Shillong, May 17, 2016 (VIRTHLI): Hmar Inpui, Meghalaya Region chun ngaituo ding pawimaw tak tak a nei leiin Executive Meeting vawisun khan Tv. Robert Wilson Thilsong In, Demthring, Shillong hmunah an nei. Hi huna hin members hai kimtaka thangin hnam ta dinga thu pawimaw tak tak hai hriltlangna an neia, Resolution iemanizat an thlak (passed) a nih.
Hi meeting huna hin Pu Lalthankunga Hmar, President Hmar Inpui, Meghalaya Region chu sawrkara a sin le inzawma Aizawl Mizorama tieng sawn (transfer) a ni tak leia Hmar Inpui, Meghalaya a President a nina chu a chelzawm thei ta naw ding thu ziek ngeia a pek chu nguntaka an ngaituo hnungin pawmpek a nia, ama aiawtu dingin Vice-President sin chellai mek Pu Lalpawllien Tuolor chu Hmar Inpui Constitution dungzuiin President-a hlangkai a nih. Vice-President post hmun ruok hluobittu dingin member hai lai candidate siemin Ballot Paper ngei hmanga inthlangna nei a nia, Vice-President, Hmar Inpui, Meghalaya Region dingin Pu L.C Thanga chu thlangtling a nih. Hi huna hin thlangtlinga um hai hin Charge ilaksawngna an nei nghal a nih.
Hmar Inpui, Meghalaya Region chun President feltak inthlaa a um hi inpâmum a ti hle thu le a țul ang anga Hmar hnam ta dinga țhangtlangna ruokchu la nei zawmpei dingin ati bawk a nih.
Meeting zoin Pu Lalthankunga Hmar in Award-World Customs Organisation Certificate of Merit le Presidential Award for the Year 2016 for Specially Distinguished Service a dawng le inzawma lawmna ruoi a buotsai chu hlimtlang takin an kiltlang a nih.
