Responsive Ad Slot

Hmasawnna Thar | 06 December, 2015

Sunday, December 6, 2015

/ Published by VIRTHLI
JAC inrawinain Joint Consultation nei a nih
Dec. 9 in Public Ground-ah Mass Prayer nei ding
CCPUR: Manipur Assembly in August 31, 2015 nia Anti­ Tribal Bills 3 a passed hai le inzawma Tribal Movement fe mek ni 100 a tlingna hun hmang dan ding le inzawmin zani 12:00Noon khan YPA GHQ Hall, Hiangtam Lamka hmuna Joint Consultative meeting nei a nih.



Joint Consultative meeting chun Tribal movement fe mek  ni 100 a tling ni December 9, 2015 in Public Ground­ah hieng chen mi thuoitu Pathien kuoma lawmthu hrilna, ngaidam inhnina le ram ta dinga tawngtairuolna (Mass Prayer) nei ding; hi le inruola India le khawvel rambung tum tuma tlangmi um hai khawm movement an thlawpnaa mass prayer lo nei ve dinga ngen ding; Tribal Martyrs hai inzana le sunnain December 9, 2015, 6:00PM­ 7:00PM inkar sungin tlangmi po poin mani In tuol chita candle sitvar ding; Tribal Movement fe meka Manipur Tribals Forum Delhi (MTFD) hmalakna JAC in lawmum a ti a, Joint Consultative hmasaa remtina lo um ta angin JAC in CCPur District le infepawna lampui pawimaw hai siem/siemthatna ding le inzawmin Road Construction Committee an din ding; JAC le Inpuis/Tribe leaders le CSOs han Manipur Hill district tinah tribal land and rights thuah awareness campaign an thaw ding tiin an rel.

Chun, Inpuis/Tribe Councils han Parliament Winter Session fe mekah Outer Manipur Lok Sabha MP Thangso Baite chu Anti­Tribal Bills pathum hai chungthua buoina kheksuokpui ve dinga thurawn a pek ding; Tribal movement fe mek le inzawma hmatieng JAC in agitation iengang khawm nei tula a hriet chun JAC hmalakna Tribe Leaders hai thlawp dinga ngen; JAC in Tribal movement chungthu Parliament­a kheksuok puitu MP kuomah lawmthu thawn ding tiin meeting chun an rel bakah Ministry of Home Affairs in November 9, 2015 nia thusuok (Press Release) a siem chu a taka sukpuitling dinga ngen dingin Joint Consultative meeting chun an rel bawk.

Hi huna hin Tlangmi hnam hran hrana pawl tum tuma thuoituhai le Church leaders hai khawm an thang a, United Naga Council (UNC) President Gaidon Kamei; Manipur Tribal Forum­ Delhi (MTF) a inthawk palai hung hai khawmin thuhrilna hun tawite te an hmang a; Mr Langkhanpau Guite, Chairman, ADCC khawmin Cold Storage thuah report a a pek bakah Nov. 15, 2015 nia JAC le Inpuis/Tribe leaders han MTFD kuoma thangpuina JPO fethelgna Rs. 2 lakh pek dinga thutlukna an lo siem ennawnna neiin an hmatienga Rs. 2 lakh thawn nisien a ti thu a hril.

ICI 66th General Conference
CCPUR:  Independent Church of India (ICI) in December 3, 2015 a inthawka Muolvaiphei, CCPur hmuna 66th General Conference an nei chu a fe mek a, vawituk Dec. 6, 2015 Zing inkhawm 10:30 AM huna thuhriltu ding Rev. Darsanglien Ruolngul ning a ta, Sun inkhawm 1:30PM in Pension Service le Ordinstion Service um a ta, zan 5:00PM mipui inkhawm huna Rev. S.K. Songate in Pathien thucha hril a tih.


RPC (NEI) 25th Synod khawmpui a fe mek
CCPUR:  December 3 a’nthawk khan ­Parbung khuo­ah Reformed Presbyterian Church­ ­NEI 25th Synod (Silver Jubilee Celebration) chu hmang mek a ni a. December 6, 2015 hin Pro ­Pastor Joseph Hanse Commissioning (Ordination) programme Rev. Saithanglur Joute in hmang a ta, Lalpa zanbu Sacrament semin zui a ta, December 6, 2015 zan inkhawm hunah Rev. Dr V. Lalnghakthang in Kum 2016 thupui “Rorelna Fel” hrilzauna le hawngna nei bawk a tih.

