“Too many sit at the banquet table of the gospel of Jesus Christ
and merely nibble at the feast placed before them. They go through
the motions – attending their meetings perhaps, glancing at
scriptures, repeating familiar prayers – but their hearts
are far away.” Joseph B. Wirthlin
Khawvela hin hnam tin le ram tinin ni pawimaw le ‘Kût’ pawimaw bik ei nei seng a, chuong nihai chu khùn taka inser le hmangin ei lawm hlak. Dannaranin, tu laia ropui taka ram tam lemin ni pawimaw ei inser chu ei ramin zalenna a hmuna champha (independence day) a nih. Chu zoa ei inser nawk chu sakhuo indintuhai le mi ropuihai piengcham a nih. Chuong laia danglam tak le hlu tak chu ‘Kristmas’ hi a nih.
Ni ropui ei inser le hmang le piengcham ei lawmhai lai hin khawvel mi po po huop zo pakhat char a um a, chu chu kristmas hi a nih. Piengcham nei mi dang hrim hrim chu mihriem vawng an nih. Kristmas neitu ruok chu zaa za Pathien le zaa za Mihriem ni kawp a nih. Edena bawsietna leia mihriem le Pathien inzawmna lo inchat tah chu mihriem tu khawm suizawm nawk thei an um nawh. Suizawm ding chun Pathien nina le mihriem nina nei kawp a ngai. Ieng leiin am?
Pathien chu ‘Hmangaina’ a ni lai zingin Felna, Indikna le Thienghlimna Pathien a nih. Ama angpuia siem mihriem chu ieng angin hmangai sien khawm, a thu awi loa a danhai bawsetu a ni chun a felna, indikna le thienghlimna kut tuor chu a pumpel thei nawh. Chun, Pathien chu Thlarau a ni leiin thlarau naw chun hnai le inzawmpui thei a ni nawh. Pathien Thienghlim a ni leiin mi pawrche chun hnai thei a ni bawk nawh. Mihriem thienghlimna lai tak khawm Pathien ngaia chuh puontiek tirdakum ang chauh a ni leiin, ieng anga mi fel inti khomin Pathien chu hnai ruol a ni nawh.
Hi lei tak hin, Iengkim LALPA, a thu thua thil inumtir theitu chun ama le mihriem inzawmna intan tah chu thil dang anga ‘Um raw se’ tia inumtir el thei a ni nawh. Thaw sien chu ama nina ngei kaltu ning a ta, Pathien ni thei naw nih. Chuleiin, Ama Pathien ngei chun mihriem taksa puta mihriema hung insiem a, Eden bawsietna leia thi dinga tawngsephur mihriem intlanna sin chu Naupa nina inbela a hung hlen a ngai tah a nih. Hi lei tak hin Hmangai Johan chun, “Lekhabu ziel chu sût a, a sung en thei vanah tu khawm an um naw a, hnuoi le hnuoi sunga khawm an um bawk nawh. Lekhabu ziel chu hawng a, a sung en thei tu khawm an um naw leiin ka tap ka tap a. Upa laia pakhat chun, ‘|ap naw rawh, ngai ta, Juda hnama sakeibaknei, Davida |obul khan inchikna suoi pasari chu honga, lekhabu ziel chu sût dingin a hnè tah” tiin a lo ziek a nih (TP 5: 35)
Hi remruotna mak tak el hi thlaraua lo hmu lawktu Zawlnei Isai chun, “A hming chu Remruottu Mak, Pathien Hrât, Chatuon Pa, Remna Lal” (9:6) tiin Isu pieng hma kum 700ah tlang a lo insampui daih tah a nih. Hmangaina leia Chatuon Pathien remruot, Bethlehem tlanga chatuon hringna bei hung tum thu chu hrilin, Hmangai Johan khawmin, “Thu chu taksain a hung inchang a, eini lai a hung chèng a, a ropuizie khawm ei hmuh, lunginsietna le thutaka sip, Pa Naupa nei sun ropuina chu” (1:14) tiin a lo hril bawk a nih. Chu chu hmu chieng loa kristmas ruoipui tak tak chu thlaraua kil thei a ni nawh.
