Hmasawnna Thar | 22 October, 2015

Tuolsung

Hrillawkna  lova silai kap a ni thuah 7-AR CO  Aditya Verma in ngaidam an hni

CCPur: Tribal movement hrat taka a fe lai mek le boruok so veng vung laia Hindu han Durga Puja an hmang mek le inzawma October 20, 2015 zan sawt hnunga HQ veng­a um 7­Assam Rifles han silai an kappuok leia mipui nasa taka an suk thlabar bakah  Pearsonmun­a Mr Khumkhenmang hai riekna room inchung rangva silaimu in a deng pawpna thuah  Mr Langkhanpau Guite, Chairman, ADCC chun 27­Sector AR a  Brigadier inhmupuiin complaint a peklut a. Hi le inzawm hin Aditya Verma  CO, 7­AR chun ngaidam an hni a, sienkhawm Mr Guite chun silaimu in a deng fuk In neitu hai kuoma ngaidam inhni dinga a ti leiin zani zantieng khan  ADCC Chairman inrawinain Personmun a Khumkhenmang  chengna inah fein 7­AR CO pa hin  ngaidam an hni. Hi huna hin T. Khaikhomang, Chairman, Finance Sub Committee; ADCC/ CT Lian Guite, MDC  hai khawmin an uop.

ADC  Chairman chun  Durga Puja hmang huna silai an kap ding chun mipui inhriettir hmasa  ta hlak dingin Army hai chu ngenin, law & order \hatnaw leiin  security han silai an kap puok huna mipui an \ithawng hlak  thu hai a hril.  CO 7­AR  Aditya  Verma chun  an thil  thawsuol pawmin silai kap puok tuhai zawngdawk an ni  ding thu le hiengang thil a tlung nawk ta ngainaw ding thu a hril.

ZRO  Hqrts in thusuok an siem

CCPur: Zomi Re­Unification (ZRO) Hqrts, Ciimnuai­ a Co­Ordinator/Secretary GAD    chun Manipur Assembly in Aug. 31, 2015 nia tlangram tawkpawi ding  Bills 3 a passed  le inzawma tulaia political movement thuah mipui hriet dingin October 21, 2015 khan  thusuok  a siem.

    
Bills 3 hai chungthu   buoipuia hma latu dingin Zomi Council, Kuki Innpi, Hmar Inpui,  Mizo Peoples Convention, Joint Philanthropic Organisation le Student Bodies hai hrietpuinain JAC indin a ni a,  hi JAC  hmalakna lawmum tiin an thlawp thu;  Bill 3 hai bakah Manipur tlangrama  roinrelna hran (Separate Administration) thuah UPF le KNO  chun  Central Government ah theitawpin a nawr mek a, ra \ha tak an suo ngei beisei a nih tiin thusuok chun a hril.

           
Hieng bill 3 hai le Separate Administration hai inthuruol taka ei buoipui laia Zomi sung le Tribal inpumkhatna sukse thei ding thil thawa invir hai an dem thu puongin an thilthaw  tawpsan dingin an hriettir a, tawpsan lova hma an lak zawm pei chun amaw annin phur an tih tiin thusuok chun a hril.

Police Commemoradion Day

CCPur: India ram pumpuia Police Commemoration Day hmang a ni ang bawkin zani zingkar 8:00AM khan SP, CCPur inrawinain CCPur Police station­a khawm  Police Commemoration Day hmang a nih. Hi huna hin September 1, 2014 a inthawk August 31, 2015 inkar sunga Ministry of Home Affairs hnuoia security personnels thi mi 437 hai  inzana salute pek le par inhlanna nei a nih.

