(Virthli = VT, Esther L.
Infimate = ES)
VT: Inchukna tienga I
hlawtlingna leiin tulai mi hril huoi huoi I hlaw a, chu le inzawmin Virthli
(online news portal) in hun tawite hohlimpui che kan nuom a, hun I mi pek thei
ding am?
ES: Aw, thei e ah!
Hohlimpuina in mi nei nuom leiin Virthli (online news portal) chungah ka lawm
a, hi chen mi thuoitu Pathien kuomah ka lawmthu ka hril bawk.
VT: Awleh, a hmasatakin I
hming tluonsuok, in khuo le I sunghai chanchin I mi hril thei ding am?
ES: Ka hming tluonsuok chu
Esther
Lalnunnem Infimate a na, ka pa Ramtharnghak le ka nu Niangngaihvung hai an nih.
Ka pieng hun (DOB) chu 16th September 1993 a na, kan umna (permanent
address) Hebron Children Home, Diphu, Karbi Anglong, Assam a nih. Unau piengpui
pahni ka nei a, kei a mi lai tak ka na, ka U le ka sang chu pasal ve ve an nih.
Ka sang James Infimate chu tuhin Class-X an chuk mek a, ka U George L. Infimate
chu Modal Medical Transcription, Bangalore ah sin a thaw tah. Ka pa chu Covenant
High School, Diphu a Office Assistant sinthaw a na, ka nu khawm Covenant High
school, Diphu a bawk Accountant sinthaw a nih.
VT: School I kai tana
inthawka inchukna insangtak inchukna hmun, Class-X a inthawka chungtienga I
position hai I mi hril thei ding am?
ES: Covenant High School,
Diphu ah Nursery a inthawka Class-X chen ka zo a, 2009 kum khan SEBA hnuoiah HSLC
2nd division (55%) in ka passed. Rayburn College, Churachandpur ah
Arts subject la in HS ka zawm nawk a, 2011 kumin MIL ah letter mark (68.7%) hmu
in 1st division in ka pass a, Manipur Tribal Affairs in 60% chung
hmu hai laia a thlang suokhai a pek hlak kum 3 sung Merit scholarship Rs.
12,000 a mi pek bawk. BA ah Geography major la in Diphu Govt. College ah ka zawm
nawk a, 2014 kumin 69.99% hmu in 1st division 1st
position in ka passed a, Diphu Govt. College ah ansangtak ka ni leiin Assam
University, Silchar hnuoia Gold Medal an min hlan a nih. MA chu Assam
University, Diphu Campus, Department of Geography hnuoia 2016 in 1st
division 65.5% in ka zo bawk.
VT: Tuta I ngirhmun,
inchuk zing am sin zawng mek?
ES: Tuhin NEHU, Shillong
ah PG Diploma in Geoinformatics (GIS), Department of Geography kan chuk mek a
nih.
VT: I hlawtlingna thuruk I
mi hril thei ding am?
ES: Ka hlawtlingna thuruk
chu lekha tiem rawn lei khawm a ni ka ring naw a, asanchu, lekha hi ka tiem
rawn tawkin ka hriet naw a, amiruokchu, lekha hi hriet tumin ka tiem hlak. Tiem
rawn lei el nilovin lekha tiem inhnik khawm hlawtling niin ka hriet. Inchuknaa
mi hlawtling ni ding chun hrisel khawm a pawimaw in ka hriet a, mihriem
hriselnaw chu inhnikna khawm an nei tlawm a nih.
VT:
Inchuk
hun sung hin social thil le Kohran-ah in hmang hlak am? Nina dam chel I lo nei
hlak am?
ES: Puitling Sunday
School a ka luta inthawk ka theitawpin social thil le Kohran-ah kan hmang ve in
ka hriet a, kan chukna ruok chu a sukbuoiin ka hriet chuong nawh. Social le
Kohrana inhmang hi inhawi ka ti a, inhnik khawm kan hnik hle. Lekha inchuk
ringawt hin thil a sukfamkim vawng naw niin ka hriet.
Social le Kohrana nina chel ka lo
nei nuol tah. Diphu RPC thalai pawl-ah kum 4 sung Finance Secretary sin ka thaw
a, RPC Diphu Choir ah Treasurer sin ka chel ta bawk. Chun, HSA, Diphu-ah kum 4
sung Finance Secretary mawphurna ka lo chel ta bawk.
