"Ka damsan hi iem mana ?" Mi tamtak chun damsan chi dang dang nei seng ei tih, kei khawm ka damsan nia ka hriet chu Lalpa rongbawl hi a nih.
Joshua chun "kei le ka sûnghai ruok chun LALPA rong a nih kan bawl ding" Joshua 24:15.
A lo ti angin, nang le kei khawm Pathien nau eini chun, ei Pa rongbawl chu ei damsan ding ni awm tak a nih. Amiruokchu ei rongbawl dan ruok chu inang vawng ker naw nih ti ei hriet.
Kum 10 vel liem ta a khan vawikhat chu dammaw țawngțai pek dingin an mi ko a, ka naute maksanin ka pa motor ka hmanga ka fe tah a, lampui chu ruosur leiin lampui a lovin nal/țhanaw hle a, Lalpa kuomah lampui țhanawa inthawka mi venghim dingin ka hni a, ka fe tiengchu țhadeuin ka fe thlengtheia ka lawm hle a, damnaw țawngțaina hun ka va hmang khawm chu anhawi hle, mi dang dangkhawm an hung sapei leiin ringnekin ka va um sawt tah a, ka pa fena nei ding le ka naute maksan chun ka lungril a hluosip bawk, inthlak hla tak pumin intieng inlawi ding chun ka hungkir taha, lampui sietna bawk chu ka huphur em em a ka țawngțai nawk taha, Lalpan a mi țhangpui beiseiin ka hang tlan nawkel taha, kan ringnaw kar chun lampui laia chun ka tlu el tah a, mi hai chun an mi hung keithova ka motor khawm chu tlan thei țawk țawkna ani lei chun ka la tlan thei hram a, motor workshop a chun ka sie tah a, chutaka ka lungril hang sawl em em ziet chu aw !!! Hril hin a phak naw ani deu tak a nih.
Țawngțai dan khawm ka hriet ta nawh, invet angin ka um a, ka en na tieng tieng chu a ping chur el a nih. Kha hun lai tak khan mi khawm ka hmu ngam naw ani deu tak, inngai sie em em le beidawng em ema mi bangkil a ka motor insiemtir nghaka ka ngir lai chun rawl innem riei in "LALPA rongbawl hi i nuom tak tak am ?" Ti a mi hung bietu um angin ka hriet a, kei khawma "Aw ka nuom" ka tia, chutaka chun ka umdan a hung inhawi hiei hiei tah a, ka motor an siemzo ta lei chun intieng ka fe thei hram tah a nih.
Awle, Lalpa hratna ringsanin kei khawm ka thei angtawk le, ka phak tawk chin ahai Lalpa rong ka lo bawl ve na a hin, vawisun chen hin harsatna le malsawmna inzat rawngin Lalpa'n a mi țhuoi ve niin ka hrieta. A changchun ka țawngțaina dam hi a dawn ngai nawha a to vung vung chang a tam hle, a changchun ei hni hma hma hin ei lungrila ei ngaituo ringawt khawm hi a hrieta a mithawpek chang hlak bo lo, ei Pathien hi chu alo va ropui ngei de !
Nikhat laikhan khawmkhan thuziekna hunawl ka nei a, vawi 2/3 chu ka Bible le ka mobile le thu ziek tumin țhang ka lak a, sienkhawm ziek ding um țhak lo chu ! Lalpa chu ka ko khawma a to vung vung el a nih. Rinum ka ti taluoa "Lalpa iem ka thaw suol ?" ka ti zakel a nih. Nie, nuoma Pathien thu hi ziek/hril mei mei chi an nawh. A man a mi peknaw chun a thei lul naw a nih. Ka țhahnemngainan ziek hram ka tum changkhawm a mi pek naw chun athei nawh a, amiruokchu hun inteptak lai ka sinthaw buoi em em hun nisien khawm Lalpan thuziek ding a mi pek chun ka zieknaw thei ngainaw a nih. Mi hai angin sermon ropui tak tak le hrietna insang em em neinaw lang khawm, Lalpa mi țhuoina/țhuoidan hai hi hmusit um hle sienkhawm a ma ropuina dinga ziek/hril hi ka thawthei ve sun ani leiin Lalpa ropuina dingin ei hung suklang a nih.
Lalpa rongbawl hi insir a um ngai nawh. Ei theina zawn sengah nasa nawkzuolin țhanglang ei tiu aw ? Setan le a rawihai chun chawl lovin sin an thaw a, nang le kei khawm nikhat khawm chawl thei ding ei ni nawh ti hriezing pumin le Lalpa rongbawl hi ei damsan a nih ti hriezingpumin Lalpa ei Pathien rong țhahnemngai takin bawl seng ei tiu khai.
