Responsive Ad Slot

DIT LO MALSAWMNA

Sunday, October 28, 2018

/ Posted by Simon L Infimate
~ Jami Darngawn

Khawvela hin malsawmna chi dang dang a uma malsawmna dit lo ei um ring a um nawh, kei khawmin malsawwmna hi ka dit hle hlak, taksa malsawmna hi mitinin ei hnawt/dit lem a hawia, ei Lalpa ruokchun taksa malsawmna nekin thlarau malsawmna a ngai pawimaw lem a nih.


Abraham tupa, lsak naupa Jakob khan a pa malsawmna a dawng char khan harsatna a tuok nghal a, thi țiin a tlansie a nih ti chu ei Bible ah ei hmua, a pu Laban kuoma a va uma, a pu naunu a dit em em Rakil hlawa an ngai laiin a upa lem Leah (a dit bek lo ti el in la) a hlaw dawk hmasa lem a, a lungril tak chun Leah chu dit bek naw sien khawm a pu Laban dan (a ram dan) a ni tlat leiin dit lo malsawmna Leah chu a nuhmei dingin a nei tah a, kum 7 dang an hlaw nawka chutaka chun a dittak Rakil kha a nei thei tah a nih. Amiruokchu Jakob tading chun a dittak Rakil khan chi an thla pek el thei ta nawh a, a dit naw lem Leah khan chi tam tak an thla pek lem hlau a ni kha. 

Awleh, hi lai thu a hin inchuk ding tam tak a uma, kei ngei khawmin thil tam tak kan chuk dawk a nih. Kei ve bawk khawm hi nikhuo ka hriet a'nthawk tuchen hin dit lo malsawmna hai hi a nih kan zawt mawl mawl hlak chuh, naupangte ka nilai a'nthawk khan ruol inhnar ngawi ngawiin ka hrisel naw leiin ka hringnun ka hmang hlak a, inchukna tieng khawm ka ni ding ang ka ni thei naw pha a, chuongchun ka nau lutir leiin harsatna tawpkhawk ti thei hiel chu ka tuok nawk a (a kar laka harsatna neu neu hai chu thukhat lo nisien). Chuongchun inngaisie tak le inzak ngawi ngawiin ka hringnun ka lo hmang hlak a nih. Kum 30 ka hung tling meu chun Lalpa rawl hre in chuongchun ka thei tawkin Lalpa Pathien dit danin rawng ka lo bawl țan a nih. 

Bible a hming chuonglo amiruokchu a thuhril, a chanchin a'nthawk malsawmna/chona nasatak ka lo dawngna hlak chu Pi Joyce Meyer hi a nih. Ama chun hieng hin a hril "ka naupang laia ka pa mi suksiet/sukkhawlona le, nuhmei el ka nina leiin ka lo inzak hlak a, turuok hin chu Kristaa mi thar ka ni tak leiin ka naupang laia hmingsietna le, nuhmei el ka nina le etc. hai leiin Lalpa Rawngbawl hi inzak ka tum ta nawha, tum a nih ni ka tum lem a nih" a ti khan ka lungril a tawk em ema chona nasatak a mi pek a nih.

Kei ruokchu kan siengna ka pa chun a mi hmangai em em lai zingin, ka hrisel naw leia ruol ka ban nawna le, nuhmei el ka nina leiin ka lo inzak/inphalam hlaka, milai khawm ka țawng suok ngam ngai nawh a, inphalam nan ka sip hlak. Chulaizing chun Lalpa siehlaw Joyce Meyer hmangin Lalpan a mi suk hrata, huoisenna a mi pek bawk, ka mi angnawna le ka ruol bannawna po po hai kha thlarau malsawmnan a lo inchang lem hlau a lo nih.

Unau ditumtak, i hringnun a khan harsatna i tuok hlak am le? inngaisie takin i um hlak am aw? taksa malsawmna i beisei laiin vangduoina han an bawm sup sup ti rawh,  lungngai naw i ta ding chun thlarau malsawmna ințanna lampui a lo nizing thei a nih. Chu ding chun Lalpa ko/bel fan fan hlak raw aw! Tuor lai chun a harsa ngei el, sienkhawm Lalpa hratna ringsanin tuor hram hram rawh. Mi hai tadinga malsawmna intluntu i ni thei zing a nih.

Dit lo malsawmna hi a hmelsie hle hlak sienkhawm thlaraua chi tam tak mi thla pek theitu a ni leiin hrietthiem takin lo pawm/dawng sawng hlak ei ti le. 

LALPAN MALSAWM RAW SEN CHE!
Don't Miss
© all rights reserved
made with by Simon L Infimate