Responsive Ad Slot

Hmasawnna Thar | 16 September, 2016

Friday, September 16, 2016

/ Published by VIRTHLI
Manipur Old Age Pension sum sem
CCPUR: September 15, 2016 (zanita) inthawk khan District Social Welfare Office, Chiengkonpang, Tipaimukh Road, CCPur­ah CCPur District sunga Manipur Old Age Pension Scheme (MOAP) hnuoia pensioners hai kuomah pension sum sem tan a nih. Zanikhan  Saikawt A/C sunga mi hai sem tan a ni a, vawisun khawm hin Saikawt A/C sunga mi hai sem sunzawm ning a tih. Pension sum sema um hi March, 2015­ February, 2016, thla 12 sunga mi a ni a, pension sum an hmu hi thlakhatah Rs. 200/­ pei  niin mi pakhatin pension sum an lak hi Rs. 2,400/­ a nih.

Thuoitu ding thlangna an nei
CCPUR: September 15, 2016 khan WMCEI Meeting Hall, Rengkai­ah Hmar Kohran sunga Joint Naupang Sunday School Union kum 2016­18 sunga thuoitu ding thlangna nei a ni a. Chairman dingin Rev. H.B. Hluothang, Vice Chairman in Rev. Dr Lalhmuoklien, Secretary dingin Rev. Lalthakung;, Asst. Secretary in  Rev. Lalkhumvel Joute, Fin. Secy. in Rev. Rorelfel, Treasurer in Rev. Lalngailien Puruolte hai thlang an ni a, Auditor dingin Rev. Lalneikhum le Mr Phirneithang Inbuon hai thlang an ni bawk.  Thuoitu dinga thlang thar hai hi Rev. Dr V. Lalnghakthang in tawngtaipekna a nei a, committee fekhawm han bufaktlangna an nei nghal bawk.

HYA thuoituhai an inzinsuok
CCPUR: December 5, 2016 nia Diphu hmuna  Hmar Sikpuiruoi puithu taka hmangna ding le inzawma September 16, 2016 nia Diphu hmuna meeting   hmasatak  uma thang dingin Manipur­a inthawk  HYA thuoitu iemanizat hai chun zani zingkar 7:30AM khan Imphal suoksanin Diphu an pan.  HYA thuoitu inzin suok hai lai hin Upa Laldawnlien Varte, Gen. President, HYA GHQ; Tv. Alan Famhoite,  Asst. Gen. Secy. HYA GHQ; Pi Thangthatling Sinate, President, HYA Imphal JHQ; Pu Lalbuotsai Zote, Vice President, HYA Imphal JHQ; Pu Samson Hrangchal, President HYA Rengkai Branch hai le  Tv. Lyan, Photographer, Tv. Nghaka, Driver hai an nih.  HYA thuoituhai hin Sept. 17, 2016 nia Shillong HSA Freshers Meet khawm hung uop an tih.

ADCC Chairman Delhi­ah an zin
CCPUR: Chairman, ADCC le Leader Hill People’s  Alliance (HPA) ni bawk Mr Langkhanpau Guite,  le Pu Genneikhup Vaiphei, EM & Secy. HPA hai chu Delhi panin an inzinsuok. Delhi an cham sungin Autonomous District Council Manipur, DRDA chungthu haiah official dang dang hai inhmuipui an tih. Hi le inzawm bawk hin  Sept. 19, 2016 khin ADC Ukhrul Chairman inrawinain ADC Chairman iemanizat han Delhi pan bawk an tih.

Tesol Training an zo
CCPUR: Asia  khawmuolpui sunga Teacher Training Centre lien tak, Asian College of Teachers (ACT), Bangalore le TESOL Canada hai thangruola huoihawtnaa Tesol Training neia um chu  August 26, 2016 khan zo a nita a, hi taka hin eini tlangmi pahni  Pu S. Khuma Thangjom, Professional Trainer, Excelsior Spoken English, Zion Street, Salem Veng, CcPur le Pi Boisy Gangte, Head in­charge, Good Shepherd School, Itanagar,  Hebron Veng, Phailien CCPur  hai khawm an thang a, Tesol Graduation Certificate inhlan an nih.

