Responsive Ad Slot

A MAN PEK A NGAI A NIH

Sunday, October 21, 2018

/ Published by Simon L Infimate
~ Jami Darngawn

Ni tin ei taksa pawimaw thilhai fak le dawn sil le bil etc hai ei pawimaw ang peiin manto deu sienkhawm a man pein ei inchawk hlak ang bawkin. Thlarau rama khawm a man pek a ngai hlak a nih.

Pathien nau ei ni theina ding chun Lal Isun kraws ah a mi hung tlanna (Piengtharna) hi chu Pathien thilthlawnpek lieu lieu a nih a, ei ni thawsuok an nawh. Amiruokchu Pathien nau ei ni ta hnung hin chu mihai tadinga malsawmna intluntu ni ding ruok chun a man pek a ngai a nih.

Ringtu hmasahai chun Pathien Thlarau malsawmna mihan anni fethlenga an dawng/hmu theina ding chun chânna, țapna, hnengdena, hmusitna etc.an lo tuor hlak hai kha a man an pek a nih a, khawvel pawisaa inchawk theilo manto em em chu a lo nih. Ringtu hmasahai zar ei zona tamtak a uma ei lawm hle a nih.

Kei ve bawk khawm hi mihai tadinga malsawmna intluntu ka ni theina dingin a man chu ka lo pek ve hlaka harsatna khawm ka tuok ve hlak, ka harsatna tuokhai hi mi țhenkhat ta ding chun nuizat um le iengmalo khawm a ni thei, sienkhawm kei ka ta ding ruok chun namên an nawh.

Setanin a theida tak chu Pathien ropuina dinga thil chite khawm nisien ei thawhai hi a nih. Hmelmapa Setan ditdan chu Ringtuhai hi um mei mei inla Chanchinṭha hi topui țawk țawk inla ti chu a mi nuompui em ema nasatakin Ringtu lai hin sin a thaw zing a nih. Nikhatlai khawm khan thiemtakin mi hmangai ni awmtakin ami hung beia keikhawm chun tak rawm ka lo sawna ka lo pawm ve dek dek an leh, hmelmapa hmangruo a nih ti ka hung hrietsuoka ka har chieng ngei el.

Setan sinthaw am ei ti ding ?
Muolphona, vangduoina, harsatna, natna ei tuok chang khawm hin Pathien hnai phana hmangruoa ei inchangtir pei thei chun Ringtuhai thawdan ding reng a nih a, Pathien ditdan khawm ni ngei a tih. Sienkhawm Setan chun kawng iengkima hin châng a lo kam hlak leiin fimkhur a țul takzet a nih.

Chuleichun, tiemtu ditumtak, harsatna i nei ani chun i harsatna nei anga harsatna hung tawng/tuok ding mi iemanizat ta dinga malsawmna intluntu nidinga a man i lo pek lawk a nih ti kha hrezing pumin harsa hle sien khawm Pathien hratna ringsanin tuormuolsuo ngei dingin Lalpân malsawm raw sen che.
Don't Miss
© all rights reserved
made with by Simon L Infimate