Responsive Ad Slot

HSA in Mobile Charity Concert Aizawl ah buotsai ding

Thursday, August 30, 2018

/ Posted by Simon Infimate
AIZAWL, 30 AUG, 2018 (SINLUNG HMATHLIR): Mizorama Hmar Students' Association (HSA) joint headquarters 3 hieng Aizawl Joint Headquarters, Kolasib Joint Headquarters le Sinlung Hills Joint Headquarters hai buotsaiin hung tlung ding tarik 1 September khin, Aizawl veng hran hran ah ni 20, August, 2018 a Tuiruong vadungah unau Sakawrdai mi iemanizat in siet an tuokna le mi 4 hiel in hringna hlutak an chân le inzawmin mobile charity concert buotsai an tuma, hi concert a hin Hmar hlasakthiem Lalruotmawi, Lalramchan Amo, Margy Lalremruati le Caroline Biakthansangi hai baka Mizoram a top artiste hieng Zoramchhani, Lalruotawi, Henry Varte le mi dang danghai inlang an tih.

Charity concert hi Mission Veng bazar, Khatla kawn, Tennis court le Vaivakawn a hai nei nîng a ta, zingkar dar 10 in ṭan ning a tih.

Hi huna hin Sakawrdai khuo mi siet tuokhai ṭhangpuina di'n bawm daw ni bawk a tih.


HSA chun August ni 23 anthawk khan siettuokhai ṭhangpuina le ralna bawm a dawa, mimal anthawkin ṭhangpuina a zawng bakah Aizawl a dawr iemanizatah ralna bawm hi a sie bawk. Mimal ṭhangpuina pe nuomhai ta dingin September ni 1 chen khi hun an la hawng niin ei thulakna chun a hril.
Hi taka ralna sum lut popo hi siettuok (mithi) sungkuohai kuomah inhlan a ni ding thu HSA ṭhuoituhai chun ei palai an hril.

Liemtah August ni 20, 2018 khan Sakawrdai khuo mi, mi 27 anthawka 30 inkar chu lo vai an fe lai Tuiruongah an che suola, mi pali - Pu Lalpawlliana, Pu Lalroliana, Pi Lalchamdami le Tv J. Hranglura hai chun sansuok hman lovin an hringna an chan a nih.

Sawkawrdai YMA ṭhuoituhai anthawka chanchin ei dawng danin siettuokhai hi Tuiruong Zilthawsuo kai thlang met, Sakawrdai anthawka km 15 velah lawng (launch) ah an chuonglai suor hratin a lak thuta, an lawng hi a pil zui pei niin an hrila, mi 4 ti lo passenger danghai po chu an sansuok hman niin an hril.

An hril peinaah, YMA ṭhuoituhai chun tlang tieng lam dukdak a um naw leiin Tuiruong tieng hin hêlin lo ah hin an fe hlak thu an hrila, tuhin lampui hi MNREGS hnuoi ni 100 inhlawna hmangin sat mêk a ni thu an hril.

August ni 20 a siettuok hai hi lo a inriek dinga fe niin an hril.
Don't Miss
© all rights reserved
made with by Simon L Infimate