Tesol Certificate  hi  khawvel pumpui khawlai hmuna khawm English teacher ni theina a nih. Ph.D. amani annawleh English ni lei elin English inchuktir theina a um naw a, Tesol/Tefl/ Celta certificate nei lo hai chu English teacher tia pawm thei a ninaw bawk  a nih tiin ei thu dawngna chun a hril. NE ah anni pahni chau  hi training­a hin an zu thang a nih.

SLNT, STS le Scholarship form
CCPUR:  State  Level National Talent Search  Examination (SLNTSE), 2016­17; State Talent Search Examination (STSE) , 2016 le National Means­cum­Merit Scholarship Examination (NMMSE) 2016 a dinga  Application form chu September 22, 2016 chen hin ZEO, CCPur Office­ah lak thei ning a ta, Application form fill­up  September 30, 2016 chenin peklut thei ning a tih.  SLNTSE hi Class X inchuklaihai ta ding, STSE hi Class IX inchuklai le NMMSE hi Class VIII inchuklai (reading) hai ta ding a nih.

Ms Mannuamching in CEO charge
CCPUR:  Ms Mannuamching chu IAS  pek (conferred) a ni le inzawma August 1, 2016 a inthawk Mushoorie, Uttarakhand­a training chu zani hmasa khan  CCPur a hungtlung nawk ta a, zanikhan CEO, ADCC charge lain office a kai tan nawk a, kar thar khin Mr Seiminlen Lengen kutah CEO, ADCC charge inhlan nawk nghal  a tih. Ms Mannuamching hi  Director, Tribal Affairs & Hills chel dinga sawn a nih.

Ramthar Bazar an thaw ding
CCPUR:  Saikot Presbytery Northern E F C I Nuhmeipawl chun  September 17, 2017 (Inrinni), 6.30 AM a inthawk khin  Light house Lane, CCPur­ah Pathien rama rawngbawlna dingin Ramthar Bazar an thaw ding a nih. Hi huna hin Sa chartang, Hmepawk, Thingpui/bei; secondhand le thil dang dang zawr ning a tih. Pathien rama rawngbawlnaa ngaia mitin dawr seng dingin Saikot Presbytery Northen EFCI Nuhmei Pawl chun fielna le ngenna an siem.

YLS in Exhibition
CCPUR:  Young Learners’ School, CCPur chun  School Silver Jubilee Celebration  le inzawmin Sept. 16, 2016, 10:00AM­2:00PM inkar sung hin Exhibition nei an tih. Exhibition hi Ms Betty Khawmang, Headmistress, V.K. Tawna High in hawng a ta, Silver Jubilee Song Book tlangzar bawk a tih.

Bolero inrukhmang
CCPUR: Sept. 15, 2016, 3:30AM vel khan Rengkai Zote Veng­a um Pu Lalmuon  hmang lai Garage­a a sie  Bolero MN O2 A 6665 ( a senduk) chu tu ti hrietlo rukru han an inrukhmang niin ei thu dawngna chun a hril. Hiengang motor inruk lo hmu hai chun 9862159270 or 9089866134 haia inhriettir dingin motor neitu chun ngenna a siem.

Yumkham Erabot Singh le NPF MLAs 4 hai inbanna Manipur Legislative  Assembly Speaker in a pawmpek tah
IMPHAL: Manipur Legislative Assembly  Speaker  Th. Lokeshwar Singh chun Yumkham Erabot Singh le Naga People’s Front (NPF)  MLAs 4 hai inbanna chu September 14, 2016 khan a pawmpek tah. Hi thil le inzawm hin  zanikhan K. Meghajit Singh, Secretary in­charge, Manipur Legislative Assembly chun Bulletin Part­II an suo. MLA an ninaa inthawka an inbanna hi September 14, 2016 a intahwk tiem tan ning a tih. Chun, hieng  MLAs 5 hai tlingna Assembly Constituency­hai chu a ruok an nih tiin K. Meghajit Singh chun  September 14, 2016 khan Notification an suo nghal bawk.

