Responsive Ad Slot

Hmasawnna Thar | 09 June, 2016

Thursday, June 9, 2016

/ Published by VIRTHLI
Manipur Tribal area sungah darkar 24 aw ding total shutdown thaw tan a nih
CCPUR: Zani zignkar khan JAC Against Anti­Tribal Bills le Outer Manipur Tribals Forum (OMTF) han Imphal­ah Emergency meeting an nei a.Hi meeting­a hin zani hmasa zana Manipur Bhavan, Sardar Patel Marg, New Delhi tuola Manipur Tribal mihai chunga Delhi Police le Manipur Rifles hai chet dan nunrawng takel chugnthu an hriltlang. Hi thil tlung dodalna le demnain Manipur Tribal areas sungah darkar 24 sung Total Shutdown thaw dingin an rel. Hi dungzui hin Total Shutdown chu zani zanrila inthawk khan tahw tan a nih. Total Shutdown hin Medical Services and Emergencies, Airport pick­up and drop, Electricity Department (including prepaid recharge outlets), Telecom Service, Water Supply, on going School/College exams, a hmaa lo ruotlawk tasa Conference/Seminars le inneina hai huomsa naw nih (exempted) ning a tih tiin Information and Publicity Department, JAC Againsts Anti­Tribal Bills in zanita Press Release an insuo a chun an zieklang.

Delhi­a Manipur tribal­hai tuorna pawi ei tipuizie, ei tuorpuizie le ei thangtlangzie suklangna dingin Manipur a tribal­hai chu total Shutdown hi lo thlawp dingin JAC chun ngenna an siem. Chun, June 9, 2016 a inthawka Salpate Pumbuk, Hiangtam Lamka a Sit­in protest nei tan dinga ti chu hun danga tan dinga ti le a hun ding chu a hnunga mipui kuoma inhriettirna la hung siem ning a tih tiin JAC thusuok chun a hril.

Manipur Bhavan, Sardar Patel Marg, New Delhi a Anti­Tribal Bills 3 hai chungthua an lungawinawna va suklangtu Manipur tribal­hai chu Delhi Police le Manipur Rifles han hmawl hmangin an vuok a, an samah keiin an hnuk a, an benin an pet a, nunghak 2 lem chu Delhi Police han mawilo takin an sawisak. Hi lei hin hliemna tuok hril khawm an um niin JAC thusuok chun a hril.

DC in thautui lak thei ding zat a bituk
CCPUR: June 8, 2016 zanril­a inthawk JAC in Total Shutdown an puong bakah ni 10 sung aw dinga JAC Against Anti­Tribal Bills in Economic Blockade thaw dinga an puong leiin zanikhan CCPur khawpui sunga Petrol Pump haia chun Petrol/Diesel dit mipui an tam hle.



Hieng laizing hin JAC le Outer Manipur Tribals Forum (OMTF) in June 9, 2016 a inthawk June 19, 2016 chen, ni 10 sung National Highways haia Economic Blockade thaw dinga an puong le inzawmin DC/CCPur in zanikhan Oil Pump haia motor neitu han nitina thautui (Petrol/Diesel) an lak thei dingzat bituk a siem.

Hi dungzui hin Heavy (Truck& Buses) han ni khatah HSD (Diesel) litres 60; LV Tractors &LV 4 Wheelers han litres 20; Three Wheelers han Petrol litres 5 le Diesel Litres 5;  LV 4 wheelers han Petrol litres 10 le Diesel litres 10; LV 2 wheeler han Petrol litres 5 pei la thei an tih. Thautui la ding han Motor RC book an chawi tul a ta, DSO(CAF&PD) kuomah daily stock position report an pek zie ding ti le JCB le Bull Dozer han Diesel an lakna dingin  DC/CCPur kuoma ngenna an peklut tul a tih.

BSN ah B.Sc.Nursing inchuk thei ta ding
CCPUR:  Kum 2016­17 session­a inthawk Bethesda College of Nursing (Bethesda School of Nursing), Muolvaiphei­a chun ramdang pan ngai ta lovin B.Sc. Nursing inchuk thei a ni ta ding a nih.

MRH&RC hnuoia indin tan a lo ni a, hi school­a inthawk mi tam takin GNM training zoin sawrkar le private haiah sin hmu phanain an lo hmang ta a nih. Hieng lai zinga B.Sc. Nursing chen inchuk thei dinga dawmsanga a hung um hi ei chanchinbu chun a lawmpui hle a nih.

