Tuolsung
Tum khata tuitla mi 3 sansuoktu, Master John Lalditsak Hmar
National Child Bravery Award dawng tlak a nih
-LRS Puruolte
CCPUR: Lo inhnu deu tah sienkhawm, Oct. 12, 2015 2:00PM vel khan Churachandpur P/S a inthawka 3/4 KM vela hlaa um Tuithapui Vadung, Saikot Vengthlang kai lai Master John Lalditsak chun tuia tla ding mi pathum zet a ruolin a sansuok.
Chanchin ei hriet le inruolin ei bawzui a, Nupui pahni le naupang pakhat Mrs. Lalremkung (60) W/o Mr. Lalropui of Saikot, Mrs. Tingneihoi @Hoinu (35) W/o Mr. Ramchuoilo of Neihsial Veng/Saikot le Master Lalramthar (12) S/o Mr. Ramchuoilo of Neihsial Veng/Saikot hai chu Tuithapui Vadungah Chengkawl zawngin an fe a, vadung paltan tumin Mrs. Lalremkung hin a tupa Master Lalramthar (12) chu a ruongzangah a puok a, chun Mrs. Tingneihoi @Hoinu chu Mrs. Lalremkung hin a chel bawk a, tuta hma chun an paltan tumna hi kawng chen chauh a inthuk a lo ni hlak a. Hrietnawkarin vadung tuilienin a lo suk danglam tak leiin chu lai hmun tak chu ni dang nekin a lo inthuk a, paltan el thei ta loin an um a, vadunga tui khawm chu a lo hrat bawk leiin an Pathum chun tui hrat chun fenin, mangang thlak taka inham buoiin an pil zawmtawlta nghal a. Chu phing chun vadung panga ngakuoi kama lo inthung Master John Lalditsak Hmar (13) S/o Mr. Edwin Lalrosiem Hmar Saikot Vengthlang chun a taksa silfen hai hlip sawk sawkin vadung a chun an chawmlut a, anni tieng pana inhlieuin Mrs. Lalremkung (60) a zakuo ah manin vapang tieng pan puiin an pathum chun inhlieu kai puiin a sansuok ta vawng.
Hi chauh khawm hi niloin tuta hma khawm khan Master John Lalditsak Hmar hin kum 11 mi a ni lai, a naupang chanpui kum 8 mi Tuithapui vadunga tuitla a lo sansuok ta bawk. Tuitla sansuoktu hi mi tamtak an lo um ta hlak a, tumkhat thil thuah mi Pathum sansuok ruok hi chu hriet ding a la tam naw hle. Naupang kum 13 mi Master John Lalditsak Hmar ang hi chu vang khatte ning an tih. Chuleiin, ama hi mihai hringna sanhimna dinga a huoisenna, a’n pumpekna, ama hringna ngei khawm mihai tadinga inhlan ngam le a tlawmngaina lei hin inpak le chawimawi a phu tak zet a, Chawimawina khawtlang le “National Child Bravery Award” chen khawm dawng tlak a nih.
Tuhin ama hi Class VI, ICI Standard English Medium School, Saikot, CCPur ah a’nchûk mek. A piengna Pa in ei indawnna a dawnna a chun a naupa John hi a chintea inthawka hi lai vadunga cheng thang le tui thiem tak el a ni thu a hril. Hi thiltlung hlim hin tuitla hai hin inzakum thila an lo lak leiin an chanchin hi mi an lo hril vat naw a, a khawhnungah ei hung hriet tah a nih. John Lalditsak Hmar (13) hin “Ka Pi Remkung in John ti’n a mi hung ko ka hrieta ka zuk en leh an pil bawr bawr ka hmu a, thil dang iengkhawm ka ngaituo hman nawh, an tla a nih ti ka hriet leiin kan chawm lut nghal el a nih,” tiin a hril. Oct. 12, 2015, Tuitla hai a sansuok ni zan lala khan a san suokhai hi an in ah va leng nghalin an lawmthu hai an va hril a, ama ngei khawm Bu fa dingin an ko a, sienkhawm ka’n zak a ti leiin a fe nuom naw a nih.
