Responsive Ad Slot

HMAR THIMPUI – HNUCHHAWN RAM

Thursday, August 9, 2018

/ Posted by Simon L Infimate
~ L. Thanmawia Pajamte

SINLUNG  HILLS COUNCIL  ram, abîk takin Tuisuol Ral, Hmar bubitna ram po hi Mizorama kan umlai chun, “Hmar Thimpui – Hnuchhawn ram” tiin an ko. In-le-lo, lampui, education, socio-ecomic development chu a châu ngawi ngawi a. Sakawrdaia EFCI Upa (fam) Dama In-ah bâl puikhat le mai pumkhat a um chu kan lawm em em.

Vervek (Khankawn) le Zohmunah bufai Kudam a uma, anachu bufai a um ngai nawh. Thingkawlkai (Pangbâl) bu a ring kan tam. D/S (P/S) in chêng 560/- kan hlaw a; chu khawm chu kan hmu duk dak thei ngai nawh. Vawisunni a P/S hai,a sîngtêl têl  hlaw tahai hin khalai harsatna râpthlak zie kha hrephâk tak an ti’m aw.


Kum 1984 Kum Thar lawm huna Mr. Darliensang Ralsun a pa H.Zakhum-in saruol late a kâp a. Bufai a um naw leiin atta le pangbâl leh kan hme. A lungsiet thlâk a nih. Pathien ngaina chu a zuol hle. Sawrkar ṭha, hmasawnna lamtluonga mi keihruoitu ding dit a na thei kher el. MNF buoilai a la hang ni nawk bok leh.

Muol pakhat, Overseer quarter hmun dinga V.C haiin an rijâp chu EFCI D/S Quarter hmun dingin ka hni a, a rem thei naw a. Aizawla fein sawrkar ka va hni a, phalna lekha an mi pêk a, ka lawm em em. THE EVANGELICAL HILL tiin signboard ka târ a.  Cheng singnga in Quarter a hun laia ding chun mawi tak el kan bawla. Thinghai hlain ka chei a. Forest thing dam ka phun a. Parhuon ka siem a.  Pathienni zantieng chu nunghak le tlangvâl an hung lêng hlak. Quarter chu ṭha le mawi an ti thei hle. Kei chun, “Kum 20/30 hnunga chu hi In hi a ṭhanaw pawltak la nîng a tih. Khuo le ram hi nasatakin hma a la sawn ding annawm” ka ti a. Vawisun hin chu In ṭha a tam ta hle. Council a fangsawn ṭha pha lem chu a va ropui awm deh! Hmar Thimpui-Hnuchhawn Ram ni bîk ta naw nih.

Hmelchhe Bawm: Ram pasie, fak-le-dawn tlâksamna, health & education le infepawna ṭhatnawna rama chun mihriem hi an hmêl khawm a lo se nuom nîng a ta. Sinlung Hills Area rammihai khawm an siein an inthir a. Hi lei hin Aizawl le Vervek inkâra Bus pakhat tlân sun chu “Hmelchhe Bawm” ti a ko a nih. A chuonghai khawm ei inthir bawk a. Ratu chen chu ei chang a la par a. A khela chu ui khuol ang ei ni tah.

Hienganga indeusawna hi Pu J.Thankim-in a tuor ta naw leiin Bus pahni a’n chawk a. “Hmelṭha Bawm-I&II” tiin bus hmaiah a ziek a, thla a sukmuong kher el. Ṭum khat chu Aizawla inthawkin Hmelṭha Bawm a kan hung chuong a. Hmar deu ruok kan ni a. Hmar ṭawngin kan hohlim mur mur a. Nu pakhat le pa pakhat hin “Enge in sawi? Hmar ho hi in ninawm….” an ti a, kan inselpui deu tawl a. Hmarpa pakhat hi a ngirsuok hlut a. “Enge ni, Hmar zawngte kha i ding chhuak vek ang u” a ti a. Kan ngir ta vawng a. Darlawn kan hung tlung a. Hmar theidanu kha a ṭum a. Bus step a inthawkin lamlai a bawkkhupin a tlu thla a. A mawng a’n hlîm vawng a. Kekawrte a bun nawk naw nghal!

Buannel ram, sahkâr: Sakawrdai Hmunsang le Ṭinghmun inkâr; Ṭinghmun le Kani (Zokhawthieng) inkâr hai hi ramngawpui a ni hlak a. Sakukawng bel veng vungin lam an tan a. Vapuol, rângkêk le vate dang dang haiin hlimzai an vawrna a nih. Tuhin motor lam, kacha road-in Ṭinghmun a paw ta a. Khânglawma ramngaw kha ṭhiekdarin a um a, phûl ang a ni tah. A pâm em em.

