Responsive Ad Slot

Hmasawnna Thar | 05 December, 2015

Saturday, December 5, 2015

/ Published by VIRTHLI
DC rawiin DLCC meeting nei a nih
CCPur: Zani 11:00AM khan Mr Lunminthang Haokip, IAS, DC, CCPur inrawinain DC Office­a BRGF Resource Centre­ah District Level Coordination Committee (DLCC) meeting nei a ni a,  District Level Officers (DLOs) hai an thang.
     


DC chun, DLOs hai chu development works an thaw hai DC kuoma report pe pei dingin an hriettir a, Department in Tiddim Road zula tuilawng phumnaa hnuoi an chokhur hai tha taka an vurnaw chungthu khawm DC chun hi huna hin a hrillang. District Training Centre, Tuibuong­a  Trade 46 haia Entrepreneur training um dingah DC Office le DIC Office haia Application form  sem mek a ni thu, training fee Rs. 2000/­ le application a tul thu; PMEGP loan apply huna training­a thang hai ditsak bik an ni ding thu DC/CCPur chun a hril a.  
     
Singngat khuoa Central Bank of India duthusama a function nawna thuah Development Fund a um hun huna Singngat Block hnuoia fund um hai deposit ni thei sien a nuom thu DC chun a hril a, NIELIT Office bawlna ding thuah tukhawma an sukbuoi nawna dingin SP/CCPur chu enkaipui dingin an hriettir a, DIO/NIC in CCPur Website­a an upload ding DLOs hai chu data pelut dingin a ngen bawk. Zanita DLCC Meeting chun  DLCC Meeting nawk chu Singngat  a nei dingin an rel.

JNV Entrance  Admit Card Dec. 7­ah
CCPur: JNV, Tuinom, CCPur a Class VI inchuk ding lakna dinga Entrance Test January 9, 2015 a  CCPur district­a Block 6 haiah nei ding le inzawma candidates 956 hai Admit Card December 7, 2015 a inthawk semdawk ning a tih. CCPur Block, Singngat Block le Samulamlan Block a mi han CCPur Govt. H/S campus­ah Admit Card hi la thei an ta, Henglep Block le Thanlon Block a mi han CCPur Govt. H/S a DI of School kuoma lak thei ning a ta, Tipaimukh block hnuoia mi han Synod House­a DI/Tipaimukh kuoma inthawk lak thei ning a tih tiin DI of School, i/c JNV chun a hril.

Dec. 7­11 sung DC Training in a fe ding
CCPur:  Mr Lunminthang Haokip, IAS, DC/ Executive Director, DRDA/CCPur  chu December 7­11, 2015 inkar sunga Hyderabad hmuna Training on “ Participatory Planning for Poverty Reduction and Sustainable Development”um dingah zu thang a tih.Training hi National Institute of Rural Development & Panchayati Raj (NIRD&PR), Hyderabad hmna nei ding a nih.
     
Ama umnaw sungin Ms O. Leimaton Devi, MCS, Additional  Deputy  Commissionar/CCPur chun  in­charge in DC/CCPur sin lo chelsang a tih.

Awareness on Animal Husbandary
CCPur: ICDP­CCCD hnuoia zanikhan VDC hai hmalaknain M. Lhavom khuoah One Day Awareness on Animal Husbandary nei a nih. Hi huna hin resource person in Dr George le Pu Douzathang, F.A, Vety Dept hai an thang a, ran vai le enkawl dan, Bawng le lawi, Ar vai, Vawk vai le enkawl dan chipchier taka mipui hai hrilhrietna nei a ni bakah mipui hai chu an mamaw hai sawrkar kuoma intlun hlak dingin an fiel a. Vety. Dept chu an thei ang anga thangpui dinga inpeisa zing an ni thu an hril. Mipui tienga inthawk indawnna  um hai khawm hi huna hin dawnna pek pei an nih. Hi programme a hin khuo 9 haia inthawk mi 70 vel an fe khawm. Resource person hai kuoma lawmthu hrilnain  Memento inhlan an nih.


