Responsive Ad Slot

Railway compensation chungchang ah joint meeting nei

Thursday, May 3, 2018

/ by Simon Infimate
Guwahati, May 03, 2018, Virthli (ONP): NCHISF in Railway construction leia siettuok hai ta dinga Compensation a nawr chu fepei in zani (May 02, 2018) khan Guwahati Dispur Assam, hmun ah hun danga la um ngai lo Chief Secretary Conference Hall ah Joint Meeting nei a nih. Hi meeting a hin Govt. of Assam aiaw, Railway, N.C Hills Autonomous Council, District Administration le N.C Hills Indigenous Students Forum (NCHISF) hai an ṭhang.

Smt. T. Y Das Chief Secretary keihruoi na hnuoia meeting hi nei ani a, meeting a ṭhang mi pawimaw ṭhenkhat hai chu a hnuoia hai hi an nih.

Shri. Alok Kumar, Add.C S,
Smt. L.S Changsan, P.Secy H&P,
Shri. Rajesh Prasad P.Secy Revenue & Disaster M
Shri. M Agarwal ADGP,
Shri. A Hussain Com & Secretary GAD,
Shri. A U Choudhury Com & Secy HAD,
Shr. S N Singh CAO/Con-1,
Shri. B. N Bashkar CE/Con-1,
Shri. P K Jain, DRM Lumding
Shri. Arul Jothi, DIG RPF
Shri. Naresh Ghosh PS NCHAC,
Shri. Amitabh Rajkhowa DC,
Shri. Prasanta Saikia SP,
Shri. Mukut Kemprai PS(N) NCHAC
Shri. Saindesh Ardao, Secretary Revenue
Shri. Debanon Daolagupu, Secretary NCHAC
Shri. David Keivom, President NCHISF
Shri. Robert Changsan, President Kuki Students' Organization Assam
Shri. Miteu Zeme President Zeme Students ' Organization Assam
Shri. Lalringum Parate Secy ISF Harangajao Branch

Hi meeting a hin Assam Govt. tienga palai hai chun Railway construction leia Ram le Lo tam tak suksiet a um hi a ram neitu hai kuoma zângnadawmna inpêk ngei a ṭul a nih tiin NF Railway chu a hril a, NF Railway chun pêk ngei an tum thu le Zerrat Value an lo pêk tah thu an hril. Assam Govt. Palai hai chun tuta Land Development/Land restoration khawm hi Zerrat Value in pêk thei si chun in pêk ngei a ṭul a nih, ieng ang lampui khawm nisien siettuok hai hin an hmu ding ang an hmu ngei ding a nih tiin an hril pek. Siettuok sungkuo 500 vêl kum tam tak Rail lam siem leia harsatna tuokin an lo um ta a, vawitam tak Joint Meeting hai nei a, inbie rema lo um tah vawisunni chena Compensation Railway in an la pêk naw zing leiin Assam sawrkar chu a lung a awi naw hle thu an hrila hienga Assam mipui harsatna siem pêka um, mi rethei tak tak hai an hlêm rawp hi Assam Tribal mipui an hmusit anga an ngai thu an hril bawk.

Assam Government chun mipui harsatna tuok hai a lo hlem hlak ang khan tuta inthawk chu phal ni ta naw nia Compensation hi pe nghal dingin Railway tieng chu an hrila, an pêk naw chun Legal Action an lâk ani ding thu Chief Secretary in a hril. Chun, Railway palai hai chun Assam Government chu ngenna siem in hun la pe met dingin an ngên a. Asan an hril chu Railway in ram a dit sa ta si naw leiin ram an suksiet man, ram la sie lo a pêk ding hi dân ah ala um ngai naw leiin Railway Board Delhi Headquarter an'thawk approval lâk a ṭul ding leiin hun tawite an hnina chu Assam Government chun an hnu tawp a thlahni (2 months) sûnga suk fel dingin hun a pêk a nih.

NCHISF ṭhuoitu hai chun an lo intiem angin thlakhat (1 month) sûng ngei ni rawse ti a an ngên chu Chief Secretary hin ISF hai ngênna siem in kum nga (5years) lai zet in lo buoipui tah a tuhin Assam Govt. chen a hung inrawl ta lei hin mipui ta dinga in hma lâkna hi inpâk in um hle a chuleiin tuhin ṭhangruola hma ei lâk ta si si hin chu thlahni (2 month) la hei pe nawk phawt ei ta, hi sûng hin an pêk ding ang an la pêk naw rawp chun dân hmang in ieng ang action khawm nisien Railway hai chunga Assam sawrkar in a lo lak khawm a Railway haiin Assam sawrkar an mawsiet thei naw ding thu an hril pêk bawk a nih. Chun Chief Secretary chun Railway hai in ringzo ta naw khawma Assam sawrkar bêk mi ringzo inla iengkima in kuoma kan um zing leiin hi hun tawite hi la pe hrâm inla tiin a ngên bawk. NCHISF hin Assam sawrkar chen an hung inrawl ta lei hin mipui ta ding chun thu lawmum an thlun vat an beisei thu hrilin chun DC le SP haiin kawng iengkima hma an lâk pui na leia hieng ang chen chen inbiekna dawkân an nei thei leiin lawmthu an hrila chun NC Hills Autonomous ṭhuoitu mipawimaw tak tak hai hi meeting ngai pawimaw a mipui hai harsatna tuok an hung hril pui na leiin Tv. David keivon President NCHISF in lawmthu a hril.
Don't Miss
© all rights reserved
made with by Simon L Infimate