Responsive Ad Slot

Hmasawnna Thar | 06 November, 2015

Friday, November 6, 2015

/ Published by VIRTHLI
Tuolsung
Dr P Buhril rawiin WAD hmang dan ding an rel
CCPUR: Zani 11:00AM khan Dr Phirthanglien Buhril, District AIDS Control Officer inrawinain NGO hai bakah Imphal­a inthawk National AIDS Control Society palai han joint meeting an nei a, December 1, 2015 nia World AIDS Day (WAD) 2015 hmang dan ding an hriltlang bakah District AIDS Prevention and Control Committee (DAPCU) hnuoia Social Benefit Scheme hai khawm hriltlang a nih.
    

Dist. AIDS Officer chun Line Deptt (DSO,DRDA, DSWO, NYK, DIC, Tribal Development etc) hai le thangruolin PLHIV (People Living with HIV) hai kuomah AAY card 222, Widow Pension Scheme 28, BPL card 103, Job Card 200, PMEGP loan 2, Widow Financial Assistance 138 pek a ni thu a hril a. Rehabilitation Centre 54 a um a, PMJJBY (Life Insurance) 37, PMFBY (accident Insurance) 39 thaw a ni a, JSSK mi 35 pek an ni a, World Vision fethelngin mi 477 kuomah thangpuina dang ­ handloom, cow, hygiene kits, tailoring, embroidery, piggery, petty shop nuritional support pek a ni thu le World Vision hnuoiah naupang kum 14 hnuoitieng mi 365 registered an ni thu a hril.

DC Office­a documents la ding hai hriet tul
CCPUR: DC/CCPur Office­a Certificates (Tribe/Income etc) la ding hai chun Aadhar Card, Voter I­Card, Indian Passport, Ration Card, Electricity Bill le Village Authority Recommendation letter pakhat tak chawi tul a ta, Certificate la ding han petition an ziek ngai bawk a tih.
    
Ms Mannuamching, IAS, i/c DC/CCPur chun, Deed Writer hai chu signature le seal namsa Certificate le documents zawr le sie ta lo dingin an hriettir. Tuhin DC Office­a chun Deed Writer 8 an um a, chuonghai chu­ Tunsei Haokip (function), Paominthang (function), Lalboi (function) Letkhanthang (function), Seikholen (not function), Chingbiakim (not function), Mangcha (not function) T. Dempao Haokip of Tuibuong (not function) le SDO/CCPur­ah Deed Writer 6: P. Kamkholal (function), Chinkhopau (function), Thawnkhandou (function), Th. Thangboi (function), David PG. Vaiphei (function) le L. Lianzahau of Simveng (function) hai an nih.

Protest rally leh bandh
CCPUR: October 6, 2015 zingkara Thingkangphai le Pangzawl khuo inkara Mr Thangliansiam (20) s/o (L) Thonsong of College Veng, New Lamka a thisaa hmu a nina le inzawma tuolthattu hai man dinga nawrnain YPA GHQ chun November 6, 2015, 6AM­6PM inkar sung hin CCPur District­ah protest rally leh Bandh thawng an tih. 10AM in Public Ground­a fekhawm an ta, hi taka inthawk DC Office chen rally neiin DC i/c kuomah memorandum peng an ta, hi zo hin Public Grounda fekhawmin public meeting ning a tih.

Tribal Martyrs ralna
CCPUR: Zanikhan mimal le organisations 5 han District Hospital, CCPur­a JPO kutah Tribal Martyrs hai ralna le thangpuina dingin Rs. 19,500 le puon 1 an pek. Ralna le thangpuina petuhai chu­ Ginzagen of Lingshiphai Rs 1000, + Puan 1; Kangpokpi Town Area Auto Association Rs 12,000, DK. Thangboi, ADC Kangpokpi Rs 5000, le JPO hmang dingin Rs 1000;  Ngurthansangi of Tribal Colony, Imphal in JPO hmang ding Rs 500/­ hai an nih. Vawisuna District Hospital­a thingpui inlumtu YMA ning an tih.