WPF inrawinain tawngtairuolna nei
CCPur: Zani 7AM12:00Noon inkar sung khan Women Prayer Fellowship (WPF), CCPur inrawinain Public Ground, CCPurah ram le hnam ta dinga bungheia tawngtairuolna nei a nih. Hi hun sung hin Rev S. Vung Minthang, Gen Secy, EBC; Pastor Lalropuia, Presbyterian, Saikot Area; Evan Lhunkhosei, Missionary Promoter, EAC le Pastor Lalpienglawm, Evangelist at large, AG han thuhrilna neiin tawngtaina an inrawi a, Pastor T.Remthang, Lamka ICI in mani fak ai chawikhawm hai Pathien kuoma inhlanna le hun khar tawngtaina a nei.
ATSUM le JAC team a mi 5 an hungtlung
CCPur: Tribal movement fe mek le inzawma Central thuoitu hai inhmupui dinga October 7, 2015 nia Delhi pana inzinsuok ATSUM le JAC thuoitu laia mi 5 hai chu zanikhan an hungtlung a, October 21, 2015, 11:00AM khin JAC Camp, KKL Complexah mi 5 hai hin report peng an tih.Tuhin JAC Chief Convenor H. Mangchinkhup inrawinain ATSUM President Muan Tawmbing hai inrawinain iemanizat Delhiah an la cham. Zanita Manipur hungtlung hai chu Joseph R Hmar, Co Convenor, ATSUM; JAC –a inthawk K. Vallallian Vaiphei, Finance Secy; Richard Hmar, Transport i/c; Lalkhohao Chongloi, Convenor Secy le T. Lalkhohao Haokip, Treasurer hai an nih.
Rev. Dr Pudaite ralna Rs. 12,720/ hmu tah; Oct. 22, 2015 in a ruong a hungtlung beisei
CCPur: Rev. Dr Rochunga Pudaite Funeral Committee Secretary Rev. Jessai L. Neithama inthawk report ei hmu danin Dr Pudaite ruong chu lekha sukfel zo lo a um leiin saprama inthawk inthawk an hung suok hun ding sukchieng thei a la ninaw a, tum anga saprama inthawk an hung vuongsuok thei a ni chun October 21, 2015 (Wednesday) 9:30PM in Delhi hung tlungpui ning a ta, Delhi a inthawk October 22, 2015, 5:30AM in hung suok an ta, 9:30AM in Imphal an hungtlung ding ti a nih. USA to Imphal (via DeIhi) flight itinerary hi TENTATIVE chau a la nih tiin a hril.
Hieng laizing hin Condolence registrationcumInformation centrea inthawk report ei hmu danin ralna Rs. 12,720/, tuomna puon 49, Memento 3, Belpui 1, condolence message 16, vuina programme a hun bik hmang nuom 37 an tling tah. Mimal le pawl condolence message pe nuom hai ta dingin Oct. 21, 2015, 8AM4:30PM chenin information Centre, Sielmat Hospitala zieka peklut thei a la nih.
Martyrs ralna sum a la lut zing
CCPur: District Hospitalah zanikhan Tribal martyrs hai ralna dingin mimal le organisation 4 han JPO kutah ralna Rs. 11,350/ le Maibal 21 an pek. Zanita ralna le thangpuina petuhai chu D.Vungthang of Pearsonmun maibal 12; Mahendar Kumar Sharma Rs.2, 100/ le maibal 9; ECA Church, Tuilumjang Rs.1000/; PTC Vaingai Block Rs.8, 250/ a nih. Oct 21 nia Dist. Hospitala thingpui inlumtu ding hai chu Thangkhal Youth Organisation ning an tih.
Chun, JAC hnuoia Finance SubCommittee kutah khuo 3 han tribal martyrs hai ralna dinga in tina Rs. 100/ an dawl hai an peklut. Zanita ralna sum petu khuo hai chu Henglep blocka Naupanglon Rs.1,000/; Sanglel Rs.1,000/ le Manipur Tribal Students’Assn. Kolkota Rs.30,000/ a nih.