Consultation Workshop on Tribal Customs Nei
CCPur:  Zanikhan Indian Council of Social Science Research sponsored­in Omeo Das Institute of Social Changes & Development, Guwahati chun Manmasi Digest fethlengin Functioning of Hmar Traditional Institutions (Pre and Post Colonial) le Functioning of ADC in Manipur thua Consultation Workshop, VTI, Muolhlum ah nei a ni a. Tribal issues le thil dang dang, traditional practices, customary laws, Land Reform Bills, etc. hai hriltlâng a nih. Tribal haiin autonomy an lo nei dan, governance fedan, sawrkâr dân tharhai le tribal chingdan hung danglam peihai, hmasâwnna am thang mawbawk, ti bichiengna le inhrilhrietna nei a nih.
     


Mr Joseph Joute­in Discussion moderate­in Prof Bhupen Sarmah, Director, OKD ISCD in resource a lak khawm a. Manipur­a ADC chu North East­a ADC 6th Scheduled hai le an ang nawna, asan ding awm, a ni dan ding ang tak a ni thei nawna le a ni thei dan ding, issue hran hran, tribal nunphung hmang zing tah le governance system kakhawkhai hriltlâng a nih bawk.
            
Prof Bhupen Sarmah chun, North East India context a Autonomy le Governance chungchâng thuah an research thawna ding kawng tamtak a hmangpui a. Tribal customs le traditional laws/norms hrietna kawnga khawm nasataka thangpui zie thu a hril. Participants, tribe thuoituhai a inthawkin feedback tamtak pek a ni bawk.
            
Participants hai chu Hmar prominent leaders le resourceful tak takhai, Prof R.Sanga, etc. an nih a. Tamtak chun, hieng ang workshop tam lem hi nei pei thei inla, ei hnam traditional institutions hai khawmin lungril lientak putin bawzui pei thei inla chu policy le social changes development kawngah tuta nek hin ei ram le hnamin sawr tangkaiin hma sâwnpui ngei ei tih, tiin an hril a. Mr Timothy Z Zote, Editor, Manmasi Digest­in lawmthu hrilna neiin workshop khar a nih.

Lompi Golseh 2015  hmang ding
CCPur: December 11­12, 2015 sung khin “Unity Through Sports”ti thupui hmangin  Lompi Golseh  Organising Committee, Kuki Inpi, CCPur huoihawtnain Tuibuong­a Peace Ground­ah Lompi Golseh 2015 program hmang ning a tih. Traditional tournament a ni angin kum dang ang lo deuin Khao Kiloito, Kangchongkap, Suhkho, Kungkal, Lhaichop le Songse hai thangin modern sports Football  inkhel ning a tih. Hi programme­a thang ding hai chu­  KIC, KCA, KKL, KNO & UPF, KSO/CCpur, MDCs, JPO, TKSU, Hmar Inpui, PTC, VPC, TCU, MPC, KWU & KWOHR, KSCC, KCLF, STC, GTC le UZO haia inthawk palai hai ning an ta, Last date of form submission December 8, 2015 ning a tih tiin CH. Lhunchon, Convener & Jangkhohao, Secretary Lompi Golseh Organizing Committee  chun a hril.

Joint Consultative meeting
CCPur: Zanita JAC Against Anti­Tribal Bills chun JAC Information Centre, KKL Complex­ah meeting an nei a. Hi huna hin December 5, 2015 (Inrinni) 11:00AM­a Church Leaders, Innpi/Tribe Council leaders le Tribal Organisation tum tuma thuoitu han YPA GHQ Hall, Hiangtam Lamka hmuna Joint Consultative meeting nei dingin an rel. Hi huna hin December 9, 2015 nia ‘100 days of injustice’ hmang dan ding le Tribal Movement le inzawma hmatienga hmalak pei dan ding hai hril le rel ning a tih.

India ram hmasawnna dingin Centre le State sawrkar hai an thangruol a tul: PM
New Delhi: Prime Minister Narendra Modi chu zanita New Delhi hmuna Hindustan Time Leadership Summit nei huna a thangin thuhrilna hun a hmang. Hi huna PM in thu a hrilnaa chun,  India hi Delhi­a inthawk chauin hmasawn naw ni a, India ram hmasawnna dingin state sawrkar han mawphurna lien tak an nei a, ei ram hmasawnna dingin sawrkar thlungpui le state sawrkar hai an thangruol a tul tiin a hril.
     
