Responsive Ad Slot

HI-GHQ in Pherzawl Dist. mipuihai ngai pawimaw seng dingin ngenna a siem nawn nawk

Sunday, April 1, 2018

/ Posted by Simon Infimate
CCPUR, April 1, 2018, Virthli (ONP): March 26, 2018 a Imphal hmun a Manipur Health &Family Welfare Minister Pu L. Jayenta Kumar Singh in Measles Rubella (Sentut) Vaccination campaign a hawng chu Churachandpur Dist. le Pherzawl Dist. a khawm March 27, 2018 a inthawk Medical Staff hai hmun kilkhawr a hai inthawk suokin hmalak mek a nih a, chuonglai zing chun Pherzawl District sunga khuo ṭhenkhat a chun indik naw taka thu thedar a umin Narendra Modi in Kristien hai a suot tumna anga hril rik chu thu belchieng dawllo hulhuol le invet thlak thil a ni leiin ṭi loa hriselna ngai pawimaw a, hi Measles Rubella (Sentut) Vaccination hi sawrkarin a bithliek a siem anga mani taksa ah Doctor le Nurse sawrkarin a hung tir haia inthawk la ngei dingin Hmar Inpui, Gen. Hqrs. chun inhriettirna le ngenna a siem nawn nawk. Hieng ang thu belchieng dawllo le invet thlak thedartu hai hi an thil ching tawpsan hmak dingin HI-GHQ chun an hriettir a, an ching zawm pei a ni chun an chungthu la ngaituong a tih tiin HI-GHQ chun a hril.


Tlangram kilkhawr hai zo a hin CCPur khawpui sunga inchûkna In a hai khawm damdawi pek ni nawk an ta. Chun, khuo tin a hai khawm pek zawm pei a ni dinga hril tasa a nih. Hi hun a hin nu le pa le mitinin hi natna laka him theina dingin naupang thla 9 a'nthawka kum 15 chen hai chu hi damdawi hi an chang ngei ngei theina dingin lo ngaiven seng dingin HI-GHQ chun a nuom tak zet thu a lo hril tahsa a nih.

March le April thla hin hi natna hi a zuolkai bik hlak a, thlakhat sung hi natna dangna ding hin Medical Dept. chun hma a lak pei ding a nih a, chu khel ah hi zo a hin Routine Immunisation in a zawm ding le abiktakin Pherzawl Dist. tieng doctor le thawktu hai tlung zing zing a'ntak hlak leiin Social Media/Networking Site fethlenga inhriettirna le ngenna siem a um hi ngai pawimaw seng dingin HI-GHQ chun ngenna a siem nawn nawk bawk.
Don't Miss
© all rights reserved
made with by Simon L Infimate