Mission Indradhanush thuah DTFI meeting
CCPUR: November 6, 2015, 11:00AM hin DC Office­a BRGF Resource Centre­ah DC/CCPur inrawinain Mission Indradhanush Phase­II (Round­I) thuah District Task Force Immunization meeting um a tih. Hi huna hin April­June & July­Sept., 2015 sunga Health  Centre haia Routine Immunization sin thawna ennawn ning a ta, Mission Indradhanush Phase­I sinthawna ennawnna, Routine Immunization hrat lema thaw dan ding, Mission Indradhanush Phase­II action plan hai hriltlang an tih. Meeting­a hin Dist. Health Society member hai le Medical Officer hai thang an tih.

Dengue positive 39
CCPUR: NVBDCP/CCPur a Dengue Cell in Dengue ringhla blood sample test dinga an lak hai laia 110 hai chu negative an ni a, Dengue positive hmu ta po 39 a nih.

Malaria Postive 5
CCPUR: District Malaria Department, CCPur chun October, 2015 thla sung khan damnaw mi 720 thisen lain an enfel a, hienghai lai hin Malaria Postive 5 an hmudawk a, an rengin Malaria PV vawng an nih.

Headline
Bihar Assembly Election Security khautak hnuoia zo a ni tah:votes 60% a tla
Exit Poll thawtu tam lemin Grand Alliance an hrat ding niin an hrillawk tawl
PATNA: Bihar Assembly Election October 12, 2015 a inthawka tan a Phase 5­ana le a tawpna tak zanita security khau taka vengna hnuoiah District 9 haia Assembly Constituencies 57­ah  inthlangna neizo a ni le inruolin Bihar Assembly Election­ 2015 chu zo a lo ni tah. Bihar Chief Electoral Officer Ajay Nayak chun, vote tla percent insangna tak chu Katihar niin votes 67.27 % a tla tiin a hril. Kishanganj ah 64.39, Araria 62 percent , Purnea 62.95, Supaul 58.6, Darbhanga 58.27 percent, Madhepura 57.84 Madhubani 55.87 le Saharsa 50.78 percent votes a tla niin a hril a, zanita Phase 5 naa vote tla zat hi 60 perent a ni a, Bihar Assembly seats 243 haia inthlangna  phase 5 haia a pumpuia vote tla zat chu 56.80% a nih. Kum 2010 a Bihar Assembly Election­a khan votes 55.44% vote a tla a nih.
    
Bihar Assembly Election zo a ni le inzawm hin Exit Polls thawtu dang dang hai chun poll an thawna result an puonglang tawl nghal a; Exit Poll result dungzui chun JDU­RJD­ Congress hai thangruolna Grand Alliance le BJP inrawi NDA chu an inhnetawk hle ding niin an lang a, sienkhawm Exit Poll thawtu tamlem chun Grand Alliance hi an hrat lem met ding niin an hrillawk tawl. Exit Poll thawtu hai laia pakhat Today’s Chanakya ruok chun BJP inrawinaa NDA in hratna an chang ding niin a hrillawk ve thung a nih.
           
Bihar Assembly Election phase 5­a neia um haia vote tla hai chu November 8, 2015 khin tiem a ni ding a nih.

Irilbung Police station mipuiin an hlukhum
IMPHAL: November 2, 2015 nia Keirao Makting UJB School Headmaster Md Hasmad alias Babu a thisaa hmu a nina le inzawma indin JAC inrawinain tuolthattu hai man le hremna pe dinga dinga nawrnain zani 9AM khan Keirao Makting mipui tam tak hai chun Irilbung Police Station an va hlukhum a; Police sentry post, signg board le gate hai an suksiet leiin mipui hnawtdarna dingin Police han tear gas an kap leiin mi 8 in hliemna an tuok. Imphal East a inthawk Police hai va fein JAC thuoitu hai inbiekpuiin mipui hai hi an control thei. Mipui chun Imphal­Yairipok road lampui an dang bawk a nih. Tuolthattu hai tuchena man an la neinaw leia  mipui hi lungsen an ni a, an thil ngen sukpuitling a ni hma chu ruong hi an lak naw ding thu JAC chun an hril bawk. Tuta hma khan hi thina thua ringhla Hasmat thenum a cheng Md. Matlif chengna in chu an lo raw raw ta bawk a nih.