Dengue positive 19, blood sample lak zing
CCPur: CCPur khawpui sunga tuchena Dengue positive hmu le sukchienga um chu 19 an tling tah. Chun thisen test huna negative 41 hai laia test thar ding 10 an um bawk. Zani khawm khan Malaria Clinicah Dengue ringhla mi 12 hai thisen enfel dinga lak a ni a, zanikhan blood sample 12 Imphala thawnsuk a nih.
Lawmthu an thil
CCPur: Kuki Students Organisation (KSO), CCPur chun JAC against Khadangband Killing in darkar 48 hill distrct bandh an thaw thlawptu hai, a bik takin ZSF, HSA, Zomi Mother Association le Kuki Women Union hai chunga lawmthu an hril. Hi chungthua nuorna dang dang thaw a la ninaw el thei a, chuong hun haia khawm JAC thlawp dingin mipui an ngen.
JAC website hawng a nih
CCPur: JAC Camp, KKL Complexah zani 3:30PM khan Mangcha Thangzom, President, Group YMA (JPO) chun JAC Website: www.tribalunity.in a hawng a, Rev. Dr Lalhmuoklien, Executive Secy. EAC & Chairman, CCPur District Christian Goodwill Council in Pathien kuoma tawngtainain an hlan. Website hi JACa Inf. & Pubicity chun, website siemna dinga JAC in Rs. 10,000/ a sanction laia Rs. 3715 seng siem a ni thu an hril a. Website thiltum chu Tribal Unity hrat lema a fe theina ding, JAC sinthawna hai mipui hriet dinga puongdarna ding, Press Release le thil dang dang inthawndarna ding a nih tiin an hril.
Dalit in raw, naupang 2 a kang hlum, an nu le pa hai a kang hliem:
HM in Dalit hai venghim dingin Haryana CM an hriettir
Faridabad: October 19, 2015 zan sawt hnung khan New Delhia inthawk Km. 40 ve hla Faridabad, Haryana hmuna Dalit sungkuo in pakhat raw a ni a, naupang pahni a kang hlum bakah an nu le pa hai meiin a kang hliem. Hieng naupang hai pa Jitender chun, ni tlawmte liemta khan Thakur hnama mi hai leh an inselbuoi thu a hril a, zingkar 2AM vel khan imu inhnik taka an in laiin tukver a inthawk petrol an hung buoka, Petrol rim ka hriet leiin ka nuhmei ka keitho a, sienkhawm hi huna hin kan in hi an raw der ta a nih tiin a hril.
A nuhmei Rekha chu a taksa 70% vel meiin a kang hliem leiin Hospitala enkawl mek a ni a, Jitendra khawm hi a sung hai sanhim a tumnaah meiin a kang hliem met. Meiin a kang hlum naupanghai chu Vaibhav (10) le thla 11 chaua upa Divya hai an nih.
Hi thil tlungna hmun hi hnam insang Thakur hai chengna deu a ni a, Dalit mi chu tlawmte chau an um a nih. Hi thil tlung lei hin boruok a rik hle a, Union Home Minister Rajnath Singh chun hi thil tlung hi a ngaimaw hle thu hrilin Haryana CM Manohar Lal Khattar telephonea biein Dalit mi hai venghim dingin an hriettir bakah hi thil tlung thua report pe dingin state sawrkar an hriettir.
Haryana CM chun thina tuok sungkuo hai zangnadawmna Rs. 10 lakh pek dingin a puong a, hi thil tlung le inzawm hin mi 3 man an ni ta a, venghimna sin thawtu dingin police tamlem tirlut an nih tiin a hril.Police 7 an sina inthawk suspended an ni ta bawk
October 5, 2014 khan hi thil tlungna khuoa hin mi 3 that an ni a, mi 3 hai hi Dalit sunguo hai that niin an intum niin ei thu dawngna chun a hril.
