Responsive Ad Slot

Hmasawnna Thar | 07 August, 2016

Monday, August 8, 2016

/ Posted by VIRTHLI HMAR
Ni 3 sung hun an pek; Aug. 10 a inthawk Tiddim Road Bandh thaw an tum
CCPUR:  Mr Siaklalzawm Vaiphei (40) s/o Thiankhogen Vaiphei of Kangvai village thina le inzawma JAC indina um chun zani zantieng khan MHJU Press Club, Hq. Veng, CCPur­ah tuolsung chanchinbumihai an inhmupui.


JAC a Secretary K. Paul chun, Siaklalzawm kha a ruolpa Thangkholal s/o (L) Khaikhogin of  Kangvai le lampuia an fe lai December 17, 2015, 7:00PM a Kwakta Turel mapal W. No. 9 Tiddim Road­a Bajaj Pulser MN03­S/0877 a chuong pasal pakhatin a baw a ni a, hospital­a enkawl a ni hnungin Dec. 19, 2016, 3:15AM velin Siaklalzawm chu a hliemna tuor lova thi a; mi baw hlumtu chu Salam Biren s/o Biramani of Ningthoukhong Kha­Mamang Leikai Ward No. 7 niin 1st IRB a thawk lai mek a ni a, vawi tam tak inbiekna a ni hnung khawmin inremna a la um theinaw a, hi thu hi K. Govindas, Minister le T. Manga Vaiphei, Minister hai khawm an lo intlun ta a,  Amiruokchu, inremna a la um thei naw zing a nih. Police khawmin mi baw hlumtu hi hrietnaw sak an thaw a nih tiin an tum. Hi thua hin sawrkar chu mi baw hlumtu chunga a phutawk action la dingin an JAC chun an phut a, ni 3 sung ngei mi sukhlumtu tiengin inbiekna anga thil ngen an sukpuitling an phut. Hi hun sunga sukpuitling a ninaw chun August 10, 2016 zingkar a inthawk tiemchin um lovin Tiddim Road bandh an thaw ding thu an hril.

Siaklalzawm kha Kangvai­Lamka inkar Jeep khal a insung fakzawngtu tak niin nuhmei Chinhawilam leh nau 5 an nei a, a upa tak kum 15 niin a naupang tak chu kum 2 le a chanve mi a nih.
 
Hi thil tlung hi Moirang Police han case lain FIR khawm an zieklut a, sienkhawm mi bawhlumtu hi hrietlo anga an record laiin mi bawhlumtu chu anni kuoma an puong a, mi a baw huna khan CCPur­a posting niin thubuoi a nei hnung khan Pangei tieng sawn hmang nia hril a nih.

Lok Adalat le Traffic Mobile Court; 
Helmet khum lo hai khawm man le fine inchawitir ding
CCPUR: National Legal Services Authority le Manipur State Legal Services Authority thupek le guide na hnuoiah Churachandpur District Legal Services Authority chun August 13, 2016, 10:30AM a inthawk khin Chief Judicial Magistrate Court, CCPur hmunah One Day Lok Adalat le Churachandpur Police Station tuolah Traffic Mobile Court thawng an tih. One Day Lok Adalat thubuoi hran hran relfel ding nei han August 10, 2016, 12:00Noon chenin CJM Court, CCPur­a Chairman/Secretary, CCPur Legal Services Authority kuomah ziekin hnina peklut thei ning a tih.

Hi ni ma 11:00AM a inthawk CCPur Police Station­ah Traffic Mobile Court um a ta. Traffic Rule le Motor Vehicle Act bawsetu hai man le Court in fine an chawitir pei ding a nih. Hi lei hin mipui hai chu traffic rule zawm seng dingin Letkho Kipgen, Secretary, CCPur Legal Services Authority chun ngenna a siem. Two Wheeler khal si Helmet khum lo hai khawm hi huna hin man le fine inchawitir pei ni dingin ei thu dawngna chun a hril.

D.El.Ed form lak thei ding
CCPUR: Diploma in Elementary Education ­D.El.Ed thaw nuom hai ta dingin August 8, 2016 a inthawk khin DIET Office­ah form lak thei ni tang a tih. Chu chienglem DIET Office­ah hriet thei ning a tih tiin DIET Superintendent chun inhriettirna a siem.

August 8­ah sem nawk ding
CCPUR: Japanese Encephalitis (JE) natna laka invengna dinga AYUSH damdawi ‘Belladonna­200’ chu sem sunzawm zing a ni a, District Hospital Campus­a DFWO office chun a nei po a sem zo a, August 8, 2016 khin Counter 3 hawngin sem sunzawm nawk a tih.