Pu Narendra Modi chun, India ram chu khawvel rambung tum tum hai laia economy inthang hrat taka ngai a ni thu hrilin, India Economy  inthang pei vawnghimna dingin state sawrkar hai le sawrkar thlungpui an thangruol a tul thu hrilin Economy in hma a sawn pei theina dinga pawimaw tak chu sawrkar nghet nei a ni a, mipuiin NDA hne taka an thlanglal chu thil lawmum tak a ni thu hril. Ni 100 sunga  NDA sawrkarin India ram sunga khuo 1900 haia electric meivar pek hman tuma target a nei laiin tuhin target pelin khuo 3000 haiah electric meivar pek an ni ta a, lungmeihawl le power  industry thanga industry project sin pending­a um hai khawm thaw tan a ni ta a, India ramin electric power a peksuok thei khawm kum khatah 8.5 percent in a pung mek a nih tiin Pu Modi chun a hril.

Security vengnain   Imphal an hung pan
Imphal: Civil Society Organisations (CSOs), Sadar Hills in Trans Asian Highway No. 1 Imphal­Mao lampui siemthat dinga an ngenna sawrkarina ngaisaknaw leia December 2, 2015 zanrila inthawk National Highways haia  Blockade an thaw leiin  Imphal­Mao le Imphal­Jiribam Road ah nitin mamaw phurtu Trucks tam tak an intang  mek niin ei thu dawngna chun a hril. Hieng laizing hin Jiribam a intang nitin mamaw phurtu Truck ta tamlem hai chun security khau taka venghna hnuoia Imphal an hung pan niin ei thu dawngna dang pakhat chun a hril. CSOs a hin  Kuki Inpi Sadar Hills; KSO/Sadar Hills; TSA/Sadar hills; KWU Sadar Hills le pawl dang dang hai an thang. CSOs hin October 24, 2015 daia kha hi lampui siemtha dinga ngenna an lo siem tah, an ngenna sukpuitling pek an ninaw chun  nuorna an tan ding thu an lo puong tasa a nih.

Tiemchin um lovin  an service chawlsan
Imphal: December 3, 2015 nia Leingakpokpi, Jiribam hmuna Cement phurtu Truck pahni tu ti hrietlo han an raw dodalnain All Manipur Road Transport Divers and Motor Workers’ Union (AMRTDMWU) chun December 5, 2015 (vawisun) a inthawk tiemchin um lova  an service chawlsan an  tum thu zanita MG Avenue,Imphal­a an office­a Chanchinbumihai an hmupui huna AMRTDMWU Gen. Secy. Maimon  Anil Meitei chun a hril.
     
Maimon Anil Meitei chun, National Highways a inlawn  motor hai suom le raw an ni vet hlak leiin state sawrkar kuoma venghimna pe dingin vawi tam tak  ngenna siem ta a, sienkhawm sawrkarin tuchen hin hma a la laknaw zing a nih tia hrilin Truck rawa um hai zangnadawmna pe ding le  Transporters hai venghimna huntawk pe dingin a ngen. An strike thaw tum hi Manipur Truck Owners’ Welfare Association khawmin an thlawp.

Bravery Award dawng dingin Manipur  mi 2
Imphal: Manipur naupang pahni­ Master Maoris Yengkhom of Yaiskul Police Lane le Master Chongtham Kuber of Tera Loukrakpam Leikai hai chu National Children Bravery Award­2015 dawng dinga thlang an nih tiin  Manipur state Concil for Child Welfare, Moirangkhom chun a hril. Bravery Award hi January 26, 2016 nia India Republic  Day hmang hmain  New Delhi hmuna  Prime Minister Narendra Modi in  inhlan a tih.

Sawrkarin dawnna a la pek nawh
Imphal:  Manipur Assembly in August 31, 2015 nia Bills 3 a passed hai dodalna le inzawma  buoina tlung le Manipur­a tlangmi 9 zetin thina an chungthua buoina chingfelna dinga a hmalakna  National Commission for Scheduled Tribes in Manipur sawrkar kuoma ni 15 sunga Commission kuoma report pe dinga November 10, 2015 nia notice a pek chu hun tiem a bo hnung chena khawm dawnna pek a la ninaw niin ei thu dawngna chun a hril.
     
