LAWMPUINA THUPUONG
Assam Public Service Commission (APSC) huoihawta hnuoia Combined Competitive Examination, 2014 Final result suoka hlawtlingna insangtak chang Nk. Phyllis Hrangchal, Assam Civil Service (ACS), Guwahati HSA Joint Headquarters a Executive Member ni lai mek le Pu James A Songate, Assam Police Service (APS), HSA Barak Valley Joint Headquarters a President ni lai mek hai hi HSA chun a lawmpui tak zet. An sin inrimna ra ditum tak anni mimal hlawtlingna el khela Hnam chawimawitu le suk hmingthatu an nina hi entawn tlak an ni zie a sukchieng hle a nih.
An sin thawna ringum taka thaw ding le Sawrkar le Ram le Hnam ta dinga mi tangkai tak le ban pawimaw tak hung nia malsawmna tamtak dawng dingin ditsakna insangtak el HSA’n an hlan.
Inchuklai hai nasa taka thang la nawk zuol a, anni anthawka inchuk dawk neia hma la nasa nawk zuol seng dingin ei inngen tak zet a nih.
(JOYFUL L THIEK)
Secretary, Education
Hmar Students' Association
General Headquarters
