Responsive Ad Slot

HPC (D) palaihai Aizawl tlung, ṭawngṭaipekna nei

Wednesday, March 7, 2018

/ Published by VIRTHLI
Aizawl, 6 March, 2018, Virthli (ONP): Mizoram sawrkar le inbiekna a ṭhang ding HPC (D) palaihai chun vawisun March ni 6 khan Aizawl tluong takin an hung tlung.
Aizawl an hung tlung hnung hin, Mizoram tieng anthawka palai dinghai leh HCLF hmalakna in EFCI Aizawl biekin ah an puolin hun hmang a nia, Rev. Ramchuoilo Varte, Presbytery Secretary, ICI chun infuina thucha hrilna le an ta dinga ṭawngṭaipekna hunser a nei. Hi huna hin hnam ṭhuoituhai bakah mipui ṭhahnemtak an ṭhang.

Palaihai hi HPC (D) working chairman Pu Lalthanglien @ LT Hmar in anrawia, spokesperson dingin Pu Lalṭhalien ning a tih.


Zing March ni 7 a political level talks hmasatak neina dinga khin palai 11, Manipur anthawk mi 4 le Mizoram anthawk mi 7 thlangsuok annia, amiruokchu Pu Thangliensung, Sakawrdai chu taksa bawrsawmna leiin inbiekna dinga hin a ṭhang thei ta naw ding thu, Pu Lalṭhalien chun ei palai a hril.
Zinga inbiek huna hin Sinlung Hills Council bill draft le MoS draft hai chu hriltlang ning a ta, hi huna hin HPC (D) palaihai chun siemṭhat (ratification) ngaihai intlun an tum thu ei thulakna chun a hril.
Ratification thaw dinga hin member election le inzawma qualification chungchang hril lang ning a ta, demand area ah non-tribal vote nei khawm an lo um nuol ta leiin tribal chau MDC a thlang thei dinga rawtna palaihai hin pulut an tum bakah 1994 peace accord chungchangah 'supersede' term chu hmang naw dan (alternative) lampui zawng dingin sawrkar palaihai ngen an tum bawk niin, thulakna chun a hril.

Hi baka hin technical issue hran hran intlun tum a nia, SHC in 'transfer of subject' a nei thei dan ding le Legislative power le executive power chen a nei thei dan ding baka SHC area chin ding khawm specification ṭhataka siem dinga ngen an tum thu, Pu Lalṭhalien chun a hril.
Inbiekna hin raṭha an suo ngei an beisei thu, a hril bawk a nih.

Hi lai zing hin palai laia ṭhang ding Pu Lalvenhima Hmar, tuta Hmar Inpui, Mizoram region president ni lai mek chun party nekin hnam rawngbawl chu thilpawimaw lem nia ngaiin Mizo National Front (MNF), General headquarters a adviser a nina le member a nina chu vawisun khan hnam ta dingin inbanna a lo thelut ta bawk a nih.
Don't Miss
© all rights reserved
made with by Simon L Infimate