Silchar, September 03, 2018, Virthli (ONP): Vawisun khan Hmar Students' Association (HSA) , Silchar Branch chun Bhango Bhawan, Sadarghat, Silchar hmunah the 26th Fresher's Meet chu hlawtling takin an hmang. Hi huna hin Chief Guest in Mr. David Keivom, President, N.C. Hills Indigenous Students’ Forum (ISF) hmang ani a, Guest of Honour in Dr. Nathanael Sungte le Dr. Samson Lalhnethang Hmar hai hmang an nih.
Hi hun hi hun hnia thein, hun khatna hi Tv. Liensanglor Zate le Nk. Glory Zate hai keihruoina hnuoia zing dar 10 ah hmang tan a nih. Hun hmasa tieng mipui hlasakna le Pi Naomi Inbuon in hla sakin mipui an awi zoin Upa Thiltinlut Thiek-in Pathien thu thienghlim tiemna le Pathien kuomah hun hawng țawngțaina a nei. Peter L. Kungate President, HSA Silchar Branch in Welcome Speech neiin Fresher meet chu hlim tak le lawm taka hmang dingin mipui a ditsakna an hlan.
Nk. Lily Lalparmawi-in Pathien hla sak a mipui an awi zoin Pu Raltawnluoi Intoate, Chairman, Hmar Welfare Society, Silchar (HWSS) in thuhrilna neiin HSA chu HWSS in iengtiklai khawma a thlawp zing thu a puong a. Student hai chu sin zawngna kawngah taima nawk zuol dingin an fui a, HSA chu hrat taka fe le dam zing sien a nuom thu a hril bawk.
Upa Thiltinlut Thiek in thuhrilna a nei a, suonlam siema office kai nekin thilțha thaw dinga hung a ni thu a hril a, Hmarnauhai le Hmar țawng hrehai chu ei chavai nawna dingin Hebron Baptish Church-ah inkhawm hlak dingin a fiel a, inkhawm kai chu insir a um nawzie thu a hril bawk, Ringtuhai chu vairama lekha inchuka ei um lei el in da ding ei ni naw a, al zing ding eini lem tiin mipui fekhawm hai chu Pathienin malsawm seng dingin ditsakna an hlan bawk a nih.
Tv. Donal Khawbung le Nk. Chawngțhazo han mipui hlaa inawina an nei zoin HSA Cultural Troupe in Hnam lam Fahrel tawk lam mawi tak inentirna an nei. HSA Silchar Branch Secretary Tv. Daniel in Chief Guest lawmlutna neiin Tv. Peter Kungate, President, HSA Silchar Branch in Chief Guest Tv. David keivom, Guest of Honour Dr. Samson Lalhnethang le Dr. Nathanel hai Memento inhlanna le Hmar Pasaltha puon inawrtirna a nei bawk a nih.
Tulaia inlar em em Guest Artiste a ko Tv. Jajai Singsit in “You’re my Best Friend" ti hla sakin mipui hai hnesaw taka an awi zoin Chief Guest Tv. David Keivom in thuhrilna neiin, Hmar hnam chungah lawmthu a hril a, kohran thuoitu, HWSS, HSA thuoitu hai le inchuklaihai chibai bukna a nei a, ISF President a hung ni dan hai, HSA Silchar Branch chu hmasawn pei a nih a tih a, hnama an pekna lei chauin hi hmuna hin Chief Guest a thang thei a ni zie a hril a. Thuoitu ni chun indikna le huoisenna nei dingin a hril bakah ngaizawng a tai dan hai le a piengken hrilin mipui a sukhlim hle.
Guest Artist Nk. Lily Lalparmawi le Tv. Jire Lalditsak Faihriem han hla tienga mipui inawi nawkin, Guest of Honour Dr. Nathanael Sungte in Motivational speech hun lain inchukna tienga hma lak nasa nawk zuol dingin inchuklai hai chu an fuia, Education ei tia hin lekha inchuk chau ni loa ei thiemzawng (Talent) senga fak khawp hmuna dinga thang la dingin a hril a, Freshers hai chu lekha inchuk ei ni ta si chun thanghmun neia inchuka, hnam le khawtlang kohran ta dinga mi tangkai hung ni ngei dingin a ngen tawl. Hmar hai chu khawlai hmuna khawm um inla khawm ei tawng, ei hnam, ei nunphung ei zie le rang inzapui loa chawisang dingin a ngen.
Guest of Honour Dr. Samson Lalhnethang Hmar chun Fresher hai chu hun hmang thiem a, Hnam ta ding khawma thang lak a, mani lekha tiemna a khawm nasa taka thang la dingin an cha. HSA chu midang (Officers/Minister) hai inbiekpuina ding khawma channel tha tak ani leiin HSA chu suk vel pei dingin student hai an cha.
Hi huna hin HWSS keihruoina hnuoia HSA Silchar Branch thuoitu thar ding thlangna nei ani a, a hnuoia hai hi thlangtling an nih;
President: Tv. Peter Kungate
V. President: Tv. Nathanael Neingaite
Secretary: Tv. Alfred Intovate
Asstt. Secretary: Tv. Nehemi Thiek
Treasurer: Nk. Genevi Infimate
Finance Secy.: Tv. Peniel Tuolor
Education Secy.: Nk. Crossmawi
Games & Sport : Tv. Johnson Infimate
Information Secy.: Tv. Salem Chhakchhuak
Inthlangna nei zoa Tv. Donald Khawbung, Tv. Jehova, Pi Naomi Inbuon le Tv. Jire Lalditsak Faihriem haiin rimawi tieng panga mipui inawina an nei zoin Pi Laltuozing Hmar in fak le dawn ding hai Pathien kuomah inhlanna neiin hun khatna suktawp a nih.
Hun hnina chu dar zantieng dar 4 ah tan nawk niin Pu Raltawnluoi Intoate in hun hawng tawngtaina a nei a, Hmelthar/freshers hai hmelhrietna hun hmang a nih. Hi huna hin Silchar hmuna inchuk dinga hung thar 30 (nuhmei - 18, Pasal-12) hai chu lawmlut an nih.
Nk. Euniky Kungate in inchukna tienga hlawtlingna chang hai chawimawina (Felicitation of Successful to HSA members) hun a hmanga, chun Mr. & Miss Fresher 2018 Top Ten thlangna le question in dawnna nei zawm nghal a nih. Mr. Freshers dingin Mr. S.B. Mawi Khawbung le Miss Freshers dingin Seba Lalhnepui Khawbung hai thlang an nih.
HSA Vice President le Secretary haiin kum 2018 sunga tlawmngaia thisen pe (Blood Donors) mi 14 hai kuomah chawimawina Certificate inhlanna an nei a. Tv. Daniel Selate, Secretary in Secretarial Report a peka, Guest Artistes hai Chief Guest Mr. David Keivom in lawmthu hrilna memento inhlanna a nei bakah Tv. Laldinglien a inthawk Finance Report ngaithlak ani bawk.
Hun hnia keihruoitu Tv. Liensanglur Zate @Pu Amitabs in "Mawng sawpa kan fe ding" ti hla sakna neiin mipui a suk hlim hne hle a nih. Rimawi tienga insuk hlimna hun iemanichen hmang ani hnungin hun dit khawp lo le inpam tak pumin Dr. Lalzawmlien in Pathien kuoma tawngtaina neiin the 26th Freshers Meet chu suktawp a nih.