Mr  T. Romeo Hmar, Convenor Manipur Tribal Forum Delhi in representation a pek le inzawma  NC for ST in  Bills 3 hai Anti­Tribal Bills an nih tia ni 15 sunga  report pe dinga a hung inhriettir, hi hun sunga report pek a ninaw chun Chief Secretary chu Commission hmaa inlanga hrilfie dingin an hriettir a nih.
     
Hieng laizing hin  Manipur sawrkar chun Bills 3 passed a ni huna detail report  Commission kuoma a thawn ta a, chu taka chun, Bill passed a ni huna khan MLA tukhawm a dodaltu an um naw thu, Bills passed huna thang MLAs hai khawm chieng takin a ziek lang niin Imphal Times chun a zieklang.


Mulayam PM candidate a puong a ni chun
New Delhi: Uttar Pradesh Chief Minister Akhilesh Yadav chun, Lok Sabha Election nawkah    Samajwadi Party leader Mulayam Singh Yadav Prime Ministerial candidate­a an puong thei a,  Congress leader Rahul Gandhi a Deputy dinga  an pawm thei chun Congress le Samajwadi party thangruol thei ning a tih tiin zanikhan a hril a, Bahujan Samaj Party (BSP) leh an thangruol  naw ding thu a hril. Congress leh Lok Sabha election nawkah Samajwadi Party an thangruol thei dim tia indawnna um le inzawma hi thu hi  Akhilesh Yadav in a hril a nih.

VIPs hai  Mizorama inzin lo dingin
New Delhi: Mizoram sawrkar chu  Krismas le Kum Thar hmang dingin nasa takin an singsa mek a.  Hi le inzawm hin Mizoram Chief Secretary chun Mizoram sawrkar aiawin state puotienga  milien­milal ‘ VIPs,  le Officers hai chu Christmas le Kum  Thar lawm insingsatna leiin December 14, 2015 a inthawk January 8, 2015 inkar sung state sawrkarin an lo ngaisak hmannaw ding leiin Mizorama inzin lo dingin an inhriettir. Hi inhriettirna hi Government of India hnuoia Secretaries hai;  States le Union Territories haia  Chief Secretaries;ADCs to State Governors; Registar, Supreme Court of India le states tina High Courts registrar hai; state/UTs tina Secretary (Protocol) hai, Secretary Lok Sabha; Secretary, SC/ST Commission;Secretary, Election Commission of India;Secretary,OBC Commission; Secretary, Niti Ayog le Secretary, UPSC hai kuoma a thawn.

GNLA action commander kap hlum
Tura: Zani hmasa zingkar khan Durama Hills, East Garo Hills district­ah Garo Hills Police –a   SWAT Commando hai le GNLA hai an inkaptuo a, inkaptuonaa hin GNLA a ‘action’ commander Kennedy T. Sangma @ Hebel kap hlum a nih. SWAT Commandos han Durama Hills ramhnuoia dappui an thawnaah GNLA hai le inkaptuona hi tlung a nih.  Inkaptuona hmuna hin Police chun AK series Rifle 2, Russia siem Draganov Sniper rifle 1 le AK mu 24, AK  magazine ruok 2, 7.62 calibre mu 2 (sniper rifle mu) le Mobile handsets 4  an hmu bawk.

Disable hai ta dinga 5% reserved tum
New Delhi:  Lov Verma, Secretary, Department of Empowerment of Persons with Disabilities  chun, sawrkar thlungpuiin Disable persons hai ta dinga  sawrkar sin laknaa 3% huol (reserved) chu  5% a sukpung tumin hma a lak mek a, hi le inzawm hin The Persons with Disability Act­1995 siemthat  a ni theina dinga Cabinet in an rel vat ta ding  thu New Delhi­a  2nd National Conference on Disability  nei huna a hril.

