Responsive Ad Slot

Hmasawnna Thar | 24 January, 2016

Sunday, January 24, 2016

/ Published by VIRTHLI
Master Lalditsak Red Blanket (bravery Award) inhlan ding
CCPUR: January 26, 2016 nia DC Offce Complex, Tuibuong­a District Level 67th Republic Day lawmna nei huna October 12, 2015 nia Khuga/Tuithapui vadunga tla mi pathum hringna sahimtu Master John Lalditsak of Saikawt chu Red Blanket (Bravery Award) inhlan ve ning a tih. District Level Republic Day hi zing dar 9 a inthawk tan ning a ta, Lal 21 le DCOffice a Lambu 2 hai kuomah Red Blanket inhlan ni bawk a atih. Chun, Govt. Employee sin thaw tha mi 82, JPO leader 5 le NCC Cadet 1 hai kuoma Appreciation Certificate inhlan ni bawk an tih.

Mission Board le inzawmin prog. hmang
CCPUR: Zani 11:00AM khan B. Vengnom Community Hall, CCPur­ah Formation of “Mission & Evangelism Board to our Blood Brothers” thuah prog. hmang a nih. Hi huna PS Haokip, President, KNO in thu a hrilnaah, Scholars, Philanthropics, Student Bodies le Church leaders hai thangna Mission Board  indin a, khawvel rambun tum tuma inthedar “Manasseh” hai Pathien thu hril ding le “ A Mission Map of Kuki­Manasseh Tribe in Asia” thuah Map hmangin inentirna a nei. Kristien ei nina kum 100 a chuong ta a, sienkhawm ram tum tum 16 haiah, a bikin South East Asia haiah ei mi le sa Chanchintha la hre lo tam tak an um leiin taksa le thlaraua sin ei thaw a pawimaw tiin a hril a, Kohran hai chu Missionary an tirsuok zat list Mission Board kuoma pelut dingin a ngen.


Hi prog. hmangnaa hin Rev. Dr Hawlngam Haokip, Adviser KCLF le Rev. Kim Singson, Church of Nazarene han thuhrilna hun an hmang a, Dr Holngam inrawinain Mission & Evangelism Board to Our Blood Brothers indin dan ding hriltlang a nih.

Special Block Level Bankers meeting
CCPUR: January 29, 2016, 1:00PM khin UCO Bank Opposite­a DDM/NABARD Office­ah Special Block Level Bankers Committee meeting um a tih. Hi huna hin Annual Credit Plan for 2016­17; Govt. Sponsored Scheme implementation; recovery of Govt. Sponsored Scheme; holding of FLAC and Rupay Card activation/distribution camps ti hai thangin thu pawimaw tum tum hriltlang ning a tih. CCPur district­a Bank Managers tin hai bakah RBI a inthawk Lead Bank Officer khawm hung thang a tih.

School siemthat dan ding an rel
CCPUR: Zanikhan KIC Office, Tuibuong­ah KSO Singngat chun ZEO block hnuoia Schools 4 le ADC/CCPur hnuoia Schools 5 haia Headmaster/Headmistress hai le khaw lal hai joint meeting an neipui. Hi huna hin Academic Session 2016­17 sung School tha lema enkawl dan ding an hriltlang.  Teacher hai chu anni thlaktu ding midang tir lova anni ngei kaia naupang lekha inchuktir dingin KSO Singngat Block President chun a ngen.

A mimal sum hmangin Culvert a siem tha
CCPUR: Tipaimukh Road­Mission Road junction Culvert a chanve zet chimthla chu G. Thangkhosuanmung, EM, ADCC le Chief of Hiangtam Lamka in sawrkar a inthawk fund umnaw sienkhawm ama mimal sum hmangin an siemtha tir.

Hmar History Association indin
GUWAHATI: January 22, 2016 khan Hmar mithiemhai le Hmar History ngaipawimawtu mi thenkhat hai Guwahati, Assam­a Kharguli hmuna NEREFS Committee Room­ah inthungkhawmin ‘Hmar History Association’ an indin.