MTFD thangpuina dinin Rs. 1 lakh thawn
CCPUR: JAC Against Anti­Tribal Bills chun Dr Chinkhanlun Guite, Advisor, MTFD fethlengin zanikhan Manipur Tribal Forum, Delhi (MTF­D) thangpuina dingin Rs. 1 lakh a thawn. New Delhi hmuna protest nei huna hliemna tuok hai enkawlna ding le MTF­D in a tul le pawimawna naa a hmang dinga pawisa hi thawn a nih. Chun, zanikhan ATML le ATWU pawl chun Delhi­a MTF­D hmalakna le protest leia hliemna tuok hai thangpuina ding dawlin CCPur khawpui sung zanikhan an fang a, cheng nuoikhat chuong zet an dawldawk niin ei thu dawngna chun a hril.

GB meeting ding thul
CCPUR: June 9, 2016 a DC Office­a DC & Chairman, District Health Society/CCPur inrawinaa District Health Society General Body meeting nei dinga ti chu JAC in total Shutdown an puong leiin thul a nih tiin ei thu dawngna chun a hril.

Delhi­a Protest leia man hai insuo vawng an ni tah:
ADCC in full support a puong, Rs. 1 lakh an hlan
NEW DELHI/CCPUR:  Manipur Tribals Forum Delhi (MTF­D) hmalaknaa Anti Tribal Bills 3 hai dodalnaa June 7, 2016 zana New Delhi­a Manipur Bhavan hmuna mipui an va fekhawm huna security hai le innawrbuoina tlunga man hai chu zani zantieng khan an intangna Chanakyapuri Police station­a inthawk insuo nawk vawng an ni tah tiin ei thu dawngna chun a hril. Mana um le Police Lock­upa hrentang hai lai khan HSA Delhi JHQ Secretary Nk. Thelma Ramthienghlim thangin HSA member thahnemtak an thangsa a nih. Ei thu dawngna thenkhatin a hril dan chun, peacefull protest nei a ni laiin Manipur Bhavan sawng chunga inthawk mi thenkhatin Delhi police hai le protestors hai teklei/lungin an zuk deng a, chu taka inthawka buoina tlung niin a hril. MTF­D Convenor Pu Romeo Hmar khawm hrentanga um hai kan dinga zani zingkara a va fe huna an lo man sa ve a nih. Hliem thenkhat Hospital­a enkawl hai khawm first aid pek an ni hnungin Police station tieng hin zani zingkar khan an thuoi tawl a nih. HSA member lock­up a intang hung suok hai thla huolnain DHWA chun zani zantieng khan ruoi a buotsai pek bakah DHWA T­Shirt a present seng bawk.

 Zani zantieng 2:00PM khan Mr Langkhanpau Guite, Chairman, ADCC inrawinain MDC han a office chamber­ah emergency meeting an nei. Hi huna hin Anti Tribal Bills 3 hai le inzawma Delhi­a Manipur Tribal Forum (MTFD) inrawinaa movement fe mek an thlawp thu; peacefull protest huna Manipur Bhavan a Manipur Rifles le security  han nuhmei­pasal enhrang lova kut thlaka an sawisak chu nasa takin an dem a, MTF­D hmalakna full support an puong. Chun, zani hmasa zana protest huna hliem hai, jail chen tlung hai MDCs han an tuorpui zie inentirnain Rs. 1 lakh an dawlkhawm a, zani zantieng khan Chairman, ADC/ CCPur inrawinain Dorothy Nenem, Core Committee, MTF­D kutah an inhlan.

Khuo a tamlem haiah LLIN/ITN sem zo 
CCPUR: District Malaria Department chun, Parbung CHC, Senvon PHC, Sibapurikhal, PHC, Patpuihmun, PHC le Sagang PHC hnuoia khuo le veng haiah Long Lasting Insecticide Net/Insecticide­treated­Net (LLIN/ITN) sem la ninaw sienkhawm PHC le PHSC hnuoia khuo le veng a tamlem haiah sem zo a nitah tiin a hril.  LLIN/ITN semna hi July thla sunga zo hman ngei tum a ni a, manpower tlaksam lei le lampui harsat leiin duthusamin a fe hrat theinaw niin Department official thusuok chun a hril. Chun, village wise data collection thawa umhai duthusam a tling naw a, khaw thar tam tak ASHA worker um nawna a um leiin Department in data a neinaw a, hi lei hin LLIN/ITN semna hi duthusamin a hrat theinaw niin an hril bawk.