MGNREGA fund a  hma neka suktam a nih
New Delhi:  Opposition Congress in MGNREGA scheme hnuoia fund suktlawm a nih tia intumna hnielin Union Minister Birender Singh chun Mahatma Gandhi National Rural Employment Guarantee Act (MGNREGA) hnuoia fund suktlawm a ninaw thu hrilin kum 2012­13 a MGNREGA hnuoia  Rs. 33,000 crore sie a ni a, 2015­16 ah chun Rural Development ministy in Rs. 34,000 crore sie a,  hi laia fund 90% chu released a ni tah tiin Mr  Birender Singh chun Congress MP Jyotiraditya Scindia indawnna dawnin a hril. Hi programme hnuoia fund indiklo taka hmang a ninawna dingin Kerala a chun January 1, 2016 a inthawk electronic transfer system hmang a ni ding thu Birender  Singh chun a hril.

Delhi MLA hai hlaw sukpungna ding bill
New Delhi:  Independent Committee in Delhi MLA hai hlaw sukpungna ding recommendation an siem chu zani hmasa khan Delhi MLA hai chun approve an thaw. Delhi MLA hai hlaw pungna ding Bill hi passed a ni chun tuta MLA hai hlaw Rs. 88,000 ni mek chu Rs. 2.35 lakh a hung ni ding a nih.  Opposition BJP MLA hai chun a pung rawn taluo tiin an sawisel a, Assembly­a phar a ni khawmin vote laknaa an thangnaw ding thu  Opposition leader  Vijendra Gupta chun a hril.

Nitish Kumar in Rs. 5 crore a thawn
Patna: Bihar Chief Minister Nitish Kumar chun Tamil Nadu­a tuilien tuortu hai thangpuina le sawmdawlnaa hmang dingin  Rs. 5 crore a thawn. Mr Nitish chun tuilien tuortu hai Bihar mipuiin a tuorpui thu a hril. Chun, Bihar Deputy Chief Minister Tejaswi Prasad Yadav khawmin Tamil Nadu­a tuilien thangpuina dinga a thla khat hlaw a pek ding thu a puong a, MLA hai khawm thangpuina pe dingin a ngen tawl.

Mit at leiin mi 24 an mit an del  pha
Bhopal: Madhya Pradesh a chun November thlaa  Badwani district hospital­a Eye camp nei huna mit nauleng var (cataract)  mi 28 at hai laia mi 24 hai chu an mit an del pha, infection leia an mit hi indel pha an ni a, Indore hmuna enkawl dinga thurawn pek an nih. Cataract operation thaw leia mi 24 zet mit an del phana le inzawm hin Madhya Pradesh sawrkar chun eye specialist RS Polod chu a sina inthawk a suspended bakah  hi thu suizuitu dingin member 3 umna Committee an din. Operation thawna theatre khawm khar a ni bawk.

Dec. 11 ah Bank Strike
Guwahati:  All India Bank Officers’Confederation (AIBOC) chun December 11, 2015 khin India ram pumpui huopin Strike an nei ding thu an puong. PJ Nayak Committee recommendation dungzuia sawrkar thlungpuiin policy a siem dodalnaa strike hi nei an tum a nih.

VAWISUN THUPUI
Hmangaina neinaw chun Pathien a hriet nawh; Pathien chu hmangaina a ni sih a.  ­1 John 4:8

Editorial
Khawvel inkhawkpui  Climate  Change
Sungkuo tinin inkhawkpui thil ei nei seng ang bawkin khawtlang, ram le hnam hmasawnna le inthanglienna daltu  inkhawkpui  khawtlang le  hnam tinin ei nei seng a. Hiengang  bawk hin khawvel rambung hai chun kum iemanizat liemtaa inthawk khan inkhawkpui em em thil pahni a nei a.  Chuonghai chu Climate Change (boruok sik le sa inthlakthleng) leia khawvela boruok lumna hung zuol pei ‘Global Warming’ le san mumal tak um chuong lem lova khawvel rambung sawrkar hai suksiet tuma mihriem pawitawklo hai chen lunginsietna le hmangaina nei loa nun tarawt ‘Terrorist’ hai an nih. Hieng thil pahni hai hi khawvel mihriem hai hriselna le hringna ta dinga tium, khawvel ngirhmun derthawng taka siemtu an ni a. Rukru  le misuol laka  mihriem han ei chengna in Dai siema ei inhuon el anga  rambung pakhatin a do el thei  ni lo a ni leiin khawvel rambung han  an ngaimaw le nasa taka an inkhawkpui a hung nita a nih.
     
