March 13, 2017 khan Pastoral Committee nei a nia, March 14, 2017 khan Assembly Musical Committee le Central Ramthar Board inthungna nei niin, March 15 khan 96th Executive Council le March 16 khan Assembly Rorel inkhawm nei a nih.
Hi huna rorel thenkhat hai chu: Doctrine of Faith thuah Local tin thuoitu haiin an bye- heart ngei ding le Kohran mihan an hriet ngei theina dinga hma lak ding tiin an rela. Kum nawk 45th General Assembly chu Hmarkhawlien, Assam a innghat dingin an ruot. Kohran in Certificate a peksuok hlak hieng Baptisma, Marriage, Dedication le Calendar hai chu a man um talo ding tiin rel bawk a nih. CHNP tia ko hlak chu CNHP (Central Nuhmei Pawl) ti ni lem ta ding in rel ani bakah Assembly huna hin Kawlawk insuo mi 4; Post thar siem (Post Creation)- 2 (CKTP Promotor 1; CHNP Promotor 1) siem a nih.
Hieng hai bak a hin Happy Valley, Shilong hmuna Ram 1 Crore man inchawk ding; Zemabawk ah Ram 85 lakhs man inchawk ding, Guahati (Pilangkata) ah EFCI Center bawl sunzawm ding ti hai le EFCI Thawktu hlaw CLA -10% le DA - 5% in suk pung dingin rel a ni bawk.
Assembly hun sung hin Seminar - Harna (Revival), Intoldel (Sustainable Development) ti thupui hai hmangin nei a nia. Vawisun khan mi 4 Pastor Ordination pek an nia, thawktu pension ding hai inthlana le Kohran Upa Ordination an pek anthawka kum 25 tling ta hai chawimawina hun hmang a nih.
Assembly sung hin hla tienga rawngbawlna hieng Aizawl EFCI Choir, NC Hils Presbytery Choir, Kolasib Presbytery Choir le EFCI Central Choir haiin an nei bawk a nih.
Assembly sunga thuhriltu hai chu Rev. C Kawldinglien Joute, Secretary, EFCI; Upa Lienzalam Gangte, Mahur Garde; le Rev. Dr. J Huoplien Neitham, zan huna hin Rev. Lallienvel Pakhuongte, President, EFCI in thuhrilna nei bawk a tih. Vawizan hin Commissioning Service um ata, hi hun hi Rev. Dr. J Huoplien Neitham, EFCI Moderator in hmang ata, EFCI Central Choir le Presbytery Choir haiin hla rawngbawlna an nei dinga ti ani bawk a nih.
