Responsive Ad Slot

NU HMANGAINA

Sunday, May 13, 2018

/ by Simon Infimate
~ Jami Darngawn

✍ lsai 49: 15. Nuhmeiin a nau nene nelai a theinghil theiin,
A rîla ra, naupasal chu a lunginsiet naw dim a nih?
Thei e, an theinghil khawm a ni el thei a, Nisienlakhawm kei chun theinghil naw ning che.

Nu hmangaina hi a ropuiin an'thuk em ema Pathien mi hmangaina le tekhi phak hiel a nih. Nu tam tak chun an pasal hân an thisan khawma an nauhai an hmangai leiin an țulpui hlak a nih.

Kan naupang lai khan tlangval pakhat hi a suol ve em ema, a nu chun a pa thi hnunga a țulpui a nih, chu nu chu mi fel tak le Pathien ți mi a nih. Vawikhat chu a naupa chun a nu chu vuok a tum el taa, chutaka chun a nu chun a naupa kuoma hieng hin a hril tah a.


Bawia, i nu hi mi en ta? Ka khawlai tak hîm i vuok ding chu? Ka hnungzang hlak hi zansawt tak tak hnunga i țap hlaka ka puokna che a'na, ka ke hlak hi i fak ding zawngna le ka enkawlna chawl lova kan lawnna a'na, ka kut hlak hi hmangai taka ka enkhawlna che le i ta dinga ka hmang țhangkai em em a'na, ka lu hlak hi nang a ta dinga a sun a zana ka hmang ka thluok umna a'na,  ka mit hlak hi hmangai taka ka enna che a'na, tiin a hril zawm pei lai chun a naupa chu insum zo lovin a hung țap suok tah a, chu tlangval chun a nu kuoma a lo thawsuol hai ngaidam an hni a,  a nu'n a ngaidam a vawisun chen hin mi fel tak le entawnthlak tak nufa an ni tah a nih.

Kei ve bawk khawm hi ka nu le ka pi'n an mi hmangaina hi  ropui ka tiin theinghil ni um naw nih, mi angin inchukna insang lo nei naw langkhawm, Lalpa zar le ka nu le ka pi'n hmangai taka an mi enkawlna hai zara hiengang ngirhmuna um thei ka nih ti chu ka hril ngam a, ka nu le pi chun nitin Pathien thu le umdan ding an mi kawkhmu hai kha ka zawm famkim nawa chu, ka zawm thei ve sun hai hi ka ta dingin ava hlu ngei de aw !!!

(Keikhawm NU hung ni ve ding ka nih a, ka nu le pi mi enkawl anga ka nauhai le ka tuhai ka enkawl let ve chu ka mawphurna a nih)

Vawisun hin NU HAI NI ei hmangna a hin NU HAI hlutna tamtak hril ding um a tih, ei Bible khawma hienghin a lo hril a nih. 

Thuvarhai 31:
10. Nuhmei țha ringum chu tûn am hmu thei a ta?
A hlutna chu lungmantamhai nêkin ân sâng dai a.
11. A pasal lungril chun ama chu a ring zo a;
Thilțha tlâksamna hrim hrim nei naw nih.

Ava ropui de aw ! Lungmantam chu ei nei tawl naw khawma ni thei ie. Sienkhawm NU ȚHA Lalpa'n a mi pek hi ei lawm bek bek a nih.

HAPPY MOTHER'S DAY 🙏
Don't Miss
© all rights reserved
made with by Simon L Infimate