Responsive Ad Slot

Bukpi to Tuivai Tipaimukh Road siemthatna ding Work Order la suokin sin tan a ni tah

Thursday, August 30, 2018

/ Published by Simon L Infimate
CCPUR, Aug. 30, 2018 (HT): Tipaimukh Road Bukpui a inthawka Tuivai chen siemthatna ding Work Order suokin sin tan mek a nih tah. July 9, 2016 khan Dr.Vanlallien Pulamte in Pu Kabindra Purkayastha, Former Telecom Minister Government of India le Dr.Rajdeep Roy, General Secretary, BJP, Assam, hai chu Cachar a Hmarkhuo thenkhat lamlien la tlungnaw hai PMGSY lamlien intlungtir dinga Assam Chief Minister in a pek, sin thaw tan dan ding le hmalak pei dan ding thua inhmupuina a nei a. Hi huna hin Tipaimukh Road Bukpui a inthawka Tuivai chen lam siemthat a ngai zie le Tuivai Leilak daw a ngai thu a hrilsa a.Pu Kabindra Purkayastha chun mipui thlawpna lekha a lak thei phawt chun an thangpui thei ding thu a lo hril a.Chu thu chu Hmarram Kohran Inzawmkhawmpawl (HKI) kuomah intlun a nih a. HKI hai chun August ni 3,2016 khan Tipaimukh biel mipui hai thlawpna lekha an hung lak a.

A hnuoia hming ziek hai hin Tuivai Leilak daw na ding le Tipaimukh Road Bukpui a inthawka Tuivai chen lam siemna dinga hmalatu dingin Dr.Vanlallien Pulamte le Pu Bula Hmar an thlawpna thu August 3, 2016 khan an hung ziek: 1. Pu Ralkapthuom, Chairman Village Authority Union Tipaimukh Area. 2. Pu Tongkhawlun, Secretary, Village Authority Union Tipaimukh Area. 3. Pi Lalzaidam, President, Hmar Women Association, Tipaimukh Area. 4.Pi Lienthangkim, Secretary, Hmar Women Association, Tipaimukh Area. 5. Pu C.Songate, President, Hmar Youth Association, Tipaimukh Area. 6. Pu Lalruotlien, Secretary, Hmar Youth Association, Tipaimukh Area.7.Pu L.Tlanthang, President, Tipaimukh Area Development Agency. 8. Pu Lalnisuok, Secretary, Tipaimukh Area Development Agency. 9. Pu Hrangneikhum, Chairman, Hmarram Tribal Upliftment Society. 10.Pu Lalchunghnung Buongpui, Secretary, Hmarram Tribal Upliftment Society.
Hmarbiel mipui hai thlawpna lekha Pu Kabindra Purkayastha le Dr.Rajdeep Roy haiin an hmu hin an lawm hle a, fawnin Pu Nitin Gadkari, Minister of Shipping, Road Transport and Highways, Government of India, New Delhi chu an biek pek nghal a. (Pu Nitin Gadkari le Pu Kabindra Purkayastha hi Atal Bihari Vajpayee Prime Minister a ni laia inthawka ruoltha tak el an nih) Tipaimukh Road Bukpui a inthawk Tuivai chen siem tha dinga an lekha pek chu; Government of India, Ministry of Road Transport and Highways, Gate No.3,Jeevan Tara Building, Patel Chowk, Sansad Marg, New Delhi-11000, chun File No.NH-12037/167/2016/PG/P-8 hmangin November 11,2016 khan a hung dawn el tah a. Chu lekha chu an bawzui ta char char a, December 21, 2016 khan, Pu Nitin Gadkari, Minister of Shipping, Road Transport and Highways, Government of India, Imphal-a a hung chu an lo inhmupuia, an rang thei anga department hai hma la dingin a hril ding thu a lo hril a. BRTF haiin Bukpui a inthawka Lungthulien chen lam siemna dinga October 7, 2015 a Estimate le DPR an lo siem File No.23047/NH(0)/Sewak/185-235/C-T/DGBR/05/East, Dr.Vanlallien Pulamte kuomah an pek chu Pu Nitin Gadkari kuoma hin an lo peka. Hi tum hin Pu Nitin Gadkari hin a mobile no chen a pek anih. Pu Nitin Gadkari Delhi a tlung hin department a sin thaw hai a zuk indawn kuol zung zung nghal a. Engineers hai chun BRTF in kum 2015 October 7 a estimate an lo siem chu a hlui deu tah leiin hmang thei a ni ta naw ding thu Highway Minister kuoma chun an hril a. Estimate chu update a, a thara siem dingin NHIDCL thu a pek tah lem anih. Chutaka inthawk chun file a fe kuol ta zung zung a. Dr.Vanlallien Pulamte le Pu Bula Hmar hai in Delhi tieng file hi an bawzui ta char char a, Pu Nitin Gadkari Private Secretary Pu Vaibhav Dange leh Bukpui to Tuivai lam hi satellite study, Ministry of Road Transport, New Delhi Office a inthawkin an thaw a, thil umzie Highway ministry hin a hung hriet chieng tah a nih.