EFCI MissionaryConvention 
CCPUR: December 6, 2015 (Pathienni) hin EFCI Kohran chun EFCI Saikawt Presbytery biel pumpui huopin Missionary Convention, Rev. Chawnga Memorial Chapel, Sielmat­ah nei an tih. Khuo tina EFCI Biekin hai chu khara hi inkhawma thang seng dinga inhriettir an nih. Zing inkhawm huna thu hriltu ding chu Rev. Rohminglien Pakhuongte ning a ta, zan inkhawm khaw tinah rawngbawltu tir ning a tih tiin EFCI Saikawt Presbytery Superintendent chun inhriettirna a siem. Vawisuna Missionary Convention huan hin Missionary thawlawm lakkhawmna um ata, Mr Lalbiekthang Amaw, Secy. PRB le Mr Jousanghlei Joute, Fin. Secy. PRB han report peng an ta, EFCI Central Choir, Khawmawi KTP; Sielmat KTP; Rengkai KTP le Saikawt KTP haia inthawk inpakna hla ngaithlak ning a tih.

Tuailai Mega Event nei
CCPUR: Zani 10:00AM khan Tuailai 2015  Golden Jubilee huoihawtnain EBC Gospel Centenary Hall­ah Tuailai 1434 Pro Mega Event nei a ni a, Rev. N. Pumsuanthang, Youth Coordinator inrawinain Tribal martyrs hai sunna hun hmang a ni a, Rev. Dr T. Pumzathang in Tribal Martyrs 9 sunghai ta dinga tawngtaipeika a nei. Event sung hin workshop, Musical drama le Pathien thu ngaithlakna nei a nih.

ESC Annual Council
CCPUR: December 3, 2015 a inthawk khan Synod HQ Church, Chiengkonpang­ah 62nd Evangelical Synod Church Annual Council, 2015 nei a ni a, zanikhan ESC proposed budget Rs. 1.37 lakh approved thaw a nih. December 6, 2015 hin  Pro­Elder 6 P. Bieklien of Chienkawnpang; Mangminthang of Chiengkawmpang; Malsawm of Nalon; Lienkhokam of Congchin; Thangtinpau of K.Zoar le Khuolkhokam of Kanpi hai ordination hun hmang ning  a tih.

ZC Interim Chairman dingin B. Dongzalian
CCPUR: Zani zantieng 2:00PM khan Simveng­a Simte Inn ah Zomi sunga inlawikhawm Tribe thuoitu han meeting an nei a, Zomi Council (ZC) interim Chairman dingin B. Dongzalian, President, STC GHQ lungruol takin an ruot a, March 15, 2016 chen chel a ta, hi zo a ZC election nei ning a tih.

Martyrs ralna Rs. 11,900/­ le puon 9
CCPUR: Zanikhan District Hospital­a JPO kutah Tribal Martyrs hai ralna Rs. 11,900/­ a lut. Zanita JPO kuta ralna petu hai chu­ NTBC (New Church) Rs 200/­; Pastor S Kamkhojam of Tangnuam Rs.500/­; M. Pumzachin of Bungmual Rs.200/­; S. Thangkhokap Mate 1000/­ le  Shri .Laltlansang Hmar, EM of NC Hills  Rs.10,000/­ le puon (shawl) 9 hai an nih.

Dec 6, 2015 a District hospital Morgue bula lengkhawm dinghai chu Pearsonmun, Rengkai, Demmang Veng le Tuinom hai ning an tih.

JNV Entrance Exam
CCPUR: January 9, 2015 khin  CCpur District sunga Block Hq tinah JNV Tuinom, CCPur hnuoia Class VI inchuk ding lakna dinga entrance Examination um a tih. Candidates han December 7, 2015 a inthawk Concerned DI of School/incharge hai kuoma inthawk Admit Card la thei an tih. CCPur Block hnuoia candidates 504, Henglep block ah 73, Singngat block ah 31, Thanlon block ah 61, Tipaimukh block - ah 175 le Samulamlan block –ah 110 an um.

Highway haia Economic Blockade a la fe pei
IMPHAL: Manipur nitin mamaw phurlutna lampui Trans Asian Highway No. 1 (National Highway) Imphal­Mao sector inkara Civil Society Organisation (CSOs) Sadar Hills in December 2, 2015 zanril­a inthawk lampui siemtha dinga sawrkar an ngenna ngaisak a ninaw leia tiemchin umlo Economic Blockade an thaw chu a la fe pei bakah Jiribam District Demand Committee in National Highway No.37(Imphal­Jiribam Road) a economic Blockade an thaw khawm a la fe pei a. Nitin mamaw phurtu  Truck 140 chuong Hengbung Taxation office bul lai an intang mek bakah  Jiribam­ah Truck 30 chuong an lan tang mek niin ei thu dawngna chun a hril. Ei thu dawngna thenkhat chun Jiribam­a intang nitin mamaw phurtu Truck hai chu security khau taka vengna hnuoia Imphal an hung pan vawng ta niin a hril.