HKI thuoitu han Hmarbiel le Vangai an fang mek
HMARBIEL/VANGAI: Hmarram Kohran Inzawmkhawm (HKI) thuoituhai chun Hmarbiel le Vangai mipui haikar a inlaichinna a tha nawk zuol beiseina le tukum kumbul lai a, General body meetingin a lo rel ta angin HKI thuoituhai chu Hmarbiel le Vangaitlang hai sir dingin an inzin suok a, June 6 le 7, 2016  hai khan Patpuihmun­ah Vangai Kohran thuoitu mi 60 chuong hai consultation meeting an neipui. Hi huna hin HKI chun HKI thiltum, hmalak dan, thaw ding, ram siemthatna ding, HKI Vangai  tieng thuoitu ding siem dan ding le a dang dang hai Presbytery hai senga lo intlun sawng dingin Vangai tienga Kohran tum tuma thuoituhai hrilin, mipui ngaidan lo lakhawmtu dingin Rev. Rev.Immanuel Hrangchal, Rev.Vanlalruot & Rev.Laldinglien hai hai lungruol takin an ruot.



Tuiruong (Barak) leilak, Taithu le Patpuihmun  inkar leilak ding siem meka sinthaw tuhai chun June 6, 2016 ni khan, thla hmasa laia an ruolpa tuia a tlakhlumna hmun tak, leilak dawna ding hmunah mihriem mihriem lien deu el, a lu tieng po dum (black le a mawng tieng po eng (yellow) an hmu leiin an ti a, thenkhat an veng tienga kir an lo tum a. Sienkhawm HKI chun ti lo dinga hrilin Rev. Lalrohlu in tawngtaipekna a nei hnungin sin tha taka sunzawm dinga a ngen angin sin an thaw sunzawm nawk. Hi thil mak hmutu hi mi 3 an nia hril a nih. ­(Lalnunthang Songate)

Bandh leiin mail service um theinaw ding
CCPUR: JCILPS in zanita darkar 12 sung bandh an thaw leiin Imphal le CCPur inkara motor a tlan theinaw leiin zanikhan Tuibuong Post  Office­a chun Mail service (speed post ) etc a fe thei naw bakah JAC le OMTF in zani zanril­a inthawk darkar 24 sung total shutdown/bandh an puong leiin vawisun khawm Mail service a fe theinaw ding a nih.

R.K. Meghan kum 10 intang dingin
IMPHAL: Zanikhan M.K. Bhattacharjee, Special Judge, NIA Court chun UNLF Chairman, R.K. Meghen @ Sanayaima le midang 10 hai chu kum 10 sung lungin intang dingin an chungthu a rel. Kum 10 lungin intang dinga ti midang 10 hai chu UNLF Col. Nongyai, Lt. Col. K. Jeeten, Maj. M. Sarat, Capt. S. Boi, M. Nganba, O. Naresh, L. Jatishore Singh, W. Noren Singh, N. Dilip le Henbi Chani hai an nih. Mi 7 hai chu kum 7 seng lungin intang dinga ti an ni a, chuonghai chu­ S. Rakesh, T. Herojit Prem Singh, Landhori, O. Maniton, Y. Brajabidhu, N. Bomi Singhle A. Ibomcha hai an nih.

PCI kuomah intlun ding
IMPHAL: Yumnam Rupachandra Singh, Secretary, Editors’ Guild Manipur le Editor­ in­ Chief, Imphal TV chun zanikhan Imphal suoksanin New Delhi an pan. Manipur­a Media Organisations, Editors le Working Journalists han vauna an tuok rawpna chungthu Press Council of India (PCI) kuomah Yumnam Rupachandra Singh in a zun tlun ding a nih.

Honda Activa inrutu man
IMPHAL: Zanikhan Polo Ground, Imphal bula MPP Office tuola Honda Activa inru Md. Sahadat (29) s/o (L) Md. Abdul Gani @ Abocha of Lilong Turel Ahanbi Atoukhong chu mipui han an man a, a motor inruk leh City Police station, Imphal kutah an inhlan. Police han Court hmaah an thuoi a, June 14, 2016 chena Police kuta la um dingin a rel hri phawt.