Vawisun a la hungtlung hman naw ding

CCPur: Rev. Dr  Rochunga Pudaite ruong chu  US a inthawk India ram tieng hung vuongpui a ni ta a, October 21, 2014  zan dar 9:30 vel khan Delhi a hungtlung hman beisei a ni a,  Delhi Hmar Welfare Association in  a ruong hi lo tuok an tih. Govt. Protocol thil leia thil dang dang buoipui ding a la um leiin Oct. 22, 2015 khin Imphal a hung tlung hman naw ding a ni a, beisei dana chun October 23, 2015 khin  a hungtlung hman beisei le, chu dinga ticket khawm lak nawk phawt a nih tiin Secretary, Rev. Dr Rochunga Pudaite  Funeral Committee a inthawk ei thu dawngna chun a hril.

Tribal Martyrs hai bufai le chini an pek

CCPur: YPA Lamphel Unit chun zanikhan YPA GHQ fethlengin\ YPA GHQ Hall­ah Tribal martyrs sungkuo 9 hai kuomah Bufai bag 1 seng le Chini kg. 5 seng an pek.  Chun, YPA GHQ khawmin martyrs family hai hi Dal  kg. 5 seng, Everyday (bawngnene) kg 1 seng le thingpuife packet 1 seng an pek a, hi zo hin  District Hospital­a JPO kuoma Chini kg. 100 an pek bawk.

Tribal martyrs ralna

CCPur: Zanikhan JAC hnuoia Finance Sub­Committee kutah khuo 6 han in tina Rs. 100/­ ralna sum an dawl hai Rs. Rs.1,22,800/­ an peklut. Zanita ralna sum petu hai chu­ Chin Baptist Assn. Imphal  Rs.1,200/­; Young Mizo Assn. Imphal Rs.13,850/­; Thangluaia, President YAM Imphal  Rs.1,000/­; Young Vaiphei Assn. Imphal Jt Hq Rs.55,450/­; Paite Tribe Council/Young Paite Assn. Imphal block   Rs.49,500/­ le Saikot block a M.Saljang Rs.1.800/­  a nih.

    
Chun, District Hospital­a JPO kutah zanikhan mimal le organisation 16 han ralna Rs. 4,40,921/­, Puon 18, Maibal pum 14 le Chini kg. 100 an pek.  A petu hai chu­ N.Tualkhanzam & Family, Vengnuam, New Lamka, maibal  2; Thangkhal Youth Orgn. maibal 12; Behiangjang ZPCS Rs.5000/­; Lungthul T   Rs.9000/­; K.Athuipao­Dimjankhong, Loktak Project   Rs.200/; Kuki Welfare Assn. Guwahati   Rs.18,000/­; Jorhat Eimi Kiloikhawm   Rs.21300/­; Manipur Tribal Forum, Mumbai Rs.330751/­; Thangzamuan Hauzel of Bombay (RBI Imphal) Rs.9000/­; ZYA Banglalore Region Rs.5000/­; Manipur Tribal Union, Bangalore Puon  9; Myanmar Christian Church, Tulsa, USA in Dr Khamkhankhai Tombing fethlengin  Rs.38700/­; Church of Nazarene Internation, NE India Dist.  Rs.3270/­; E.Thonkhansiam of Singngat  Rs.500/­; YVA Imphal Jt HQ  puon  9; T.Joseph of Langol, Imphal Rs.100/­ YPA Lamphel Unit   chini   kg 100  a nih.

YVA Imphal JHQ in martyrs hai ralna

CCPur: Young Vaiphei  Assn. Imphal Jt. HQ  inrawinain YVA members \hahnemtawk tak chun zanikhan 4­wheeler le 2 wheeler  50 vel hmangin Imphal­a inthawk  CCPur hunin zani zantieng 1:30PM khan District Hosital­a JPO \huoitu hai inhmupuiin tribal martyrs 9 hai ralna an pek. YVA Imphal Jt. HQ chun Imphal­a hliem enkawl hai an thei ang anga an lo bawisawm  thu le Tribal martys hai thina an sunzie inentirna hung an ni thu an hril a, JAC finance  Sub­Committe kutah Rs. 55,450/­ an inhlan. 