Yumkham Erabot Singh hi Congress ticket a 15­Wangkhei Assembly Constituency a inthawka thlangtling a nih. NPF MLAs 4 an inbanna pawmpek tahai chu, Shri Dikho, 48­ Mao (ST) Assembly Constituency; Dr V. Alexander Pao, 47­Karong (ST) Assembly Constituency; Shri Samuel Raisom, 44­Ukhrul (ST) Assembly Constituency le Shri S.T. Nunglhung Victor, 41­Chandel (ST) Assembly Constituency hai an nih. NPF  MLAs 4 hai chi August 31, 2015 a Manipur Assembly in ILPS le inzawma Bills 3 a passed dodalnaa inban tawl an nih.

Manipur Assembly seats 60 uma MLAs 5 hai  inbanna pawmpek a ni ta leiin tuhin Manipur Assembly a MLA umzat chu 55 a hung ni tah. Assembly seats 5 hai hi a ruoka puong nisienlakhawm 10th Manipur Legislative Assembly fe mek hun (term) a tawp hnai ta leiin byelection  a um chu ring a um ta nawh.

Shri Govindaji Temple an va sir
IMPHAL:  Zani zingkar dar 9:30 vel khan BJP National President Amit Shah, BJP National General Secretary Ram Madhav, BJP Election in­ Charge Manipur, 2017 Prahlad Patel; Union HRD Minister Prakash Javadekar, North East Democratic Alliance Convenor  Himanta Biswa Sarma, BJP Manipur Pradesh President K. Bhabananda; BJP MLAs Kh. Joykishan, Th. Bishwajit le BJP Manipur Election Management Committee Convenor Th. Chaoba le party workers thenkhat han Shi Govindajee Temple an va sir a, tawngtaina  an va nei. Hi zo hin Imphal suoksanin an ram tieng an kir nawk tah.

Time Bomb ang a nih: Gaikhangam
IMPHAL: India sawrkar le NSCN­IM han Framework Agreement an ziek hi time bomb ang a nih. Hi thila hin Manipur ta dinga agenda inthup  a um a, chuleiin sawrkar thlungpuiin mipui hriet dinga a puonglang naw a nih tiin zanita Imphal­a “One Day Conference on  Empowerment of Panchayati Raj” neina huna Dy. CM Gaikhangam in thu a hrilnaah a hrillang. BJP sawrkar chun Panchayati Raj  Institute­hai power lakhamgn pek a tum a nih tiin Gaikhangam chun an tum bawk. Meenakshi Natarahan, Chairperson, Rajiv Gandhi  Panchayati Raj Sangathan, AICC, New Delhi  chun, UPA sawrkarin  Panchayati Raj Ministry a dingin Rs. 7,000 crore hmang dingin sum a peksuok a, NDA sawrkar ruok chun Rs. 94 crore chau hmang dingin riruong a siem tiin a hril.

Vety & AH le Sericulture Dept. ah sin ruok
IMPHAL: Vety & AH Department, Manipur le  Sericulture Department, Manipur hnuoiah sin ruok chi tum tum a um a. District Employment Exchange Office, CCPur­ah ngaiven thei a nih. Vety & AH  Dept. a sin ruok hai chu, LDC/Office Asst.­cum­Computer Operator post 20, Vety  FA post 10, Milk Recorder post 4 le Lab. Asst. post 2 a nih.

Sericulture Department hnuoia sin ruokhai chu Inspector  post 4, Farm Overseer post 14, LDC post 6, Stenographer post 2 le Driver post 2 a nih.

IEDs 2 leh mi 3 man
IMPHAL: Sept. 11, 2016 khan 31­Assam Rifles han Nampisha, Ukhrul District a Mahindra Jeep MNS­5862  sukchawla an dapnaah IEDs  2, 8.76 kg a rik leh PLA Overground worker 3 man  le Litan Police Station­ah peklut an nih tiin IGAR(South) thusuok chun a hril.

Housing Scheme hmu dinghai
IMPHAL: Kum 2014­15 sunga MOBC hnuoia Housing Scheme hmu dinghai list siem fel le puonglang a ni ta a,  en thei dingin MOBC Office Notice Board­ah tar a nih tiin Dy. Director, MOBC thusuok chun a hril. Beneficiaries select list hi MOBC website:mobcmanipur.gov.in a khawm en thei ning a tih.

