Responsive Ad Slot

Hmasawnna Thar | 06 July, 2016

Wednesday, July 6, 2016

/ Posted by VIRTHLI HMAR
HNA indintu Pu Thangsang Intoate nunrawng taka that; pawl tum tumin an dem thu an puong
CCPUR: Hmar National Army (HNA) indintu le Kuki National Organisation (KNO) a Vice­President ni laimek Pu Lalthangsang Intoate (55) s/o (L) Khamlien Intaote of Sielmat chu July 5, 2016, 1:00AM vel khan tuti hrietlo han Hmarveng, CCPur­a a chengnain gate tuol lai silaiin na taka an kap hliem a,District Hospital, CCPur panpui a ni a, sienkhawm a hliemna tuorzo lovin a thi.

A ruong hi Postmortem thaw dingin District Hospital Morgue­a sielut a ni hnungin zani sun dar 10:45 vela inthawk 2:00PM vel chen khan Police le Doctor han District Hospital, CCPur Morgue­ah Postmortem an thaw a, Postmortem thaw zo zani zantieng khan Hmar Ambulance a phurin a hnungah KKL Ambulance in a zui a,  two wheeler han hma thuoiin  a hnung takah four wheeler motor han zuiin Hmarveng­a a chengnain panpui a ni a. Hmarveng­a a inah sunna hun iemanichen hmangpui a ni hnungin Sielmat­a a ruong innghatna dinga ruot Vanso Cottage, Sielmat CCPur panpui le, a ruong mengkhawvarpui a ni a, July 6, 2016 hin Sielmat thlanmuolah a ruong vuiliem ning a tih.



A nuhmei Ramdinmawi hril danin, Pu Thangsang hi zan dar 9 vel khan ina inthawk a suok a, a khawlai leng hung tin zing dar 1 vel khan a in gate bula tu ti hrietlo han silaia an lo kap niin a hril. Hospital panpui a ni chen khawmin biek la hrein a la tawng thei niin ei thu dawngna dang chun a hril bawk. Hi thu ei sut chena hin tu pawl khawmin anni thaw a ni thu an la puong nawh. A nuhmei Ramdinmawi le hin naupasal 2, a upa lem kum 4 mi le a naupang lem kum 2 an nei. Pu Thangsang taksa a phingnem vawitieng le changtiengah silaimu lutna hmu theiin a um a, Police chun Pu Thangsang thina le inzawm hin FIR No. 35 (7) 2016 CCP­PS U/S 302/34 & 25 (1­C) A. Act. an registered.

Pu Thangsang sunna le inzanna in HSA CCPur Jt. HQ in CCPur khawpui sunga dawr le bazar hai khar dinga ngenna (appeal) an siem angin zanikhan CCPur khawpui sunga dawr le bazar hai chu khar an nih.

Pu Thangsang hi hnam ta dinga mi thahnemngai em em, HPC Movement hun lai khawm a thil nei le sum le pai hai inro der loa lo thaw lawm a, a nei popo hnam ta dinga lo vuihmang vetu, thuziek thiem le ngaidan tha le vision tha takel nei le mi lungril lien takel a ni a, Hmar hnam sunga chawi pawl pathum um hai pumkhata an um theina dinga nasa taka hmalatu, hnam ta dinga mi tangkai mi hlu takel a ni a. A bik takin HNA Command area sunga cheng mipui hai chun an inro le inpam takzet thu an hril tawl.

Pu Thangsang nunrawng taka that a nina thua hin Hmar Inpui, HYA, HSA le HWA hai bakah Hmarveng Village Authority chun  tuolthattu hai an dem thu an puong tawl.
 
Lusun sungkuo hai ei chanchinbu chun a sunpui hle.

HPC (D) in inhnamhnawina an neinaw thu an puong
CCPUR: Zanita (July 5, 2016) a John F. Hmar, Secretary, Information & Publicity, General Headquarters, Sinlung in Press Release an suo a chun Pu Lalthangsang Intoate, President, Hmar National Army (HNA) thina chungah HPC (D) chu inhnamhnawina iengkhawm a neinaw niin a hril. An press Release a chun hiengang hin an ziek:

A hmasa’n Pu Lalthangsang Intoate, President, Hmar National Army (HNA) thina chungah hin HPC(D) chu inhnamhnawina iengkhawm kan nei nawh ti mi tuel khawm hriet dingin kan puong.

