Muolhoi, October 27, 2018, Virthli (ONP): Pu David L Hmar, Secretary, HPC (D) Assam Region chun October 25, 2018 ni a CH Khawthlang Hall, Muolhoi a Consultative Meeting on Hmar Autonomous Council Demand in Assam and Ongoing Tripartite Talks hlawtling taka an huoihawtna le inzawmin le Hnam ta dinga thangpuina petu hai chunga ahnuoia ang hin lawmthu a hrila, movement a hlawtling vat theina dingin tawngtainaa lo hre hlak dingin Hmar mipui kuoma fielna le ngenna a siem bawk.
-------------
-------------
LAWMTHU HRILNA
October 27, 2018
HPC (D), Assam Region chun October 25, 2018 khan CH Khawthlang Hall, Muolhoi ah Consultative Meeting on Hmar Autonomous Council Demand in Assam and Ongoing Tripartite Talks chu hlawtling takin a huoihawt a. Hi hun a hin Assam a ei movement le inzawm a Charter of Demand hai le hmalak pei dan ding hai fumfe tak le chipchier taka ngaituo le hriltang a nih.
Hmar hnam hmakhuo ngaina leia tlawmngai taka hi inrawntlangna hung sukpuitlingtu Hmar hnam sunga ṭhuoitu/politician, Hmar Inpui, HSA, HYA, Hmar Welfare Society, Guwahati, HPC (D) ṭhuoitu le Assam Peace Team member-hai chungah HPC (D) Assam Region chun lawmthu a hril mawl mawl a nih. Chun, hi inrawngtlangna ding le inzawma tlawmngai taka local arrangement lo thawtu HWA Assam Hills & KA, HYA Muolhoi Branch, HSA Muolhoi Unit le inhawng taka hmun dang dang a'nthawka palai hung hai lo mikhuoltuhai chungah lawmthu kan hril bawk a nih.
Chun, hi inrawntlangna hun a hin movement ṭhangpuina dingin Hmar Inpui, Gen. Hqrs. rawtna in mimal tlawmngai han ngam tawk an thaw khawma, ring bak zet el hmu a nih. Hmar hnam ta dinga inro loa sum-le-pai a ṭhangpuina hung petuhai po po chungah HPC (D), Assam Region chun lawmthu a hril a, a let tama Pathien-in malsawmna'n vur let ve dingin ditsakna insangtak kan inhlan.
Assam rama Hmar Autonomous Council ei ngenna le inzawm hin Tripartite Talks vawi 8 lai zat nei a lo ni tah a, chun Central sawrkar khawmin interlocutor dingin Pu A.B. Mathur chen hung ruotin inbiekna hai nei a lo ni tah. Sawrkar le inbiekna hi a hmawr bawk chau baka ngai a ni tah leiin Assam a Hmar nauhai ta dingin kawl a hung eng ṭan vat ei beisei a nih. Ei movement hi a hlawtling vat theina dingin ṭawngṭaina haia lo hre hlak dingin Hmar mipui ei in fielin ei in ngen a nih.
Hnam a in rawngbawlpui,
(DAVID L HMAR)
Secretary,
HPC (D), Assam Region
Camp: Ngaibantlang