UNC in Blockade an hlip
IMPHAL: United Naga Councils in Anti­Tribal Bills 3 hai dodalnaa ni 10 sung aw ding Nov 2, 2015 zana inthawk National Highways haia Economic Blockade le Natinal le International Project sinthawna hai ban a thaw tan chu sawrkarin an thil ngen bawzui pek dinga a tiem leiin zani zantieng 4PM a inthawk khan an lakdawk/hlip tah. Imphal­a hung inzin NSCN­IM le Govt. of India Interlocutor RN Ravi khawmin UNC hai chu an blockade thaw hlip dingin zani hmasaa Naga thuoituhai an hmupui huna a lo ngen ta a nih.

Manipur byelection­ah candidate 7
IMPHAL: November 21, 2015 nia Manipur­a Assembly Constituency pahni Thongju le Thangmeiband A/C haia byelection hung um dinga nomination paper file­a um hai zanikhan scrutiny nei a ni a, Candidates 7 scrutiny an fethleng.
           
Scrutiny nei zo hnunga Imphal East district­a Thongju A/C­ah candidates 4 um h ai chu chu­ Minister hlui le Congress candidate Bijoy Koijom; MLA hlui le BJP candidate Th. Bishwajit; Manipur Democratic Front candidate Gurumayum Tonsana Sharma le Independent Candidate Okram Ingo hai an nih.

Hmun tum tumah dappui an thaw
IMPHAL: November 21, 2015 a inthawk Manipur Sangai Festival hung um ding le inzawmin  zanikhan Imphal Police han Imphal West Police Commandos hai leh Kekru Villa le Kabaw Leikai, North AOC haiah dappui an thaw a, ringhla thuin pasal 60 le nuhmei 17 manin thu indawnna an nei.

Pasal thisa ruong hmu
IMPHAL: Zani 11:30AM khan Imphal East district sunga Kalika Uyok Ching ramhnuoia Pa (mushroom) zawnga fe han pasal pakhat thisa ruong an hmu. A hnungin mithi hi Sanasam Rajesh (23) a nih ti finfie a nih. Sanasam Rajesh hi Oct. 22,2015 a zingkara JNIMS­a skin treatment thaw dinga suok, chu taka inthawk in inlawi ta lova um a nih.

BSNL thawktu han pen down strike
IMPHAL:  BSNL thawktu  hai chun BSNL Manipur GM Lunkim sawnhmang dinga nawrnain zanita inthawk khan Pen Down Strike an thaw tan. BSNL thawktu hai chun thil chite leiin GM hin BSNL SDE a sawisak tia intuma sawn hmang dinga an phut a nih. A hma chun GM hi ngaidam inhni dingin an phut a, sienkhawm an hni sinaw leia pen down strike hi an thaw tan a nih.

Gadhamani thattua intum man
IMPHAL:  October 25, 2015 nia Kakching Khunou hmuna Khumukcham Gandhamani Devi tubo hmanga sut hlumtua intum Elangbam Inao @ Punyeiba (43) s/o (L) Elangbam Tombi of Hiyanglam Warok Khong chu November 4, 2015 khan Thanga, Bishenpur District –ah Waikhong Police han an man tah. Gandhamani Devi hi October 28, 2015 khan a hliemna tuorzo lovin a thi a nih. Tuolthattu hi a mi that nu le inngaizawng, an inselbuoi leia a that nia hril a nih.