Inkhawm hi Pu R.H. Hminglien, New Delhi chun Convenor niin inkhawm a keihruoi. Hi pawl thiltum chu ‘research, documenting, publishing & preservation of Hmar History’ a nih.

Hi pawla thuoitu dinga thlang hai chu­ President Prof. Laldena; Vice Presidents­ Dr Upa Vanlal Tluonga Bapui, Pu Sumhlihrawng, Rev. Dr Hrilrokhum Thiek, Rev. Dr Ruolneikhum Pakhuongte; Executive Secretary in Pu RH. Hminglien Hmar; Joint Secretaries in Pu Ramthienghlim Varte, Dr Paul B. Chonzik; Secy. Fin. & Accts. In Pu Lalthankunga Hmar;  Members in Pu James A. Songate; Pu Tawnluaia; Upa L. Chongtho Hmar; Pu Thangnuntluong Ralsun; Pu  Thangsawihmang  Sawngate; Pu Louis Keivom le Pu Timothy Z.  Zote hai an nih.

Hmar History a inhnik le ngaipawimawtu chu member nisa hai laia pakhatin a recommend chun Rs. 5000/­ pein Life member ni thei a ta, history student le Hmar history inhniktuhai khawma Rs. 100/­ pein Annual member  ni thei an tih.

Pawl indin thu hi Hmar Inpui inhriettir nghal dingin hi huna fekhawm hai chun an rel bawk.

Temporary Market shed bawl dodalnain Curfew bawsein rally nei;  Joykishan Police han an hrentang, a hnungin insuo nawk
IMPHAL:  January 4, 2016 nia simkhawlei richter scale 6.7 a hratin Manipur a sawi huna Keithel  market hluo ngamlo khawpa a suksiet leia state sawkrarin hi market siemthat a ni hma poa nupui bazar kai hai inthungna dinga Thangal Bazar lun lai taka Temporary Market Shed a bawl dodalnain  zanikhan Thangmeiband A/C BJP MLA Kh. Joykishan inrawinain a supporter tam takin Curfew zama um bawsiein Khoyathong a inthawk Thangbal  Bazar panin rally an nei. Rally hi zani zing dar 10 vel­a an nei tan a ni a,  Khoyathong a inthawk Thangal Bazar pana rally fe an fe lai mekin Police hai chun Curfew a ni leiin rally hi nei lo dingin MLA hi an hril bakah Magistrate khawmin rally nei lo dingin a ti a, sienkham rally an nei lui tho leiin MLA Joy Kishan hi Imphal City Police han Curfew bawsiea intumin an hrentang.

MLA Joykishan Police han an man lei hin a supporter hai chun Police hai lungin an deng a, Police hai khawma mipui hnawtdarna dingin Tear gas an kap a, mi iemanizatin hliemna an tuok pha. Joykishan  Police han mana an thuoi hnung khawm hin a supporter hai le Police hai Nagamapal road­ah nasa takin an inbeituo nawk a, Police chun tear gas kapin mipui hai hi Khoyathong chenin an va hnawkir.
 
MLA Joykishan hi zanikhan High Court­ah inlangtir a ni a, hi zo hin Imphal West Polie Station tieng thuoiin a hnungin insuo nawk a nih.
Thongju A/C BJP MLA Th. Bishwajit chun zanikhan Manipur Press Club­ah Press Conference koin, a BJP MLA chanpui Joykishan hmalakna chu a thlawp thu a hril a; January 7, 2016 nia state sawrkarin temporary market Hao Keithel hmuna bawl dinga  order an suo hnunga ngaituona fumfe tak um lova chawp le chila Thangbal bazar lailung taka temporary market shed a bawl leia buoina hi suok a nih tiin sawrkar a sawisel. Th. Bishwajit chun mana um Kh. Joykishan  khawm an hmupui a, a hmalakna  tawpsan a tumnaw thu hrilin a tul a ni chun Jail lut khawm pawi a tinaw thu a hril. TAKDO Executive member Khumukcham Anil Kumar khawmin Thangal bazar road­a temporary market shed bawl tum dodalna mipuiin an thlawp thu hril.

