PARBUNG, September 06, 2018, Virthli (ONP): Pi Manmuanching IAS, DC, Pherzawl le a thawkpuiha'n Senvawn a GTV programme an hmang zova, Rawvakawt khuo an sir zovin, Parbunga Gospel Camping, Bank conplex hmuna nei mek chu ni 5 Sept 2018 zantieng hunah thahnemngai takin kanna an nei. Hi hun ahin, Pi Lalhminglien ZEO khawm a thang ve a. Camp Speaker, Counsellorhai, camping buotsaituhai, tlawmngaia a tulna tieng tienga rawngbawltuhai le Camperhai po po Thlarau malsawmna dawng seng dingin DC chun ditsakna chibai bûkin pawisa sum Rs 3000.00 in a thangpui.
Hi Gospel Camping a sawngthumna a hin pasal mi 200 lai campers an riek luta. Mani in anthawka inlâna thang khawm iemanizat an um bawk anih. Hi camp thangpuina'n Pu Dr Chaltonlien Amo. MLA Tipaimukh chun Rs 4500.00 in a hung thangpui a. Pu Thangkiemlo Khawbung hai sungkuo'n Rs 10000.00 an hung pek. Pu Zofawnlien Rengkai khawmin tumkhat fâkman po po a hung tum anih. Chun, khuolram dang dang anthawka thahnemngaihai, Kohran le pâwl dang dang le khawsung mi tamtakin sum le puon le fak le dawn dinghai an thawlawm nasa em em. Hi Gospel Camping Thawtanni 3rd Sept 2018 a tan alo ni ta a, Ningani 6th Sept 2018 zantieng chen âwng atih. Chanchintha tlanginsampuina ding le bohmang hai sandamna dinga Gospel Camp boutsaina a kil dang danga inthawka thang hung lapuituhai le pawisa suma thangpuina petuhai, an hming ziek lo tamtakhai chungah khawm hi organiserhai chun Pathien hmingin an lawmthu an hung hril. (input: Lalruotlien Hmar)
