PU PAWLSIEMLIEN SONGATE GEN. VICE- PRESIDENT (ORG) HNU GEN. HQRS. MUOL A MI LIEMSAN TAH
Pu Pawlsiemlien Songate Gen. Vice – President, (Org) HNU. Gen.Hqrs. hi General Hqrs. Hotu a ni lai zingin, a bikin Hmarbiel awptu a ni bik a. Hmarbiel sunga thil thaw ding rêng rêng chun ama hriet ngeia thaw a lo ni hlak hrim a. Party thil hmatieng induong lâwk tam tak a um lai zinga phing natnain a man thut leia Doctor thiem lem beiseia Churachandpur tieng hung pan mek lai Sept. 29, 2018 zantieng dar 3:PM vela S. Khawlienah a natna tuor zo lova a hringna a tâwp thut thu lo hriet hin HNU Party mihai ta ding chun hril a haiin mang a ang em em el a. Muolvaiphei ama in phur tlunga unau laina,ruolṭha khuo le veng tamtak fekhawma inthlana hunser hmangnaa khan HNU Gen.Hqrs. chun a ruong chu inzâ taka Thangsuopuona tuomin a khawzâwl ngêi Parbung chen intlun mawphurna a ni thu puongin thlakhla le inpâm êm êmin inthlaliem a lo ni ta a.
Ama Pawlsiemlien hi pieng dan hrima mi hleitling zet, hmel le pum pienga insit um lo,mi nun nem, ruol pawl thiem mi tak a ni a. Sawrkâr mi,kohran mi, organization thuoitu le mikhuol dang dang Parbung khaw sûnga lûthai lâwmlut le lo pâwl thiem mi a ni leiin inpâm a um tak zet a nih. A taksa pieng ṭhat leiin hrat tawka tha nei nisien khawm mi zâidam a ni leiin tûkhawm sukna lova zâidam taka rorel le nun hmang mi a nih. HNU Party inhnikin a chawngpu taka lo ṭhangin HNU Block N0.1 President nia hmâ laa theitawp suoa lo inhmang hlak mi a ni a. Block Officer nia hun a hmang zo hin ṭhuoitu tlâk ngêi a ni leiin General Hqrs.ah Vice-President dinga hlângkâi niin a hun tâwp chenin ringum taka Party sin chel zing a nih. A vânglâi nia a lo dittak Mrs.Buongneitling d/o (L) Rev. Rokhumvel Buongpui le inneiin nau nuhmei 3 le nau pasal 3 neiin hun an hmang zing lai a nih.
Kohran rama khawm theitawp suoa a hnâr keitu pâwla ṭhang zing a ni a. 1982 a inthawkin Parbung PMS ME Schoola Teacher sin thaw ṭanin EFCI Kohrana ding chun Evangelist Teacher ang khan kohran sina theitawp suo peiin Headmaster chena hlângkâi niin naupang enkawlna kawnga vânglâi hun lo hmangin pension chen a lo tlung phâk a nih. EFCI Senvon Disticta Executive Council palaia dam lo ṭhangin kohran rorelna insangtak chena lo inhmang zingin a hun tawp chen khawm Parbung EFCI ṭhuoitu laia pawimaw pâwla ṭhang zing a nih.
A nuhmei, a nauhai le a tu le tehai Pathienin ṭhuoiin enkawl pei sien malsawmna tam lem hung dawng pei raw hai seh. Hieng anga Hotu ṭhain tûng naw ang taka muol a mi liemsan hi HNU chun a`n pâmin a sûn tak meu a nih.
L.Thanzam Pulamte
Gen. Secretary, HNU Gen. Hqrs.