CSOs Sadar Hills Spokesperson Lamcha Chongloi chun, an nuorna le inzawmin state sawrkar le concern department tienga inthawk inbiekna nei dinga fielna an la hmunaw zing niin a hril. An thil ngen lampui siemthat dinga an ngenna chawlkar khat sunga tan a ninaw chun Sadar Hills pumpuiah total bandh an thaw ding  thu hrilin a tul chun  contractor chunga khawm case an file ding thu Lamcha Chongloi chun a hril.

Hieng laizing hin Manipur Janata Dal- United President chun zanikhan Babupara­a an office­ah chanchinbumihai an hmupui a, Imphal ­Dimapur Road le Imphal­Jiribam Road haia Economic Blockades thaw a ni chungthuah sawrkarin hma a laknaw lei a nih tia demin a sawisel.

ICHAM in inbiekremna lampui dap dingin ngen
IMPHAL: Information Centre for Hill Area Manipur (ICHAM) chun zanikhan Manipur Press Club, Imphal­ah Chanchinbumihai an inhmupui a,state sawrkar le Joint Action Committee (JAC) Against Anti­Tribal Bills Churachanpur hai chu thina tuok sungkuo hai hmakhuo ngainaa inbiekremna a um theina dinga hma la dingin an ngen. ICHAM General Secretary Ngachonmi Ramshang chun, tuchena martyrs hai ruong vui loa ni 100 tling tep a um ta chu pawi a ti thu hrilin Chrismas hma ngeia inbiekremna a um theina dinga hma la dingin State sawrkar a ngen.

CM in Thoubal Mega Power Project a va kan 
IMPHAL: Manipur Chief Minister O.Ibobi Singh chun zanikhan Thoubal College bula Thoubal khunou hmuna bawl mek Mega Power Project 300­400 MKW Power Sub­Station a va enfel. Hi project fe mek hi zo a ni huna chun tuta inthawk kum 30 sung chu Manipur in electric power thuah harsatna a neinaw ding niin ei thu dawngna chun a hril. Manipur CM chun hi project zo hun ding a hril thei nawh. CM hi Manipur State Power Corporation Limited officials hai, Thoubal DC, T. Ranjit hai bakah Thoubal Municipal Council­a Chairperson le Councillors han an zui ve.

Manipur mi inhmang inkhaihluma hmu
IMPHAL: November 29, 2015 a inthawk a umna chin hriet loa inhmang Manipur mi L. Poumai chu Bhubaneswar a Raj Bhavan­a Odisha Administrative Service (OAS) Officers quarter bul lai ringhla um takin thingkungah inkhaihlum saa hmu a nih. L. Paumai hi Senapati Distict a Khabung Karong mi a ni a, Rel­a Dimapur­a inthawk Bangalore  pan,  Nov. 29, 2015 zantieng 4:55PM khan a sung hai phone in a lan biekpui a, a chuongna  Rel hi November 30, 2015 khan Bangalore a tlung a nih. A ruong hi postmortem thaw dingin Capital hospital, Bhubaneswar­a thawn a nih.

Dec. 10­15 sungin Barak Festival 2015
IMPHAL: December 10­15, 2015 inkar sung khin ‘Barak ­Let Live’ ti thupui hmangin Senapati public Ground­ah Barak Festival  hmang ning a tih tiin Naga People’s Organisation (NPO) President  T. Kamba Moses chun zanikhan a hril. Hi Festival thiltum tak chu Barak river le Senapati district environment le ecology humhal a nih tiin a hril.

Kar nawk Rajya Sabha­ah GST Bill pass dinga phar a ni ding
NEW DELHI: Parliament Winter Session fe mekah Goods and Services Tax (GST) Bill, Real Estate Bill le bill dang dang hai pass dingin Rajya Sabha­ah phar ning a tih. Business Advisory Committee chun GST Bills a dingin hun darkar 4 le Real Estate Bill a dingin hun darkar 2 an bituk.

Kar thar tienga Rajya Sabha­a Bill pass dinga phar ding hai lai hin ­The Whistle Blower Protection (Amendment), the Negotiable Instruments (Amendment) ; Scheduled Castes and Scheduled Tribes (Prevention of Atrocities) Amendment Bills hai khawm a thang.

