Responsive Ad Slot

Career Guidance Workshop hlawtling taka hmang

Sunday, August 26, 2018

/ Posted by Simon Infimate
Silchar, August 25, 2018, Virthli (ONP): Vawisun khan Hmar Students' Association, Silchar Branch chun a vawikhatna a di'n CAREER GUIDANCE WORKSHOP "Every Career is important but the choice is yours" ti thupui a hmangin Zairema Hall, Mission Compound, Jail Road Silchar ah hlawtling takin an hmang.

Hi huna hin resource persons in Pu James A. Songate, APS (DSP Probationer, Karimganj, Dr. Vanlallien Pulamte, Asst. Prof. G.C. College, Silchar le Pu H. Buonsanglien Inbuon, Asst. Bank Manager, United Bank Of India (UBI) hai hmangin inchuklai hai hrilhirietna le infuina thu țha tak tak hai hrilna an nei.


Hun hmasatakah Pi Noami Inbuon-in 'Lalpa i mi țhuoina tin reng hi' ti hla sakin hun țan ani a, mipuiin a ruolin 'Hmar puonzar khai ei tiu' ti hla sak ani bawk.

Pu Laldawnlien Tuolor-in Conductor (hun vawngtu) sin thawin Pathien thu thienghlim tiem langin, Pathien kuomah lawmthu le hun hawng țawngțaina a nei a.

A dawtah Tv. Peter L. Kungate-in Welcome Speech hmangin Resource Person hai chu mipui hriet dingin Introduction (inhmelhrietna) a nei a, a nei zoin hla tieng Pi Noami Inbuon in 'Ka ta dinga țhanaw ka Lalpa'n rel naw nih' ti hla sakin mipui an awi hnungin Resource Person dinga ruot Pu James A. Songate in hun la nghalin HSA țobul le HSA Silchar ințan dan le Hmarkhawlien le Barak Valley Joint Headquater hung ințan dan hai chen a hril a. Assam-a HSA ințanna hmasatak chu Silchar a nih tiin a hril nghe nghe a, adawt a chun Union High School,Hmarkhawlien hai an nih a tih. Inchuklai hai le sin zawnghai ta dingin thu țha tak tak a hril bawk a.

Mit nei, a tunga lawn hai chun an phak chin peiah Țhangna/ thawkna (Job) a um zie hai a hril a, Pawl sawm zo tah inchukna sunzawm ta lo nuoma um el nek chun Mani certificate phutawk peia țhangna a um pei hai dam a hril a, hieng SSC Pawlsawm ami le 12 a mi dam, chun Sipaia țhang nuom hai ta di'n an thaw dan ding le an qualification (thiemchin) ding hai a hril bawk.

Pu James A. Songate-in hun a hmang zoin refreshment (fak le dawnna) hun nei a nih a. Fak le dawn hnung sawt nawteah hung țan nawk nghal a nih.

Hun hnina țanna dingin Pi Noami in Pathien hla sakin hun țan a nih a. Pu H.Buonsanglien-in Banking and Other ti thupui hmangin a hun a lak țan a. Pu Buona chun inchuklai hai chu tumruna nei ding le tumruna chau ni loa Tumrúkna le teirei peina khawm nei dingin an fui a, Chun Banka hai khawm țhangna ding a tam zie hai a hril a, SBI in employment an lak dan hai dam, inziektling dinga hmalak dan ding le exam dan ding hai chen a hril a, chun IBPS hnuoia bank UBI, UCO, Allahabad le a dang dang Regional le Rural Bank a inziek tling dan ding le thaw dan ding examna hmun ding țha lem hai dam a hril bawk.

A dawtah Dr. Vanlallien Pulamte in Motivational Speech ti thupui hmangin a hun a lak a.

A chanchin le an chuklaia rinum a tuor zie hai dam a hril a, Dr. Thanglung hlaphuoka ngai 'En tu'm Mihrang pasalțha ha'n an Sinlung ram chu maksanin tlang tieng kawlrawn an liem mek' tia an sinlung maksana tlang tieng kawlrawn liem hai chu Student (Inchuklai) hai an ni zie a hril a, Dr. HS Thanglung-in 1930-a pawlsawm a zona hmun Silchara ngei hin Hmarnauin iengleiin am B.A ei zo thei naw ding tiin Inchuklai hai chona țha tak a pek.

Student hai chu Silchar hmuna hin lekha inchuk dinga hung an ni zie dam a hril a, a sehriet bak ta laklaw chun a tawp chena țhang lak ding a nih tiin Inchuklai hai an fui bawk.
Pu Vanlallien chun naupang chite a ni lai anthawk Politician ni a tum zie dam a hril a, amiruokchu MLA amanih minister ni kher chu a tum hran chuong naw a, a thei tawpa Hmar hnam ta dinga hma a lak tum thu dam a hril bawk a, Pathien hring biek ani lei le Hmarnau a ni leia hnam dang (vaihai) chu an ni neka thiem lem dingah an ngai zie Inchuklai hai chona pek malamin a hril a nih.

Hun tawp tiengah Pu James A. Songate-in hun a lak nawk a hun khatnaa a hril zo lo iemani zat inchuklai hai ta ding le thawkna zawng mek hai ta dinga thil pawimaw le țha hai a hril bawk. Pu James A Songate-in hun a hmang zoin Tv. Rozahlun Zate Asst. Secretary-in Lawmthu hrilna neiin hun tawptakah Pu S.K Khobung-in hun a nei a. A chanchin le țhangna a hung nei dan dam, Magazine le Job Advertisement hai chu ngaiven hlak dingin inchuklaihai a ngen zoin Pathien kuomah lawmthu hrilin hun kharna nei a nih.

Vawisuna Career Guidance Workshop a thang hi 80-90 bawr vel an ni a. Mipui fe khawm hai le Resource Person hai zar lei chauin prokram a phuisuiin a hlawtling tak zet a nih ti hmutheiin a um a, fe khawm hai le Resource Person hai chun HSA Silchar Branch chunga an lawm tak zet

Silchar HSA ta ding chun vawisuna prokram hi a mellung pawimaw tak pakhat laia mi a tling phak a nih. Record um chen anthawk (1992) tiemin vawisuna mi HSA in Career Guidance a vawikhat huoihawtna a nih.

Don't Miss
© all rights reserved
made with by Simon L Infimate