Filmmakers 24 han National Awards an dawng hai an pekkir
MUMBAI: India rama sakhuo thila intheidana le chi le kuonga inthlierhranna leia buoina hung pung pei le inzawma FTII students han “Award Wapsi’ protest fepui mek thlawpnain zanikhan Filmmakers 24 han National Awards an dawng hai an pekkir. Zanita Award pekirtu h ai lai hin iconic film ‘Jaane Bhi Do Yaaron’ siemtu Kundan Shah le Saeed Mirza; writer­activist “The God of Small Things” ziektu Booker Prize winner Arundhati Roy khawm a thang.

Tuta hma kar iemanizat liemta khan writers, artistes le filmmakers 50 chuongin an Award dawng an lo pekkir ta bawk a nih. Award Wapsi campaign hi tulai h naia Uttar Pradesh­a Dadri hmuna Muslim hnama mi pasa pakhat Bawngsa fa tia intuma sawisak hlum a nina le Maharastra­a rationalist that a nia intawka hung intan a nih. Award pekirtu hai lai hin Meghalaya filmmaker Tarun Bhartiya khawm a thang.

Lal Thanzara an suizui mek
AIZAWL: Mizoram Anti Corruption Bureau chun Mizoram Health Minister hlui le Chief Minister Lal Thanhawla sangpa Lal Thanzara chunga corruption case chu an suizui mek tiin Opposition MNF legal Board Chairman J. Lalremruata Hmar chun zanikhan a hril. Lalthanzara hi Aizawl North­ III MLA a ni a, intumna um le inzawma inban, an ban leia Nov. 21, 2015­a byelection nei ding a ni a, hi taka hin Lal Thanzara chu Congress in an candidate nawk a nih. Sunshine Overseas Ltd. ah state PWD in lampui an siemnaah 21.6 percent shares a chang bakah Parliamentary secretary le state minister a chel laiin a HP Food chun Social Welfare Dept. kuomah high protein biscuits Rs. 22 crores chuong man a supply tiin an intum a nih. Aizawl North­III byelection­ah thlangtling a ni khawmin Lalthanzara chunga intumna hi MNF legal  Baord chun an sunzawm pei ding thu le HP foods neitu hi a naupa hmingin thlak sienkhawm dan hnuoia chun tlanse thei chuong naw nih tiin J. Lalremruata Hmar chun a hril.

LJP candidate in Security deposit ding a neinaw leiin file thei lo
NONGSTOIN: November 21, 2015 nia Meghalaya­a Nongstoin A/C a byelection hung um dinga LJP official candidate Brensly Ryntathiang chun nomination paper file fe a tum a, sienkhawm security deposit ding a neinaw leiin a file thei nawh. Brensly Ryntathiang hi a security deposit dinga pawisa petu ding DC Office campus lai zawngin an vel ruoi a, a hnungin DC­cum DEO S. Kharlyngdosh kuoma pawisa a va hni a, sienkhawm Election Code of conduct bawsietna a ni ding leia a pek theinaw thu a hril leia a beidawng tawpkhawkah a ruol thenkhat hai leh Shillong­a LJP leader an van hmupuiin security deposit ding sum an va hni a, sienkhawm a hlawsam nawk leia nomination file thei lo a nih. Brensly hi sin neilo, tuta hma kum 2003 khawm khan BJP ticket­a Mawthengkut A/C a lo ngir ve ta a nih.

Assam­ah Congress MLA 9 in BJP zawm an tum
GUWAHATI: Assam BJP President Siddartha Bhattacharya chun Congress MLA 9 han November 6, 2015 (Zirtawpni) khin BJP an zawm ding thu zani hmasa zan khan a puong a, Central BJP leaders hai khawmin remtina an nei ta thu a hril bawk. Congress MLA BJP zawm tum hai chu­ Bolin Chetia (Sadiya), Pradan Barua (Jonai), Pallab Lochan Das (Behali), Rajen Borthakur (Tezpur), Pijush Hazarika (Roha), Kripanath Mallah (Ratabari), Abu Taher Bepari (Golakganj), Binanda Saikia (Sipajhar) le Jayanta Mallah Barua (Nalbari) hai an ni a, September 5, 2015 khan New Delhi­ah BJP national President Amit Shah khawm an lo inhmupui ta a nih. Hieng hai laia MLA 5 hai chu Congress party a inthawka hel le BJP lo zawm tah Himanta Biswa Sarma langchang taka an thlawp leia Congress a lo suspended ta an ni a, 4 ruok chu suspended lova hrilfiena pe dinga show­cause notices pek an nih.
    