VT: Inchukna tienga I
hlawtling leiin Assam Governor in Gold Medal an hlan che ti kan lo hriet a,
Medal hi iengtik huna I dawng am? Assam state sungah hieng ang chawimawina hi
thaw zing hlak a ni am, kimchang deuin I mi hril thei ding am aw?
ES: Ka hril ta angin Gold
Medal chu 2014 kuma Diphu Govt. College a Geography topper ka ni leia ka dawng
a na, kha kum khan College a inthawk inhriettirna ka hmu vat naw leiin Medal hi
ka lak thei naw a. Tukuma Convocation nei huna khan MA a mi apply in BA ka zo
huna Gold Medal chu ka dawng thei chau a nih. Hi chawimawina hin Merit
Certificate le sumfai Rs. 1,000 a sawm.
VT: Hlawtlingna I changna
dingin ieng angin am thang I lak, nikhat sungin lekha tiemna ding darkar bi
thliek dam I nei hlak am?
ES: Hlawtlingna chu mi po
poin ei beisei seng a, chu hlawtlingna chang ding chun kei khawm thang ka lak
nasa hle a, lekha ka tiem ta vek chun inhnik takin ka thaw hlak. Darkar bi
thliek ka nei nawh a, nikhata ka lekha tiem hun sung tak khawm hril a harsa ka
tih. Asanchu, routine siema bawzui hi an tak ka ti leiin, kan hman hun hunah
lekha ka tiem el hlak a nih.
VT: I hlawtlingna dingin I
sunghaiin ieng angin am an thangpui hlak che? Mi hlawtling ni dingin an thlawp
tho che in I hriet am?
ES: Ka lekha inchukna a
hin ka sunghai in an mi support hle in ka hriet. Ka nu lem chun a mi ngaisak
hle a, zana khawm ka lekha tiem chen chen a mi mengpui hlak a, result a suok
huna khawm ka nek nekin ka sunghai an lawm lem hlakin ka hriet. Tuchen hin hlaw
dawk iengkhawm ka la nei nawh a, ka sunghai pawisa lam hi a tam lem kan chukna
tieng a fe in ka hriet. Nuhmei umsun ka ni leiin kawng iengkima hin an mi
thlawp hle a nih.
VT: I thiltum (aim in life)
I mi hril thei ding am? Chu thil puitlingna dingin ieng angin am in buotsai
hlak a?
ES: Tuchen a ding chun
aim in life tak hi ka la nei naw a, sawrkar sin zawng hi ka tum tak a nih. Thei
chun further study khawm ka la tum pei bawk.
VT: Lekha thiem thei tak
tak PG course chen zo hai khawm sin hmulo an um nuol a, chuleiin mi thenkhatin
“inchuk thiem le inchuk insang nazawng sin neina an nawh” an lo ti hiel a, hi
le inzawm hin hril nuom I nei am?
ES: Aw, an hril chu an
dik ka tih. Mi tam tak inchuk sanga sin hmulo an tam, kei khawmin ka hriet rawn
a, mi personal life chu ei zu hril thei chuong nawh. Anachu, ka ngaidan a chun
mihriem ei inang seng naw a, a vangnei bik le support tha tak nei khawm ei um.
A nei deu hai ta ding chun inchuk sang lo sin hmu nghal thei khawm an um tho. Chuleiin,
hi thua ka ngaidan chu mani le family a innghat niin ka hriet.
VT: Anle zuk bei chawt
inla, ngaizawng I nei ta hlak am? Inchuklai le ngaizawng nei hi inkalna umin I
hriet am?
ES: Hahaha.... Aw nei ve tah...
inchuklai le ngaizawng nei hi iengkhawm an kalna umin ka hriet nawh. Kei ka
personal a ding chun lungril pek dan izir a nel. Thenkhat chun ngaizawng nei
leiin lekha tieng chau pha na’n an hmang el thei, amiruokchu, keia ding chun ka
lekha inchukna a mi sukchau pha chuong nawh.