Temporary Market Shed bawlna leia buoina suok ding vengnaa Khwairamband bazar –Nagamapal area­a hin Magistrate in Jan. 22, 2016, 6PM a inthawk thuthar um nawk hmakhata dinga Cr.P.C. 144 /Curfew a puong a nih. Curfew sung tukhawm tuol suok lova mani ina um seng dinga inhriettirna siem a nih.

Pawl tum tumin Republic Day Bandh le Public curfew
IMPHAL: United National Liberation Front of WESEA (UNLFW) Co­Ordination Committee  (CorCom)­ Manipur; Garo National Liberation Army (GNLA); Hynniewtrep National Liberation Council (HNLC) hai chun zanikhan joint statement siemin  Republic Day, 2016 hmang ding ni January 26, 2016, 1:00AM­6PM inkar sung Western South East Asia (WESEA) Region­ah Total bandh/strike an thaw ding thu an puong. Bandh hin emergency services, media le sakhuona thil hai chu huomsa naw nih tiin an thusuok chun a hril.

Kangleipak Communist Party (Military Council), KCP(MC) khawmin  Republic Day an boycott thu puongin  zingkar 6AM-­6PM  inkar darkar 12 sung Public Curfew an puong bawk a, media, medical le sakhuona thil hai ruok chu huomsa naw nih tiin an thusuok chun a hril.

Maoist Community Party, Manipur (MCP­M) le KCP (Poirei) hai khawmin General strike le bandh an thaw ding thu an lo puong ta bawk a nih.

R­Day Full rehearsal nei a nih
IMPHAL: Jan. 26, 2016­a State Level 67th Republic Day hmang le inzawmin zanikhan 1st Manipur Rifles parade ground­a inthawk security khau taka vengnain full dress  rehearsal nei a nih. Rehearsal a hin Police, MR, IRB, NCC, Schools, Colleges, Cultural Troupes le band party hai an thang. Rehearsal hi Kangla­North AOC­Kangla MOAT­ 1st MR Ground chen nei a nih. Rehearsal lei le Khoyathong, Khwairamban bazar area le Nagamapal road­a Maharani bridge chena tiemchin um lo curfew zam a ni leiin traffic a Jam nasa hle a, mipuiin harsatna nasa tak an tuok pha.

Hydel Project an dodal
IMPHAL: Irang vadung khuop­a  Irang Hydel Project bawlna dinga Manipur sawrkar le NEEPCO in Memorandum of Understanding (MoU) an ziek chu an dodal thu Irang (Toubam) khaw mi han an hril. MoU hi kum 2014 a ziek nia hriet a ni a, Project in a tawkpawi ding khawmi hai inhriettir lawkna iengkhawm a umnaw leiin project thaw tum hi an dodal a nih tiin Amol Phaomei of Irang village chun a hril.

Kholmunlen village­ah Water Supply Scheme
IMPHAL:  21­Assam Rifles in Chandel District­a Kholmunlen village­a Water Supply Scheme an siem chu zanikhan Commanding Officer, 21­Assam Rifles in a hawng. Hi khuoa cheng han tui thua harsatna nasa tak an tuok leia tui sekkhawlna dinga hi thil hi Assam Rifles han an thaw pek a nih. Chun, Jan. 21, 2016 khan Chandel District­a  Sajik Tampak hmuna ‘Op Sadbhavana” Veterinary camp an buotsai bawk.

Nagaland in Human Rights Commission
KOHIMA: Nagaland chun Human Rights Commission a nei ta ding  a ni a, a hmingah Nagaland State Human Rights Commission (NSHRC) ni dinga rawtna siem a ni a, high court­a Chief Justice Pension (retired) in inrawi a ta, member secretary dingin retired HC Judge le Human Rights tiengpang hrietna le thiemna nei panel ah thang bawk an tih.  Nagaland Chief Minister N TR Zeliang inrawinaa Selection Committee in NSHRC Chairman le members ding hai ruot an tih. Selection committee a hin Assembly Speaker, Home minister le Opposition leader hai thang an tih. Chun, NSHRC hin Superintendent of Police (SP) inrawi investigation wing hran nei bawk a tih tiin sawrkar thusuok chun a hril.