UNC in darkar 48 Hill districts bandh
Imphal/Senapati: Manipur Assembly in August 31, 2015 nia Anti Tribal Bills an passed dodalnain United Naga Council (UNC) chun October 22, 2015 zanrila inthawk darkar 48 aw dingin Tribal hill district po poah bandh an thaw ding thu zanikhan an puong. Bandh hin PHED, Electricity, Medical, sakhuona thil, funeral programme le inchukna in hai huomsa naw ni a. Amiruokchu, hienghai ti lo democratic movement/bandh bawsetu hai chunga ieng thil khawm tlung sien a maw an nin phur an tih tiin UNC chun an hril. Bandh hi Manipura Tribal hai chu thlawp seng dingin an ngen bawk.
Sangai Festivalah High Commissions 15
Imphal: November 2130, 2015 inkar sunga Manipur Sangai Festival2015 hung um dinga hin thenum rambung Nepal, Bhutan, Myanmar le Cambodia hai thangin South East Asia rambung haia Ambassadors le High Commission 15 hai khawm an hung thang ding niin O. Nabakishore, Chief Secretary, Manipur in zanita Old Secretariat Hall, Babupara hmuna chanchinbumihai an hmupui huna a hril. Festival tan ni a inthawk mi 800 chuong theina Golden Myanmar vuongna pahni bakah Mandalay to Imphal le Imphal to Mandalay inkarah Nov. 22, 2015 a inthawk flight a um ding thu O. Nabakishore chun a hril. Hi Festival huna stalls hawng nuom hai ta dingin Online Registration service hawng a nih tiin a hril bawk.
Tur dawnin ama le ama an that
Imphal: Pasal nei hlim Moirangthem Ningol Chanam ongbi Robiya (21) w/o Ch. James (22) of Sabungkhok Maning Leikai chu zani hmasa zantieng khan tur dawnin ama le ama an that niin Police thusuok chun a hril. Robiya le Ch. James hai hi thla 4 vel chau lan nei nia hril a nih. Mipui lungsen han zani zingkar 10AM khan a pasal in an suksiet pek. Robiya ruong hi JNIMS ah postmortem thaw dinga sie a nih.
Viva Voce sukchawl dingin Governor in Order
Imphal: Manipur Police Constables (Male/civil ) post 2000 lakna ding le inzawma written test a hlawtling hai ta dinga Viva Voce nei mek chu thuthar um nawk hmakhat la sukchawl dingin Manipur Governor in October 19, 2015 khan Order an suo. Selection thaw danah thil indiklo a um tia sawiselna tam tak sawrkarin a dawng leia Governor in order an suo niin ei thu dawngna chun a hril.
KPLF/KPLA in Economic blockade thaw an tum
Imphal: Kuki People Liberation Front/Army (KPLF/KPLA) chun Manipur Assembly in August 31, 2015 nia bills 3 a passed dodalna leia tribal martyrs 9 hai chungthuah October 21, 2015 zanrila inthawk October 31, 2015 inkar sungin National Highways haiah Economic blockade an thaw thum le hi hun sunga sawrkarin iengkhawm thaw naw chun November 2, 2015 a inthawk tiemchin um lovin economic blockade an thaw ding thu an hril. Chun, Kuki MLA hai October 31, 2015 chena inban vawng dingin an phut a, an inban naw leia thil ditumlo a tlung chun a maw annin phur an tih tiin KPLF/KPLA thusuok chun a hril.
Admit Card Oct. 22 a inthawk
Imphal: Manipura Government Colleges haia Assistant Professor 280 lakna ding le inzawma direct recruitment nei dinga Screening Test Admit Card chu October 22, 2015 a inthawk lak thei ni dingin ei thu dawngna chun a hril. A hma chun Oct. 20, 2015 a inthawka lak thei dinga ti a nih.