Congress MLA 9 in BJP an zawm ding lei hin Assam Assembly seats 126 umah Congress chun members 69 chau an um ta ding a nih.

J&K Police han mi 200 chuong an hrentang
JAMMU: November 7, 2015 a Prime Minister Narendra Modi Jammu and Kashmir inzin ding leiin venghimna sukkhau a ni a, Syed Ali Geelani inrawinaa Hurriyat Conference in ‘Srinagar Million March’ thaw dinga an puong le inzawmin ni 5 liemta sung khan separatist leader Nayeem Khan thangin mi 230 chuong man le hrentang an ni tah. Syed Ali Geelani le Mirwaiz Umar Farooq hai chu tuol suok thei lo dinga house arrest a sie an ni a, JKLF chief Yasin Malik chu Srinagar­a Kothibagh Police station­a hrentang a nih. PM Jammu and Kashmir an zin huna thu a hrilna ding Sher­e­Kashmir Cricket Stadium chu police le security forces han khau taka vengin an tuom sip vawng bawk a nih. Tuta tum hi Peoples Democratic Party (PDP) le BJP in thangruola March 1, 2015­a J&K­a sawrkarna an siem hnunga PM Modi an zin vawikhatna ding a nih.

Rahul Gandhi in Nov. 26 in Assam­ah campaign
NEW DELHI: Congress Vice President Rahul Gandhi chun kum thara Assam Assembly Election hung um ding le inzawmin November 26, 2015 khin Guwahati hmuna Congress party candidate hai ta dingin election campaign nei tan a tih. Rahul Gandhi hi Assam­ah ni 2 sung a cham ding a nih. Guwahati­a Rahul inzin ding le mipui hmaa thu a hrilna ding hun hai sukfel vawng a ni tah tiin Asam PCC President Anjan Dutta chun a hril.

Tripura Congress chief intang hun a suktawi
AGARTALA: Thupek bawsea a licensed Pistol mu ding neka tam a chawi kum 3 sung jail intang dinga thiemnaw inchangtir Tripura Unit Congress President Birajit Sinha Jail intang hun ding chu Supreme Court in  thla 1 sung chau intang ta dingin a suktawi. July 20, 2004 nia CPI­M cadres han Panchayat election­ah booth an capture ti report an dawng leia Sinha le a personel security officer hai Babur bazar­a va fe a, Mr Sinha in silai a hmetpuok bakah CPI­M leader pakhatin a thi phana thua suizuina fe peiah a Pistol­a a mu um zat 12 bakah pistol mu 5 a chawi sa ti hmusuok a ni leia thiemnaw inchangtira hung um a nih.

Canada Cabinet­ah Punjabi mi 3
OTTAWA: Zani hmasa khan Punjabi hnama mi Indian­Canadian pathum hai chun Canada cabinet a minister dingin sesamna an nei. Canada Cabinet a minister dinga Sikh pasal sesamna nei hai chu Harjit Sajjan (42); Navdeep Bains (38) le Amarjeet Sohi hai an nih. Sajjan hi Defence Minister ding; Bains hi Innovation, Science and Economic development minister ding le Sohi hi minister of infrastructure dinga sesamna nei an nih. Sohi hi Bus driver hlui, India rama 1980s lai khan um 2 sung zet jail lo intang ta a nih. Bains hi Ted Rogers School of Management, Ryerson University, Toronto a visiting professor; Sajjan hi police le army official, Canadian regiment lo inrawitu a ni a, Afghanistan le Bosnia ram haia khawm lo thawk tah, Afghanistan­a special adviser­a tumhni zet lo fe ta a nih a, March 2013 –a Meritorious Service Medal lo dawng ta a nih.

