Responsive Ad Slot

VANGAI ELECTRIC

Saturday, April 29, 2017

/ Published by Simon L Infimate
~ Lalnunthang Songate

Ram hmasawmna ding hril ni khuo a thei nghil thei lo leh sam hmasa ngei ngei hlak Khawlphetha (Electric Current) mi tin dit le mamaw, thenum State Mizoram lem chun” khuo in sawmthum a ni chun electric suk tlung vawng ding” a ti angin, a tlung vawng ta ni a hril hi a lo in dik a ni chun, ei umna State le chu ei van tlau awm de aw ti hi ngaituo tham a nih angin Vangai Tlangdung electric chung chang ka hmu dan hang thairang ve met nuomna ka nei leiin, thu ziek thiem ni awm takin ka hung inchu ve tawp a nih.

Vangai biel tieng hi Hmarbiel nekin ring naw takin electric lut hmasa lo ding a mipui in ei thlir thup laiin vangnei tlak takin ei Sawrkar chun Sipapurikhal (Ankhasuo) ah Power Sub-Station 33/11KV siem zoin tarik 16th December, 2015 khan CM hlui Pu Ibobi Singh in hawngna a hung nei khan Hmar mipui lawm tham a tling hle in inthimna anthawk zalenna hmu ang deuin ngai a lo nih. Amiruokchu ti hi ei t awng a dingin dit um naw hle sienkhawm hmang tulna hun a hung um hlak a. Ei dit thu ni lovin a tulna lei a hmang a hung ni nawk hlak angin, Vangai biel a electric siem peka ei um a khawm hin, pawi ti tak pumin hmang a hung tul hlak. Electric hrui khat chau sawr thei an naw leiin, a ban, a hrui, le a tul dang dang lo um ta vawng sienkhawm sawtnawte hnungah, Amiruokchu sit var theiin a hung um ta nawh, ti a hung ni nawk.

Manipur Assembly 11th election tawm khan lawmum takin mang ang elin sit var a hung ni a, election zo char in Power Sub-Station inthutna hmun a hmang a ram nei tuhai le Sawrkar in dawr fuk naw lei a hung inthim nawk el hi beidawng um tak thil anih. Hmu dan le hriet danin sawrkarin a ram neituhai kuomah ram hmang man pek/siem pek /Chawkidar sin pek an naw leia var zawm thei ta loa um nia hril hi thil pawi tak chu a tling a nih. Ram nei tuhai nuorna hi Sawrkar pa’n hang suk fel sien chu a thlep nawk tuor nghal ding chuh chieng taka hmu le hriet a nih. Mi pakhat, Sawrkarpa le an indawrna fuk lo lei a, Vangai mipui po po in electric var chung thu a harsatna an tuok el hi chu thil pawi tak a ni zing lai thil awlsam tak khawm a ni bawk. Thuneitu insang lem annawleh a Dept. hai chun mipui harsatna hrie peka thaw dinga a lo ti chu hang thaw pek el chu thil awm hlie hlie niin an lang.

Tuta Vangai electric ngir hmun tak chu pakhat lungawi, mipui lungawi le ram siem changkang a nih. Thuoitu ta ding chun mipui suk hmasawn le suk lungawi chu antak naw hle ni in an lang. Asan chu, mi pakhat lungawiin mipui lawm tham a tling thlat leiin buoipui chak um na rieu khawm umin an lang. Hieng a fe pei chun electric hruihai hi lo in hmang pal thei ani leiin kut rawl vat hi misuol le mi duk-daklo hlawna ding laka himna ding chu a nih. Electric hring zing lai electric hrui inruk/lak hmang/sukchavai ei hriet ngai nawh. Tu taka, Vangai ngirhmun mipui harsatna sawmdawlna ding thil tam hle sienkhawm lampui le meivar tiengpangah kut hang rawl met/vat chi chu a va hang ni de aw! ti chu mitin hriet le hmu thei a nih.

Tlangdung lampui hlak hi motor infepaw zing theina ding chun an khattawk a JCB tir chauh a hung nih. Lampui a thanaw hlak chun khawrsaw lusip a phur kaina hin fak fawm zawng hai ta ding chun harsatna le tlaksietna bulpui a ni bawk. Chutieng chu ei hril tum tak an naw leiin Khawnvartui/ Mambati/battery hai a sum sengna hi awlsam taka sukbo thei hi thuneitu insang lem hai kuta innghat a ni a, chingfel vat nisien economic chu chikhatin a suk hmasawn le suk changkang nghal thei a nih ti hi hrie mawl inla nuom a um hle. Thuneitu insang lem haiin ngaituo ding tam tak nei zing hai sienkhawm antak taka inthawk tan nekin a awlsawm le umzing zuk siemthat vat chu thil awlsam nawk zuol a tling hle. Chu ding chun ei chunga thuneitu le ram hmangaituhan chet hun hriea, an an ngaiven vat nuom a um hle. Pakhat lungawi mipui lungawi, pakhat lungsen mipui lungsen chuh Vangai electric chungchang hi a van i chieng de aw. Chu thil awlsam tak thawtu ding chu ei um hlawl naw ni ???
Don't Miss
© all rights reserved
made with by Simon L Infimate