Sielmat School thlang an nih
CCPUR: All India Radio (AIR), Imphal huoihawtnain zanikhan Synod Hall, IB Road, CCPur­ah District Level Quiz Competion nei a nih. Hi huna hin VK Tawna College, Sielmat Christian Hr Sec School, Bon Bosco Hr Sec school le CCpur govt College haia inthawk student pahni seng an thang.


Hi huna hin Sielmat Christian Hr. Secondary School chu Imphal hmuna State Level Quiz competition­a CCPur district aiawa va thang dinga thlang an nih. State Level Quiz Competion hi September chawlkarhnina (second week) vela nei ding a nih.

March, 2016 chena Manipur a motor umzat 3,06,039 a tling phak, HSRF number pek ta po 1,61,600 a nih: M. Lakshmikumar 
IMPHAL: Inlirthei eksiden laka mipui himna hi Transport Department ngaipawimaw hmasa tak a ni a. Hi lei hin inlirthei eksiden laka mihriem thina a hung tlawm lem theina dinga hmalak a nih tiin zanita DIPR Complex, Moirangkhom, Imphal­a Press Conference huna M. Lakhsmikumar, Commissioner (Transport), Govt. of  Manipur chun a hril. Thla thara inthawk inlirthei  ke pahni khaltuhai chun Helmet an khum ngei ngei tul tang a tih. Hi le inzawm hin July 25, 2016 khan Notification insuo a ni tah. Transport Department chun “No Helmet, No Petyrol” ti thupui hmangin hma lang a ta, Helmet khum nawhai chu Petrol pump­a khawm Petrol pek nita naw nihai. Student phurtu motor­hai khawmin seat um bak an phur phal ni tanaw ni a, lo thei loin Commercial Vehicle tia register an thaw le an motor hai rawng eng an nal tul a tih tiin a hril.


District Transport office (DTO) office 7, Imphal West, Imphal East, Churachandpur, Bishnupur, Thoubal, Kangpokpi le Senapati haiah Smart Card projects, VAHA (registration) le SARATHI (driving licence) thaw a ni tah. Chun, High Security Plats (HSRP) khawm April 12, 2012 a inthawk thaw tan a ni ta bawk. March, 2016 chena Manipur a motor umzat (registration thaw) chu 3,06,039 a tling ta a, hienghai laia 1,61,600 hai chu HSRP inbuk (July 31, 2016 chenah) pek a ni ta a, kum 2011­12 khan Sie (Revenue) Rs. 15,35,73,573/0 hmu a ni a, 2013­14 in Rs. 17,55,29,134/­ le 2014­15 in Rs. 22, 03,73,241/­ le 2015­16 in Rs. 23,69,21,997 hmu a nih  tiin M. Lakshmikumar chun a hril.

IED pakhat hmu a nih
IMPHAL: Zani zingkar dar 6:15 vel khan Kelawnga fe CRPF patrolling team in Johnston Higher Secondary School le M­Sector inkara foothpath a par khawina bel sungah bomb (IED) 2.4 kg a rik an hmu a, zani 10AM vel khan Manipur Police a Bomb disposal Squad Team in pawitawk nei loin an va suksiet. Zani hmasa khawm khan IED hmua a umnaa inthawk metres 100 vela hlaah bomb a lo puok ta bawk.

Admit Card lak thei hun
IMPHAL: Revenue Department, Manipur hnuoia Mandol, LDC, Driver, Lambu, Peon, Process Server le Chowkidar sin lakna ding le inzawma hnina pehai ta dingin Admit Card August 8­12, 2016 inkar sung hin DC, Imphal West District Office, Lamphelpat­ah lak thei ning a tih. CCPur thangsain  Hill district a inthawka candidate­hai ta dingin August 11&12, 2016 haiah Admit Card hi lak thei ning a tih.

MJS Grade ­I post 4 a ruok
IMPHAL: High Court of Manipur hnuoia thawk ding Manipur Judicial Service (MJS) Grade­I post 4 (regular in post 3 le Adhoc in post 1) a ruok. Hnina lekha peklut theina hun nuhnung tak 26­08­2016 a nih. August 21, 2015 le April 12, 2016 a Advertisement thawa um apply hai ta dingin apply nawk tul naw nih. Thu chieng lem hi Court website:http://hcmimphal.nic.in ah hriet thei ning a tih tiin Registrar, High Court of Manipur chun inhriettirna a siem.

CEO tharin a sin a chel tan
IMPHAL: Chief Electoral Officer (CEO), Manipur thar dinga ruot Vivek Kumar Dewangal chun a sin thar ding a chel tan tah. Kum thar 2017 a Manipur Assembly Election hung um ding hi zalen, thienghlim le tluong taka nei a ni theina dinga theitawp suoa hma a lak ding thu Vivek Kumar Dewangal hin a hril.