PM in Netaji file 100 a tlangzar
NEW DELHI: Zanikha Netaji Subhash Chandra Bose piengchampha 119­na a ni le inzawmin Prime Minister Narendra Modi chun Netaji Subhash Chadra Bose le inzawm file la puongzar lo 100 a tlangzar. Netaji kha kum 1897­a Odisha­a Cuttack hmuna pieng a nih. Netaji files tlangzarna huna hin Union Ministers Mahesh Sharma le Babul Supriyo hai khawm an thang a, PM Narendra Modi chun National Archives of India (NAI), Delhi hmuna digital copies siema um hai chu Netaji Subhash Chandra Bose sung hai hmu le hrietpuiin a tlangzar a nih. Pu Modi hin nikuma Bose sung han an inhmupui huna Netaji le inzawm file hai a tlangzar vawng ding thu a lo tiem tasa a nih.

Defence Minister in Ranchi ­ah India Flag insang tak  a keiphar
RANCHI:  Defence Minister Manohar Parrikar chun zanikhan Ranchi­a Pahari Mandir hmuna Netaji Subhash Chandra Bose piengchampha hmangna le inzawmin India National Flag insang tak hawngin a keipar. Hi lai hmun hi India ram zalenna  suoltu hai British sawrkarin a khaihlum hlakna hmun a ni a, India in Independence a hmu char khan hi lai hmuna hin National Flag keipar a nih.

Ranchi hmuna National Flag keipara um hi feet 293 a insang niin  kg. 80 zeta rik, flag hi ft. 66x99 a lien a nih. Defence minister hin Ranchi­Khunti district inrina laia Jharkhand Shakti Defense University indinna ding lungphumna a nei bawk. Jharkhand hi hiengang University nei India rama a pathumna a nih.

PM in NRL wax unit a hawng ding
DIBUGARH:  February 5, 2016 khin Prime Minister Narendra Modi chun Numaligarh Refinery Limited (NRL) khuoihlu siemna ‘wax production unit’ Dibrugarh a inthawk video uplink fethlengin hawng a tih. NRL wax plant hi Indian Institute of Petroleum a scientist han an design a ni a, kum khatah Khuoihlu/sathau  ton 50,000 a siemsuok thei ding a nih. Tuhin India chun China le Iran haia inthawk Khuoihlu a laklut a nih.

Political parties hai election dingin
GUWAHATI: Assam Assembly Election hung um ding le inzawmin Political party tum tum hai chun candidates ding, campaign strategy le election manifesto ding hai buoipuiin nasa takin an inpuocha tan mek. Tuta inthawk sawtnawte hnungah campaig nei dingin Central leaders le political party tum tuma hotu han  Campaign an hung nei ta ring a nih.

PM Narendra Modi chun Feb. 5, 2016 khin Moran hmuna campaing a nei beisei a ni bakah Congress Vice President Rahul Gandhi khawm Upper Assam­ah a hung inzin ding a nih. Assam Election hung um dinga hin BJP le BPF chun thangruol dingin remtina an lo nei der ta bawk.

NIA in ISIS ringhla mi 20 chuong an man tah
NEW DELHI: India Republic Day hmang ding le inzawma rampuma venghimna sukhau a ni a, National Investigation Agency (NIA) chun India ram hmun tum tuma chetna nei tuma ringhla mi 8 hmun han hrana an man belsa nawk leiin zani hmasaa ISIS ta dinga sinthawtu ni dinga ringhla mi 13 an lo man ta hai leh tuchena ISIS ringhla mana um chu 21 an tling tah. Mana um hai hi thu indawnchiengna nei dingin New Delhi tieng thuoi vawng ning an tih.