Suu Kyi in hratna an chang chun sawrkarna a siem ding thu a hril
YANGON: Myanmar democracy heroine Aung San Suu Kyi (70) chun, Myanmar general election November 8, 2015 a hung um dinga hin a party National League for Democracy (NLD) in hratna an chang chun sawrkarna a siem ngei ding thu a hril. Suu Kyi chun Myanmar General Election hi thienghlim le fel taka nei a ni phawt chun an party in hratna an chang ngei a beisei thu a hril.
    
Kum 1990 khan NLD hin General Election­ah hratna an lo chang ta a, sienkhawm Myanmar sipai han sawrkarna an siem phal pek tanaw a nih. NLD in an inkhingpui ding tak chu General hlui Thein Sein inrawi Union Solidarity and Development Party (USDP) an nih.
----------------------------------------------------------------------------------------
VAWISUN THUPUI
Mi khawhlo in chu nam thluk ning a ta, Mi tluong puon in ruok chu um ran a tih. Mihriem kuoma indik awm taka inlang lam chu a um a, Chu tawpna ruok chu thina lampuihai a nih.  ­
Thuvarhai 13:11-­12

Editorial
Thu zâwmna

Kristien han Pathien thu tak ei awi a, Bible­a thu inziek hai khawm ei pawm, sienkhawm a zawmna tieng ei tlasam; Pathien thu hi awi ringawt lovin zawm seng inla chu ei buoina tam tak hai hi chu pumpel thei ngei ei tih. Hiengang bawk hin nu le pa hai inchuktirna, thu tha­ hla tha hrila min chuktirna hai zawmtu thalai hai lai ei vang tiel tiel leiin ei khawtlang, insung, kohran le ram a buoi zo vawng ta a nih. Khawvela Band inlar takel Jon Bon Jovi in 90’s lai vela ‘Its My Life’ ti hla a hung sak lar kha thalai hai rilrem zawng tak hung niin, an nun nasa takin a thuoi a, inkhuokhirna ngaitheilo thalai hai lai ei hung pung pei a, ka nun a nih ‘its my life’ ti chu tulai chena thalai hai tawng changlakna a hung ni ta pei a nih.
    
‘ITS MY LIFE’ ti changchawia nu le pa thununna le zilna ngaipawimaw lova mani nuom dan le ditdan ang taka nun khaltu hai hi mi hmangtlak le hlawtling an vang khawp el. Chu nekin, ‘Its My Life’ tia an nuna midang inrawl theida le ngaithei lo em em hai hi nuhmei­pasal ei nei hnung chena khawm nu le pa hai inkhawkpui, nu le pa bova khawsa thei lo ei hung ni pei.  Nuhmei­pasal neia nau le te ei hung nei chen khawma nu le pa hmangaina le zilna hrethiem lo le harsuok nachang hre lo hai lem chu ngirhmun lungsietum takah damsung nun an hmang hlak. Sienkhawm, hmangaina tawngkam le zilna thu ngaia insiemtha hai chun nun pangngai tak an la hung hmang nawk hlak.
    
Tulai thalaihai laia hmangaina tawngkam le zilna ngaitheinawna hung zuolkai em emna san pakhat chu Human Rights, Child Rights le rights dang dang hai nasa taka hung suklar le sukhrat a hung ni lei khawm niin an lang. Hieng rights dang dang hai lei hin nu le pa hai chau ni lovin Schools le Colleges haia khawm naupang thununna kawngah hotu han harsatna namen lo an tuok ta a nih. Rights (dikna/ chanvo) dang dang hai hi ei hriet a, indik taka ei hmang chun thil tha tak a nih. Chuong laizing chun Rights ei nei le inruolin mawphurna (duty/responsibility) a um sa nghal a nih ti ruok hi chu ei hriet nawh. Ei rights ei hriet a, ei mawphurna ei hlen si naw chun ei rights ei hmangsuol tina ning a tih.
    