Truck in HT line a hrut fuk, mi 1 a thi
IMPHAL: Zani zantieng dar 5 vel khan Bishnupur district a Moirang a Laigou Chingkhong an ti hmuna Tata Truck pakhatin High Tension (HT) line (electric hrui) a hrut fuk a, electric in mi pakhat a man hlum a, mi 7 an hliem a, Hospital panpui an nih.

PM le a ministers 6 hai Telangana­ah
NEW DELHI: Vawisun in PM Narendra Modi le Union Ministers 6 hai chu Telangana state­ah a vawikhatna dingin inzin an tih. PM in 1200 MW Singareni Thermal Power Plant hawng a ta, NTPC 1600 MW Power Plant le Ramagundam Fertilizer Plant indinna ding lungphumhai phum a tih.

Gujarat CM thar in vawisun sesamna
AHMEDABAD: Gujarat Chief Minister thar Vijay Rupani le Deputy Chief Minister Nitin patel hai chun vawisun 12:40noon hin Mahatma Mandir, Gandhinagar hmunah Governor O.P. Kohli hmaah CM le Dy. CM dinga sesamna nei an tih.

Rs. 100 an pek nuomnaw leiin inhlawfa 2 vuok hlum
MAINPURI: Uttar Pradesh­a Mainpuri district­a chun zani zingkar khan nitina inhlawfa (labourers) 4 manin Police station­ah an thuoi a, chu huna Police han thamna Rs. 100/­ pe dingin an ngen a, sienkhawm an pek nuomnaw leiin Police hai hin an vuok a, an vuok hliemna tuorzo lovin mi 2 hai chu an thi. Inhlawfa pakhat chun, hi laia um Police han nitinin thamna pawisa an ngen hlak thu a hril. Mainpuri SP Devranjan Verma chun, hi thila inrawlna nei Police hai chungah action natak lak a ni ding thu hrilin suizuina an nei mek bakah FIR an registered.

Kashmir­ah inbeituona a la tlung zing
SRINAGAR: July 8, 2016 nia security forces han Hizbul Mujahideen commander Burhan Wani an kaphlumna le inzawma Jammu & Kashmir buoina suok chu a la re theinaw zing a, Curfew zam nisienkhawm zanikhan Anantnag le Shopin district haia chun protestors le security forces hai nasa takin an inbeituo nawk. Buoina suok leia Kashmir­a nundan pangai um thei lova curfew zama um chu zani kha ni 29 a tlingna a ni tah. Kashmir buoina leia tuchena mihriem thina tuok chu 54 an tling ta a, midang 6,000 chuongin hliemna an tuok bawk a nih.

Zanita Anantnag­a Chee hmuna rally nei huna buoina suokah mi 21 in hliemna an tuok. Zani hmasa khawm khan inbeituona suokah mi 3 an thi belsa nawk bakah mi 150 chuongin hliemna an tuok belsa a nih. Srinagar­a Nowhatta, Khanyar, Rainawari, Safakadal, Maharajgunj le Batamaloo haia chun curfew zam a la nizing bakah Budgam district­a Chadoora, Khansahib, Magam le Budgam, Anantnag bakah Baramulla district­a Khanpora area­a chun Curfew zam thar nawk a nih.

Schools, Colleges, sumdawngna hmun, petrol pumps, banks le private offices hai khawm khar an la ni bakah motor inlawn an la um naw a, Kashmir valley pumpuia mobile internet that zing a la ni bawk.

Gold Medal lahai Rs. 50 crore
NEW DELHI: Indian Olympic Association (IOA) chun Rio Olympic Games, 2016 nei meka India mi, Gold Medal lahai lawmmanin Rs. 50 crore pei, Silver medal la hai Rs. 30 crore pei le Bronze medal lahai Rs. 20 crore pei pek anni ding thu  a puong. Chun, August 4, 2016 a Manipur Cabinet meeting khawmin Manipur mi, Gold Medal lahai Rs. 2 crore, Silver medal lahai Rs. 1.5 core le Bronze medal la hai Rs. 1 crore pei lawmman a pek ding; Manipur mi Rio Olympic Games a thang phakhai Rs. 25 lakh pei le an sunghai Rs. 2 lakh pei pek dingin a puong. Indian Railways khawmin gold medal lahai lawmmanin Rs. 1 crore pei a pek ding thu a puonglang.
  