Thuoihmanga um sumdawngtu 6 hai  insuo
TURA:  North Garo Hills­a Wageasi village bul laia Assam sumdawngtu thuoihmanga um mi 6 hai chu a thuoihmangtu han dam le himin an insuo tah. Thuoihmanga um mi 6 hung insuo hai chu Manoranjan Sarkar, Putul Mukherjee, Piyush Biswas, Pradip Das, Bijoy Sarkar le Ganesh Basu hai an ni a, anni ruola thuoihmang ve  dang pakhat Tustu Paul chu tuta hma khan a thuoihmangtu hai kuta inthawk himin a lo hung tlansuok ta a nih. Kharkutta le a se vela cheng mipui haia inthawk insuo dinga mawrna a nasa leia  an hung insuo ni dinga ring a nih.

Bar bribery sam thuah Minister an ban
THRISSUR: Kerala Excise Minister K. Babu chu kum 2014­a licence fees sukhnuoina dinga Bar neitu hai kuoma inthawk thamna Rs.10 crore laa intum a nina le inzawmin zanikhan Kerala Chief Minister Oommen Chandy kuomah inbanna a peklut. Court chun, Vigilance and Anti­Corruption Bureau chu ‘ Bar bribery scam’ thuah K. Babu chungah case registered  dingin zanikhan an hriettir. K. Babu baka hin Court chun minister chunga thamna a pek nia intumtu Bar hotelier Biju Ramesh chunga khawm case register dingin an hriettir. Biju Ramesh hi Kerala Bar Owners Association working President ni lai a ni a, Bar licence suktharna dingin Babu kuoma hin Rs. 10 core a pek niin a hril a nih. Tuta hma khan bar bribery case a hin Finance minister hlui KM Mani case file khum niin a lo inban ta bawk a nih.

AMEF helpawl 10 ralthuom leh an inpe
TURA: Meghalaya­a North Garo Hills a che hlak A Chik Matgrik Elite Force (AMEF) cadre 10 hai chu January 22, 2016 khan Sambrak hmuna ralthuom leh sawrkar thuneituhai kutah an inpe. AMEF inpe hai chu­ Saljatchi Marak,  Bulthul Marak, Banjrang Sangma, Jhony Marak, Premanear Marak, Aron Marak, Nibirth Marak, Tawan Marak, Jagol Sangma le  Sengjan Sangma hai an nih. Ralthuom an inpeklutpui hai lai Light Machine Gun (LMG) 1, AK rifles 2, pistols 2 , SBBL shot gun  le silaimu thahnemtawk tak a thang. Kohran thuoitu, NGOs le khawtlang thuoitu hai thangna North Garo Hills Vigilance Forum (NGHVF) hmalakna leia AMEF cadre hai hi sawrkar kuta hung inpe an nih. An hotulien hai thangin cadre dang hai chu December, 2015 khan East Garo Hills police kuta an lo inpe ta a nih.

VAWISUN THUPUI
Thil po po nekin lungril hi an khel a; a se bik rieu a, tuin am hrethei a ta? Kei Lalpa hin lungril chu ka zawng suok hlak a, mi tin chu a thilthawhai ra ang pei le, a lampuihai ang peia pek dingin an inthununna chu ka fie bawk a.  ­ Jeremia 17:9­10

Editorial
Taimakna, ringumna le indikna

Zohnathlakhai hi ei pi le pu h aia inthawk mi thabo le zawmthaw a hril ei ni ngai nawh. Krista chanchintha mi hung hriltu sap missionary hai khawm khan hnam taima, hnam ringum, mi indik le hawihawm nia hrilin an mi lo record hlak a nih. Mani thawsuok saa ngir, mani thawsuok sa fa le dawn, khawtlang inthuruol, mihai thangpui pei a, mi harsa le sawmdawl ngaihai samdawla mani hratna le theina hmang hlak ei nih. Mi han tham naw deua an mi diriem chang khawma “a nei ka fak nawh,’ ti ngam ngat le an lo insuong vena tawngbau a nih. Tulaia thangthar hai hin ei pi le pu hai lo um dan le nina hi ei ngaituo nawn rawp a, ei la sunzawm pei nuom a um khawp el.