B.F.Sc. inchuk nuom hai ta dingin
IMPHAL: Central Agriculture University, Imphal hnnuoia kum 2016­17 sunga College of Fisheries, Lembucherra, Tripura hmuna kum 4 sung Bachelor of Fisheries Science ding lakna dingin entrance exam a um ding a ni a, a thang nuom hai ta dingin  June 9­21, 2016 inkar sungin Directorate of Fisheries, Lamphelpat­ah lak Rs. 200/­ pekin thei ning a tih tiin Director of Fisheries, Govt. of Manipur chun zanikhan inhriettirna an suo. Application peklut theina hun nuhnung tak chu June 23, 2016 a nih. Seat umzat chu 9 (UR+ST+SC­ 7, OBC­2) a nih. Entrance exam June 28, 2016, 11AM in Directorate of Fisheries, Lamphelpat­ah nei ning a tih. Admitcard June 24­25, 2016 inkar pekdawk ning a tih. Thu chieng lem Directorate­ah kan thei ning a tih.

Ngate 40,000 Kangla Moat­ah
IMPHAL: Zani zing dar 7:30 khan Directorate of Fisheries, Manipur chun Pengba Ngate thangsain Ngate chi hran hran Kangla Moat, Imphal ah an insuo. Hi huna hin Dr R.K. Nimai Singh, Consultant, Govt. of Manipur, K. Radhakumar Singh, Commissioner (Art & Culture)  David K. Shimray, Director (Fisheries), Manipur, E. Soluchana Devi, Addl.Director (Fisheries) le H. Biramani Singh, Jt. Director (Fisheries) hai an thang.

Mamata in GST Bill an thlawp ding thu a hril
KOLKATA: West Bengal Chief Minister Ms Mamata Banerjee chun, Parliament­a Good and Services Tax (GST) Bill pass a ni theina dingin a party (Trinamool Congress) chun GST Bill thlawp a tih tiin zanikhan a hril. Politics thilah BJP chu khing sienkhawm TMC chun mipui ta dinga thil tangkai dinga chun BJP inrawinaa Centre sawrkar thlawp a tih tiin a hril bawk. GST Bill hi Lok Sabha­ah chun passed a ni ta a, sienkhawm BJP le an thlawppui hai minority nina Rajya Sabha­ah chun Opposition party Congress in an dodal tlat leiin pass thei lovin a la um a nih.

Tuila vadungah naupang 2 an tla hlum
AIZAWL: June 6, 2016 zantieng khan Champhai district­a NE Khawdungsei naupang pahni­ Lunlaljames­a (8) s/o Suahmanga le Suanngaihawma (7) s/o Sangpua hai chu Mimbung le NE  Khawdungsei inkara Tuila vadung­ah an tla hlum. An ruong hi zani hmasa zingkar dar 7:30 vel khan hmu a nih. An ruoldang hai le Tuila vadunga tui an insil huna changsuola tuia tla hlum an nih.

Railway Union in tiemchin umlo strike  
NEW DELHI: Railway Union chun, Pension Scheme thar ennawn ding le 7th Pay Commission hai thanga an thil ngen nawrnain July 11, 2016 a inthawk khin tiemchin um loin strike thaw an tum niin All India Railwaymen’s Federation (AIRF) General Secretary S. Gopal Mishra chun a hril. Charter of Demands an pek thla 6 hnunga khawm sawrkarin an thil ngen a ngaisaknaw leia lungawi lova Strike hi thaw an tum niin a hril. Railways hin thawktu 13 lakh vel a nei a, strike hi an lo nei tak tak chun Rel­a inzinna kawnga harsatna nasa tak an tlun ding a nih.

Bihar exam merit scam thuah mi 4 man
PATNA: Bihar School Examination Board hnuoia Class XII (10+2), 2016 merit scam thuah Police han mi 4 an man tah. Mana um hai chu Hajipur­a G.A.High School a Centre Superintendent ; Rajendra Nagar High School Principal, School teacher le Clerk hai an nih. Rajendra Nagar High School hi answerpaper check­na hmun niin G.A. High School hi topper­a thang hai examna Centre a nih. Tuhin Toppers hai kaina Vishun Rai College Principal chu man dinga zawng mek a nih. Science topper pahni ­Saurabh Shrestha, Rahul Kumar le Arts topper Ruby Rai hai chunga police chun FIR an lo file ta bawk.