Lok Sabha­a chun Industries (Regulation and Development) Amendment, the Payment of Bonus (Amendment) le Arbitration and Conciliation (Amendment) Bills hai thangin bills 6 phar ning a tih.

Gill Gates in Nitish an hmupui
PATNA: Bill and Melinda Gates co­- chairman le trustee Bill Gates chun zanikhan Bihar Chief Minsiter Nitish Kumar an hmupui a, health sector­a sin thaw tlang dan ding an hriltlang tiin ei thu dawngna chun a hril. Foundation chun maternal, neo­natal and child health, nutrition, infectious diseases management (diarrohea, pneumonia and tuberculosis) le elimination of Kala­azar dona kawnga technical support pek a nuom a nih. Bill Gates in Nitish an hmupui huna hin Bihar Chief Secretary Anjani Kumar Singh, R. K Mahajan principal secretary Health; SM Raju Secretary Social Welfare le Chanchal Kumar, Secretary chu CM hai khawm an thang bakah Gates hi India rama a leadership team han an tawiawm bawk. Bill and Melinda Gates Foundation le Bihar sawrkar chu tuta hma khawmin Polio dona kawnga hlawtling takin an lo thawtlang ta a nih.

Bus in electric hrui a tawk leiin mi 5 an thi
BULANDSHAHR: Zanikhan Kakor town ah private Bus pakhatin electric high tension 11KV line a tawkfuk leiin Bus a chuong pasal naupang kum 12 mi thangin mi 5 electric in a man hlum niin SSP Anant Dev Tiwari chun a hril. Bus driver hin short cut lampui a hraw huna electric hrui hi a tawkfuk niin a hril. Hi thil tlunga hin midng 7 na takin electric in a man hliem a, district hospital­a admit an nih.

Centre in Sikkim­ah four lane highway
NEW DELHI: Sawrkar thlungpui chun tuta inthawk sawtnawte hnungah Sikkim a inthawk Bagdogra chen four lane a lien highway siem tan a tih. Hi lampui hi vuongna chen tum theina dinga thaa siem tum a nih. Sikkim sawrkar chun tourist tamlem hip theina dingin Rs. 3,600 crore sengin tourism industry tiengpang nasa taka hma lak a tum a, chu hai lai chun India le China ramri a Nathula bula international class Golf Course siem ding a thang a, hi hi khawvela Golf course insang tak a ni ding a nih.
---------------------------------------------------------------------------------------------------------------
VAWISUN THUPUI
‘Inremna siemtuhai chu an ham a tha, Pathien nauhaia inbukin an la um ding a ni sih a’ ­Mathai 5:9

Inremna siemtu

Tulai khawlvela thil tlung mek mita ei hmu le naa ei hriet hai ei thlir chun tuolthatna, inpawngnekna, helna, sietna dang dang; ram le ram, hnam le hnam indona; thuoitu le mipui ingnghirnghona hai nasa takin a pung pei a; sawrkar rorel dana mipui lungawinawna a zuol pei bawk. Ei ram, ei insung, ei kohran, khawtlang le ei hnam sunga khawm a tlung zing a, a pung pei bawk. Hieng thil hai popo hung suok nasan chu ram thuoitu le roreltu han thuneina hmang suol a, mani mimal inhawi chenna le hlimna ding chau thlira thil an thaw lei; mipui thangruol han ram le hnam himna ding le thil tha lem dinga sawrkar, thuneitu le hotu hai an khinglet hlak lei; A tawi zawngin ‘a pumpui a dinga thiltha ding neka mani mimal; hnam bing, kohran, sakhuona le party bing ei ‘inruichil’ lei a nih ti inla ei hril suol ring a um nawh.

Pa var tak khawm Zu an rui ta chun a lungril a fim naw leiin thil invetthlak tak takin a thaw hlak. Hiengang bawk hin mihriem hai hin inrui ei nei ta hrim hrim chun ei khaw hmu hi a hla thei naw a, eini ngaia thiltha le indik nia inlang ei thaw hai kha  harfim taka lo thlirtu hai ta ding chun invetthlak tak tak dam an ni hlak. Hi lei hin sakhuona amani, hnam amani, politics annawleh hnam­bing chibing thila manih ei inrui ta chun mihriem hin invetna chikhat ei nei hlak a; iengangin min thu­tha hla­tha hril hai sienkhawm hrietthiemna ei nei thei ngai nawh. A san chu inrui zing puma harfim hi thil harsa tak a ni leiin. Zurui tam takin an inrui zie an hriet ngainaw ang bawkin mi tam tak chun ei inrui a nih ti hi ei hriet naw a, ei pawm theinaw bawk. Chu chu hung kakhawk chu inkhingna, buoina le inbeituona a ni hlak. Tulaia khawvelin an khawkpui em em laia pakhat ‘Terrorist’ hai khawm ku hi inrui an nei leia hienga um le khawsa an nih. Khawvelin misuol le nunrawng takin ngai sienkhawm anni (terrorist), ei hrietthiem thei dan dingin tulaia inlar em em ISIS hai khawm hin thil suol thawin an inngai der naw a, an mimal, insung, sakhuo, ram le hnam ta dinga thiltha thawa inngai an nih.