Lusun sungkuohai kan tuorpui takzet ti kan puong le inruolin hienganga inthatna rapthlak tulai ang huna a tlung el hi pawi kan tiin kan dem takzet bawk.

Tulai Manipura ei Politics kalchawiin hmasawn tieng a pan mek lai le UPF le KNO khawmin Political Demand thuhmun neia hmalakna a um mek laia Political Dialogue chen khawm UPF le KNO table hmunkhata inthung tlang thei ta hiel lai le, a bik takin ei hnam (Hmar) khawm Hmar Christian Leaders’ Forum (HCLF) haiin a chawi pawlhai khawm remkhawm tuma nasa taka hma a lak lai zing bakah nikhat lai el khawm khan Imphal hmuna ngei khawm hlohlimtlangna le thlaithleng chen khawm awt tlanga hlim le lawm taka inpawltlangna hun hai hmang a;  hma tieng peia khawm hmabak tam tak nei a, lan pawltlang nawk pei dinga intiem a inthe kan ni laia hienga a chunga nunrawng taka kutthlakna rapthlak a hung tlung el hi HPC(D) chun hrietthiem harsa kan tiin a thawtuhai hi man dawk ngei a an phu tawk hremna pek ngei ni raw hai seh.

Pengpelep Music Video
CCPUR: Hmar Music Band “Pengpelep” single Music Video hmasatak “Chawnlam Hla” chu July 8, 2016, 6PM khin Life Cafe, Rengkai Road­ah tlangzar ning a tih.

DC Office Electric
CCPUR: DC/CCPur Office in kum 2 sung zet Electric department a inthawk electric meivar la lova Generator le Solar power a hmang hnungin DC/CCPur ngenna angin zanita inthawk khan Dept. chun  AB Cable hmangin DC Office electric a pek nawk tah.

Ration Card pekir mi 309
CCPUR: CCPur district­a chun zani chen khan NFSA hnuoia Ration Card pekir mi 309 an tling ta niin DC Office­a Civil Supply Deptt. report chun a hril. NFSA criteria tlingzoa an inhrietnaw leia Card hi an pekkir a nih.

I­Day Orientation on IDCF
CCPUR: District Health Society/CCPur hmalaknain zani 11:00AM khan CMO Mini Conference Hall­ah ‘I­Day Orientation on Intensified Diarrhoea Control Fortnight (IDCF)’ nei a nih. Special Guest in T. Goukhomang, ZEO le Dr J. Son Goukkham, Medl. Supdt. an thang. Orientation hunah Dr VC Pau, DFWO/CCPur le Tongzakai, Paediatrician, Dist. Hospital hai an thang a, CHC le PHCs haia MO i/c hai le PO, IDCS, CDPO hai an thang.


Hi zo 2:00PM khan CMO Mini Conference Hall­ah  National Program for Prevention and Control of Deafness (NPPCD) le inzawmin CMO inrawinain PHC Singngat, PHC Saikot, PHC Henglep, PHC Thanlon le CHC Parbung haia Medical Officer i/c han meeting an nei.

Vanamohatsav, 2016 hawngna
CCPUR: Divisional Forest Officer,Southern Forest Division, Churachandpur huoihawtnain July 7, 2016, 2:00PM a inthawk khin Kangvai Model Village Community Hall­ah “One Tree, One Family” ti thupuia hmangin 67th Vanamohatsav, 2016 hmang ning a tih. Hi huna hin Pu Lunminthang Haokip, IAS, DC, CCPur chun thing phun kut hmangna hi inrawi a tih. Pu C.T. Lian Guite, MDC (New Lamka West) chu Special Guest in thang a tih.

HYA GHQ in sunna le an dem thu an puong
CCPUR: July 5, 2016 zingkar dar 1 vela HNA Founder le KNO Vice­Supremo ni lai Pu Lalthangsang Intoate mi thenkhatin lo kap a, chema sun le a hringna latuhai chu Hmar Youth Association (HYA) GHQ chun an thiemnaw hle a, hiengang thil tlung hi HYA GHQ chun pawi ti takzet thu le hiengang thil tlung nawk tanaw sien a nuom thu a puong. Hnam invawi le hmangai em emtu a ni a, hnam ta dinga a thilthaw that le an pekna hai HYA chun theinghil ngai naw nih tiin zanita HYA GHQ a Info. & Publicity Dept. thusuok chun a zieklang.