Jean­Jacques Rousseau in ‘The Social Contract’­a ‘Man is born free, but everywhere he is in chains’ tia a lo ziek angin; khawvel rambung tin han ram sunga inkeihruoina felfai tak a um theina dingin dan le dun zawm ding annawleh Constitution an nei seng. Mihriem a chin­a lien hin mani nuom dan le dit dana um theina zalenna dikna le chanvo chu ei nei ngei, sienkhawm  mihriem hai hi thlarau bo ramsa le rannung hai anga khuoptu le khittu Dan um lova zalen taka um dinga siem ei ni naw a, ram le khawtlang inthuoina fel tak a um theina dinga ei umna ram le khawtlang inthuoidan in a mi khit tlat hlak ang hin, nu le pa han thu­tha, hla tha an hril hai le zilna an mi pek hai hi lampui indik ei hraw theina ding mi kawkhmutu an nih ti hi thalai han ei hriet nuom a um.
    
Hla phuoktu in ‘Pa thununna ka tuor laiin lungriem mitthli’n a mi’n siltir.. ka hriet thiem ngai nawh.. ka pa hmangaina’ a lo ti angin nu le pa han thu tha hla tha hrila ei thatna dinga thununna le zilna an mi pek chang hin thalai hai ta ding chun tuor an takin hrietthiem khawm an tak hlak hrim a nih. Sienkhawm, a mi kawktu, zilna mi petu le umdan ding mi hrila min chuktirtu hai tawngkam hi hmangaina rawl a nih ti thalai han a thar taka ei hriet a, ei zawm nuom a um. Pa in nau a hmangai chu a vuok hlak ti Bible a khawm ei hmu a, ei inzilna, ei inchuktirna hai hi theidana le hmupeinaw lei ni lo, hmangaina rawl a nih ti thalai han ei hriet nuom a um bawk.
    
Nunghak hmeltha le piengnal tam tak, nu inzaum tak ni thei ding first class a inthawk third class a tlalut tam tak ei society­ah hmu ding an um a, chuongang bawkin tlangval hmeltha, piengnal le lekhathiem tak tak, ngirhmun insang le inzaum tak ni thei dinghai, nu le pa inchuktirna le zilna zawm lova mani nuom dana nun hmang leia hnawmkar tin zuia nun hmang tam tak hmu ding ei um bawk. Hang sui chet chet inla, nu le pa inchuktirna le zilna pawma tha taka zawmtu hai ruok chu mi hlawtling le intodel el chau ni lovin, insung, khawtlang le ram le hnam dawmsanga chawimawitu an hung ni zat zat a nih. Nunghak hmeltha tak tak, society a first class nuhmei ni thei ding third class a tla thla ta hai hi ei hang sui chet chet chun, a tlangpuiin ‘Its my life’ ti hmang inrimtu an ni zat zat. Hi lei hin thuawi le thuzawmna tlaksam hi a pawi em em a, ei ngirhmun ding indik tak tlung thei lova misiemtu a nih ti hi ei hriet nuom a um.
           
Nu le pa hai an hringnuna thil tam tak lo tawng (experienced) ta an ni leiin eini thalai hai nek chun an mit a lo varin ei hmakhuo ding hi an hmu chieng em em; khawvel thiemna le technology tienga chun anni nekin ei thiemna le hrietna a lo insang vieu khawm a ni thei, hringnun lamtluong hrawna kawnga ruok hin chu ei ni neka ‘master’ an nih ti hi theinghil ngai nawng ei tiu. Chun, Nu le pa hai hin ei hmatieng thil ding ngaituona leia an pei le peinaw khawm hril loa, an mi hmangaina leia ei thatna dinga thu tha le hla tha an mi hril tawk tawk hlak a nih ti hi theinghil ngai bawk nawng ei tiu. Thuawi le thuzawm hi a tha, malsawmna a ni bawk.
Don't Miss
© all rights reserved
made with by Simon L Infimate