Hieng a ni lei hin Isu Krista (Remna Lal) zuitu Kristien hai ta ding chun harfim taka um a, inremna zawng hi ei sin pawimaw tak ding a nih. Chu ding chun thuhnuoirawlna dam, hmangaina dam, inngaitlawmna dam, dawtheina dam ei nei a tul a, chuonghai chu Pathiena inthawk a ni ngei bawk ding a nih. A san chu mihriema inthawk a ni chun a daisawt ngai nawh. Inremna ei ti hi khawvel pum huop, khawtlang huop le hnam pum huopa chawp le chila zuk inumtir el thei a ninaw a, mihriem varna le thiemna hmanga sukpuitling el thei khawm a ninaw bawk;  mimal tin nuna um a ni a, mimal chit nuna inremna a um huna an tlun thei chau a nih. Hi lei hin eini Kristien inti hai hin ei kohran, insung, thenum, khawtlang le ei ram le hnam sunga inremna a um theina dingin ra ei insuo a tul. Isu Krista’n suola tlu tah Pathien le inzawmna nei thei ta lo ding mihriem hai Kross lerah a thisena min tlana Pathien le a min remtir ta hai ei ni leiin.

Mathai bung 7:16 a chun “Anni chu an raah hre el in tih. Hrui hlingnei kungah grep an lo hlak am a nih. Lenhlinga khawm theichang an lo hlak am a nih? ti ziek ei hmuh. Sakhaw mi tak nia inngai a,  midang le kohran dang theidana ei neizing sung chun iengangin tawngtaiin thu hril inla khawm ei  ram le hnam sunga hin inremna intluntu ni ngainaw manih. Mania inthawk ei tan phawt a tul.  Mathai  Bung 5:9 a chun ‘Inremna siemtuhai chu an ham a tha, Pathien nauhaia inbukin an la um ding a ni sih a’ ti ziek ei hmu bawk a; inremna siemtu hai hi khawvel khawmin a ngaisangin an za a, chawimawina a pek hlak. Hi lei hin inremna siemtu ni hi thil hlu tak, mi hamtha chau ni lo, Pathien nau nina changtu  ngirhmun a ni leiin Kristien hai chun khawlai ram le hmuna khawm ei zawng rawp ding chu a nih. Mani inngaihlut, mani inpak le inhril ropui rak hin ei  ropui sawt naw a, mi lungril a them naw bawk a; thilthaw le changzie in mi a hne lem rawp hlak.

Anti­Tribal Bills pathum hai dodalna leia buoina hung suok le inzawm khan ‘iemie’ ti tawng hmang hai khawvel thilah ei politics an sang nawin  mi ngaiah a lo inhnuoi vieu khawm a ni thei. Sienkhawm, chieng taka ei thlirkir chun ngirhmun pawimaw tak ei neizie an lang. Uong thu inchangnaw sienla, Pathien ropuina ding lemin; Ip set set lo chun ei unau hai kha a sungrilah, anni sungah an buoi hle a, Morgue­a ruong nghaktu ding khawm an insiem mumal theinaw laiin ‘Chanchintha lo dawng hmasatu in ni bawk leiin, mawphurna mi la pek ro’ tia an ngenna pawmin Morgue bula nitin Pathien thu le hlaa lengkhawm inrawitu ngirhmun ei chang tlat kha khawvel ngaia ropui raknaw inlakhawm Pathien ngaia chu ei nep ring a um nawh. Ei hnam bing sungah iemani taka inlungruolna a um theinaw lai khawma mi han Pathien thua bek ringtlak le innghatna tlaka an mi la ngai hi lawm a um a, sunzawm pei ei tiu. Mi ring ei ni ang bawkin ei hnam sunga indikna, ringumna, taimakna le tuorselna hai neia; inhmangaituona, inngaitheituona, inremna le inthuruolna lampui ei hraw a ni phawt chun Pathienin hnuoia khawm hin ram chu mi la pe ngei a tih. Kohran, hnam, phingpui hmangai ding, inrui lo ding.


Don't Miss
© all rights reserved
made with by Simon L Infimate