Tuhin chu nu le pa thawsuok sa ring dam, sin thaw tak tak pei si lova hausak tum dam ei tam tah. Sum thienghlim naw khawm pawisa lo, an dik le an dik naw khawm ngaituo lova mani hlawkna le hamthatna ding a ni phawt chun baw huom huom el ei pung pei a, inrim taka thawsuok neka a thlawna hmu dam chu ei nuom zawng, a hnawta ei hnawt el ni tain an lang. Ei lekha inchukna khawm hi a that em em laiin tam tak chun thabona tawk chauvin ei hmang an tanaw mani ti theiin a um.

Ei rama nuhmei le pasal tleirawl sikul tawpsan, in le ram tienga sin thaw hlak thiem tak tak si lo, umawl mei mei an tam taluo a, mani le mani an inthunun zo si naw leiin  Zu le inruithei chi tum tum suokaah an intang pha niin an lang. Hieng a ni lei hin an thaw thei zawng le an inhnikna zawng ding sin  ei ngaituopui a, mi zui ro tia hma ei lakpui hi a hun ta takzet a nih. Thabo hrim hrim a pieng an ninaw a, thuoi har le inchuktir  mawl mawl an  mamaw a nih. Chile rama nuhmei ropui, Nobel Prize dawngtu Cabriel Mistral chun,‘khawvela mi puitlinghai hin thaw dik lo le thaw suol tam tak  ei nei a, ei thaw suol le thaw indik naw pawi tak chu naupang le tleirawl hai ei thlathlam hi a nih’ tiin a hril.

Ei hnam leram ngirsuokna ding hin iem a pawimaw tak a? ti indawn ta inla. Taimakna, ringumna le indikna hai neka sie le hril hmasa ding a vang hle ring a um. Mani le midanghai ta dinga tangkaina nei zawngin taima inla, ringum tak le indik takin mani sin seng thaw inla, ei nun sungril takah ringumna, taimakna le indikna hai vawng hring tlat inla. Ei thil buoipui hai hi ngirsuokpui tham law lawa ei bei indik a a tih. Tin khat hmun chau lo nei han silai zawn bu an tharsuok ngai nawh. Sungruol deu fakkhawp bu nei ding chun bu tin 4 vel bek tu theina lo vata nei a tul. Khuongchawipa ni tum lem chun bu tin 10 hmun lai bek lo nei a tul. Taimakna nunpui inla, chu chu ei hmasawnna ding, ei sungkuo, ei ram le ei hnam ngirsuokna ding ning a tih.

Sin hi an hnuoi taluo le a chin taluo a um nawh. Sin hnuoihnung thaw ei inzak le rin hi ei retheina san pakhat niin an lang. Mi taima hai ta ding chun ei ram le town sunga hin fak hmu theina sin tam takel a um a, ei thaw pei le peinaw thuah innghat a nih. Inhlawna ding annawleh sin thawna ding ka hriet nawh, annawleh ka hmuzo nawh ei ti chun ei taima tawk naw a, sin chin le hnuoihnung hai ei thaw nuom naw lei a nih ti inla hril suol taluo ninaw nih.

Tulai hin Churachandpur town sungah in tinah fea kutdaw a invak hi hmu ding an um nawk el ta hi a pawi hle. Kut le ke kim, piengsuol le ruolbanlo khawm ni si lova kutdawa invak ngam ei um el ta hi ngaituo chet chet a, a sukre dan ei ngaituo a hun hle. Iengleia kutdawa invak el am an nia ti hi khawtlang, ram le hnam thuoitu han ei zawngsuok a, a sukre dan lampui ei dappui thiltha a ni ngei ring a um. Zohnathlakhai hi kutdaw dinga siem le pieng ei ni nawh ti hi ei thupui hung ni thei sienla nuom a um khawp el.

Don't Miss
© all rights reserved
made with by Simon L Infimate