Kha hma deu khan Tipaimukh Road hi BRTF hai enkawlna hnuoia um anih a, pawisa funding thawtu ruok chu Ministry of Road Transport, New Delhi a nih. Tipaimukh Road siemna dinga Dr.Vanlallien Pulamte in Ministry of Road Transport, New Delhi kuoma lekha a pek chu Ministry of Road Transport, New Delhi chun Director General Border Roads, Seema Sadak Bhawan, Ring Road, Delhi Cantt. New Delhi-110010, chu November 11, 2016 khan Tipaimukh Road ngirhmun an rang thei anga report pe dingin a hril a. Chu dungzui chun DGBR General Headquarters chun File No.32015/DGBR/SWK/Gen/65/Works(East) hmangin November 22,2016 khan M.N.Singh E.E.(Civil) NFSG, For Commander, Lamphelpat Imphal chu Bukpui a inthawka Tuivai chen Tipaimukh Road ngirhmun report pe dingin thu a peka. Lekha a lo hmu a inthawk hin M.N.Singh chun Dr.Vanlallien Pulamte chu fawnin a biek nghal anih.Hi lekha pawimaw hai popo hi HQ 25 Border Roads Task Force C/O 99 APO, office Imphal ah hmu thei anih.

Imphal le Jiribam inkar BRTF hai enkawl chu sin a hratnaw el baka pawisa nasataka sukchingpen a ni leiin BRTF hai kuta inthawka an lakdawk ding thu official haiin Dr.Vanlallien Pulamte chu an hrila.Chu le inruol chun Tipaimukh Road enkawlna sin khawm NHIDCL haiin sin thaw hai sien ti an nuom thu an hril nghal a. Chu dungzui chun Minister of Shipping, Road Transport and Highways, Government of India, New Delhi chun NHIDCL chu Bukpui a inthawk Tuivai chen survey thaw nghal dingin thu a peka. October 24, 2017 khan Bukpui a inthawka Tuivai chen lam siemthatna ding Detail Project Report NHIDCL in an siem mek thu Dr.Vanlallien Pulamte kuomah a copy an hung peka. NHIDCL in Tipaimukh Road Bukpui a inthawka Tuivai chen enkawlna in-charge hi BRTF kuta inthawkin February 17, 2018 khan a lak tan a nih.

November 13,2017 khan Pu Nitin Gadkari, Minister of Shipping, Road Transport and Highways, Government of India, chu New Delhi ah Dr.Vanlallien Pulamte le Pu Bula Hmar in an inhmupui nawka. Minister in thu a pek angin hi ni vek zantieng hin Director General And Special Secretary, Ministry of Road Transport and Highways, New Delhi khawm an inhmupui nghal a. December ni 27, 2017, Chawhnung dar 2 pm khan Pu Vaibhave Dange, Private Secretary to Minister of Road Transport, Highways and Shipping, Government of India chun a Email ah Bukpui to Tuivai lam thlalak thawn ding a ti a angin thawn anih a.Thlakhai hi HKI thuoitu hai Bukpui le Tuivai inkar lam a hmuna fe in hmun hran hran a mi thla an hung lak anih.Hi taka inthawk hin file tluongtakin a fe ta char char a, an bawzui char char bawka, Work Order July,2018 khan an ziekfel a nih a, sin tan theia um tah hi lawm a um takzet anih. Sin hi hmunthum ah thaw ni’ng a ta. Bukpui ram tawp lamsietna a inthawk sin thaw pawl Group khat um an ta, Parbung ah Group khat, Tuivai panga inthawka sin thaw pawl Group khat um bawk an tih. August 27,2018 khan Pu Rajiv Kumar Sharma, Project Manager NHIDCL, Pu Sarvanjit Singh, Project Manager NHIDCL, Contractor le Pu Bula Hmar, Executive Member, BJP Kisan Morcha, Manipur Pradesh inrawina hnuoia Work Order chawiin a hmuna sin tan dingin an fe a. Hmarram Kohran Inzawmkhawmpawl (HKI) hai keihruoina hnuoiah Pherzawl, Damdiei,Taithu le Lungthulien ah hai mipuiin tuokna neiin Pastor haiin tawngtaina an lo nek pek pei leiin NHIDCL hai an lawm takzet a nih.Lungthulien PMS School ah riekin zantieng bu Pu Lalchunghnung Buongpui hai sungkuoin fakpuina an nei a an lawm hle. NHIDCL sinthaw ding hai chu tuhin Parbung Assam Rifle Camp ah an um ve nghal anih. HKI le NHIDCL inbiekremna angin jungle cutting po po hi Tipaimukh biel mipui hai inhlawna dinga sukfel anih.