HSA GHQ in poster a siem

CCPur: HSA GHQ  chun  Rev. Dr  Rochunga Pudaite ruong Churachandpur khawpui hung phurlut huna a tuoka fe ding motor 4 wheeler le 2 wheeler  haia tar ding  Poster a siem a. Poster hi  Information  Centre, Sielmat Christian Hospital­ah a fe ding taphawtin laka mani motor chita tar dingin HSA  GHQ chun inhriettirna a siem.

Mannuamching IAS conferred lawmpuina

CCPur:  KIC inrawinain KKL, Kuki  Women Union, Kuki Women Organisation for Human Rights chun zani 8:00AM khan Zomi Colony­ah Ms Mannuamching in IAS a hmu (conferred) lawmpuina an nei a, Upa  Dempao in Pathien kuoma \awng\aipekna a nei a, KIC le KKL han  Saipikhup  puon 1 ve ve , KWU le  KWOHR  han  Khamtang puon an pek.

Headline

Parliament Winter Session  November 20 a inthawk \an a ni el thei

CCPA in Session nei hun ding Oct. 26 in an rel ding

New Delhi: Parliament Winter Session nei hun ding sukchieng la ninaw sien khawm November 20, 2015 a inthawk khin thla khat sung aw dingin \an a ni el thei tiin ei thu dawngna chun a hril. Zanita Mr Rajnat Singh inrawina hnuoia CCPA  meeting chun  October 26, 2015 nia CCPA meeting neia, chu huna Parliament Session nei hun ding  sukfel dingin an rel.

    
Zanita  CCPA meeting huna hin November 19 Constitution Day a hmang ding le nikhat sung aw Constitution thua debate nei ding le Rajya Sabha­a pending bills 53 um hai chungthu khawm an hriltlang. Parliament Monsoon session nuhung taka khan  Lok  Sabha chun bills 8 an passed a, 5 dang hai chu parliamentary committees dang dangah pending in a um mek bakah GST bill pending­a um khawm tuta session hin passed beisei a nih tiin ei thu dawngna chun a hril. Hi meeting­a hin Parliamentary Affairs Minister Venkaiah Naidu, Finance Minister Arun Jaitley le Law Minister Sadanand Gowda hai khawm an \hang. BJP inrawinaa Centre­a NDA sawrkar hi Rajya Sabha­ah minority an ni leiin bill/Acts passed na kawnga harsatna an tuok  bawk a nih.

    
Session nuhnung taka khan External Affairs Minister  Sushma  Swaraj le Rajasthan Chief Minister  Vasundhara  Raje   hai chu Congress in IPL chief Lalit Modi  UK an zinna dinga documents laknaa an \hangpui tia intuma inban dinga  ngen naa nasa taka risie an siem leiin rorel thei mumal lovin a lo um ta  bakah multi­crore Vyapam Scam thuah Madhya Pradesh CM  Shivraj Singh Chauhan ban dingin Congress chun Parliament­ah nasa taka phutin an lo khekpui a nih.

MLA chengnain bulah bomb a puok

Imphal: Zani zingkar 12:45AM vel khan Kiyamngei hmuna Keirao A/C  MLA Karam Thamarjit Singh chengnain gate sentry post bul lai bomb a puok a, sienkhawm thi le hiemna tuok an um naw a,  sentry post fencing ruok chu a suksiet nuol.  Bomb  puok huna hin MLA pa khawm a ina hin a um a, bomb puok lei hin sentry duty khawmin silai vawi iemanizat a hmetpuok niin ei thu dawngna chun a hril. Thamarjit hi  Manipur State  Congress Party (MSCP) ticket­a MLA dinga thlangtling, tuta Congress party zawm  ta a nih. Bomb puok hi IED niin Police chun an hril a,  case an registered.