Bethlehem tlanga hmangaina ruoi ropui hung thettu chun agenda chieng tak el a nei a. Chu chu Bethlehemphùla riek beram vengtuhai kuoma hung inlang Lalpa vantirko le van zaipawlin an hung puong, mi tin huop zo chanchin tha lawmum bek bek kha a nih. Ieng leia berampuhai kuomah an hung puong hmasa tak kher am ning a ta? Ieng leia khaw thienghlim Jerusalemah pieng loa Bethlehema khawm bawng inah pieng a, ranthlengah a lu a hung innghat am ning a ta? Ieng leia vantirko le zaipawlin a pieng thu an hung puong am a na? Ieng leia ama chibai buka hung khawsak mivarhai thuoitu arasi kha Bethlehem chungah a chawl am a na?
Chatuon Pathien agenda a bat bata sukpuitling le hlena a hung um thlap thlap lei a nih. Hmangaina ruoi, Hringna Bei, Chatuon Manna chu Bethlehem, bei in (house of bread) a ngei the tanin a hung um a; mi po po suol ngaidamna ding Pathien Beramte le Berampu |ha le Beram Kotkhar ni fawm vong hung pieng thu chu hnuoi berampuhai kuomah puongin a hung um hmasa a nih. Van ropuina po po neitu SIKHAWVAR hung pieng chu chawimawi dingin van zaipawl chauh ni loin, arasi mak, Bethlehem Arasi a hung inlang a nih.
Vantirko le zaipawl rawl thangkhawk chu Pastor Thangngurin, ‘Bethlehem dar’ a lo ti bakah “Bethlehem le Kalvari tlang chungah suokna dâr an ri tah” tiin hla ropui takin a lo khek suok a. Chu dâr chu Adam bawsietna leia chatuon hremna tuor dinga thiem naw chang tah mi po po ta dinga ‘hmangaina dà r, suokna dâr, zalenna dâr, jubili dà r’ a nih.
Aw, a ri a va mawi ngei!
Kristmas darin lung a mi lèn,
Bethlehem a mi’n hriettir;
Mivarhai ruola fe dingin,
Aw ka thla, insiem ve rawh.
Van Lal zalna bawng in tlawmah,
Sun khawsawt intawi ka nuom;
Mi ngaiin hmun tlawm ni sien khawm..
Chu hmangaina dâr rimawi chu ei ramah kum za chuong zet a’n rikna a lo ni tah. A ri hre sia thina hlim ruoma intâng zing mi ieng zat am ei la um a? Chu suokna dar ri hrepuitu le pawmtuhai chu fe suok a, khawvel hnam tin kuomah remna chanchin tha puongdar dinga thu pek ei nih. Ei bau le ei nungchanga inthawkin ieng dâr ri am mi dangin an hriet hlak a? Hmangaina ruoi am ei kilpui, an naw leh intheidana ruoi lem?
Kum 1993 September 28 chawhnung dar hnia Bethlehema Isu piengna hmuna an biek in Church of the Nativity ka fang nia ka thil hriet le ka lungril sukna em em tu chu neitu nina hauh le inchu seng Roman Catholic, Grik Orthodox Church le Armenian Church hai inngei nawzie le an intuolvuok hlak thu le kristmas khawm ni tum senga an hmang thu a nih. Roman Catholic haiin December 24 zan an inpiengtir a, Grik Orthodox haiin January 6ah, Armenian haiin January 18ah. Pathien Naupa khom ni sien, ni hrang hrang pathuma pieng ruol chu a thaw thei bik ka ring nawh.
Kristmas ruoi, Krista ruoi, hmangaina ruoi hi mani thlarau ngeia ei kîl hma chun khuong le dar leh lâmin, hlimhlopna tinreng leh kîl hlak inla khom Heroda ruoi pangzatum le lungsietum inchang zing a tih. Hmangaina ruoi thang si lo kristmas chun umzie a nei nawh; a ruoi neitu luok ei suksuok mei mei a nih.
Chu hmangaina ruoipui chu a tak taka thlarau le taksaa hlim taka kîl seng dingin tiemtuhai po po kristmas chibai vochuom ka bûk cheu.
Isu, vawisun hin kan lungril bawng in tlawmah,
Insieng thar nawk la kan chatuon Lal dingin;
Kan kut inrieng hi Mari kut angin ngai la,
Kumkhawtluonga lawmin hlim kumkhuo tang kan tih.