BSF han Heroin kg. 10 le Pistol 4 an man
Ferozpur: Border Security Forces chun zani hmasa khan Punjaba Ferozpur district, Pakistan le India ramri lai Heroin kg. 10 le Pistol 4 bakah a mu 95 an man. Pakistana inthawka hung lut smugglers hai le an inkaptuo hnunga hieng thil hai hi an man a nih. Inkaptuona hmuna hin Pakistan Mobile SIM Card pahni le Mobile phone pahni an dapdawk bawk. Tulai hnai el khawm khan Amritsar le Ferozpur haiah BSF han Heroin an lo man ta bawk. Tukum sunga Punjab border district laia BSF han Heroin an man chu kg. 260, international market rateah Rs. 1300 crore manhu a tling tah bakah silai 13 le silaimu 200 an man ta bawk.
Kum 6 sung ramdangmi 598 man
Aizawl: Mizoram Home Ministr R. Lalzirliana chun, kum 6 liemta sung khan ramri (international border) kana dan lova Mizorama hung lut ramdang mi 598 man an nih tiin zaanikhan Mizoram Assemblyah a hril. Thil tul hai sukfel zoin an ram tieng chita thawnkir an ni tah tiin a hril. Kum 2010 khan ramdang mi 228 man an ni a, tukum ruok chu August thla chen khan 13 chau man an la nih tiin a hril. Chun, thla 6 liemta sung khan ILP nei loa Mizorama lut nontribals 5,305 man an nih tiin a hril bawk.
Army personnel ama le ama an that
Jamshedpur: Zanikhan West Singhbhum district mi Army personnel Ramvilas Jarika chu a dutyna hmuna a silai chawi Insas Rifle hmangin ama le ama an kap hlum. Ramvilas Jarika hi SeraikelaKharswam district Deputy Commissioner officea duty niin district SP Indrajeet Mahatha chun a hril. Ama le ama inkap a tum lai hi a ruol hai khawmin an hmu a, thaw lo dingin an ngen a, sienkhawm fehmang dingin a lo ti tawl a, an fe hmang naw chun kap el dingin a vau tawl nia hril a nih.
Zu thalo dawn leiin mi 3 an thi
Kanpur: Zanikhan Ghatampur hmuna zu thalo dawn leiin mi pathum an thi. Zu thalo dawn leia thi hai chu Dhanpal, Bijender le Gokul hai an nih. Hieng mi pathum hai hi October 18, 2015 nia Panchayat election nei zova bufak khawmnaa va thang, in an hung tlung huna an inluok a, chu hnungin an hung thi el nia hril a nih. An zu dawn leia thi ni ngei dinga ring an nih.
------------------------------------------------
VAWISUN THUPUI
Lalpa chu thikthusie Pathien le phuba lak hmang a nih; Lalpa chun phuba a lak a, lunginsennain a sip a nih. Lalpa chun ama dotuhai chungah phuba a lak a, a hmelmahai ta ding chun lunginsenna an khawlkhawm a nih. Mika 1:2
Editorial
Thiltha a suok ding chun chân nei phawt a ngai
Pathienin a nauhai suola thi ding a hmangai luot leia a naupa nei sun misuol hai sandam dinga khawvela a hung tir ang bawk hin mihriem han ei thil dit le ei mamaw hai ei hmu theina dingin iemani tak chân ei nei phawt a ngai hlak. Ei thil dit hmu le chang theina dinga ei chân ding chu inang vawng kher naw nih. Nu le pa han nau lekhathiem ei dit leiin sum le pai tam tak, tam tak lem chun ei nei bak sengin ei chan hlak. Chân sawng dinga ei seng ruok chu a ninaw a, thiltha lem beiseina leia chân inhuom ei ni lem hlak.
Tribal movement annawleh Peoples Movement ei fepui mek a, hi le inzawm hin mi 9 zetin hringna an chân ta a, hringna pakhat hman hi a hlut em em veileh 9 zetin ei movement leia hringna an hang chân el hi a pawi a, ei thil dit le thil ngenah ei hlawsam vai chun ei chân ropui hle ding bakah ei hmakhuo an thim hle ding a nih. Mipui tieng chun hringna chau ni lovin tha le zung, sum le pai khawm ei sengin ei chân tawk thawkkhat ta hlein an lang a, ei thaw ding awm khawm ei thaw a, thaw pei ei lan huom bawk nia an lang leiin lawm a um.