VT: I pasal ditzawng I mi
hril thei ding? “hmar val ngei” ti’n sungtuona dam I nei ta hlak am?
ES: Ka pasal ditzawng chu
Kristien mi indiktak ni phawt sien, Kohran a inhmang mi tak, mifel, zaidawthei,
mi taima, bengvar, inruithei thaw lo mi, nu le pa hmangai mi…
‘Hmar val ngei’ zuk ti khawma
keini lai chu hmar tlangval an tlawm khawp el, unau anga in-en vawng kan nih.
Hahahaha...chuleiin, hnam a hin mi ka thlier bek bek nawh.
VT: Inchukna tienga
hlawtlingna I chang theina dingin fak le dawn dam insum I nei hlak am? I hme duzawng
dam hriet nuom a um ngei a?
ES: Fak le dawn kawnga
hin chu fak ka du bawk leh insum ka nei nawh, chubakah ka nu thlai suong a
thiem bawk le a hme suong chu ka du vawng. Ka hme duzawng chu tlangmi ei ni
bawk leiin vai hme hi chu ka du bek bek naw a, chi-al hme le hme but hai hi a
tlangpuia ka hme duzawng an nih.
VT: Khawvela I mi
ngaisangtak I mi hril thei ding? Iem a san?
ES: Khawvela ngaisangtak
ka nei nawh. Ka mihriem ngaisang zawng chu mi tik tlai, mi thangpui hlak mi le
mi tlawmngai thei hai an nih. Chu le inzawmin keia ding chun ka ngaisang chu ka
‘pa’ hi a nih. Midang chun an lo hriet naw el thei, ka pa hi mi ropui tak a na,
mihai hmangaina hau em em, a sunghai nek hmana midang hai thangpui rawn lem
niin ka hriet. A kut a zang a, mi’n an mamaw chun iengtiklai khawm an pei zing
hlak hi ka ngaisang em em na a nih. Chuleiin, ka pa anga mihai hmangai le
inhawng hi midang ka la hmu naw a, hmangaina a hau bek bek hi ka tluk naw hle
in ka hriet.
VT: Hi interview tiemtu le
I inchuklai chanpui thalaihai kuomah thucha hril nuom I nei am?
ES: Ka thalai chanpuihai
kuoma kan cha nuom tak chu ‘inchukna kawngah hlawtlingna hi hlimna a ni nawh’
ti hi a nih, Hlimna zawng hmasa la, chun I hlawtling ding a nih.
Kei ka mimala dingin, inchukna le
inzawma Pathien malsawmna tam tak dawngin Medal hai chen lo dawng pha lang
khawm, ka lekha inchukna a hmasatakin ka sie pha in ka hriet chuong nawh.
Khawvela damsung tawite hun hi Pathien tienga inhmang in a ditnaw zawng thaw
lova hun hlim thei patawp hmang hi ka nuom tak a nih. Chuong lai zing chun, ka
inchuklai chanpuihai in an khawsak theina ding zawng zing dingin ka ditsakpui
a. Var a ngai a, mi anga um ei nuom chun hun hmang thiem hi a ngai khawp el.
Kei khawm ka mimal hun hmangna ding hin time management hi ka zui tak hlak a
nih. Mi laia thang kim vawng ka nuom bawk leiin, iengkim hi tumru takin ka thaw
hlak. Ieng anga buoiin inhmang lang khawm, Pathienin hratna a mi peka ka lekha
inchuk le activities dang danga hai hin ka thang kim vawng hlakin ka hriet. Ei
inhlem rawn pol eh ei tha a bo nuom a, thil chu thaw tumna tak tak ei nei phawt chun ei hman vawng a nih.
Ka thalai chanpui le ka ruolhai
kuoma kan cha nuom tak chu “tum chun thaw thei naw a um nawh” ti hi a nih.
Lekha inchukna khawm nisien, thil iengkim thawna haia inhlem lova thaw fan fan
tu chun a thaw ra a sik hlak a nih. Thil I thaw rawn po leh inpak hlaw’ng I ta,
chulai chun tumruna in a zui zawm a ngai bawk a nih.
VT: Awleh, I hun hlutak I
mi peka kan lawm takzet.
ES: Kei khawm ka lawm,
Virthli damzing raw sen!
