Hmarkhawlien, April 02, 2018, Virthli (ONP): Khawvel pumpuia Zohnathlak hnam hran hran hai laia ‘Hmeltha Lalnu’ thlangdawkna dinga nunghak hmeltha ruol inruolsiek-na Miss Zofa International contest 2018 ah Hmarkhawlien anthawk Nunghak Melody chu Barak Valley aiawin a thang ve ding a nih. 5’5 ft a insang Nk. Melody hi Pastor T Hmingthang le Pi Bungchawntling a nauhai laia nau upatak ni dingin June 16, 1997 khan khaweng a hung hmu tan a. Cachar College, Silchar ah Bachelor of Arts (BA) inchukin major ah English a lak a. Hmarkhawlien khawsunga Miss Sikpui Ruoi Contest 2016-a khan Second Runner Up-a a lo ni ta bawk a nih. Kum 20na hmang mek Nk Melody hai sungkuo hi a Pa rawngbawlna leiin hmun hran hrana an lo khawsa ta hlak a. Jiribam le Aizawl-a hai lo khawsa tain Pawl 5 an chuk anthawk Hebrai Veng, Hmarkhawlien ah an um tan a. Hitaka hin sungkuoin an khawsa ta pei a nih. Miss Zofa International Contest 2018 a thang ding hin Melody chun application form a peklut ta a nih.
