Vawisun tarik 14, Thlaphur (May) 2016, Tribal Research Institute Conference hall hmunah Hmar Literature Society (HLS) hnuoia Hmar Literary and Vernacular Committee, Imphal (HLVCI) le Hmar Students’ Association, Imphal Joint Headquarters inkawpa huoihawt “One-Day Regional Seminar-cum-Consultation on Hmar Dialect” ti prawkram chu hlawtling taka zo a nih.
Hi prawkram hmang dinga hmun dang dang le Hmar organisation hrang hranga inthawka fekhawmhai mi 100 vel haiin ngun taka ngaituo le an hriltlang hnungin, a hnuoia ang hin mipui hriet dingin lunginruol takin THUPUONG (Declaration) siem a nih.
Declaration:
1. Hmar tawngin hieng neka hmasawnna thalem a nei theina dingin Hmar umna state hrang hrangah Joint Co-ordination committee, Hmar Literature Society (HLS) hi keihruoitu ni ding le mawphurtu ni pei hai sien, mipui khawma inza takin an thusuok zawm ni raw seh.
2. Nasatakin HLS hin hma hung lain, Hmar hnam sunga tawng kaupeng hieng Thiek, Biete, Sakhechep, Hrangkhol, Kom, Ranglong, Darlong, Chiru le a dang danghai humhalna le sukhmasawnna ding lampui HLS in an rang thei ang takin hma la sien tha kan tih. Hi bakah, Hmar umna state tina Hmar tawng sukhmasawn le sukchangkang na dinga hrat taka hma lak hi tul le makmaw in kan hriet.
3. Tawng Upa ei hmang tlangpuihai, a hmangna ding le ding naw hi inhrilhrietna Joint Seminar or Workshop nei nawk pei dingin Hmar umna state tina HLS haiin lampui hung buotsai hai sien.
4. Hmar tawng hi Hmar ei nina suklangtu le midang haiin ieng hnam am ei nih a? ti an mi hriettheina a ni leiin, ei danglam rieuna hi vawngthat tlat ni sien tha kan tih. Chuleichun, HLS in tawng ziek dan a fepui mek hi inza takin zui seng inla.
5. Hmar tawng hi Sawrkara sinzawngna ding khawma a hung pawimaw ta pei leiin, inchuklai mek le inchuk zo tahai khawma ei tawng hi ei hlutsak thara ei inchuk thar theina dinga hma lak thar zuol ding. “English Alphabet” ei ti Sap hawrawp hin Hmar tawng hi a lam dawkin a ziek dawk zo tak tak naw leiin, ei Hmar tawng hi indik tak le fie taka ei ziek a, ei tawng suok theina dingin Hmarnau taphawt chun Hmar A Aw B hi thiem taka inchuk seng ni sien tha kan tih. Hi le inzawmin state tina HLS in hma a hrat thei ang takin hung la hai sien.
6. Khawvela lekhabu ropuihai hi ei mithiemhai hin Hmar tawngin mi hung inlet dawkpek hai sien tha dinga ngai a nih. Hi le inzawm hin ei mithiemhai kuomah ngenna siem sien.
7. Hmar tawng hlui, hla tawng, tawnglamkei le tawng tharhai Hmar-Hmar dictionary hi buotsai le sut nisien.
For Organisers:
1. Hmar Literary and Vernacular Committee, Imphal (HLVCI) under the aegis of Hmar Literature Society (HLS)
In collaboration with
2. Hmar Students’ Association, Imphal Joint Headquarters
Dr. Immanuel Zarzosang Varte
Seminar Coordinator