Construction company in Sonia chungah FIR 
THIRUVANANTHAPURAM: Kerala­a construction company pakhat Heather Constructions chun Congress President Sonia Gandhi chunga FIR a file. Rajiv Gandhi Institute for Development Studies bawlna bill Congress in a pekzo nawh tia intumna leia FIR hi a file a nih. Sonia baka hin Kerala Chief Minister hlui Oommen Chandy le state home minister hlui Ramesh Chennithala le Kerala Pradesh Congress Committee (KPCC) Chief VM Sudheeran hai chunga khawm FIR a file niin ei thu dawngna chun a hril. Institute hi kum 2005­a kha Sonia Gandhi in a lo hawng ta a nih. Hieng laizing hin Congress spokesperson Randeep Surjewala chun, hi thua buoina hi darkar 24 sunga sukfel a ni ding thu a hril.

Hospital ward boy le guard in an suollui
GURGAON: SHKM Government Medical College a chun zani hmasa zan sawt hnung khan hospital Ward boy le security guard han hospitala enkawl mek nuhmei kum 22 mi chu room ruok pakhatah a thu le hla lovin an suollui. Hi thil hi zan dar 11:30 vela tlung a ni a, a suolluitu hai hi man an la ninaw a, nuhmei suolluina case siem khum an nih. Suollui­a um nuhmei hi nau 3 nei tah, June 2, 2016 a kha hospitala female general ward­a admit a nih. Hi hospital Director Dr Sansarchand Sharma chun, nuhmei suolluitu hai chu an sina inthawk ban nghal an ni ding thu a hril.

Hillary Clinton Presidential candidate dingin
LOS ANGELES: Hillary Clinton (68) chu US President inthlangna hung um dinga Democratic Party Presidential Candidate ni dingin a tling der tah. US rama nuhmei Presidential candidate dinga tling hmasa tak a la nih. Presidential candidate tling theina ding delegates 2,383 lai a hmu. US President ni laizing Barack Obama chun Hillary Clinton hi a lawmpui thu a hril.

VAWISUN THUPUI
Ka unauhai, miin, “Ringna ka nei,” ti sienla, thilthaw a thang si naw chun ieng am thahnem a ta? chuong ang ringna chun ama a sandam thei ding am a nih? ­ Jakob 2:14

Editorial: Mob Justice

Ei ram, ei state Manipur a hin mob justice or Mob rule or mob culture hi a tlung inzing ta hle a. Ei ram boruok fe pei dan enin hiengang thil hi hmatieng peiah khawm a la tlung nawk pei ding niin an lang. Manipur phaimi le tlangmi hai chun hienganga rorelna annawleh hmalakna hi thaw dan ding hrim, thaw dan tha le kalhmang nia ngaina ei nei am an ta ding aw ti theiin a um. Amiruokchu, fim taka ei ngaituo chet chet chun thaw dan tha le an dikpa tak chu niin anlang nawh. Hieng a ni lei hin mob justice or  mob rule or mob culture hi thaw rawp chi le hmang rawp chi a ni am ti hi Manipur mipui han chik taka ei ngaituo chet chet nuom a um. Mob justice, mob rule, mob culture leia thina, hliemna, sietna, inhmangna le thil ditum lo chi tum tum ei tuok ta hlak hai kha ennawn hlak inla nuom a um. Ei thatpui nekin ei sietpuina tiengpang a lien lemin a tamlem niin an lang.

Cambridge Advanced Learner’s Dictionary and Thesaurus a chun, “Mob Justice is the new (modern) name of Vigilante­ism. Vigilante­ a person who tries in an unofficial way to prevent crime, especially because they do not think that official Organisations, such as the police, are controlling crime effectively. Vigilantes usually join together to form groups tiin a ziek or a hrilfie. Oxford Advanced Learner’s Dictionary chun, A member of a self­appointed  group of citizens who under take law enforcement in their community without  legal authority, typically because the legal agencies are thought to be inadequate tiin a umzie a hrilfie.

