Responsive Ad Slot

EFCI Aizawl Presbytery KṬP inkhawmpui vawi 23-na nei

Sunday, October 28, 2018

/ Posted by Simon L Infimate
Aizawl, 28 October, 2018, Virthli (ONP): Kum tina lo hmang hlak angin EFCI Aizawl Presbytery KṬP inkhawmpui lien vawi 23 na chu October ni 26, 2018 (Zirtawpni) anthawk khan Aizawl EFCI kohran ah hmang tan ani a, vawizan khan a lo ṭumṭiek tah.

"A sietna lai siemṭhatu" (Isai 58:12) ti chu inkhawmpui thupuia hmang ani a, Speaker in Rev. V. Lalṭhalien Zote, Academic Dean, Trinity College & Seminary, Sielmat hmang a nih.

Hi khawmpui sung hin taksa le thlaraua ṭhalaihai insawizawina dingin infiemna (games & sports) nei ani a, zirtawpni khan Rev. Lalrotluong Darngawn, Secretary Regional & Evangelism, EFCI, Mizoram region chun Zemabawk field ah a hawng.


Inkhawmpui sung hin speaker anthawkin Pathien thucha ropui tak tak ngaithlak ani a, Aizawl Presbytery Choir le KṬP unit tin deu thawin hla ah rawngbawlna an nei bakah, "The Negative Impact of Social Networking/Media on Christian Youths" ti thupui hmangin seminar buotsai ani a, Rev. V. Lalṭhalien Zote chu resource person a hmang a nih.

Aizawl Presbytery huom sunga hin pastor biel 3 hieng Zemabawk, Darlawn le Sesawng a uma, KṬP unit (Khuo) 9- Aizawl, Zemabawk, Sesawng, Khawruhlian, Darlawn, Hmarchaltlang, Zokhawthar, Khanpui le Sawleng a um bawk a nih.


Inkhawmpui tawpzan (Pathienni zan) in kum hni sunga EFCI Aizawl Presbytery Choir member thar dinghai laklut rawngbawlna (installation) Rev. Lalhmunsang F. Tusing, Aizawl Presbytery Superintendent in a nei.

Hi inkhawmpui a hin unit tina inthawkin mikhuol ṭhahnem tak fe khawm ani a, rorelna inkhawm nei a ni bakah inkhawm ṭin zatin Pathienthu le hlaah inpawlhlimna (fellowship) nei a ni bawk.

EFCI Aizawl Presbytery KṬP inkhawmpui le inruol hin ICI Aizawl Presbytery Nuhmei pawl inkhawmpui khawm Ramhlun Sports Complex, Aizawl ah nei niin, Pathienni zan vêk khan a lo ṭum ṭiek tah a nih.

EFCI le ICI kohran hai hi Hmar ṭawng hmang hai chau kohran ninaw sienkhawm Hmar ṭawng hmang tamna kohran an ni leiin Mizoram a ding chun hnam thil le ṭawng thuah an thaw hlawk em em a nih.


Don't Miss
© all rights reserved
made with by Simon L Infimate