Responsive Ad Slot

FAST in Hmar Martyrs' Trophy a lawm

Thursday, May 24, 2018

/ by VIRTHLI HMAR
CCPur, May 24, 2018, Virthli (ONP): The 15th Manipur State Level Hmar Martyrs' Trophy 2018 Champions Team Friendship Athletic Sporting Team (FAST) chun May 24, 2018 sun le zan haia VTI Auditorium, Rengkai, CCPur ah an Trophy lawmna le Pathien kuoma lawmthu hrilna hunser an hmang. Sun hun ah Chief Guest in Pu M. Gouzamang Guite, MDC a nuhmei Pi Manthiannem a ṭhang a; Guest of Honour in Pi Thangṭhatling @Thangi Sinate, Co-ordinator, Swachh Bharat Mission, Pherzawl Dist.; Functional President in Pu H. Samson, Social Worker & President, HYA Rengkai Branch le Chief Host in Pu JC Chongkholien, Chief of Rengkai a naupa Pu Zofonlien Joute hai an ṭhang. Hi hun a hin Bawng 1, Vawk 1, Nga haiin zantieng lawmna ruoi ṭhe a nih.


Speech:
Chief Host Pu Zofonlien Joute chun Champions Trophy lawmna huna hunghai popo inzana chibai bukin FAST hai tumruna chu inpakin Champion ding chun tumruna a pawimaw thu le Phil. 3:14-na anga tiem chin tieng pan ṭal ṭal dingin an fui a, chu chu a pawimaw thu hai a hril a, FAST in hratna a changna dinga player hai le FAST chungah Rengkai Lal sungkuo le khawtlang aiawin lawmthu a hril. FAST chu Rengkai besan a ni zing laiin outside player hai ṭhahnemngaina leia lawmman lak thei a a umna thu a khawm lawmthu a hril a, Champion le Runner Up lawmman hai Rengkai khuo ah a lut ve ve chu lawmum a ti thu a hril bawk. A thu hril zoin thilpek FAST a'n hlan bawk.


Functional President Pu H. Samson chun FAST neitu a ngaia Functional President dinga fiel a nina chu lawmum a ti thu hrilin FAST chu a thei ang anga hmatieng peia hai khawm ṭhangpui pei a'n huom thu hai a hril a. Hi huna a thuhrilna a chun Hmar hnam in tulai hnaia mi 3 lai inpamum tak tak a chan thu le pawi a ti thu hai a hril a, an nina pawimaw tak tak hai khawm hrilin entawn tlak anni thu hai a hrillangsa bawk. Chuong hai chu (L) Pu Lalropui Chief of Army, HPC(D) le Chairman, UPF; (L) Pu Lalnghaksang Infimate SI, BSF le (L) Tv. Rorelsang SI, Manipur Police hai an nih.

Guest of Honour Pi Thangṭhatling @Thangi Sinate chun Hmar Martyrs' Day leh inzawm thil chu a ngai pawimaw hle hlak thu hrilin tukum Hmar Martyrs' Day leh inzawmin hmun 3 vel ah fielna a dawng leiin 15th Manipur State Level Hmar Martyrs' Trophy Saikot ah ṭhang thei naw sienkhawm, Vairengte, Mizoram ah Chief Guest in a ṭhang thu a hril a. FAST in Final kaia Champions a lak chu a lawmpui hle thu a puong. Imphal khawm ama ṭhang ve hlakin Hmar Martyrs' Trophy ah an lo suok hlak a, a harsat zie thu hrilin FAST ṭhuoituhai inpakum a ti thu a hril. State, National, International level ah fakhmu thei dinga hmalak le aim nei a ngai thu hai a hril a, football Institution/Academy a pawimaw zie hai hrilin ama ngei khawm International Coach khawma an contact hlak thu le hmalakna a um mek thu hai a hril bawk. Ama hi M/s Northeast Alliance Consultancy Services neitu le Social Worker khawm niin HYA history ah nuhmei President hmasatak le President, HYA Jt. Hqrs. khawm a lo ni tah a nih. Ama hin FAST kuomah football le uniform set (branded) a pek bawk.

Chief Guest Pi Manthiannem (w/o Pu M. Gouzamang Guite, MDC) chun FAST chu a pasal leh an ta anga an ngai thu a hril a, a pasal chu sawrkar tieng thil ah buoipui pawimaw tak tak a um leia a hung theinaw thu le a san hai a hril a, Rengkai Playground ah Waiting Shed bawl a ni ding thu, Culvert a ṭul ṭul nana Rengkai ah thaw khawm a'n huom thu a hril a, FAST hai chu in ṭhangruol thiem leia hlawtlingna chang in nih tia hrilin a lawmpui thu a puong a, Malsawmna mi petu Pathien a ni le ṭhalaihai inthuruol a pawimaw thu, ei ram in ṭhanglienna dingin ṭhalaihai an pawimaw thu baka FAST in hun vawng dik ngai pawimaw hle dingin a fiel. A thuhril zoin FAST kuomah lawmpuina'n thilpek a'n hlan.

Pu Jipson S Hrangate, AFC Referee chun thuhrilna neiin FAST lawmpuina'n FIFA World Cup 2018 Russia a hung um dinga official football ang Adidas siem ngei FAST kuomah a'n hlan a. Pu (Tv) Thankhum khawmin thuhrilna hun a hmang bawk. Hi hun hi khawtlang le hnam ṭhuoitu haiin an uop a, Tv. LRS Puruolte khawmin FAST lawmpuina'n Magic chi khat 'Thil a theinaw a um naw zie in entirna' a show bawk.

Hi hun a hin player hai chawimawina le guest hai inhlan an nih a, sun le zan hun haia hin artiste inlar tak tak Pu Lalthangkung F Tusing @Kanghling Father, Pu Ramhluolien Khawbung, Nk. Christina Shakum, Tv. Jaijai Singsit, Nk. Melody Varte, Tv. Joshua L Ṭhiek le a dang dang haiin mipui hla le rimawiin in an in awi a, zan hun chu Hmar Martyrs' hai inzana le chawimawinain concert nei a ni bawk. FAST chun an program hlawtlingna dinga ṭhangpuitu le hmalapuitu hai popo kuomah lawmthu an hriet.

FAST hin FC Rengkhawpui chu full time ah 1-0 a hnein Champions nina an lak a nih. Anni team/club pahni hi Rengkai khuo, CCPur besan ve ve an nih.
Don't Miss
© all rights reserved
made with by Simon L Infimate