A chunga hrilfiena haia inthawk hin Mob justice, mob rule or Mob culture umzie a chiengin a fie hne hle. Hieng ani chun Mob justice, mob rule or mob culture hai hi sawrkar dankala chetna a nih ti chu hmu le hriet theiin a um. Motor eksien hi thil um thei a ni a, ei ramah inzing utin a tlung hlak. Hienganga tuoksietna le inlirthei eksiden hi inlirthei khaltuin a tum hrim le a nuom leia tlung a ni nawh. Chuongang bawkin eksiden tuor hlak hai khawm hi an nuom le dit leia tuor le tuok an ni nawh. Eksiden leia tlung a nih. Inlirthei eksiden a tlung changin a khaltu a tlanhmang hlak. Ienglei am ei ti chun, inlirtheikhaltu chungah mob justice, mob rule or mob culture (tharum insuona) a tlung hlak lei a nih. Hiengang thil hi tlung ngainaw sienla chu driver tlan hmang ngai naw nih. Hi taka inthawk hin Mob justice or Mob rule chu rorelna indik le tha a ni le ninaw chu chieng takin a hung inlang. An dik naw lem le a thiemnaw lem  chu tum ni tang a ta?

Pasal pakhatin nuhmei a suollui annawleh thil an ruk a. Nuhmei suolluitu tak annawleh ruk inrutu tak a tlan hmang ta a. Hieng thil a tlung chang hin mipui ei pungkhawm a, nuhmei suolluitu or thil inrutu chengna In ei raw a, a thil neihai  ei suksiet pek  a, khawsunga cheng thei ta lo dingin an sungkuoin ei hnawtdawk hlak. Hieng thil a tlung huna hin thil suksuol der nawhai chenin an tuor pha hlak. Nuhmei suolluina le mi thil inrukna kha a thawtu sunghai chun an hrietpui der naw a, thangna le inrawlna an nei naw a, hiengang thil suol hi va thaw ding khawmin tir naw bawk an tih. Hieng sa sa khawma mob justice or mob rule hmanga a tuortu ding ni lo le suolna chiterek khawm nei lo hai chena ei intuortir el hlak hi thil indik le rorelna indik chu ni theiin an lang nawh. A suksuoltuin a tuor le a hrem chu thukhat a nih. Mob justice, mob rule or mob culture tihai hi hmang rawp le thaw rawp chi niin an lang nawh.

Sawrkar chungah ei lungawi naw pha pha mipui ei pungkhawm a, mipui hawnin sawrkar building le motor, cheng nuoi tel manhu ei raw ut hlak bawk. Hiengang thil a tlung changa tuortu chu mipui tho ei nih. Sawrkar thila ei ngaihai kha mipui ta an lo ni a, a hnungah insir hle inlakhawm a tangkaina a um ta nawh. Hi lei hin sawrkar thil le vantlang thil hai hi chu mani ta anga ngai a, duor taka enkawltu ding le a chawngpu chan changtu ding seng ei nih. Sawrkar thil el vantlang thil suksiet hi ei thil ngen hmuna ding le ei thil nawr hlawtlingna ding a ni chuong bawk nawh. Mob justice or mob rule hi ei renga ta dinga sietna le inhmangna intluntu pakhat a nih. Bansan ngei ngei dinga tha em em a nih.

Mob Justice, mob rule le mob culture hung suokna san khawm hi chi tum tum a um thei a, chuonghai laia thenkhat chu, sawrkarin indik taka ro a rel ngainaw lei, hun a lak sawt hlak lei, a ngaisak tawknaw lei, mipui ringzo dinga ro a rel ngainaw lei, ngaisak bik le ditsak bik a nei hlak lei hai a ni ring a um. Hiengang bawk hin Police le Judiciary hai chungah mipui han ringzona an neinaw lei, an rorel dan a muongchang lei, justice delivery system a that tawknaw lei, misuolhai hrem an ni ngainaw lei, thil suksuoltuhai hremna a khau tawk naw lei le a nat tawknaw lei, Court/Judge hai rorelna an dik tawknaw lei, a thienghlim le an lai tawknaw lei, fakrukna le thamna thil hai an rawl hlak lei hai a ni thei ring a um. Hieng a ni lei hin sawrkar, police le legal authority hai khawm an thil thaw dan haiah an inennawn a, an insiem that ve ngei chu thil tul a nih.
Don't Miss
© all rights reserved
made with by Simon L Infimate