Zohmun via Palsang to Mauchar inkâr chu ramngaw, thing lien tak tak ngîr ṭhelṭhulna a ni a. Pawihruihai chu ṭinbûr ruol ruol thing lienahai chun inher ngenngunin an kai a. Ṭhal laia ka’n zin châng lem chun thing lien zung bathlâr kârah inhawi tiin ka la zâl hlak. Rawmi lien tak tak, nâm pengpungin an ngîr a. Sasen inri rui ruiin an tlân a. Hieng ram ropui le hausa hi Sinlung Council ram ding a la ni hrim ka lo dawn ngâi nawh.

Tulaia Pastor-haiin inhawi ti taka bike khala biel an fang a, an bike khu chau ei inhnam ang hi ni lovin pastor haiin mansapui paiin ramngaw kâra biel ei fang a. Thlan phul nguoi nguoiin Mauchar tlung tawma Motoi Vadung ei zuk tlung a. Ka vadung insilna lai pova tui deitaka ka la hriet a hin ei zuk insil a. A dei taluo leiin ei inchawm dawk nawk el hlak a nih. Tuhin chu a hnar tienga rampui chu sukchereu a ni ta a, Motoi tui khom a dei ta nawh. Hieng ramhmangpuihai hi tuhin phûlin an inchang zo mêk tah.

Natural beauty hai an hmêl a se zo ta a. Thing-le-lung haiin fam an mi chang san a. Ramsa le vatehaiin chêngpui tlâka an mi ngainaw leiin an mi ṭinsan zo mêk a. Ṭap ṭapin ei kokir zo ta si nawh.

Feb, 29, 1996 khan Kania inthawkin Mauchar panin rampui hnuoia ka fe a. Silai chawi guard pahni ka ṭhuoi a. Assam (Cachar) le Mizoram inṭhena Ruonding Vadung kaiin ramngawpui kan lût a. Suonglawn tlângpui kan kai dawk a. Seluhna bilpui hnuoia kan fe a. Fing khat ding hi intawk ṭhupin an ngîr a. A ram a va hausa lawm lawm de aw. Khânghai kha iem an chang ta ding chuh? Vapuol le Kawlhawk an lo vuong duoi duoi a. Rawl panga ka ngir a, ram ka la thlir ringot a nih.

Kan fe pei a. Mauchara inthawka km.3 vêla hla, tlângzawla chun mankhawng a lo inkam a. An chim vawng a. Saku, sakik, ramar, vahrihaw, vahrit le sapheimanli tenau hai chu mankhawng kipin an lo dela. Ka phok pei a. Ṭhen chu an ru’n reng reng a ti ta a. Ṭhen chu an thu ta a. Ka lai a na êm êm. Motoi Vadung hnâr chu bigha khat hmun ding ienga an hmang di’m a nih thing popo an lo phûrthlûk a. Mauchar ka tlung a. Zana an V.C President Inah kan inkhawm a. “Ienga dinga saw chen chena hla ah ve pei silo dinga mankhawng in kam am a n’a? Rannung thuhmawnhai saw ka lai a na a nih” tiin ka kawk tawl a nih.

Hmar Pasalṭhahai Thisen Luongna : Mauchara inthawkin a zinga Saipum tieng mi’n an mi thak a. Saipum ram, Damdiei Vadung panga Pherzawl tlangval Joar le a ruolpa MAP haiin an kaphlumna hmun ka sir a. Tû tiem hlaw lo, Hmar hnam ta dinga an thlunglu an thâpna hmuna chun anni hrietzingna lung ramlai chun a lo ngir a, ka lai a na vawng vawng leiin lung chu tuoiin ka ṭap a. Hmar Thimpui sukêngna dingin an hringna var mawitak chu an lo inhlân a nih.

March 28, 2015-a Kani (Zokhawthieng) daia MAP 3 zet kap hlumna a ṭhang,hnam pasalṭha Malsawmkima chu May 8, 2016 in Ṭieuliena kap hlum a nih. Ama hrietzingna lung chu runthlak takin ka ziek a, Kangrengdawra phun a nih. Hieng tlangvalhai thisen luongna le action an lâkna ramhai hi Sinlung Hills Council ta ding le Pherzawl District ta dinga mellung pawimaw an nih.