AN CM ta dingin MLA a nina an ban
PUDUCHERRY:  Congress MLA  A.John Kumar chun  Chief Minister  V. Narayanasamy  MLA dinga thlangtling a hung ni theina dingin Nellithope Assembly constituency­a MLA a ninaa inthawk an ban. Kumar hi Parliamentary Secretary to the Chief Minister  ni lai mek a ni  bawk a, speaker V. Vaithillingam inhmupuiin inbanna lekha hi a pek a nih. Kumar hi May 16, 2016 Assembly election­a kha MLA dinga thlangtling a ni a. Narayanasamy MLA la ni lo,  May 28, 2016 –a Congress Legislature party  leader dinga thlang le  June 6, 2016 a kha Puduchery  Chief Minister dinga sesamna lo nei ta a nih. CM a ni pei theina dingin MLA a thlangtling a tul leia Kumar hin a seat an ken a nih.

A nuhmei hnar a sethlak pek
SHAJAHANPUR:  Narotha Hansram village a chun pasal pakhat Sanjeev Rathore an ti chun  a nuhmei Kamlesh chu pasal dang leh a ringhla leiin a hnar a sethlak pek. Sanjeev Rathor le Kamlesh hai hin nau nuhmei kum 6 mi an nei mek a, a hmel suksiet le midangin an dit nawna dinga a hnar hi a sethlak pek nia hril a nih. Kamlesh hin phone in tumani a biek a, chu lai chun Sanjeev hi zuruiin a um a, a nuhmeiin midang a biek chu lungsen puia an insuol huna  a nuhmei hnar hi a sethlak pek niin an thenum hai chun an hril. Kamlesh sunghai chun hi thuah hin police­ah complaint an thaw.

Akhilesh CM candidate a ni ding:Naresh Agarwal
LUCKNOW: Uttar Pradesh Assembly Election hung um dinga hin tuta Uttar Pradesh Chief Minister ni lai mek Akhilesh Yadav chu Samajwadi party Chief Ministerial candidate ning a tih tiin SP leader le Rajya Sabha MP Naresh Agarwal chun zanikhan a hril. Assembly election hung um ding hi Akhilesh Yadav le Mulayam Singh Yadav hai keihruoinaa hmasuon ning a tih tiin a hril bawk.

VAWISUN THUPUI
Ram chu Lalpa ta a na, Hnam tin chungah roreltu a ni sih a.  ­ Sam  22:28

Editorial: Manipur Election um ding hi a pawimaw

Politics hi ei inhnik am ei inhniknaw khawmin khawvela ei um sung chu  ei bansan thei ding a ni nawh. Mi tam takin ngaituo khawm ei ngaituo pei mang naw hi an dik nawh. Hlawk taka hmang  ding a ni lem. Kum 2017­a Manipur Assembly Election hung um ding hi inhnikum takel a nih  ti hi a hmasa taka ei hriet nuom a um.

Manipur Assembly Election hung um dinga inbeituo ding tak chu Congress le BJP an nih ti chu a chieng thawkkhat ta hle a.  Congress  chu sawrkarna siem mektu an ni leiin le BJP chun Assam­a  Congress sawrkar an letkhup hnunga NE biela Assembly election an hmasawn nawk hmasa tak ding a ni leiin an ta ding chun Manipur Assembly Election hi a pawimaw hle a  a  nih. Congress le BJP ta ding chau ni loin Manipur hi issue lientham le kakhawk natak nei thei ding  pathum­ Naga Issue, ILP issue le Tribal Issue hai leia buoina le harsatna nasa tak tuok mek  ei ni leiin Assembly Election result hin kakhawk a hung ngei ngei ring a ni leiin inhnik a um a, ngaiven a,  thang ei khaw ve  hi a tul makmaw a nih.
 
Kum 2001 laia Manipur Assembly seat 60 uma BJP in Manipur Assembly­ah  MLAs 26 an nei  huna khan sawrkar thlungpuiin NSCN­IM  le ceasefire an ziek chu territorial limits um loa a ziekpui leiin  buoina nasa tak a suok a, a kum nawk  2002 Assembly election a khan BJP chun seat 4 chau an hung chang ta a,  kum 2007 le 2012 hai khan BJP chun seat khat khawm an  lak zo ta naw a nih. Amiruokchu, kum 2014  General Election a BJP in hrat filawrna an changa inthawk BJP chun hma nasa taka lain  India hmarsakbiela Congress sawrkar hai peithlak ngei tumin Congress ni lo NE a political party dang dang hai le thangruolna ding  North East Democratic Alliance (NEDA) chu July 13, 2016 khan  BJP National President Amit Shah chun Guwahati hmuna a lo hawng ta a nih.

