Responsive Ad Slot

Minister/Bieltu MLA le MDC Rengkai khuo tadinga an hmalakna; 80th Rengkai Day le 3rd Edition Rengkai Premier League Final, Muolhlum SC hrattak

Monday, March 26, 2018

/ Posted by Simon Infimate
CCPUR/RENGKAI, March 26, 2018, virthli (ONP): Rengkai Village Authority/Val-Upa hai leh Friendship Athletic Sporting Team (FAST) thangruol a huoihawt The 80th Rengkai Day -cum- The 3rd Edition Rengkai Premier League (Football) Final chu March 23, 2018 khan Rengkai Playground, CCPur ah dar 11:30 AM a inthawk intanin sun le zan hun haiah puithu le hlim taka hmang a nih.

Hi ni sun huna Chief Guest dinga ti Bieltu MLA, Pu V. Hangkhanlian, Minister (Agri., Vety. & AH) chu hi ni a India-Manipur Sawrkar le United Naga Council (UNC) hai inbiekna (Tripartite Talk) hun a Manipur Sawrkar palai le a’n rawitutak a nina leiin ama taksa ngei thang thei ta naw thut sienlakhawm ama aiawin a nuhmei Pi (Dr.) Kimboi thangin a naupa Pu (Tv.) Sumlianding le mi dang dang mi 26 laiin anni hnung hi an zui a nih. Chief Guest in hieng ang hun a fiel a a umna chu lawmthu hrilin, a thuhrilna a chun a pasal Pu V. Hangkhanlian in hril dinga a i ti hai po chu a hril a ni thu mipui fekhawm hai hmaa a hrilfie zoin MLA election huna hlawtlingna chang thu chungchang a chun Committee neina hmasatak khawm a biel Rengkai a ni thu a hril a, a ngasak hle thu hrilin, sawrkar a inthawk sanction la um naw sienkhawm thei ang anga a hmalakna hai le a sin thaw lai zing hai a hrillang a. Chuonghai laia chun Rengkai khawsunga lampui seitak Rengkai-Muolhlum Road chu March thla sunga black topping a siemna ding sin tan a ni ding thu, Rengkai-Shanveng Road khawm lampui siem hmasak ding hai laia a thang ding thu, Waiting Shed bawl a ni ding thu, Rengkai Playground chu Khelo India hnuoiah sukhmasawnna dinga DPR khawm peklut a ni ta thu, Rengkai khawsung ngei a Bank ATM sie vat a ni ta ding thu, PHSC Proposal hai khawm buoipui mek a ni thu le khawsunga Organisation tum tum haiin thaw nuom an nei chun MLAD Fund a'nthawk ngaituo a ni ding thu a hrillangsa bawk.

A hril peinaa chun Pi (Dr.) chun ama a piengna pa ngei khawm Buongpilon khawsuok niin Pherzawl a khawsa hlak le Hmar tawng a thaw hlak thu hai hrilin Paite lai Valte chu Hmar laia Varte hai anni thu a hril a, Rengkai chu a khuo a a ngai thu hai a hril bawk.

Hi ni sun hun a Guest of Honour Bieltu MDC Pu M. Gouzamang Guite, MDC, ADCC khawmin Rengkai khuo ta dinga a thei tawp a hma a lak ding thu hrilin Rengkai Playground sukhmasawnna ding le Waiting Shed bawl dan ding chungthu hai a hrillangsa bawk. Rengkai khuo hi a khuo mi le mi tam takin uksak lo a ngai le bieltu hai chunga lunghnuol hman tah tam tak um hai sienlakhawm hi hun a Minister/Bieltu MLA le MDC hai thu hril le thutiem hin a suk lawm hle a, hmatieng ah a hung puitling hun ding nghak hla hlein an lo ngaiven hle a nih.

Sun hun a bawk hin Functional President in Pu Lalhmangpui Fimate MDC, ADCC le Chief Host in Pu JC Chongkholien (Chief of Rengkai) hai an thang a, thuhrilna hun an hmang bawk. An thuhril hai chun mipui fekhawm hai lungril a hne hle a nih. Chief of Rengkai hi a thuhril lai Rengkai Pasaltha, Lal Vengtu bik umin anni hai hin Tv. Immanuel Lalneisang Secy., Art & Culture, HYA Rengkai Branch a rawiin an veng a, mipui hmu nuom an hlaw hle a nih. Chun, Rengkai khawsung a tlawmngai pawl HYA hun pek an nih a, Pu H. Samson President, HYA Rengkai Branch in hi huna a thuhrilna a chun HYA Rengkai Branch hmalakna tlangpui le tuta HYA Rengkai Branch in Oxygen Cyclinder an nei chu a hmang dan chungchang le damnaw a sawrtu an tam tah zie hai hrilin hi ang Oxygen Cyclinder inchawkna dinga kut rawl nuom hai chun rawl thei a ni ding thu hai a hril bawk.

Television Manmasi Cable Network, Angels Vision, Hornbill Cable Network, SkyNet Media haiin a hmun ngei ah coverage thawin Manmasi Cable Network le Angels Vision in Live Telecast an thaw a. Angels Vision lem chun YouTube ah an peksuok leiin khawvel hmun tum tum haiah an lo thlir thei pha a, huoihawttu hai kuomah lawmthu mi tam takin an hril pha bawk a nih. Media Coverage a tha em em a, Printed & Electronic Media tum tum haiin an coverage tha hle a, mipui ngaiven khawm a hlaw tha hle a nih.

Veteran Artiste Pi Buongthangpui & Tv. A. Donald, Nk. Lawmnakim Hrangate (Zomi Idol, India 2015), Nk. Jenifer Nianglawmkim, Pi Roslyn Lalumpui (International Singer), Nk. Hossanmawi Songate haia inthawk hla ngaithlak le Cultural Show HYA Rengkai Branch hai a'nthawk suklang a ni a, mipui na le mit a tlai hle.