Boruok sik le sa nasa taka a hung inthlakthleng hrat (climate change)  le  khawvel lumna hung zuol  pei Global Warming chungthua UN hnuoia kum 20 vel zet zawt ngaituo a ni hnungin Climate Change do dan ding ngaituo le khawvel rambung tinin an zui ding, thutlukna/thusuok siem dingin tulai hnai el khan khawvel rambung tum tum thuoitu 100 chuong hai chun Conference of Parties (CoP21) neiin Paris khawpuia an fekhawm a, hi taka hin India PM Narendra Modi khawm hang thangin thuhrilna a nei nghe nghe a nih. Tuhin khawvel rambung 195 haia Negotiators hai chun   Climate deal siem dingin an chai mek a, thil tam tak ngaituo ding a um leiin climate deal siemna dinga hin ni 10 chuong zet a la aw ding a nih. Conference of Paris in thusuk a siem hi khawvel rambung han an namnul thienglo le an zawm ngei tul ding khawpa khaua siem tum a ni a, a tum tak chu khawvela lumna hung pung pei Celsius degree 2 vel beka khawvel boruok lumna sukhnuoi a nih. Tuta ang zinga lumna zuol pei hi sukhnuoi a ninaw chun a nghawng ding hi  a rapthlak hle ding niin mithiem hai chun an hril a nih.
     
Boruok inthlakthleng le khawvel lumna sukpungtu chu iengdang lei ni lovin khawvel thiemna le varna hung insang pei le inzawma thil siemsuokna factory lien tak tak haia lungmeihawl, thautui le Gas an raw haiin a siemsuok ‘greenhouse gas’ lei a nih. Khawvel lumna pungpei sukhnuoi hi khawvel rambung tin mawphurna chu a ni lai zingin rambung hausa le changkang hai chu boruok thalo siemsuok rawntu an ni  leiin rambung hausa hai hin mawphurna an nei lien zuol. Tukhawm hin  khawvel lumna sukhnuoi chu rambung tin dit ani lai zingin harsatna hung um ding chu factory­a sinthawna thenkhat sinthawna sukchawl amani annawleh khar dam a hung tul el thei leiin mi tam takin sin an chan pha  ring a nih.  Hi tak hi khawvel ram changkang hai iengtin am an in adjust ding ti hi a nih. Hi lei hin Conference of Paris annawleh CoP21 thusuok hi tulaia khawvel mipui ngaiven pakhat a nih. Rambung tin pawm tlang thei dinga agreement siem tuma inhmukhawm an ni bawk leiin rambung tinin an pawm tlang seng thei ding siem chu Conference thiltum a ni bawk a nih.


            
Climate Change leia Global Warming hung zuolpei do le dangna hi khawvel rambung annawleh sawrkar hai chau mawphurna a ninaw a, mitinin thaw thei ei nei ve seng a nih ti ruok hi ei hriet nuom a um. Climate Change leia ei rama boruok sik le sa inthlakthleng nasat tak zie, thing le ruo ei satthluk nasa taluo ta leia ei vadung haia tui luong ta lova a kang chat hai ei hmuin ei hriet. Hi le inzawma ei thaw ve thei chu thing le ruo tul lo baksaka satthluk, ram raw mei mei tawpsan, a tam thei ang tak thing le ruo phuna humhal  hai chu eini han mawl taka Climate Change ei lo do ve thei dan an nih. Boruok lumna a hung zuol pei chun a tuor nasa ding hi tudang an ninaw a, eini mi pasie te te  hai hi ei nih ti hriea  thing le ruo humhal nachang hriein, ei inkhawkpui tan mek ta a nizie hrieta, ei thu le hla lova ei ram le hnamin an khawkpui hun a tlung hmain, khawvelin an khawkpui hi ngaimawa, hma ei lak ve a  tul.
Don't Miss
© all rights reserved
made with by Simon L Infimate