NEDA thiltum tak chu regional parties hai le thangruola Congress peithlak a ni a. Nagaland­ah NPF bakah Meghalaya­ah NPP, Mizoramah MNF le party dang dang NEDA a hin an thang a, sienkhawm tuchena hin Manipur­a NPF ruok chu an rawl thu hriet a ni nawh.  BJP hin  NE ah Congress party hi anni khata peithlak el chu an inzuom bik naw niin an lang a, chu leia  BJP ni si lo regional party hai le thangruolna dinga NEDA  a hung indin  niin an lang. A bul chun an party mala hamthatna hui vawng a tum naw a, damte tea regional party hai le thangruola, an inthanglienna ding dal si loa  ram hung lak chu BJP thiltum a nih.

BJP hi Manipur­a Naga Peoples Front (NPF) leh an thangruol theinaw  ding zie zani hmasaa BJP President Amit Shah in Imphal hmuna public meeting huna Manipur  ram inchi khat khawm keihek a ninaw ding thu a hril khan a namdet tlat a nih. A san chu kha thil khan an  issue a kal  tlat leiin. Hiengang bawk hin NPF hi Congress le khawm an thangruol ring a um nawh.

Hieng laizing hin Manipur phairam mi (Meetei) hai chu puotieng mi hai chimral inlauna lientak  an nei leia hma nasa taka  la mek an ni a. Manipur­a Naga thangin  tribal hnam hai chun  August 31, 2015­a Manipur Assembly in ILP Bills 3 a passed hai lei khan mani ram leilung le hmun hai chan inlauna nasa tak an nei leiin dodalna nasa tak a hung um a, tuchen hin Bills 3 hai dodalna leia  thi mi 9 hai ruong khawm phum lovin an la um zing a  nih.  Hi lei hin Tlangmi (tribals) hai chun ei harsatna hrethiem a, ei himna le damkhawsuokna ding lampui  kawkhmu a, mi pe theitu ding ei dit a nih. Phairam mi hai ruok chun an ram del chin zaulien theina ding  lampui an dap zing pumin ei hmaa Election hung um ding hi an thlir a nih.

Byelection le Municipal Election haiah hratna an hung changa inthawk lem khan chu nasa taka phurna a pek  leiin Manipur chau ni lovin India hmarsak biel hmun dang dang haia khawm hma a lak hrat hle a hriet a ni bawk a. An hratna ding chun iengkim an inhuom ring a ni bakah an hlawsam chun mi hrem an rin ring a um nawh. Tribal Issue, ILP  issue le Naga Issue haiin a mi bawde mek ei ni leiin tuta tum Manipur Assembly Election hung um ding hi inhnik a umin a tu tu ta ding khawmin a pawimaw hle a, thang ei lak fuk a tul vieu ding niin an lang.

Central­a sawrkarna siemtu BJP hin hrat ngei tuma hma  an lak ding leiin  Election result hin deng a khur a nei ring a ni leiin mani mimal hlawkna ding chau amani, annawleh mani phingpui le laina politics theinghila, ei ram le hnam humhalna ding tiengpang ngaituoa election hung um ding hi ei hmasuon a tul  a nih.  Phairam biela cheng unau Meitei hai chun, BJP hrat zo lova Congress in hratna an hung chang nawk chun JCILPS inrawinaa ILP Bills Manipur tlangmi le Centre in a hnawl si leiin Manipur integrity a tawkpawi ringna an nei tlat leiin Valley haia chun BJP hin full support an hmu ring a um a, full support an hmu kher naw khawmin tuchena politics inher dan en hin  BJP an awn ngei ring a nih. Integrity issue leiin NPF chu BJP leh an thlawp ring a umnaw phawt. Anleh eini Zohnathlak tlangmi hai hin  ei ram humhimna dingin tu’m awn ei ta, iengtin am ei hmaa election dinga hin insingsat ei tum ti chu ei ngaituo ve dinga pawimaw a nih.


Don't Miss
© all rights reserved
made with by Simon L Infimate