Responsive Ad Slot

Sinlung Hills Interim Council laklut

Friday, July 13, 2018

/ Published by Simon L Infimate
Aizawl, 13 July, 2018, Virthli, (ONP): Sinlung Hills Council (SHC) sawrkar lailawk (interim) chu vawisun chawhma dar 10 khan Aizawl Deputy Commissioner office chamber ah laklut rawngbawlna (swearing-in ceremony) nei a ni a, Aizawl Deputy Commissioner Dr. A. Mathumma in ringumna intiem tirin sawrkar i ruot member 2 leh an rengin mi 14 laluk an nih.

Inbiek laia HPC(D) spokesperson Upa Lalthalien chu Chief Executive Member (CEM) dinga laklut a ni a, HPC (D) working chairman hlui Pu Lalthanglien @ LT Hmar chu Coucil Chairman dinga laklut a ni bakah ama thangpuitu dingin HPC(D) Deputy Army Chief hlui Pu Lalbieknung chu Deputy Chairman a laklut a ni bawk.


Hi baka hin Executive member dingin mi 4- Pu Darliensang Ralsun, Pu JC Zairemkunga, Pu Lalthlamuana Hmar le Nk. Melody Lalchhuangzeli hai laklut an nia, council member pangngai dingin mi 7- Pu Rohringa Hmar, Pu Lalrinsanga Ralte, Pu Benjamin, Pu B. Lalthachhunga, Pu Lalremruata Varte le Sawrkar i ruot Pu Malsawma Darngawn le Pu Lalrammuanpuia hai laklut an nih.

Laklut rawngbawlna nei zovah CEM  Pu Lalthalienin thu a hrilna ah Sinlung Hills Council chu thiltha ropuitak Pathienin Hmar nauhai bakah SHC mipuihai a pek a ni thu hrilin, inunauna tha lem, impumkhatna, insuikhawmna tha lem le inremna tlountling a um theina dinga sawrkar hmalakna lawmum a ti thu a hril a, SHC hin impumkhatna, inunauna le lungril inthlakthlengna (moral change) in tlung ngei sien a nuom thu le SHC area mipui popo ditsakna a'n hlan thu a hril.

Aizawl DC Dr. A Mathumma khawmin thu hrilin, SHC area mipui chu ditsakna an hlan thu a hrila, ram chu a ralmuong chun hmasawnna a um ngei ngei hlak a nih a tih.

HPC (D) ha'n inremna dita sawrkarah an inpek chu lawmum a ti thu le council member hai popo thatak le inlungruol taka sawrkar leh thawktlang dingin an cha bawk a nih.

Vawisun dar khat hin session hmasatak chu Sinlung Hills Development Council (SHDC) office ah nei ning a tih.

Hi lai zing hin Nilaini khan Mizoram sawrkar chun Sakawrdai chu SHC headquarter dingin a puonga hi le inruol hin Pu Malsawma Darngawn le Pu Lalrammuanpuia hai chu sawrkarin an ni tieng anthawkin a hung ruot (nominate) bawk a nih.

Don't Miss
© all rights reserved
made with by Simon L Infimate