA Song Competition, and was placed in the First Position.

A hnuoi ah, Hrangchalkhum General President, Harvey Darsiemlien General Secretary le S. Rokung Songate Editor, Inchuklai-Nun haiin an hming an ziek (Suoi an kei a nih).

Dated the 5th October 1980
-

Pu (Rev.) Hranghmingthang Varte hi taksa le thlarau, kohran, ram le hnam, khawtlang thil a hai thaw hlawk em em el, rawngbawltu ropui tak el a nih. A chanchin (a biodata) khawm ziek khawp zet a um. Tuhin taksa hrilsel nawna'n a tlak buok tah leiin tuol khawm suok thei ta loin in ah a um a, a pawi tak zet. Pathien kuoma ei ṭawngṭaina a hai lo san ei tiu. Ama hi inchûklaihai le HSA tadinga inpe zo tak el, malsawmna a nih. July 19, 2014 khan Hmar Students’ Association (HSA) in kum 75 a tlingna (Platinum Jubilee) lawmna le inzawma “Literary Meet” Tuiṭhaphai-a Trinity College & Seminary Hall, Sielmat-a a huoihawt ṭum khawm khan Resource Person a ṭhangin “Hmar ṭawng ṭobul” ti thupui a hmangin inchûklai, HSA le mipui fekhawm hai hnesaw takin hrilhrietna a nei a nih.(Virthli)

Pu (Rev.) Hranghmingthang Varte hi ei hrietfie zuol theina dingin Upa Laldawnlien Varte, Gen. President, Hmar Youth Association (HYA),General Headquarters nilai zing a piengna pa a nih.

(HSA in a piengchampha a kum 79na hmel a hmu le inzawmin ṭhangthar pei hai sinsie zing tlak, HSA le hnam rohlu a ni leiin Special takin hi thu hi ei hung ziek lang a nih. -LRS Puruolte, Chief Admin, Virthli Online News Portal.)



Don't Miss
© all rights reserved
made with by Simon L Infimate