Hmar Thimpui Hnuchhawn Ram : Ṭumkhat chu Mauchara inthawkin ṭhalai ṭhenkhat leh Hmarkhawsang (Jabla) panin kan suok a. An inkâr hi lam a umnaw leiin khawhnawma inthawkin ruopui hnuoia rama kan lût a. Invot an tam êm leiin kekawr bun lovin kekawrte khât kan bun a. Kan nunghakhai chun tulaia ang hin kekawr bun lovin puonbil an bil a. Puonṭiek hmawrah machi khit bawk, hmawlte hmawra târin kan chawi far a.

Thlado thla, tuoipui nghorsuoktu ṭêk tla dum dum le ruopui hnuoiah tlangram vawngdeitu sûm patchawnhai chu sûm khaltu Pathien Zeus ikhal ang elin tlânghai hung baw chuoi chuoi kâra chun ramngawpui kan lût a. Buonnêl ramre tuklo ram sakâr; sahapa rama chun kan lût pei a. Ruotui far ding hnaa la’n nghak khawla kûrhai chu thingchunglawn, sapheimanlihai le chunglêng vate lienhaiin Ralngam idawisuok ang elin an hung sukṭil tuor tuor hlak a.

Khawvela Invawt tamna pawla an hril hna pakhata khawm pathum-thum fu a, châl êk tlangahai inṭhungin kâi ding zawnga an lu vai mur murhai chun nunghakhai êlpui vâr chu an target hrim ang hin an kâi ngun bîk a. “Pu la rawh, man rawh, ka ṭi” tiin an puonbil chu insâng rei reiin an hlîm a. Rawsûr hnuoiah invawthai chu an innal êm leia Pû tak khawma a keithlâk el theinaw kâr chu invothaiin remchanga lain piengna ram tieng panin a tungin an inkhâpkai zut zut a. Ân vot en ding leh, a saktieng pei en nuom bawk leh Pû tak khawm chu a buoise thei hle.

Ruo a chat ta bawk leiin harsa tak pumin kan fe peia, Teirâng-nêk Vadung kan sukzui a. Tuhaiin am a nih tûr an lo buok ni ngei a ta. Nga ṭhenkhat chu an puomphut ta a. Ṭhen chu drug ngawlvei angin an inhlieu den den a. Tui dam sûnga nungcha tinrenghai ta dinga an tuolchaina vadung suk sei chu thlân dungseia inchangpekin famhringsâm an lo chang nasa ngei el. Mizoram Civil Society-haiin ramsa chau ni lova vadung le ngahai chen an humhalh laiah hilai hmuna hiengang thil a tlung hi a ram a pilril êm lei or Hmar Thimpui, Hnuchhawn Ram a ni lei ? tiin ka ngaituo a.

Tui sûnga lêng limngatehai le nungchahai, mihriemhai ta dinga pawitawk nawhai tuollengna a suortluona fam khawpuia inchaangtir hi hnam changkanghaiin an thaw ngai nawh. Hieng ramngaw kan hrawhai hi a la ngaw di’m aw ?

Thukhârna:  Mizoram, Hmarhai sâtdawk rama ei ngaiah mikhuolin ei um a, Chulai zing chun Assam le Manipur rama inthawkin kum 30 vêl sûng hin buoina le khawsak harsat leiin sûngkuo a sangtêl an inpem lût a. Ei identity (ninazie) ei va ngainêpa. Hmarhai chêng bîkna Ratu tlângdung, Khawlien tlângdung le Tuiriel râl tieng chu hmusit le deusawin mihaiin, “Hmar Thimpui, Hnuchhawn Ram” tiin an kova. Chu hmusitna le mikhuolna chu a bo theina dingin HPC Movement huoihot a nih. Hi movement lei hin tlangvâl hringna za chuong le Hmar mipawimaw tam tak ei chân a nih.

Tuhin Sinlung Hills Councils, political Kanan ram Jordan râl la kâi lovin vawikhat hachawlna Gilead ram; Reuben, Gad le Manase hnamhai, Jordan râl kâi nuom lova an lungawi tawkna hmunah ei la chawl hri ding a hawia. Aigupta le Babulon hmusitna inhlumhmangna Jordan râla Gilgal ei la lût ngei ei beisei. Tuta ei ngirhmun hi ei phutawk chau a la ni nîng a tih. “Rambung tin (hnam tinin) an phutawk seng sawrkârna an nei hlak” – JOSEPTH DE MAISTRE – in a tih.

Chuongchun, tuta Interim Council Member-hai le inthlang pha a member dinghaiin Hmar Thimpui hi Hmar Varpui ni ding le, Hnuchhawn Ram hi Hmasong Rama hung siem dingin Hmar mipuiin ei beisei a nih.

Hmar tlâng dumduoi pâr vul raw seh.

Phaizawl Lily
Thlazing 7,2018
Don't Miss
© all rights reserved
made with by Simon L Infimate