KCP worker  pakhat man

Imphal:  22­Assam Rifles chun October 20, 2015 khan Thoubal Police commando hai le \hangruola  Waikhong Bazar­a dappui an thawnaah KCP (MC) overground worker (OGW) Y.Homen Kumar (40) s/o Y. Pishak of Langmeidong, Thougbal district an man a, Waikhong Police kutah an peklut.

Sholarship exam hun sawn

Imphal:  Class V le Class  VIII inchuklai hai ta dingain State Competitive  Scholarship exam 2014­15 nei hun ding chu November 15, 2015 a dingin Directorate of Education (S) in a sawn hla.

Brown sugar  leh mi pakhat man

Imphal:  October 20, 2015 khan 24­Assam  Rifles han  NH­102­a Khudengthabi hmuna motor inlawn hai sukchawla an dapnaah Maruti Van MN­02A 1952 sunga inthawk   Brown Sugar 61ms, Rs. 24,40,000 manhu an dapdawk a, a neitu Jangkhothang  Guite (33) s/o Mr Thongkhongam Guite of Zalenphai part­3,  Moreh Ward No. 2, Chandel District leh an man. An thil man hai hi Narcotic Control  Bureau, Imphal kutah an peklut niin zanita PRO Assam  Rifles thusuok chun a hril.

TNL in Congress MLA 2 an ensan

Ukhrul:  Tangkhul Naga Long (TNL) chun,  August 31, 2015 nia Assembly in ‘anti­tribal bills’ pathum an passed huna an dodal nawh tiin  Ukhrul A/C­a NPF MLA Samuel Risom chu inbanna a pek le pek naw ni  15 sunga a fiena pe dingin  hun  an pek bakah Congress MLA pahni Phungyar A/C MLA  Victor Keishing le Chingngai A/C MLA  Preshow  Shimray hai chu ensan (ex­communicate)  dingin an puong.  Samuel Risom khawm hin ni 15 sunga an banna a sukchieng naw chun hiengang bawka ensan ning a tih tiin  TNL President  Weapon Zimik chun a hril. Preshow  hi  Manipur Assembly­a Dy. Speaker  le Victor hi Parliamentary Secretary (TD&IT) a nih.

Mizoram VC election hun ding la hriet lo

Aizawl: Mizoram Village Councils election nei thei lova um haia election nei  hun ding State Election Commission in a la ruot naw leiin election nei hun ding hriet a la ni nawh tiin Local Administration minister PC Lalthanliana chun zanikhan Mizoram Assembly an hriettir. Law & order  ngirhmun \hatnaw leia villages councils 32 haia inthlangna hi nei thei lova um a nih. Village council election nei thei lova a umna hmun hai chu  Aizawl district sungah khuo 25, Kolasib distict sunga khuo 6 le Champhai district snga khuo 1 hai an nih.

            
Chun, Mizoram Assembly chun zanikhan  kum 2015­15 sunga Sinlung Hills Development Council (SHDC) sum hmang dingin Rs. 187.10 lakh an pasi. Hi laia Rs. 115 lakh chu minor work le Rs. 42.11 lakh chu staff salary dinga sie a nih.

CYMA  thupui dingin Ram le hnam humhal

Aizawl: Central Young Mizo Association (CYMA) General  Conference a vawi 70­na chu Bairabi hmuna  nei mek a ni a, zanikhan kum 2015­16 sunga an budget dingin  Rs. 96,32,400/­ an pawm bakah kum 2015-­15 kum thupuiah ‘Ram le Hnam Humhal’ ni dingin an rel bawk.

Meghalaya­ah Army  vuongna tuoksiet a tuok

Shillong: Zanikhan Meghalaya­a Upper Shillong hmuna Indian  Air  Force (IAF)  Advance Landing  ground­a inthawka vuongsuok army aviation corps a microlight aircraft  chu  IAF Hqrts,   Eastern  Air  Command  bul lai a tla thla a, a sunga chuong army official pahni an hliem. Vuongna hi Meghalaya Veterninary farm laia tla thla a nih. Tuoksiet a tuok nasan hriet a la ninaw a, suizui dinga order insuo a nih.

