Responsive Ad Slot

Hmasawnna Thar | 08 March, 2016

Tuesday, March 8, 2016

/ Published by VIRTHLI
HYA 31st Founding Day Musical Nite hmang
CCPUR: Hmar Youth Association (HYA) GHQ huoihawtnain zani zantieng 6PM a inthawk khan Saikawt khelmuol­ah 31st HYA Founding Day Open Air Musical Nite puithu taka hmang a nih. HYA Flag keipharna neiin hi huna hin Hmar Artiste Association (HAA) a inthawk le hlasakthiem dang dang han mipui an inawi. Chun, hi huna hin HYA Muolvaiphei Branch haia inthawk HYA hlapui Pu James Songrolal in kum 1993 laia a lo siem “Pu­Pa khan tui ang kan laksa tlawmngaina hlu” ti hla mawi takin an sak bawk. Hi thu ei sut chena hin chu inrui leia buoina suok iengkhawm hriet a la ninaw a, discipline a tha a hriet a nih. 31st HYA Founding Day hi hmun hran hran haia khawm mani remchang dang dana hmang a ni bawk.


KSDDC bandh la thul hri
CCPUR: Khousabung Sub­Division Demand Committee in March 8, 2016 zing dar 6 a inthawk tiemchin um lova Tiddim Road bandh thaw an tum chu tulaia Class X le XII  Examination fe mek leia student le social organisation tum tum hai ngenna angin an la thul hri (temporarily suspended) thu zanita KSDDC thusuok chun a hril.

Amiruokchu,  Feb. 10, 2016 nia Manipur Cabinet meeting in Thangting Sub­ Division thua dodalna  um leia Kangvai Sub­Division tia thlakthelng dinga a relna state sawrkar in ennawn lo le an thil ngen a sukpuitling naw chun Board Exam zova inthawk tiemchin umlo bandh an thaw tan ding thu KSDDC thusuok chun a hril.

KSDDC chun, Kangvai chu CCPur khawpui sunga inthawk hnaite a ni leiin Sub­Division innghatnaa hmang tha an tinaw leiin Khousabung Sub­Divsion a thlakthleng dingin Manipur sawrkar an ngen a nih. Hi ngenna lei hin sit­in­ protest an la sunzawm pei a, zani kha an protest ni 25 a tlingna a nitah. An hmalakna hi mitin thlawp dingin KSDDC chun an ngen.

Thlalak pelut seng dingin
CCPUR: Churachandpur District sunga National Food Security Act (NFSA) hnuoia Rationing Agents le Sub ­Dealers thar dinga ruot hai chu form pek an ni tasa hmanga NFSA hnuoia  Bufai, Khawnvartui le a dang dang dawng thei ding hai thlalak an hma tienga District Supply Officer (DSO), CCPur Office­a pelut dingin DSO, CCPur chun inhriettirna a siem. Hi thlalak an peklut dungzui hin bufai, khawnvartui le a dang dang hai pek ning an tih tiin DSO/CCPur in March 7, 2017 nia inhriettirna a siema chun zieklang a nih.

Nurses hai ta dingin Workshop buotsai
CCPUR: Female Health Worker Training Centre­ah zani zingkar khan Nurses hai ta dingin Workshop on recent changes in Immunization & FP nei a nih. Dr V.C. Pau, DFWO/CCPur le Dr Kungi, Medial Officer i/c Saikawt PHC hai resource person in an thang. Hi huna hin block tum tuma CHCs, PHCs le PHSCs haia Nurses 70 vel an thang.


Sit­in­Protest sunzawm pei a nih
CCPUR: Anti­Tribal Bills 3 hai dodalna le inzawma CCPur Police Station tuola JAC inrawinaa sit­in­protest neia um chu sunzawm pei a ni a, March 8, 2016 hin Vengnuam, New Lamka, Lanva le Pearsonmun hai inthung an ta, March 9&10, 2016 haiah Tangnuam, Khawmawi/Bethel, Khawminthang le New Lamka hai inthung an ta, March 11&12, 2016 in Gangpimual, Zion Veng, New Lamka le Hill Town hai inthung an tih.

Dist. Hospital room thenkhat tuoinam
CCPUR: District Hospital, CCPur­a room thenkhat hai chu tuoinam that an nih. Zanikhan OPD Hall hnungtieng a Dental room partition siem a nih.

