Responsive Ad Slot

SHC Office Sakawrdai ah hawng

Friday, August 3, 2018

/ Posted by Simon Infimate
Sakawrdai, August 03, 2018, Virthli (ONP): Sinlung Hills Council office thar chu vawisun August ni 3,2018 khan council innghatna (headquarters) Sakawrdai ah hawngna hun nei ani a, SHC a Chief Executive Member (CEM) hmasatak le nilai mek Pu Lalthalien in Council member danghai bakah mipui thahnemtak fekhawm hai hmaah a hawng.

Council Office hawngna inkhawm hi Pu Lalthlamuana Hmar, Executive Member (EM) in kehruoiin Rev. Salem L. Hmar, Presbytery Superintendent, EFCI, Sakawrdai Presbytery in hunser a hmanga, Pu Lalthalien le Council Chairman Pu LT Hmar hai bakah mi dang dang hai anthawkin thuhril ngaithlak a nih.

Hi huna thurhiltu Pu Lalthalien chun tuta member ruota umhai hin development tak tak an buoipui hman naw ding a ni leiin mipui hrietthiemna an ngai thu hrilin, a hnunga Council member thlanga um haiin hma tha taka an hung lak theina dinga sawrkarin thlaruk sunga interim dinga a ruot an ni thu a hril a, tuhin Sinlung Hills Council Complex bawlna ding Detail Project Report (DPR) chu sawrkarah peklut niin file khawm bawzui zing a ni thu le nuom angin sum le pai hmu zung zung thei a ni naw thu a hril bawk.


Pu Lalthalien chun Sawrkar chu a thutiem kawnga a la ringum pei a ni thu hrilin vawisun chenah a thil intiemhai a bat abatin a la thaw pei a ni thu a hrila, a tir anthawkin inringzo tawnna le inunauna thatak hnuoia inbiek a ni leiin sawrkar chu ring a um tawk niin, a hril.

A hril peina ah Pu Lalthalien chun "Naute pienghlim ang chau ei ni leiin nuom angin sawrkarin sum le pai a mi pek el ring a um nawa, amiruokchu ring tlak ei ni le ni naw hai bakah eini khata inrelbawl thei ei ni le ni naw hai a mi enthlak zing ding a ni leiin inthuruoltak le ringumtaka sin ei thawtlang a tul a nih," a tih.

Chairman Pu LT Hmar khawmin thurhilna neiin Staff le Council member hai chu thataka thawktlang a tul thu a hrila, lungril kawi put um lova hma la tlang seng dingin mipui fekhawmhai a fiel bawk a nih.

Sinlung Hills Council office hawngna programme a hin Sakawrdai bakah khuo hran hran anthawkin political party hran hran le NGO hai bakah mipui 1000 bawr vel an fekhawm niin, ei thulakna chun a hril.

Tuta Council office hi mimal In (Pu Lalnunzira in) hluo a ni a, office puitling (SHC complex) bawl dinga hmalak mek a ni thu, Council thuoituhai chun an hril.

Ei lo tarlang ta hlak angin Sinlung Hills Council hi tukum April ni 2 a Mizoram sawrkar le HPC(D) haiin inremna an ziek dungzuia indin a ni a, July ni 9, 2018 khan Mizoram sawrkar chun notification insuo in Interim Council indin a ni thu a lo puong tah a, hi ruol hin Council member mi 12 a lo ruot tah a, anni hai baka hin member dang 2 khawm a lo ruot (nominate) ta bawk a nih.

April ni 13, 2018 khan Sinlung Hills Interim council chu laklut a lo ni a, hi ni vek hin Sakawrdai chu Council headquarter dingin puong a lo nih. 

Don't Miss
© all rights reserved
made with by Simon L Infimate