Delhi­ah NE mi hai ta dingin Hostel 3

New Delhi: Union Minister of Development of North Eastern Region (DoNER) Jitendra Singh chun India hmarsak biel (North East) student hai umna dingin JNU a hostel bawl lai mek \hangin Delhi­ah Hostel 3 bawl a ni ding thu zani hmasaa JNU campus a va sir huna a hril. JNU a hostel hi sawtnawte hnunga hawng theia a um ta beisei a ni a, hostel dang pahni hai chu  Ramanujan College le Hindu College of Delhi University campus  haia bawl ni el theia hril a nih. Jasola hmuna North  East Working Women’s Hostel khawm siem\hat le sukchangkang a  ni ding thu DoNER Minister chun a hril bawk.

UP in Amitabh  hai sungkuo pension 

Lucknow:  Uttar Pradesh cabinet meeting chun  a state­a chawimawina insang tak ‘Yash Bharti Samman’ dawngtu hai kuomah thlatina pension sum pek dingin a rel dungzuiin  Bollywood actor Amitabh Bachchan, a nuhmei Jaya Bachchan le an naupa Abhishek Bachchan hai chun hi chawimawina  hi an lo dawng vawng ta leiin Samajwadi Party (SP) in Uttar Pradesh state­a sawrkarna an siem hun haiah an damsung thlatin pension Rs. 50,000/­ an hmu ding a nih. Amiruokchu, SP in sawrkarna an siem naw huna chun hi thil hi suktawp ning a ta, sawrkar an siem nawk hunah an pek nawk pei ding a nih.

FIFA election Feb., 2016­ah

Zurich:  FIFA  Executive Committee chun Sepp Blatter thlaktu ding Fifa President election chu  February 26, 2016 a nei  a ni ding thu zanikhan puong nawn nawk. Blatter (79) hin kum 1998 a inthawka kha FIFA President sin hi a lo chel ta a nih. FIFA president inchu ding hin Prince Ali bin al Hussein,  Trinidad and Tobago captain hlui David Beckham hai  bakah Switzerland defender hlui Ramon Vega le AFC president Shaikh Salman bin Ebrahim al Khalifa hai hming an lang.

----------------------------------------------------------------------------------------

VAWISUN THUPUI

Lalpa ni ropuitak chu a hnai tah a, Lalpa ni rawlri ngei chu a hnai tah a, a tlung \ep a nih; chu huna chun mi thilthawthei­tak chu rinumtitakin a khek a nih.  ­Zephania 1:14

Harsatna

Khawvel mihriem hai hin a tlangpuiin ei hriselna \hat hun  lai, ei nitin sin tluong taka ei thaw thei lai le fak le dawn tlasam lova ei um lai chun harsatana le beidawngna hai hi tuok dinga ngaituona ei nei ngai meu naw a,  chuongang bawkin mi \hangpuina mamaw ding khawmin ei inring phak ngai nawh. Tukhawma ei chunga tlung dinga ei ditnaw lai zingin  mihriem nunphunga kawp tlat, ei dehawn thei  der lo chu a ni tlat si! Hi lei hin  pasie, rethei, hausa le ienganga milien­milal  khawm ni inla harsatna  neilo tukhawm ei um naw a, ei harsatna tuok dan an ang naw ti thu chau a nih. Inhawi  tak le harsatna  le beidawngna hrim hrim neilo   dinga ei ring hai dam hi ei hang belcheng chun harsatna tiemsenglo tuoka  hringnun rinum taka hmang dam an lo ni hlak. Ei ngirhmun le ei nina izirin ei harsatna le beidangna hai ruok chu an dang hle thei. Nau le te enkawlna, fak  le dawn zawngna kawnga, sin zawngna kawnga, lekha inchukna, insung enkawlna kawnga, tarpi­tarpu le mo chunga harsatna le harsatna dang dang tam tak hril seng ruollo mihriem hai hin ei tuok hlak. |henkhat ta dinga  insiem\hatna, intatngeina le tuorselna intluntu a ni thei laiin \henkhat  ta ding ruok chun  thodawk nawk thei ta lo ding khawpa sietna intluntu an chang thei thung.

