Responsive Ad Slot

HYA 12GC-HTS Rolling Trophy Football tran

Monday, October 23, 2017

/ Published by VIRTHLI
HYA 12GC-HTS Rolling Trophy Football tran: HYA, Rengkai-B le HYA, Muolbem ha'n a'n khingpui hai 2-1 le 3-1 a hnein hratna an chang, Daniel in hat-trick a siem

CCPUR, October 23, 2017, Virthli (ONP): HYA 12th General Conference, 2017 le inzawma HT Sangliana Rolling Trophy Football & Volleyball chu Oct. 23, 2017 chawhnung tieng khan Sielmat Playground ah tran a lo ni tah. Pi Lalthazam MCS, SDO Saikot chun Chief Guest niin a Kick-Off a, Pi Laihlizo DTO, CCPur chu Guest of Honour le Pu Lalvullien Hmar, President, HAA GHQ chu Functional President in an thang bawk. Hi hun a an thuhrilna haia chun hieng ang hun a fiel a an umna le hieng ang huoihawt thei a aum chu lawmum an ti thu hai hril tawlin hi hun a mipui fekhawm, inkhel ding hai le HYA member hai chu infuina tha tak tak pein Organising Committee kut ah thilpek an inhlan tawl a, Organising Committee khawmin lawmthu hrilna'n Memento an inhlan ve. Hi hun hi hnam sunga pawl tum tum a thuoitu ha'n an uop a, Nk. Gloria Khawlhring le Nk. Cindy Lalruotmawi Inbuon ha'n mipui hla'n an in awi a, Pro-Pastor Michael le Rev. Zothanghrim Zote ha'n hun hawng le hun khar tawngtaina an nei a nih.

Opening Football Match 1st Round a chun HYA, Rengkai-B in HYA, Muolvaiphei-B chu 2-1 in an hne a. 2nd Round a chun HYA, Muolbem in HYA, Thenmuol chu 3-1 in an hne bawk. Hi inkhelna hun a hin Daniel (jersey no. 14), HYA, Muolbem chun goal 3 thunin hat-trick a siem a nih. Ama hi hat-trick siemtu hmasatak a nih.

Opening Match a hrat hai ve ve HYA, Rengkai-B le HYA, Muolbem hin Oct. 25, dar 3:00 PM in Quarter Final, Sielmat Playground ah an inkhel ding tina a ni tah. Hi football inkhelna a hin HYA Branch tum tum haia inthawk team 16 an suok a nih. Hieng HYA Branch tum tum a inthawka team hai hin Oct. 24 in dar 1:30 PM & 3:00 PM hai ah Sielmat, Saikot le Saidan Playground ah inkhel an ta. Oct. 25 in Quarter Final dar 3:00 PM in Sielmat, dar 1:30 PM & 3:00 PM in Saikot le dar 3:00 PM in Saidan Playground hai ah inkhel an ta, Oct. 26 in Semi Final dar 3:00 PM in Saikot le Saidan Playground hai ah inkhel an ta, Oct. 30 dar 3:00 PM in Final, Sielmat Playground ah an inkhel ding a nih.

Volleyball inkhelna ruokchu Nov. 1-in ni khamin huoihawt ning a ta, hi taka thang ding player list pelut an um mek a, a la pelut lo Branch hai chun an hmatienga player list pelut ding le hun/dar bi induonga um ang taka vawng dik seng dingin Organising Committee chun inhriettina le ngenna a siem a, HT Sangliana Rolling Trophy hmanga HYA Branch tum tum hai Football le Volleyball a insukhlimna huoihawt a um a hlawtlingna dinga hmalatuhai popo kuom ah Organising Committee le HYA GHQ chun lawmthu a hril bawk.

24/10/2017 MATCH FIXTURE
1:30pm Saikot v/s Lamka-B
*Venue: Saikot Playground
3:00pm Muolvaiphei-A v/s Khawmawi
*Venue: Saikot Playground

1:30pm Thingchom v/s Rengkai-A
*Venue: Sielmat Playground
3:00pm Sielmat-A v/s V&K
*Venue: Sielmat Playground

1:30pm Lamka-A v/s Hmarveng
*Venue: Saidan Playground
3:00pm Saidan v/s Sielmat-B
*Venue: Saidan Playground

Don't Miss
© all rights reserved
made with by Simon L Infimate