Mi thar 17 thangin minister 19 laklut le pakhat Cabinet rank­a hlangkai­a Union Cabinet suklien a nih
NEW DELHI:  Mr Narendra Modi PM nina hnuoia Union Cabinet chu zanikhan minister 5 ban le mithar 17 thangin minister thar 19 lakluta Union Cabinet suklien a ni a, Envinronment Minister (Independent Charge) Prakash Javadekar chu Cabinet minister­a hlangkai/laklut a nih.

Minister dinga laklut hai hin zanikhan Rashtrapati Bhavan, New Delhi­ah President Pranab Mukherjee hmaah minister dinga sesamna an nei. Minister­a laklut thar hai hi Uttar Pradesh, Madhya Pradesh le Gujarat haia inthawk 3 seng, Rajasthan­a inthawk 4, Maharashtra­a inthawk 2; West Bengal, Assam, Karnataka le Uttarakhand haia inthawk minister pakhat seng an nih.

Minister of state –a laklut thar hai chu­ Faggan Singh Kulste, S S Ahluwalia, Ramesh Jigjinagi, Vijay Goel, Ramdas Athawale, Rajen Gohain, Anil Madhav Dave, Parshottam Rupala, M J Akbar, Arjun Ram Meghwal, Jaswant Singh Bhabhor, Dr Mahendra Nath Pandey, Ajay Tamta, Smt. Krishna Raj, Mansukh Mandaviya, Anupriya Patel, C R Chaudhary, P P Chaudhary le Dr Subhash Bhamre hai an nih.

Ban­a um minister hai chu ­ Sanwar Lal Jat (Water Resources), Nihalchand (Panchayati Raj), Ram Shankar Katheria (HRD), Mansukh Bhai Vasava (Tribal Affairs) le Mohanbhai Kundaria (Agriculture) hai an nih.

Minister­a laklut thar 19 hai laia 17 chu BJP an ni a, a dang hai chu Apna Dal le RPI a mi an nih. Minister laklut thar hai le hin Union Council of Ministers 83 an tling tah. Constitution dungzui chun Union council of minister hi 82 chen an um thei a, hi lei hin minister thenkhat ban an la hung tul el thei a hril a nih.

Kum 1 sunga Artui mamaw zat vaibelsie 40
IMPHAL: Manipur mipui han kum khat sunga Artui an mamaw zat chu Vaibelsie 40 a ni laiin Manipur a Artui ei thar suok zat chu Vaibelsie 11 chau a ni a, Vaibelsie 29 dang chu state danga intahwka ei laklut a nih tiin Dr N. Rajendro Singh, Director, Veterinary & Animal Husbandary, Government of Manipur chun a hril. Chun, kum 10 liemtah sung khan bawngpui 170279 haiah chi (artificial inseminations) kap lut a ni a, hi taka inthawk hin Bawngte 76305 an hung in te a, hienghaia inthawk hin bawngnene 26,70,675 lakh litres tharsuok a nih tiin a hril bawk.

Truck eksidenah mi 2 thi, mi 4 hliem
IMPHAL: Zani zing dar 7 vel khan Tamenglong District sunga Naomkalong le Salungpham inkarah Truck a eksiden a, lamthlang tieng ruom ft. 300 vela inthukah a tla lut a, Truck a chuong mi 2 an thi a, midang 4 an hliem. Hliemhailaia mi pahni an hliem inrik leiin Imphal tieng hung phur le Hospital­ah admit an nih. Thina tuokhai laia pakhat a hmuna thi a ni a, pakaht chu District Hospital, Tamenglong panpui a ni lai mekin lamlakah a thi. Truck eksidenna hmun hi Tamenglong District Headquarters a inthawka km. 25 vela hla a nih. Truck hi lamlien tha naw taluo leia eksiden a ni el thei tiin tuolsung mihai chun an hril.

CM in ditsakna chibai a buk
IMPHAL: Muslim sakhuo zuituhai Kutpui tak Id­Ul­Fitr chu vawisun hin Manipur a Muslim sakhuo bie hai khawmin hmang an tih. Manipur­a It­Ul­Fitr Kut hmang dinghai po po chu CM O.Ibobi Singh in ditsakna chibai a buk a, hi Kut hi inremna Kut, muongna le inunau that lemna hung intlun ngei sienla a nuom thu a hril.