Tipaimukh Road Bukpui a inthawka Tuivai chen siemthatna ding hin Manipur M.P Politics a mani M.L.A politics khawm inrawlna a nei nawh a. Highway hi Central subject a ni baka Tipaimukh Road hi a thara nawr ding a ni naw leiin Manipur sawrkara inthawka Clearance lak iengkhawm a ngai nawh a, asanchu Highway um tah sa kum tam tak enkawl ta lova um chu siemthat nawk (rehabilitate) ding a ni lei a nih. Hma lapuitu Pu Kabindra Purkayastha, Former Telecom Minister, Government of India le Dr.Rajdeep Roy, General Secretary BJP, Assam hai lawm an um takzet.

Hmarram Kohran Inzawmkhawmpawl hai khuotina malovin, kum 2016 June thla a inthawk khan an tawng taia, chu an tawngtaina chu Lalpa’n dawnin sin tan theiin a um tah hi lawm a um takzet. Lalpa’n A Chanchin Tha innghatna dinga a thlang Hmarram hi la ngirsuok mawl a tih.

Tuivai Leilak daw na ding sin tan el a ni naw nasan chu; kum 2016 November 8 a ei Prime Minister in cheng 500 note le 1000 note a that leiin khan thla thum zet office a inthawka contract work hrim hrim insuo thei lovin a sukchawl a. Chu hnunga chun GST a hung um nawka, chu zova 7th Pay a hung um nawk bawk. Kum 2016 September 20 a Tuvai Leilak daw na ding a Rs.6,11,35,000.00 (Six crore eleven lakhs thirty five thousand) estimate siema um kha hmang thei a hung ni tah naw leiin, August ni 14,2017 khan Regional Officer, Ministry of Road Transport and Highways, Government of India chun Chief Engineer PWD(NH),Division-II, Aizawl chu a hung inhrietttir a, Pu Bula Hmar le Dr.Vanlallien Pulamte hai khawm RO,MORTH hin a hung inhriettir ve bawka. August 22,2017 khan Dr.Vanlallien Pulamte in Chief Engineer, PWD(HN) Division-II chu Aizawl ah a hang inhmupui a. Executive Engineer, PWD(NH) Division-II rawiin September ni 20,2017 khan Tuivai hmuna fe in re-estimate an thaw tha a. Re-estimate hi Rs.12,41,00,000.00 ( Rupees twelve crore forty one lakhs) siem a nih a, MORTH, Delhi ah November 13,2017 khan pek lut anih( File No.NH-12031/17/CE-HW/PWD/22).Tuivai Leilak daw ding hin Mizoram tieng le Manipur tieng lam a ping ve ve leiin New Vervek a inthawka Tuivai chen lam hi siem that ni phawt sien ti a ni nawka. Chu dungzui chun New Vervek a inthawka Tuivai chen lam siem thatna ding hin Rs.25,58,00,000.00 (Rupees twenty five crore fifty eight lakhs) estimate siem anih a. November 13, 2017 khan Ministry of Road Transport And Highways, Government of India, New Delhi ah pek lut anih (File No.NH-12039/2/09/CE-HW/PWD/158). Tuhin New Vervek a inthawk Tuivai chen lam siemthatna sin chu tan mek anih tah.
............................
Tipaimukh Road chungthu a hin a tu thaw tak am/hmalatu tak ti hrietna ei nei naw a. Ka thaw titu an tam hle leiin mipui khawm ei buoi ta hle niin an lang. - Virthli
 
Don't Miss
© all rights reserved
made with by Simon L Infimate