    
Khawvela mi ropui  tam tak hai hringnun ei en chun, harsatna le beidawngna tuok der lo chu an ni bik nawh. Sienkhawm chuong ringumna le harsatna po po an paltlang hnunga  hung ngir dawk  an ni hlak. Khawvela mi ropui le inzaum tam tak  ei hmu hai hi hnebanna vawi tam tak lo tuok tah, tuorna, inhmangna, hmusitna, hnengdena, le harsatna tam tak lo hmelhrie a  lo paltlang tah, chuong harsatna le beidawngna tam tak nerthlenga hung ngirsuok nawk hai an ni hlak.   Hiengang harsatna  le beidawngna tam tak paltlanga hung parsuok hai hi an ra khawm a thlum bik hlak. A san iengdang lei  a ninaw a, an thil lo tuok ta hai leiin mi ngirhmun le harsatna haia hrietthiemna an nei lien a, misie le riengvai hai ta dinga  hadamna intluntu an ni hlak lei a nih. Mi hausa seng seng, mi ropui seng seng  khawm,  harsatnain a chawilien lo  hai chun mi hrietthiemna an tlasam tlangpui, a bik takin  rethei le riengvai hai ta ding chun inhnemna tlak an ni ngai nawh.

    
Hi lei hin harsatna hi mihriem  hringnuna dingin ditum naw hle sienkhawm siemtu Pathienin  a nau hai tuok dingin a phal ni dingin ring a um;  mi ngirhmun le harsatna hrietthiemna  ei nei theina ding dam, mi hai hmangaina ei nei theina ding dam;  chuong ninaw sien chu  Pathien hin a nauhai tuok dingin a phal ring a um nawh. Mihriem   chun duthu samin  remruotna  tam tak ei siem hlak. Amiruokchu ei duthusam angin thil a tlung vawng thei  ngainaw a, ei beisei naw tieng daiah harsatna, hlawsamna annawleh  hriselnawna le thil dang dangin a mi hung chimbuoi a, hun tam takah ei budget a hung buoi pha hlak a,  chu hnunga  sung­le­kuo le ruol\ha hai chunga ei beiseina po po a hang bo pha meu lem chun beidawnga indawm kun tlawk tlawk chang ei nei hlak. Harsatna le beidawngna hai hi Pathienin ei tuor a phal leia a lo siem a ni mieu si leiin  tuor thiem dan inchuk el naw chu  ei thaw thei a um nawh.

            
Hiengang harsatna le beidawngna tawpkhawk ei tuok huna hin mi \henkhat chun  bel ding tak Pathien  bel lovin   suola ei  lut rawp hlak a, ei  harsatna le beidawngna chun inkieng  nekin  ‘phaivang bu huot dar’ an hril angin harsatna tamlem a hung intlun a, thodawk nawk thei ta lo ding khawpin  ei tluse hlak a nih. Hla siemtu’n, ‘ka umdan le ka chan ka thu an nawh, iengkim chunga thuneitu chun a nuom dan in a rel a nih’ a lo ti angin   harsatna le beidawngna  dit le tuok nuom ei um nawh. Sienkhawm, Pathienin ei chan ding le ei tuok dinga a ruot leia ei tuok a nih tia  hrietthiemna nei hai chu an thodawk nawk ngei hlak a;  chu hrietthiemna nei lo hai ruok chu an tlu sawng hlak a nih. Mihriem  chun ei um dan ding le ei thilthaw ding hai ei lo ruot   hlak a, sienkhawm a sukpuitling theitu chu Pathien chau a nih ti hi ei pawm thei a ni phawt chun harsatna le beidawngna hai hneban ding ei ni nawh.