Joining report an pek
CCPUR: Manipur Police Department hnuoia Police hai thlawptu dinga Churachandpur District –a dinga VDF lak thar 18 hai chun zanikhan SP, CCPur Office­ah joining report an pek.

Zanikhan Manipur CM in Imphal­Kangchup­Tamenglong Road cho tanna sin a hawng
IMPHAL: Zanikhan Senapati District a Sadar Hills huop sunga Kangchup hmunah Imphal­Kangchup­Tamenglong road chona si thaw tan a nih. Hi sin thaw tanna hi Chief Minister O.Ibobi Singh in a hawng. Dy. CM Gaikhangam, Works Minister Ngamthang Haokip le officials han hi hunser hi an uop ve. Manipur sawrkar chun tlangram le phairam bielhai thlier bik um lovin hmasawnna sin a thaw a. Hiengang bawk hin lamlien le leilak siem le dawna kawngah khawm thlier bik um lovin hma a lak a nih tiin O.Ibobi Singh in mipui pungkhawm hai hmaa thu a hril huna a hril. Hi lampui chona sin hi tluong tak le hrat taka a fe theina dingin mipui hai chu lamlien cho hai lo thangpui ding le tu pawl khawma lo sukbuoi lo le dang lo dingin CM chun ngenna a siem.

Hi lamlien hi a hmaa Tamenglong fena nekin km. 44 velin a tawi lem ding nia hril a nih. Imphal­Kangchup­Tamenglong Road hin tlangram khuo19 hawng a tih. Hieng khaw neituhai hin lamlien siemna ding le inzawm hin compensation an lak naw ding thu an hril. Lamlien siemnaa hin mimal ram khawm a tawksa ding a nih. Sienkhawm an ram laksana dinga hin zangnadawmna an ngen naw ding leiin State sawrkar chun mimal ram a tawksa ding neituhai kuomah lawmthu a hril. Hi lamlien hi 103.2 km. zeta sei ding, lamlien cho zona dinga pawisa seng zat dinga riruong chu Rs. 1,200 crore vel le kum 3/4 sunga cho zo hman dinga beisei a nih. Phairam biel a hraw ding hi 12.80km vel a nih tiin official tiengpanga thuhriltu chun a hril. Tum dana chun hi Road hin Haflong, Assam a sunthlang ding ti a nih.

Postal service nasa takin a sukbuoi
IMPHAL: Postal services thawktu han DPS Vinod Kumar of Manipur Division sawnhmang le a chunga action la dinga ngennaa strike an thaw leiin zani zingkara inthawk khan postal services nasa takin a sukbuoi. DPS Vinod Kumar hin thawktu thenkhat mawilo baksakin a hal tia intuma sawnhmang dingin an ngen a ni a, Head post office complex, Imphal tuolah zanikhan thawktu han protest an nei a nih. All Manipur Postal Employees Union khawmin March 3, 2016 khan hi chungthua hin complaint an lo peklut tah.

Lamlien siemtu mi 4 thuoihmang
IMPHAL: Feb. 5, 2016 zantieng dar 4 vel khan PMGSY Scheme hnuoia Sanakeithel­Leisan village inkara lamlien siemnaa sin thaw pasal 4, A.S. Tekmaitei, Pampam Lungleng, Ngashan  Shishak le Aren Ao hai chu Zalenbung Area, Litan Police Station huop sung, Ukhrul District­a inthawk Kuki Liberation Army (KLA) ni dinga ringhla han an thuoihmang niin ei thu dawngna chun a hril.

Manipur in overall champion
IMPHAL: National Level NE Games, 2016 Khuman Lampak Main Stadium, Imphala nei chu zanikhan zo a lo ni tah. Hi Games kharna hi CM O.Ibobi Singh in a nei. Manipur team chu overall Champion an nih. Hi Games a hin NE biela inkhelmihai inkarah inlaichinna tha lem a siem ngei a beisei thu CM chun a hril.

Khewa bazar­ah kangmei a suok
IMPHAL: Zani zingkar dar 2 vel khan Khewa Bazar, Imhal East District­ah kangmei a suok a, Cinema Hall hlui, tuta DAwr chi tum tum a hmang ta chu a kang a, thuomhnaw cheng tam tak man a kang siet niin Fire Brigade thusuok chun a hril. Fire Brigade pawl kangmei suokna hmun an tlung huna chun thil a kang ding ang ang a lo kang siet hman vawng ta niin ei thu dawngna chun a hril.

