Responsive Ad Slot

DAWKÂNA BEI NAWI TLA

Sunday, September 16, 2018

/ Posted by VIRTHLI HMAR
~ Jami Darngawn.

✍ Awleh, Lal lsu le Kanan nuhmei inbiekna hi lungril le titakzetin lo tiem ei tih.


Matthai 15 :
21. Chun Isu chutaka inthawk chun a suok a, Tura le Sidon bielah a fe ta a.

22. Chun ngai ta, chuong rama inthawk chun, Kanan nuhmei pakhat a hung suok a, “Aw Lalpa, David naupa, mi lunginsiet rawh! Ka naunu khawhrîn a man tlat a nih,” tîn, a khêk a.

23. Ama ruok chun, bau khat khawmin a dawn nawh. Chun a țhuoihruoihai chun “Ei hnungah a khêk a khêk si a, infetir el ta la,” tîn, an hung ngên a.

24. Nisienlakhawm ama chun a dawn a, “Israel hnam laia berâm inhmang kuoma naw chu tir kan nawh,” a ta.

25. Nuhmei chu a hung a, chibai a bûk a, “Lalpa, mi san rawh!” tiin.

26. Nisienlakhawm ama chun a dawn a, “Nauhai bei lâkpêk a, uitehai kuoma pêk chu a mawi nawh,” a ta.

27. Ama chun, “Lalpa, ni chu a nih, nisienlakhawm uitehai khawmin an pu dawkâna inthawka bei nawi tla chu an fâk hlak an nawm,” a ta.

28. Chu phingleh Isun a dawn a, a kuomah, “Aw nuhmei, i ringna a va nasa de! I dit ang takin i chungah um raw se,” a ta. Chuongchun a naunu chu, chu chena chun a hung dam ta a.

Hi thu ka tiem hin iemani kawng taka chun Lal lsu hi a ti taluo deu an nawm a ni aw ka tia, asanchu Kanan nuhmei kha Ui ang chauva a biek kha ka lo tuorna ve a nih. Amiruokchu hi lai thua hin inchuk ding tam tak a uma, Kanan nuhmei ringna hi ava ropui de aw !
Lal lsu meu khawma a ringna kha nasa/ropui a ti a nih.

Ani ngei, nang le keikhawm vawisun hin Lal lsu zar chauvin Kanan nuhmei anga hmusitum le Lal dawkâna hung thla bei lo inchan ei ni naw a, Lal buthleng awtpui hai ei ni hi ava ropui ngei de !! 
Hieng ang chan insang ei chang phak hi nitina lawmthu hrilna khawp chu a tling reng reng a nih.

Chuonglaizing chun tulai mi tam tak hi ei nau hai khawhri'n a man zo tah ti ei hriet am aw ?! Ei nau hai khawhri'n a man zo tah ti ei hrietzing de khawmin eini ruok chun ei sukdam thei sie nawh, sukdam theitu Lal lsu ei pan tak tak nuom sie naw hi beidawng um tak chu ei nih. Ei ringna a hrat naw lei am? Or Lal lsu hi sukdamtu tak tak a ni ti ei ringzo naw lei? ti chu lungrila um a nih.

Ani ngei el, kei ngei khawm thlaraua ka nau hai chu khawhri man dam an nih a, khawhri man hang ti tak hi chidang dang a um thei, hieng ruithei sala intang hai le suolna chidang danga intang hai hi khawhri man indiktak chu an nih.

Hi thu a hin kei ngei khawm Lalpan ka mawphurna dinga a mi pek thlaraua ka nau hai ruithei sala intang hai le harsatna chidang dang neihai hi ka thei ang anga enkawl/țhangpui chu ka mawphurna a nih ti ka chieng hle. Keikhawm Kanan nuhmei anga ringna nghettak ka nei a ngai takzet a nih.

Kanan nuhmei nekin nang le kei chu vawisun hin ei chan/nina hi a ropui lem a nih ti hriezingin lawmpumin ei dit le mamaw hai chu ei Lalpa Pathien kuomah intlun mawl mawl hlak ei tiu. 

LAL BUTHLENG AWTPUI HAI EINI HI EI VANGNEI HLE A NIH.
Don't Miss
© all rights reserved
made with by Simon L Infimate