Hun hmang zawm pei niin zantieng hun a chun The 3rd Edition Rengkai Premier League Final 2018 Kick-Off Pu (Tv.) Sumlianding S/o Bieltu MLA, Pu V. Hangkhanlian, Minister (Agri., Vety. & AH) in a nei a, Final Muolhlum SC le My Foot FC in an inkhel a, Full Time a an inkhelin 1-1 in an in draw a, Penalty Kick an nei hun a chun Muolhlum SC in an khingpui My Foot FC chu 5-4 a hnein hrattak nina an lo chang tah a nih. Tuta The 3rd Edition Rengkai Premier League nei a um a hin team/club 8 an suok a, final chen ah match 31 inkhel a nih a, kha hun sung khan Indian Super League (ISL) Club FC Pune City U-18 le NE United FC U-15, Liverpool India Academy haia player suongum tak tak khawmin an hung khel ve a nih. Anni hai baka hin I-League Club, District le State League, National, International player khawm hril ding an inkat ve deu nak a nih. Hi Final huna goal scorers hai chu John Khuongpui (13) My Foot FC, 64" le Joseph Varte (9) Muolhlum SC, 90" hai an nih.

Mimal a lawmman dawngtuhai chu- Man of the Match: Joseph Varte, Muolhlum SC (*Gift- Vivian's Collection, Rengkai Road, CCPur); Player of the Tournament: Immanuel Lalthlenglien, Muolhlum SC; Best Goalkeeper: Lalremliana @Rem Rem, Muolhlum SC; Best Player: Daniel Khuongpui, My Foot FC; Emerging Player: Henry Muan, My Foot FC; Top Scorer: Lalrintluanga, Zawlbuk FC (9 goals) le Best Discipline Team: Zawlbuk FC hai an nih.

Indian Super League (ISL) Club FC Goa player le an Defender Tv. Chinglemsana le a ruolhai khawmin hung uop vein an suk thupui hle. Ama hi a hmain Delhi Dynamos a khawm lo play ta hlak niin chu hun lai chun ISL Champions an lo ni tah a nih. Ama sum ngei thil Emerging Player: Henry Muan, My Foot FC kut ah inhlanin huoihawttuhai kuoma khawm thilpek a'n hlan bawk. Henry Muan hi a nih Liverpool India Academy a seilien le RPL suk phuisuitu player suongum laia mi chu. Hi hun sunga player suongum tam tak hai leiin 4th RPL hun ding chu mi tam tak lo nghakhla a ni pha ta pei a nih.

The 80th Rengkai Day -cum- The 3rd Edition Rengkai Premier League (Football) Final hi Rengkai Village Authority/Val-Upa hai leh Friendship Athletic Sporting Team (FAST) thangruol a huoihawt a ni zing laiin The 3rd Edition Rengkai Premier League (Football) tak hi chu FAST bik lieu lieu in Rengkai khuo a Club lientak le upatak tah, 1977 a indin Rengkai Athletic & Cultural Club (RACC) hrietpui a kum 2016 a inthawka kha an lo huoihawt tan tah a nih. Tu kum hin Rengkai khuo a kum 80-na a ni bawk tah leh khawtlang thuoitu le lal hai hrietpui le remtina ngeia, anni le thangruol le an peksuok anga huoihawt a nih a, chu chu sukpuitling a hung ni tah a nih. Rengkai khuo hi football tienga hmasawn hrat ve tak el khuo an nih. Tukhawm hin District, State, National aiaw a inkhel an um mek a nih. Bieltu MLA le MDC haiin an thiltum an hlawtling chun hma an la sawn hle dingin beisei a um.

Zan hun ah chun thu le hla a insuk khawp a nih a, hlasakthiem inlar tak tak Nk. Christina Shakum, Tv. Jai Jai Singsit, Tv. John L. Varte, Tv. JJ Hrangchal, Da Deserters (1st Hmar Punk Band), Snumb Crew, Beauty & Beast (Winner of the 1st CCPur Dist. Level Summer Jam) hai bakah Artiste le Live Band tum tum haiin mipui hla'n an inawi a, hlasak thei lo le a a music rem thiem ve naw hai khawmin lam tieng pangin an lo zawm ve a nih. Rengkai Playground ah mipui an bit hne hle a, hieng ang hun hi Churachandpur khawpui sung a chun huoihawt in a um in khat hle bawk leiin a hrie phak taphawt an fekhawm a, mipui an thahnem hle a nih. Zan hun khawm hi Manmasi Cable Network chun Live Telecast a thaw a, an subscriber hai an lawm hle a nih.

Chief Guest in Pu T. Romeo Hmar (Convenor, MTFD & Brand Ambassador, Kaziranga University), Guest of Honour in Rev. Joseph R. Joute (Director, For One Life, Asia), Functional President in Pu H. Lienhmingthang (Manager, M/s Kim Joe Gas Agency) a thang a, Special Guest in Pu Lalropui Famhoite (Chairman, UPF) a thang bawk. Anni hai ainthawk thuhril ngai thlak a nih a. An thuhril haiin mipui fekhawm hai a suk bengvar hle.

Hi hun hlawtlingna dinga thil tul dang dang tam tak um haia thangpuitu le sponsortu hai popo kuomah huoihawttuhai chu an lawm hle a, a hranpa taka lawmthu hrilna la hung siem ni dingin an hril.

Hieng hun haia Guests le Chanvo pawimaw chang hai chu huoihawttuha'n thilpek an inhlan a, huoihawttuhai khawmin thilpek an thei ang angin an inhlan ve.

Don't Miss
© all rights reserved
made with by Simon L Infimate