Pasal pakhat Kani kg. 4 leh man
IMPHAL:  Zanikhan Sugnu Bazar hmuna Narcotics and Border Affairs Police han pasal pakhat chu Kani kg. 4 leh an man. Mana um hi Chuachandpur district­a  G. Songgel khaw mi niin Police chun an hril. Kani hi Rs. 2,00,000 manhu vel nia hril a nih.

Suollui leia thi naupang ruong raw liem
IMPHAL: Chinikon Village, Bishnupur district a nuhmei naupang kum 6 mi suollui leia thi ruong chu zanikhan a chengna khuoah hi thina le inzawma JAC indina um hmalaknain an hnam danin raw liem a ni tah. Nuhmei naupang kum 6 mi h i Feb. 15, 2016 zan dar 6:30­8:30PM inkara suollui, RIMS Hospital­a enkawl, a hliemna tuorzo lova Feb. 28, 2016 a thi ta a nih.

Biekin suosam, mi 9 man tah
RAIPUR:  Chhattisgarh­a Raipur khawpui a Khamardih hmuna chun March 6, 2016 khan Kristien sakhuo zuitu hai inkhawmna Biekin pasal 15­20 vel ding han an va bei a, Biekin sunga Pathien bie a lo um hai an sawisak bakah Biekin sunga thil um hai sukse in an suosam.  Hi thil tlunga hin nuhmei pahni thangin mi 5 in hliemna an tuok. Chhattisgarh Christian Association chun hi thil thawtu hai nasa taka hremna pe dingin an ngen. Hieng laizing hin Minister of State for Home  Kiren Rijiju chun, Biekin suosamtu hai chunga action lak a ni ngei ding thu a hrilin, tuchena hin Police chun mi 9 an man tah tiin a hril.

Chhattisgarh Christian Forum president Arun Pannalal chun, Biekin suosamtu hai hi Hindu right wing Bajrang Dal pawl an nih tiin an tum a, ‘Jai Shriram” tiin an khek bawk niin a hril. Mr Pannalal chun, tuta tum hi thla 1 liemta sunga Kristien hai sakhuo biekin suosama a um vawilina a ni tah tiin a hril. Biekin suosamtu hai hin Bible le Biekin banga intar thlalak hai khawm keithlain an suksiet a, naupang chunga khawm kut an kei chuong nawh tiin Pannahal chun a hril.

Nuhmei hai thuneina tamlem pek an pawimaw:PM
NEW DELHI:  New Delhi hmuna National Conference of Women Legislators a ni hnina zanita nei hunah PM Narendra Modi chun, ei ram ngirhmun siemthat le sukhratna dingin nuhmei hai kuomah thuneina tamlem pek a pawimaw tiin a hril. India khuo le tui tinin  India ram an sukhrat a, chu le inruola khuo le tui sukhrattu chu Nu an nih leiin nuhmei hai  ngirhmun siemthat le sukhrat zuol chu tuta ngirhmuna pawimaw tak a nih tiin PM Narendra Modi chun a hril a; nuhmei hai khawmin an hratna anni an inhrietchieng a tul tiin a hril bawk.

Hi huna hin India President hlui Ms Pratibha Patil khawma thu hrilin, nuhmei hai chu ei ram sukhrat le hmasawnna dinga pensuok dinga ngenin naupang pasal le nuhmei hai chu ang khata enkawl ding an nih tiin a hril bawk.

Khawpuilienhai inralringtir an nih
NEW DELHI/AHMEDABAD: Pakistan­a inthawka hung ni dinga ringhla le Lashkar­e­Toiba (LeT) le  Jaish­e­Mohammed (JeM) terrorist ni dinga ringhla terrorist 10 zet Gujarat le India ram khawpuilien haiah an lut ti Central Security Agencies han report an dawng leiin Gujarat le khawpuilien haia chun venghimna uluk taka thaw dinga inralringtir an nih. Hi lei hin Delhi a inthawk Ahmedabad khawpuiah NSG team 2, mi 200 umna tirlut an nih. New Delhi, Mumbai, Chennai, Kolkata le Bengalore haia khawm venghimna sun sukkhau zuol a nih.

