Mizoram sawrkar le HPC(D) inbiekna (2nd round of
talks) chu October thla kar hmasataka nei a ni ding thu, HPC(D) palai Pu Lalṭhalien
chun a hril.
Virthli palai a hril danin Pu Lalṭhalien chun Mizoram
sawrkarin inbiek nawk hun dingin October kar hmasatak a rawt thu a hrila, san dang dang lei le,
sawrkar official hai an buoi bakah HPC(D) palai tieng khawm an lan zo naw leiin
September thla lailunga inbiek nawk ding ti chu October thla kar hmasatakah
inbiek lem dingin rawt phawt a nih a tih.
Charter of demands chungchang hrillin Pu Lalṭhalien chun
thilṭha lem tlung dingin sawrkar anthawkin
beiseina lientak ei neia, Hmar mipui le Mizoram sawrkar a tu tu khawma
an pawm tlang thei ding ei demand a nih a tia, Autonomous body demand a um chu
sixth schedule hnuoi a ni am ni naw, mipui hai lungawi tawk le sawrkar ta ding
khawma harsa lo ding thil a ni a ring thu a hril bawk.
A hril peina ah Sinlung Hills Autonomous Council hin
legislative, Executive le Financial power nei a ta, elected council member 14
le nominated member 2 nei a tih a ti bawk.
Mizoram sawrkar le HPC(D) hai hi August ni 10, 2016 khan
Aizawl ah boruok muongum tak hnuoiah inbiekna an lo nei tah a, inbiek vel hnina
September thla sunga nei ding ti chu harsatna hran hran leiin October thla ah
sawn a nih.