Branch Manager in FIR a file
IMPHAL: July 4, 2016 zantienga HDFC Bank, Thoubal Branch rukru han an rawkna le inzawmin senior branch manager Gidon Marom chun zanikhan Thoubal Police Station­ah FIR a file. Official report dungzuiin Bank rawktu hai khan hmai an tuom a, vaults hawngin sumfai Rs. Rs 87,70,805/­ le rangkachak incheina Rs. 1,17,18,100 manhu ding an lakhmang niin a hril. Police chun an sukzui mek a, mi man ruok chu an la nei nawh.

BJP Manipur in­charge a hung inzin
IMPHAL: BJP Manipur Pradesh in­Charge Prahlad Singh Patel chu zankhat riek dingin zanikhan Imphal a hungtlung. Imphal khawpuia a cham sungin BJP Manipur President le K. Bhabananda Singh, Convenor of Election Committee, Th. Chaoba le BJP thuoitu danghai inpawlpui a ta, BJP Manipur Pradesh Executive Committee member dinghai an sukfel ding nia hril a nih. Prahlad Singh Patel hi Damoh Lok Sabha Constituency, Madhya Pradesh a inthawka thlangtling a nih.

UP a Airport hai siemthatna dingin Rs. 400 crores
NEW DELHI: Sawrkar thlungpui chun Uttar Pradesh­a Agra, Allahabad, Kanpur le Bareilly airports hai siemthat le sukchangkangnaa hmang dingin  financial assistance Rs. 400 crore a pek ding niin Minister of State for Civil Aviation Mahesh Sharma chun chanchinbumihai kuoma a hril. Kushinagar airport siemthatna ding khawmin sawrkar thlungpui chun state sawrkar kuomah Rs. 200 crores a pek thu a hril bawk.

Ambedkar hminga thlakthleng dingin
NEW DELHI: Sawrkar thlungpui chun Madhya Pradesh­a Indore district sunga Mhow Railway station chu BR Ambedkar hminga thlakthleng dingin remtina a nei tah. Hi thua hin Union Home Ministry chun Madhya Pradesh sawrkar chu Gazette notification insuo dingin an hriettir. BR Ambedkar Railway station tia thlakthleng dinga ngenna hi tukum January thlaa kha Social Justice and Empowerment Minister Thawar Chand Gehlot in Home minister Rajnath Singh le Railway minister Suresh Prabhu hai kuoma a lo pek ta  a nih.

Karnataka Speaker dingin KB Koliwad
BANGALORE:  Mr KB Koliwad chu zanikhan Karnataka  Legislative Assembly Speaker dingin lungruol taka thlangtling a nih. Koliwad hi Ranebnnur Constituency MLA a nih. Speaker ni lai zing Kagodu Thimmappa chu June 19, 2016 nia Revenue minister dinga laklut a ni leia Speaker­a inthawk an ban  leia Speaker post hi hung ruok a nih.

HPC(D) le inbiekna dinga inbuotsai mek:Lalzirliana
AIZAWL: Mizoram Home Minister R. Lalzirliana chun, HPC(D) le inbiekna nei dingin remruotna fepui mek a nih tiin zanita Chanchinbumihai an hmupui huna a hril. Mizoram in Remna ni kum 30 na a hmang lai mekin Hmar unau hai chu an lan thim a, lungisiet an um hle a, ‘inremna le muongna kan dit” tia an khekri chun a lungril a tawk thu le tuta tuma HPC (D) le inbiekna nei ding hi nidanga inbiekna ang ni lovin, inremna a um ngei theina dinga inbiek a tul tia hrilin HPC tieng khawm inremna a um ngei theina dinga inbuotsai dingin a ngen.

VAWISUN THUPUI
Tukhawm mihriem thisen insuotu chu mihriem vekin ama thisen chu an insuo ve ding a nih; Pathienin ama angpuiin mihriem a siem sih a. ­ Genesis 9:6

Editorial: Inremna le muongna

Inremna le muongna ei dit a, ei hril a, ei khekpui a, ei ngen a, ei hni a, ei tawngtai hlak. Sungkuoah, khawtlangah, ram le hnam sungah inremna a um naw chun thil iengkim el hi a hlawtling ngainaw a, a sukuk hlak. Hi lei hin sungkuoah, khawtlangah le hnam sungah inremna a hung um theina dingin thang ei lak fan fan hlak. Inremna le muongna a um chun hlimna, lawmna, hlawtlingna, inthanglienna le malsawmna hai ei dawng hlak. Inremna le muongna um nawna ram le hmuna chun tukhawm an um pei naw a, ram rinum le hmun rinum a hung ni hlak. Hi lei hin rambung hran hrana sawrkarhai chun an ramah inremna le muongna a hung um theina ding lampui zawngin hma an lak hlak. Ei Bible khawmin inremna hi a dit a, inremna zawnga hnawt pei dingin a min chuktir a nih.