Netaji Subhas Chandra Bose (NSCB) International Airport, Kolkata a chun thuthar um nawk hmakhata dingin sawrkar thlungpuiin zanita inthawk khan visitor lut thei lo dingin a khar a, Airport­a CISF personnel le Bidhan Nagar Police hai chu nasa taka inralring tir an nih tiin airport thusuok chun a hril.

Hieng laizing hin Union Home Minister Rajnath Singh chun zani zingkar khan security thuah review meeting a buotsai a, hi huna hin Home Secretary Rajiv Mehrishi le Director of Intelligence Bureau Dineshwar Sharma hai thangin top security officials hai an thang. Hi huna hin Terrorist hai chet ding dang le lo inveng dan ding chungthu hai chipchier takin an hriltlang.

January 2, 2016 khawm khan Pathankot Airbase chu terrorist han an bei leiin venghimtu iemanizat zet an thi a nih.

7th Pay a dingin budget­ah Rs. 70,000 crore
NEW DELHI: Union Budbet 2016­17 ah 7th Pay Commission a hmang dingin Rs. 70,000 crore sie niin Finance Ministry official thusuok chun a hril. 7th Pay Commission puitlingna ding hin India sawrkarin a rengin Rs. 1.02 crore a seng phak ding nia hril a nih. Hi taka hin One Rank One Pension (OROP) Scheme khawm a huomsa a, Central Government thawktu nuoi 47 le pensioners 52 lakh han an sawr tangkai ding a nih.

Bru hai thuoikirna ding remruot dingin
NEW DELHI:  Ministry of Home Affairs (MHA) chun, Tripura refugee camp­a um Bru raltlan hai Mizoram tienga thuoikir an ni theina dinga remruotna siem dingin Mizoram sawrkar an hriettir. MHA thusuokin a hril danin, Mizoram sawrkar chu Bru hai thuoikirna dinga road map a siem hai March 31, 2016 chenin MHA kuoma pelut dingin an hriettir a nih. Road map hi siem nisienkhawm Mizoram tienga Bru hai thuoikir ding hun hi hriet a la ni nawh.

Hieng laizing hin Election Commission of India (ECI) chun Bru refugee camp­a Bru um hai ta dinga electoral roll revision nei ding hun April, 2016 chen suksei sienkhawm Mizorama NGO tum tum han hi thil an dodal leiin revision sin thaw thei lovin a la um zing.

Suollui nuomnaw leiin insawnga inthawk an chawmthla
KOLKATA: Zani hmasa khan West Bengal­a Liluah, Howrah hmunah nuhmei pakhat chu suollui a nuomnaw leiin in sawnghnia insanga inthawk an chawmthla a, a lu le hmai haiah na taka a hliem leiin Howrah General Hospital­ah admit a nih. Pathienni zan khan a ruolhai thenkhat leh an in chat laiin a ruol han a thil dawn dingah damdawi pawl pekin, a hung buoi deu huna a ruol hai hin suol hrawn an tum a, sienkhawm a suollui tumtu hai laka insanhim tuma nasa taka thang a lak hnungin in sawng hnina a inthawk inchawmthla a ni thu nuhmeinu hin a hril. An chawmthlakna hnuoiah leingawi (sand) a lo um hlau leiin a him a nih. Police chun a suollui tumtu nia intum pasal 2 an man ta a, zanikhan Howrah Court hmaah inlangtir an nih.

Congress le UPP an thangruol ding
GUWAHATI: Assam­a Assembly Election hung  um dinga chun Congress le Uni ted People’s Party (UPP) han thangruol dingin remtina an nei tah. Congress le UPP inremna dungzuiin UPP chun seat 4­ah candidate nei an ta, seats 9 haiah ‘friendly contest’ le hmun danga Congress candidates h ai chu UPP in an thlawp ding ti a nih. Assam Assembly Election hung um ding hin BJP, AGP le Bodoland People’s Front (BPF) hai chun thangruol dingin remtina an lo nei ta bawk a nih. Political party tum tum hai chun an candidate ding hai an sukfel mek a, zanikha Congress ticket­a ngir nuom hai ta dinga party ticket hnina peklut theina hun tawpna tak a nit ah.

