Responsive Ad Slot

HPC (D) Chairman Pu Zosangber a thu hril

Monday, April 2, 2018

/ Published by Simon L Infimate
Vawiina, Hmar history mai ni lo, Zofate chanchina mellung pawimawh leh ni chhinchiah tlak leh hriat reng tur min hruaithlengtu, kan Pathian hnenah lawmthu ka sawi a. Thangkhat (generation) dawn lai, HPC(D) in Mizorama political movement kan nei chu Sawrkar, kan nu le pa dinhmuna ding ten, rilru zautak pua kan harsatna min hriatthiam saka hetianga Remna Thuthlung (Memmorandum of Settlement) ziak mai theih tur dinhmun min thlenpui ta mai hi, ka lawm tak zet a ni.

A hmaa inbiakna kan lo nei tawhte ang ni lovin tun tuma Mizoram sawrkar leh HPC (D) palai te inbiakna hi inrintawnna leh inunauna rilrua vawng reng chunga inbia kan nih avangin kan harsatna leh a chinfel dan tur kawng inrem ngei tuma an hmalak dan te fakawm ka ti takzet ani.


Suspension of Operation (SoO) leh Ground Rules hranpa pawh awm loa, Sawrkar leh Helpawl inbiakna hi ram dang le hmun danga hmuh tur leh hriat tur a vang khawp ang. Hetianga boruak thatak hnuaia inremna siam theia kan han awm ta hi a ropuiin a lawmawm a, History thara chuangkai chho niin ka inchhiar lo theih lo a ni. August 10, 2016 afanga vawiin, April 2, 2018 inkar chhunga inbiakna turn 6 (ruk) zet kan neih hun chhung zawng zawnga Sawrkar lam leh HPC (D) cadre te dawhtheihna leh inhriatthiam tawnna chhuanawm ka ti tak meuh a Sawrkar lam leh HPC (D) palaite chungah lawmthu ka sawi a ni. He ‘Inremna Thuthlung’ kan ziah theih nana kawng engkima min thlawptu mipui, pawl leh Kohhran te chunga lawmthu ka sawi bawk a ni.

He ‘Inremna Thuthlung’ atanga lo piang mek, ‘Sinlung Hills Council’ a lo than duana, kan beisei anga a Bial chhung mipuite chhawr theih a lo ni ngei theih nan Sawrkar nu le pa ten duhsakna nen theihtawp chhuaha hma min lakpui zawm zel ka beisei tlat a ni.

He inremna hi remna tluantling a lo nih a, ‘Sinlung Hills Council’ huam chhunga cheng mipuite hmasawnna kawnga kaihruaitu leh Mizoram mipuite inpumkhatna Siam tha leh zualtu ni ngei se ka duh in ka beisei tak meuh a ni.

Ka lawm e

(H. ZOSANGBERA)
Chairman
Hmar People’s Convention (Democratic)


State Guest House, Aizawl
April 2. 2018 (Monday)
Don't Miss
© all rights reserved
made with by Simon L Infimate