MSTC Ltd le GFOC in MoU an ziek

Imphal/CCPur, June 1, 2018 | Virthli (ONP): 1st State Level Ginger Festival Cum Business Summit, Parbung, Pherzawl District, Manipur a April 20-21, 2018 a huoihawt a um le inzawma hmalakna fe peiin June 1, 2018 2:30 PM khan Govt. of India Enterprise le Ministry of Steel hnuoia um MSTC Ltd le Ginger Festival Organizing Committee (GFOC) hai chun Aithing a an in sumdawng tawnna dinga inremna thuthlung hmasatak MoU chu kum khat sunga dingin Manipur sawrkar tienga Minister Horti., Soil Conservation; Director, Horti., Principal Secretary le sawrkar mi pawimaw hai hmabul ah Pu Th. Shyam Kumar Hon'ble Minister Horti. Soil Conservation a Office, Imphal hmun ah an lo ziek tah. An MoU ziek hi a ṭul ang peia keisei thei dinga ti a nih. Hi MoU ziek hun a hin GFOC tieng ah Secretary, Mr. V.L. Keivom, Pu Robinson Songate le Pu Hrilsangmawi hai ṭhangin GFOC aiawin MoU a hin suoi an kei a nih.

Tuhin Pherzawl Dist. ah Aithing metric tons 2000 vel um a hriet le metric tons 1000 zawr suok phawt a, product a ṭha chun metric tons 1000 dang zawr dawk nawk dinga ti a nih. Hi MoU ziek ding thu hi Imphal based Printed le Electronic Media haiah June 1 tuk le May 31 zan haia khawm khan lo insuo le puong a umin MoU ziek hun a khawm hin Printed le Electronic Media inlar tak tak ha'n an uop a nih.

An MoU ziek ang dungzui chun pawisa advance-in 30 percent inpek ning a ta, a dang chu an lak a inthawk ni thum hnunga in pek dinga ti a nih. MSTC Ltd hi Govt. of India Enterprise le Ministry of Steel hnuoia um a ni leiin hi company hi study hnunga registration thaw a nih thu le iemani tia buoina a um chun state sawrkar hungin rawl nghal a tih tiin GFOC a Secretary chun a hril. Hi ang thil a hmalak tlangna hi Manipur sawrkar tienga inthawka chanchin ei hriet dan chun a vawi khatna le a hmasatak ding a la nih.

Thil dang tam tak a khawm hmalak pei ni dingin Manipur a BJP sawrkar chun GFOC hai kuoma le 1st Ginger Festival Cum Business Summit hun a khan mipui fekhawm hai hma ah an tiemin a puong a nih. Chuong hai lai chun Pherzawl Dist. sunga lampui National Highway hai JT Road ṭhang a siem ṭhaṭ ding, Common Facilities Centre (Cold Storage), Thanlon le Parbung haia Helicopter Service, Tui thienghlim dawn ding sekkhawlna ding Water Tanky bawl, Organic a thlai chingna ding le inzawma a ṭul ang ang ṭhangpuina pek ding ti hai a ṭhang. Hmalakna khawm tuhin a femek thu ei dawng bawk.