Responsive Ad Slot

Hmar Inpui Barak Valley Region in HNU Assam a suspend

Thursday, June 9, 2016

/ Published by VIRTHLI
Hmarkhawlien, June 9, 2016 (VIRTHLI): Hmar Inpui Barak Valley Region chun Hmar National Union (HNU) Assam in Hmarkhawlien Village Authority election a kona le inzawmin thubuoi neu neu a um leiin tarik 8th June 2016 a inthawk khan HNU Assam chu alo suspend tah a nih.  Hmar Inpui Barak Valley Region chun a hnuoia ang hin mipui i hriet dingin thupuong a siem.

HMAR INPUI BARAK VALLEY REGION THUPUONG

Hmarkhawlien Village Authority inthlangna le inzawmin Hmar Inpui Barak Valley Region chun mipui kuoma hriet ding pawimaw kan hung tlangzar.

Hmarkhawlien Village Council, 2016 Public Meeting naa Danbu siemthara chun Hmarkhawlien Village Authority tia thleng an tah. Hmarkhawlien Village Authority hi Hmar National Union (HNU) Assam inrawina hnuoia inthlang hlak ani a. Hmarkhawlien Dan Bu hi kum 3 (thum) hnunga thleng danglam a tul chun public meeting ngei in siem that ding ti ani bawk. Tukum Village Authority term a bo ruol ruol khan Dan le Dun thenkhat hai siemthat/thleng danglam a tul leiin Drafting Committee hai indin ani a. Drafting Committee in a siem that zo hnungin Hmarkhawlien Community Hall ah mipui lai tlangzarna le approved thaw a nih. Village Authority inthlangna a hin Dan thar hi hmang le zui nghal ani hlak.

HNU Assam chun Dan Bu Public Meeting na a approved tasa le meeting ni a points khenkhat hai Public in la siem that dinga an iti hai, Drafting Committee in anla zuk sukfel naw suong chun Danbu hlui le Public Meeting approve ami nilo chu Danbu lo riruong in tarik 10th June, 2016 a ding hin Village Authority Election anlo ko thuoi el ta a. Dawr thenkhat haia Dan Bu hai khawm chu Public lai lo zawrdawk in a um ta el a. Hmarkhawlien mipui an chiai hle ta leiin Hmar Inpui Barak Valley Region chun Election hi felfai taka fe a, election zo a buoina le inhrietthiem nawna um pal ati ti inlauna leiin tarik 7th June 2016 khan Hmar Inpui Barak Valley chun election chungchanga Conduct Rules, Dan bu le an kal hai sukfel dingin HNU Assam thuoitu hai chu meeting Pu L. Thanmawia Pajamate, Vice-President HIBV inah hohlim tlang dingin ko anni a. Amiruokchu, hril fel dingin HNU Assam thuoitu hai chu an hung nuom naw a nih.

Hieng el hin thil tha ara dawknaw ding ani ti a hriet leiin Inpui thuoitu hai chun tarik 8th June, 2016 khan Community hall Hmarkhawlien ah HNU Assam thuoitu hai chu inbiektlang dingin a ko nawk a. Chu hnunga khawm chun an hung nuomnaw ta rawp a. HNU members thenkhat le OB hai chu Pu Abraham L. Keivom, President HNU Assam chun thang lo dingin a rawi hai thu alo insuo ti thu dawng bawk a nih.

Hienga HNU Assam in Hmar Inpui ieng tham lo le inzana nei der lova a khawsa hi ngun taka ngaituo le hriltlang ani hnung in Hmar Inpui Barak Valley Region chun tarik 8th June 2016 a inthawk khan HNU Assam hi Suspend in a sie a. Suspend ani sunga Election le HNU thila Enkawltu (Care-taker) dingin mi panga (5) a ruot nghal bawk a nih. Dan le Dun hai hi felfai taka Drafting Committee in a siem fel zo pha le HNU Assam Care-Taker le HNU Hmarkhawlien hai inrawn tlangin Hmarkhawlien Village Authority Election chu an hma thei ang takin hung buotsai an tih.


Hnama I thahnemngaipui,

(OLIVER SUNGROHLUN)
Information & Publicity





Don't Miss
© all rights reserved
made with by Simon L Infimate