Responsive Ad Slot

Doiheng (Dâwiheng), NC Hills, Assam

Wednesday, October 25, 2017

/ Published by VIRTHLI
Doiheng (Dâwiheng) kho hi khuo upa ve tak el tah NC Hills (Dima Hasao ni tah) Assam ram a um a nih. Faihriem pahnam hai khuo hluo ani a Lal (Gaon Bura) a inthuoi an la nih. An lal hai hin British hai hun lai a ram neina lekha an pêk chu anla kawl zing. Haflong a inthawka 22km a hla, Retzawl- Amranagar (Cachar) road, Borail tlang dung inzar pei tlang insâng deu a um a nih. Khuo hmun hi vawitam tak lo insawn ani ta a Dâwiheng khuo hming hi kum 1802 anthawka hung put tan a nih. A khuo hming umzie hi Thado (Khawsak) tawng a “Doi hing” (Dâwi hring) tina a nih. Dâwi anlo thiem bîk hle hlak leiin ‘Dâwi hring hai’ ti a unau khawsak (Thado) ha’n an lo ko hlakna hi an khuo hmingin an hung nei pei a, chu hming chu hung lam suol met a ‘Dawiheng’ hung ni tah a nih.

Kum 1953 khan hi khuo a hin Christianna a lût tan a, vawisûnni chen hin a khuosûng mi hai hi biekin pakhata inlâwi an nih. Tuhin Dawiheng khuo a hin in 50 an um a, sawrkar LP School, ME School le Private School pakhat a um a, khuosûng hi Rural Electrification ti a hun sâwttak sawrkarin hma a lâk hnungin electric eng chu kum 2017 kum bul khan an lo hmu ve tah. A khuosûng mi hai hi lo sinthaw le thing ât a fâkzawng anni deu tak.

A khuo hi a lien naw hle lai zingin hming a nei ve nuol a, en ding le hmu ding khawm a um nuol bawk. Kumtin Thlazîng (August) a’nthawk a Changer Thla (October) chen a hin vate mawi tak tak, chi tamtak hai an hung vuonglût ve hlak a, nasatakin man khawm anlo man hlak a nih. Hi thil tlung hlak le inzawm hin Assam sawrkar chun ‘Tourist Rest House-cum- Bird Watching Centre’ khawlailung laitakah in inhawi deu el a bâwl a nih. Vate vuong invâk vel hlak hai fuk khawmna hmun pawimawtak a hung ni ta a, NC Hills a Jatinga an ti hmun neka an tam lem zie khawm hung hriet thar pei a hung ni tah.

Chun, Pi le Pu hai lo inthâwina hmun hai le an dâwi hmun thatak tak a anlo siem hai khawm hmu ding ala um bawk. Dâwiheng khaw kâwl Buongpui vadung an ti a chun ‘Sumpa luong’ lung mihriem ang a hmelhmang put nupa an um a, chu lung hai chu Feet 100x30 bâwr vêl a sei le lien vakam a zâl an nih. Inhma lai deu met khan nuhmei nu hin nuhmei dân ang khawm thlatin a nei hlak a, amiruokchu hun iem ani chen a’nthawk ta khan chu a um ta ngai nawh. Hi taka nuhmeinu hi tienlâi a’nthawk ta khan a chanchin, hieng ang a hung ni dân hi anlo hril hlak.

Dâwiheng khuo a’nthawk hin ei chanchin iemani zât le hi ram a eilo khawsakna a sâwt tâk zie a suklang a, NC Hills Hmar khuo a chu a upatak dawt a nih.

Source: Inchuklai Nun
Don't Miss
© all rights reserved
made with by Simon L Infimate