VAWISUN THUPUI
Ka mihai an invet a, an mi hriet si nawh a; naupang invettak ang, hrietthiemna hrim khawm an nei naw, thil tha naw thaw dingin an var a, thil tha thaw ding ruok chun hrietna an nei nawh. ­ Jeremia 4:22

Editorial: Pathien thuawi

Kristien ei ni tan tir, tienlai deu khan chu “Piengthar”  ti el lovin “Pathien thuawi” an lo ti el hlak a, an lo indik lem an naw mani ding aw ti theiin a um. Pathiena inthawka piengthar tahai chu Pathien thuawi anni ding hrim a nih. Pathien thuawihai chun suol an theida a, suol an thaw ngai nawh. Tulai hin chu piengthar inti, sienkhawm Pathien thuawi si lo hi ei tam ta hle niin an lang. Pathien thu hriltu han Pathien thu tha tak tak an hril a, thu tha le hla tha tak tak ei ngaithlak nasa ta a, a hriet khawm ei hriet  hne ta khawp el. Eden huona inthawk Kalvari tlang chenin ei hriet taluo ta a, sienkhawm piengthar lovin ei chiengthar a; nunah ni lovin a thuin ei fie hlak niin anlang. A thu hai hi tisaah inchang sienla chu malsawmna dawng nasa nawk zuol ngei ei tih.

Pathien thu hi a hre lem le mani hriet dan an dik lem ti nuomna leiin ei inhniel chiem chiem a,  hiengang inhnielna hin iengang chie in am thlarau nuna dingin hlawkpuina ei neipui ding ti hi hrietthiem a harsa hle. Pathien thu hi chu a neitu Pathien a inthawk vek naw hin chu a thuin ei fie a, nunpui sunzawm ding a um naw hlak  niin an lang. Pathien thu hi nunpui inla chu piengthar chau ni lovin Pathien thuawi ei hung ni thei ding a nih. Pathien thu hi ei nunpui naw leiin Pathien hmel a hlie a, ei nunah mi han fak ding le hlawkpui ding an nei ngai nawh.

Pathien hming hi a naranin ei lam nasa a; puipung nikhuo le khawlai function neinaah a hming ei lam rik hmasa naw chun ei programme ei tan thei naw a ni deu tak. Thaw ngei ngei dingah ei ngai a, sienkhawm thaw ngei ngei dinga ngaina ei neina hin ei ngaihlutna le an zaumna ei hriet naw pha ta lem an naw mani ti theiin a um tlat el. Thaw dan pangngai ve hrim ding le ngei ngei dinga ei ngaina hin thil pangngai ve mei mei le thaw dan phung sathlie a nei a mei meiah ngaina a min neitir an ta naw mani? ti dam hi ngaituo chieng a ngai hle niin an lang.

Pathien thuawi  hi a pawimaw a, a tha hle ti khawm ei hriet. Amiruokchu, harsa ei ti tlang hle. A harsa lei hin Kristienhai lai khawm insawiselna a um rawp hlak. Piengtharna ei ngaipawimaw ang tho hin Pathien thuawina tiengpang khawm mi piengthar tahai chun ngaipawimaw seng inla nuom a um. Pathien thuawina le piengtharna hi inzawm tlat a ni leiin a hrana the chi ninaw nih. Mi piengthar le Pathien thuawihai nuna chun mi han entawn ding, fak ding le inchuk ding an hmu hlak. A hril ringawt hi chu a thiem ei tam ta a, ei baksam chu Pathien thuawina hi a nih. Pathien thu ei awi tha phawt chun ramthim le ramthar ei ti haia ei rawngbawlna hai khawm hi tuta nek hin a hung hrat lem ring a um. Hi lei hin ramthim le ramthar ei invawi ang bawk hin Pathien thuawina hi invawi seng inla nuom a um.

Kristienhai hin tluklutna indik ei mamaw a. Iemani leia harsatna le beidawngna ei tuok a ni thei. Beidawng lai chun lungril fim put a harsa a, thutlukna siem thiem a harsa hlak. Thalai, tleirawl tam takin mani ruolhaia inthawk thurawn (advice) tha lo le him lo an lak a, inruithei thil tieng dam an fe hlak. Hi thurawn hi, thurawn indiklo le him lo a nih. Harsatna le beidawngna tuokhai ta ding chun mi piengthar le Pathien thuawihai thurawn lak a thain a him tak ti hriet tlat ding a nih. Pathien thuawihai hi pan man an um a nih.

Kristienhai ta dingin piengthar a pawimaw ang bgawkin Pathien  thuawina hi a pawimaw em em el a nih. Harsatna le beidawngna nei han mi piengthar tha le Pathien thuawi tha hai  an pan leia taksa chau damna ni lova an thlarau chen damna hmu hi an tam ta a nih ti khawm hi hriet tlat ding a nih. Sakhaw dang biehai neka kristienhai hamthatna chu nun dan lampui tha a thlawna mi kawkhmu theitu ding mi piengthar tha le Pathien thuawi tha, mihai thangpui dinga inpeisa ei nei hi a nih.

Don't Miss
© all rights reserved
made with by Simon L Infimate