Responsive Ad Slot

TALENT KAWL EI NEI SENG

Sunday, March 25, 2018

/ Posted by Simon Infimate
~ Jami Darngawn

Awleh, kum 10 vel liem tah a khan vawikhat chu ka nau lutir bu pek malam in TV ka en a, chu ka TV en chu Hollywood hai Award semna ani nghe nghe.

Chu Award dawngtuhai chu a changtunu/changtupa chauh an nawa misuola inchanghai dam le kawng dang danga part lo la hai chun an part lak hnesaw taka an inchang thiem lei chun Award an dawng a nih.

Chu Award semna ka en laizing chun Lalpa Thlarau Thienghlim chun keiah thu a mi hril ve a nih. Keikhawm ka nina talent dawng hi a chin tham em ema tu mihriet khawp khawm kan nawh ti ka chienga, sienkhawm inzapui lova talent mi petu Pathien dit dan ang taka ka thawpei ani chun nakie hi khawvel ka suoksan pha Van Jerusalem khawpui thara mi thienghlimhai lai ka um ve pha chu Lalpa Pathien chun thaw dinga a mi ti hai inhawk tak le huoisen taka ka thaw ani chun, A ma chun lawmman ka phutawk chu a mi pek ngei ding a nih ti chu ka chieng hle a nih.

Matthai bung 25 chang 14 a'nthawk 30 chen ei tiem chun talent peka um thu ei hmu a nih. Talent 10 dam, 5 dam, 2 dam an dawng tawla. Chun, pakhat peka um pa khan a sukpung naw leiin a petu a pu a lungawinaw hle el a, chuongchun a talent kawl chu lakpekin aum a, mi danghai pek belsain a um a nih.

Chang 30 na chauh hang suklang ei tih.
" 30. Chun siehlaw țhahnemnaw kha tuol tieng inthima chun peidawk ro. Chutaka chun țap le harawt chu um a tih, a ta,’ a dawn a"

Talent pakhat dawngtu sukpung nuomlo pa kha a chan ding a va rapthlak awm ngei maw ! Chuongang bawk chun nang le kei khawm ei talent kawl hi sukpung lova ei um ani chun ți ava um awm de ! A mi petu Lalpa chun ei thei tawk seng ding A mi pek seng a'na, ei talent ei hmusit alo ni chun ei chungah Lalpa Pathien a lawm naw hle ding a nih.

Diktak chun keikhawm a chang chun ka talent dawng hi kan sit chang a um ve hlak, a chang chun sukpung ka pei naw hle hlak a nih. Sienkhawm ka pei nawa ka thaw naw ani chun Bible a ei hmu talent pakhat kawlpa ang kha ka ni ding a nih tîn kei le kei kan suk hrat fawm hlaka, ka thaw fan fan/hram hram hlak a nih.

Tiemtu ditum tak nangkhawm i talent kawl kha i lo sukpung hle ta khawm ani thei a chuong ani chun lawm a um hle. Amiruokchu kei anga i talent dawng/kawl kha i lo inzapui dam alo ni pal chun a pawi hle ding a nih, chuleichun tu hi ahun a nih ei talent kawl/dawng hai chu inzapui lovin Ami petu Lalpa Pathien ropuina dingin sukpung pei ei tih aw ?

Talent sukpung dinga mi petu LALPA PATHIEN chun i talent kawl hai i sukpung pei theina dingin taksa le thlarauah malsawm mawl raw sen che. Amen.
Don't Miss
© all rights reserved
made with by Simon L Infimate