Vuongna chuongman tlawmin
NEW DELHI : Vuongna chuongman tlawmin inzin hei a nih tiin Seiground Teh, Group Chief Commercial officer, Air Asia chun a puong. Hi Vuongna chuongman tlawm a hin  Imphal­Guwahati  chu Rs. 799 le Imphal­New Delhi chu Rs. 3,399 a chuong thei a ni a. Kochi/ Chennai/ Hyderabad­Kuala Lumpur hai inkar chu Rs. 2,999 le Chennai/Bengaluru­Bangkok inkar chu Rs. 3,999 a inzin thei a ni bawk. Air ticket hi online in March 13, 2016 chen lak thei ning a ta, inzin thei hun chu October 1, 2016­May 22, 2017 inkar sung a ni ding a nih.

Prince William le Kate April thlain Assam­ah
GUWAHATI: Duke of Cambridge Prince William le a nuhmei Prince Kate Middleton h ai chu ni 2 sung cham dingin April 12, 2016 khin Assam­ah an hung inzin ding niin zanita sawrkar thusuok chun hril. William le Kate hai h in Assam an cham sungin Kazairanga National park khawm sir an ta, Assam­a ni 2 sung an cham hnungah Agra le Taj Mahal hai khawm zu sur an tih.

Email hmusuoktu Ray Tomlinson a thi
WASHINGTON: American programmer le internet hmanga thu inthawntuona email hmusuoktu Ray Tomlinson chu kum 74 mi niin March 5, 2016 khan a thi niin company spokesman chun zanikhan a puong a, a thi nasan ruok chu hriet a ni nawh. Ray Tomlinson hin kum 1971 khan Email hi a lo siemsuok a, email addres a ‘@’ khawm hi ama dittthlangna ngeia sie a nih. Massachusetts Institute of Technology, Rensselaer Polytechnic Institute a inchuk  IEEE Internet Award lo dawng ta le US Defence Advance Research Project Agency (DARPA) a Manager sin khawm lo thaw ta a nih.

 Jorhat Inspector of School suspended
GUWAHATI: Assam­a Board of Secondary Education Assam (SEBA) hnuoia HSLC Exam 2016 fe meka answer scripts siekhawma um hai laia 12,000 zet kangmei suokin a kangsietna thuah Education Department chun Jorhat a Inspector of School Hiren Gogoi chu a sina inthawk suspended dingin Order an suo.Kangmei suok hin Bongaigaon district­a inthawk answer script 5,035 a kangsiet a, Dima Hasao (819), Cachar (1,116), Dhubri (1,323), Kamrup Metro (533), Goalpara (789), Kamrup (1,390) le Karbi Anglong (564) a kangsiet a nih. Hieng answer script a kangsietna haia candidate hai ta dingin special examination buotsai tum a ni a, a hun ding sukfel la ninaw sien khawm March thla sunga nei hman beisei a nih. Candidates hai chu hi special exam­a hin mani ditthlangnain thang le thanglo thei ning a ta, hi exam­a thang lo hai chun subject an exam ta hai laia mark an hmu insang tak ang zat marks pek ning an tih. Hi thil tlung hi Assam Police a Criminal Investigation Dept. (CID) chun an suizui mek.

VAWISUN THUPUI
Lalpa nghaktuhai ruok chun an hratna chu siem tha nawk an ta, mupuihai angin thlain hang vuong an ta, sawl loin tlan an ta; chau loin kein feng an tih.~ Isai 40:31

Editorial: Thuoitu tha hi ngaisang an um

Khawvela mipuiin zalen taka ei ditzawng taphawt  thuoitu ei thlang theina democrary rama hin thuoitu tha inkhina chi hran hran a tam hle awm ie. Tha ei ti dan zawng hlak an ang bawk si nawh. Thenkhatin tha ei ti em em kha thenkhatin tha an lo ti ve bawk si nawh. Chun, inthlang ramah chun ngaidan le ditdan inang hai kha Political party pakhatah an um a. Chuongang pei chun ngaidan le dit dan dang neihai khawm party dangah an um khawm el hlak. Party angin ram le hnam ta dinga tha an ti hai chu sawrkarna an hung chang leh sukpuitling dingin mipui lai an zawr seng hlak. Party tinin election lai chun policy le election manifesto tha tak tak an nei seng a, sienkhawm election manifesto bawzui le sukpuitling hi chu an um ngai meu naw niin an lang. Hi thil hi poltical partyy tum tum han ngaiah an nei ta niin an lang bawk. Political party han an thuoituhai chu iengangin inpak hai sienkhawm mipuiin an dit naw chun an tling ngai chuong naw a, an tla nawk el hlak.