Ram buoi rinumzie chu a hretu seng ei nih. Ei ram ngei khawm tribe thenkhat hai inkara inhrietthiemnawna um leiin indona hiel a hung suok a, khanglai huna khan sawrkarin Curfew a puong a, Curfew puong khuma ei um laia a rinumzie kha ei la theinghil naw seng ring a um. Thil iengkim el kha a buoi vawng a, ieng thil khawm thaw thei lovin a um a, mipui han rinumna le harsatna chi tum tum ei tuok a, thaw thei ei nei si naw leiin sepui ruo do an hril ang elin ieng hril thei lovin ei tuor tlawk tlawk el a ni kha! Inremna le muongna a hung um theina dinga hma latuhai zarin inremna a hung um thei a, mimal, a hnam le a ram zawng khawmin ei inthanglien duok duok el a nih.

Inremna um thei naw sienla chu ei ram rethei, harsat le tluksiet dan ding chu hrilin a siek nawh. Inremna a hung um theina dinga hma latuhai kha lawm an um a, ngaisang le inza an um em em el a nih. Inpak le chawimawi an phu hlie hlie a nih. Peace Mission sin thawa tubo le dolung kara hun, tha le zung, sum le pai, mani thiemna, varna le tlawmngaina hmanga hma lo lahai kha theinghil ngai naw inla nuom a um. An inrimna ra kha a hlu bek bek el a nih. Ei ram le ei hnamin inremna le muongna hi a la mamaw zing a. Inremna le muongna a hung um thei peina dinga hma latu ni dingin thang la seng ei tiu. Hi hi ei mawphurna a nih.

A bikin iem ie ti tawng hmang hai sungah inremna le muongna tluontling a hung um ngei theina dingin hnam le kohran thuoitu han hma an lak a, mipui han an hmalakna ra hung parvul ding chu beisei takin an lo thlir thup a. Hieng laizinga ringnaw tieng taka thil ditum lo takel a hungtlung el hi a pawi bek bek el a nih. A pawi bek  bek ti bak hril thei ei nei si nawh. Ienganga fe pei le rorel pei ding am ti khawm thuoituhai ta ding chun a harsa bek bek el a, Kohran tinin mani tawngtaina sengah ei lo hriet seng nuom a um. Ei hmabak ding hi an thim map a, iengang thil am kakhawk a hung nei ding ti hi huphur um takel a nih. Ei dit naw le ei nuom naw thil hung intlun pal a tih ti hi inlau a um bek bek el a nih.

Tuta hmaa thil tha lo um hlakhai, ei lungsenna le ei lungawinawna amani hai chu sie boin, theinghil inla. Ei hnam siem tha ding le ei lungril lo piengsuol tahai khawm inpiengtha tir nawk dinga thang ei lak tlang a va tul ngei de maw!  Chuong a ninaw chun ei hnam hi mihai nuisaw le sirdein a la hung um ding niin an lang. Ei hnam siem tha dinga ke ei pen tlang a ngai ta takmeu a nih. Inremna le muongna tluontling a hung um theina ding chun mimal tin hi ei pawimaw a nih ti hre thar ei tiu.

Ieng hnam le ieng ram khawm nisienla, an thuoituhai hmalakna inza lo le bawse zawnga chang hlak hnam hai hrim hrim hi khawvela ngirsuok an la um ei hriet nawh. Hnam thuoituhai hmalakna inza le zuituhai chu hnam ngirsuok le hnam inzaum an hung ni zat zat hlak. Mi thenkhatin  an nina an hmang thiem ngainaw a, an nuom nuom thaw theina zalenna amani, nuom ang anga um theina zalenna amani an ti hlak niin an lang. Ei zalenna le ei thil thawin  hnam  rorel le kalchawina a bawsiet ding a ni nawh. Chuong a ninaw chun ei hnam ta dinga hnawchepna le phurrik a la hung intlun ding a nih.

Don't Miss
© all rights reserved
made with by Simon L Infimate