Ei thil ngen le dit hmuna dingin iengchen am ei la fe ding hriet a la ninaw leiin, ienganga chânna le harsatna am ei la tuok pei ding hriet a ninaw bawk. Ei himna ding bakah thang la hung thar pei ding han an mi mawsiet nawna ding le an ta dinga thiltha iemani bek suolsuok pek ei nuom takzet a ni chun iengang harsatna khawm hmasawn dinga ei inhuom a tul ding a nih. Tukhawm hin Kuki People Liberation Front/Army (KPLF/KPLA) chun Manipur Assembly in AntiTribal Bills 3 a passed dodalna le hieng bills hai dodalnaa security forces hai chetna leia mi 9 zet (tribal martyrs) in hringna an chan demna le dodalnain October 2131, 2015 sung National Highways haia Economic blockade thaw dingin an puong bakah hi hun sunga sawrkarin hieng bill 3 hai chunga hma a lak naw chun tiemchin um lova economic blockade an thaw ding thu an puong a nih.
Economic Blockade hi hrat taka thaw a lo ni chun fak le dawn le nitin mamaw haiah nasa takin harsatna ei tuok ding a ni a, chuong harsatna hai khawm tuok le hmasawn ngam dinga ei inpuocha a tul ding niin an lang. Economic Blockade le Bandh ti hai hi ei thlawp a, tha ei ti takpa chu a ni nawh. Amiruokchu, sawrkar na verna ding le ei thil ngen hai sawrkarin a ngaisak zuol lem theina ding a ni chun ei la hung thaw pei khawm a tul el thei. Inthuruolna khelah ei thil ngen hmuna ding thua chân ei ngam danin thu a la hung phur hle ding a nih.
Hieng laizing hin mipui aiaw dinga thlang lal hai chun mipui le ram neka an phingpui hmakhuo an ngai lem lei am, annawleh chân inlaunain an lungril a la hluo lien lei hriet a ninaw a, lungtum ang hlawla an lan tung el hin ngaituona a suksei hle. Mipuiin movement ei fepui mek hi hnam thuoitu, a politician le a cian naw leh intimna nei der loin thlawp inla chu tuta nek hin ei hmalakna a hrat lem ding vei tliet leh, Lungtum ang ela an lungril a la ngar hi chu tlangmi hai ei vangduoina a nih.
Chun, ei movement fe meka mipuiin an lungsen hrittlakna dinga hotu hai chunga chetna an lo nei a ni khawmin lungsen le a kawi zawnga chet nekin mani inennawnna in hmang hai sienla nuom a um. Chu chu mipuitling hai nunzie a nih. Tu chena ei thil tawng haia inthawk khawm hin hnam thuoitu, kutchawi nei hai le ei politician hai ta ding chun mani inenfiena ding le insiemthatna ding tam tak a um tah. Hieng khawma ei harsuok naw a ni chun mi lungsietum tak ning ei ta, ei tawpna chu ropui naw hleng a tih. Mipui lungsen puokdar natzie chu tulai khawvela middle east rambung tum tuma thil tlung haia inthawk khawma hriet thei a nih. Ram thuoitu le hotu ropui tak tak, nuom chena an du le an dit dit neia nuom tawl hai khawm, an chunga mipui lungsenna a tlung meu chun sipai thahratna khawmin a dang zonaw zie ei hriet. Hiengang thil a tlung nawna dingin ei hotu, thuoitu le politicians han ei thil tuok mek hi inngaituona le inennawnna huntha in hmang hai sienla nuom a um takzet. Suol thup bo sawng thei a ninaw zie dam!
Mani le mani inngaihlutna annawleh inngaisangna sap han ‘ego’ ei ti hi thil ropui le tha takel a ni a, a thatna chin lo um hlak sienkhawm a hun le hmun a um a, tulaia ei movement fepui mek laia ding chun kei ka nih in ti thei chin, hotu, thuoitu le a tu el khawm hin ei peihmang a tul. Hmang lona ding huna ei hmang chun ei ta dinga thina, ei ram le hnam ta dinga bohmangna intlun thei thil a ni tlat.