Hieng a ni lei hin thuoitu lu tak hai hi an pawimaw em em el a nih. An thiltum ang ngir nghetpui ding le sukpuitling theitu ding an ni am ti chu mipui, thlangtuhai thlir dan a ni naw thei nawh. Thu chau hril la, ka nau hi dam el a tih ti Pathien thu ang ela ram le hnam hi chu sukdam ruol a ninaw a, thil thaw a ngai. Politics­ah chun mipui laia an lo inzawrna khan thil an thaw le thaw naw mipui han ei sut ngun a ngai. Politics thu inleng vel mei meiin ram hmasawnna an tlun ngai nawh.

India ramah Indian National Congress (INC) chu sawrkarna chel sawt tak an ni a. A san chu India zalenna suoltu Party niin, India ram, hnam chi hran hran le sakhuo chi hran hran bie hai hi lungruol taka ei um tlang diel diel theina ding, hnam tum tum le sakhuo hran hran hai khum leng thei, India Danpui an lo induong suok lei a nih. Chuong po po bakah INC thuoituhai lai Pu Nehru le a thla fe peihai lei a nih. Tuhin chu Gandhi family khawm ti thei ning a tih. Hienghai thuoina hi India mipui tam lem han ringzoin an lo dit tlat leia kum 60 lai zet rorel theiin an lo um a nih. Mipui ringzo le dit ang thuoitu lo neinaw hai sienla chu hieng chen chen hi INC in India ramah ro an rel thei ring a um nawh.

India rama hin party dang chu BJP thuoina hnuoia NDA ti lo chu term khat khawm dai lo an ni tawl. Tuhin BJP thuoina hnuoia NDA chun sawrkarna an hung chel nawk mek a, an rorelna hi ieng chen am a fe tluong ding ti hi ei hriet nawh. An rorel that dan izirin an sawrkarna hi a hung fe sawtin a fe sawtnaw thei. Hi thil hi an thuoitu lulawk haiah an nghat a nih. Hun sawt tak rorel thei hai hi chu khawlai rama khawm thuoitu tha nei an ni zat zat pei a nih. Thuoitu tha hi rambung tin le hnam tin mamaw em em a ni hrim a nih.

India rama state hran hran hai hi hang thlir inla. Tuta hmaa West Bengal­a CPI(M) hun sawt tak an sawrkarna san kha an Chief Minister Jyoti Basu lei lieu lieu a nih. A dam sung ti thei deuthaw a Chief Minister a nih. Politics chawlsan a tum hnung khawmin mipui le an party dit a la ni leiin term khat a la Chief Minister nawk a, a hang thi san meu chun Mamata  Banerjee thuoina hnuoia Trinamool Congress Party an hung sawrkar el a nih. Tripura CM Manik Saarkar khawm a duoi bik nawh. Tuta term hi a chel zo chun a zawna kum 20 (terms 4) Tripura CM sin a chelna ding a ni tah.

Hi thil hi a umna party, CPI (M) lei a ni nawh. Ama inlang hmaa Congress party hi state­a an sawrkar lai khawm khan CPI(M) chu a umzing tho an nawm. Ama mimal hi an state mipuiin an ringzo tawk a nih ti a chieng hle. Inthlang laia mipui laia an thiltum an zawr hai a sukpuitling hlak leia an state mipui han an ringzo a nih. Tuta ei PM Narendra Modi  khawm hi BJP leia inlar ni lovin, Gujarat State a CM a ni laia a mimal thil thaw that leia  BJP Central Election Chief a hlangkai le hun hung fe peia India Prime Minister hiel hung chel ta a nih. Thuoitu tha hrim hrim chu an umna pangngaiah an um zing ngai naw a, an umna pangngai neka insang lemah dawmsang an hung ni hlak. Thuoitu tha hi ngaisang um takel an nih.

Don't Miss
© all rights reserved
made with by Simon L Infimate